KJOAʼMIYA XI CHOTʼAYA 34
Nʼio chjíle jmeni xi nʼia nga jngó jngoá ya jinjtín
“Josʼin nga je yaoná tojngoní, nda tsa nkjín jko̱ya tjínle xi tjíokjaotʼani, tonga ngayije jko̱yale yaoná, nda tsa nkjín mani, tojngo yao ma, tikʼoasʼinni Cristo” (1 COR. 12:12).
KJOAJNDA 101 Jtín sʼin si̱xálee Niná ngatsʼiaa
XI TÍNCHJA̱NI *
1. Jmé kjoanda xi tjínná nga jngó jngoá.
NʼIO tse kjoanda tjínná nga ya naxinandále Jeobá tiyojiaan. Tsjoa tjío tokoán nga nda tiyoaa kʼoa jtín tiyoaa kao ndsʼee. Jmé xá xi kjinená nga jngó jngoá ya jinjtín.
2. Jmé xi bakóyaná je choa̱ xi kisichjén Pablo tojosʼin faʼaitʼa kʼa xo̱n xi kiski.
2 Tʼatsʼe jme xi kjinená nga jngó jngoá yaa bakóyaná je choa̱ xi kisichjén Pablo josʼin faʼaitʼa kʼa xo̱n xi kiski. Kʼoakitso nga je jtín yaa mangósonkao je yaoná, kʼoa jmeni xi tjínle yaoná yaa mangóson je ndsʼee xi tjío ya jinjtín (Rom. 12:4-8; 1 Cor. 12:12-27; Efes. 4:16).
3. Jñánile xi jan koya chótʼayajiaan i̱ kjoaʼmiya jebi.
3 Nʼio chjíle jmeni xi nʼia nga jngó jngoá ya jinjtín. Ngatsʼiaa koaanná si̱nʼiojiaan je ndsʼee kao tichjaa. Koaan kʼoasʼiaan tojñani tsaan, tojñani kitjenñá, ni tjínná tao̱n kʼoa ni tsínná, ni maná xo̱n kʼoa ni mai. I̱ kjoaʼmiya jebi jan koya tjínni xi chótʼayajiaan xi nʼio tjínle kjoandosin tʼatsʼe choa̱ xi kisichjén Pablo. Xi títjon, kui jchaa nga nʼio chjíle jmeni xi nʼia nga jngó jngoá ya jinjtín. Xi majaoni, kui chótʼayajiaan jmé xi tjínnele sʼiaan tsa kʼoasʼin nikjaʼaitsjeen nga tsín chjíle jmeni xi nʼia ya jinjtín. Xi majanni, kui jchaa ánni machjénsíni nga kui ngisa kʼoailee kjoandosin je xá xi tíbánená Jeobá.
NʼIO CHJÍLE JMENI XI NʼIA NGA JNGÓ JNGOÁ YA JINJTÍN
4. Jmé xi bakóyaná jmeni xi tso Romanos 12:4, 5.
4 Je xi títjon koya xi bakóyaná je choa̱ xi kisichjén Pablo kuinga nʼio chjíle jmeni xi nʼia nga jngó jngoá ya jinjtín. Je Pablo i kitso: “Josʼin kjoan yaoná nga nkjín jko̱ya tjínle, tonga ngayije jko̱yale yaoná ali tojngojin xá tjínle xi tongóson. Kʼoasʼin xi totʼatsʼe Cristo tojngo yao nía, nda tsa nkjín manía, tonga ngatsʼiaa nga jngójngoá xínkjín mani yaoná” (Rom. 12:4, 5). Kui xi kitsonile Pablo nga nʼio chjí bekonná Niná nga jngó jngoá ninga kjaʼaí kjaʼaí xá tjínná ya jinjtín.
Nʼio chjíle jmeni xi nʼia nga jngó jngoá ninga tsen tsen tjínná xá ya jinjtín (Chótsenlai párrafo 5-12) *
5. Jmé “kjoatjao” xi títsjoále Jeobá je jtín.
5 Kʼianga je nikjaʼaitsjeen xi xá tjínle, tsakui nichxin je fiyaa jkoaa je xi bándiaa ya jinjtín (1 Tes. 5:12; Heb. 13:17). Je Biblia kʼoatso nga jé Jesús tísíchjén Jeobá nga títsjoále “kjoatjao chjotasonʼnde”, xi tsonile, je ndsʼee xi bándiaaná (Efes. 4:8). Je ndsʼee jebi yaa maxki̱kao je Cuerpo Gobernante kao xi ya binyakao, Comité xi tsʼe Sucursal, superintendente xi tsʼe circuito, ndsʼee xi tsoya skuela xi satío jinnaxinandále Niná, xi chjotajchínga sʼin tjío kao siervo ministerial. Ngatsʼi ndsʼee jebi kao nganʼiotsjele Niná kitjoejinni nga sikuinda je choʼndale Niná kʼoa nga tsjoánganʼiole je jtín (1 Ped. 5:2, 3).
6. Tojo tso 1 Tesalonicenses 2:6-8, jméni xi sʼín je ndsʼee xi kao nganʼiotsjele Niná kitjoejinni.
6 Kao nganʼiotsjele Niná tjoejinni je ndsʼee nga kuitjosonle je xá xi tjín ya jinjtín. Machjénná ngayeje xi tjínle yaoná ningalani kjaʼaí kjaʼaísʼin síxá, jolani je ndsaa, je ndso̱koaa kao xi kjaʼaísanile, tikʼoasʼinni je ndsʼee xi xá kjinele, binyakao je jtín ninga kjaʼaí kjaʼaí xá sʼín. Alikui yaole bʼasjengʼa, tosaa bʼénele yaole nga sínʼiojin je ndsʼee kʼoa tsjoánganʼiole (tʼexkiai 1 Tesalonicenses 2:6-8). * Bʼailee kjoanda Jeobá nga tjío je ndsʼee ya jinjtín xi binyakaoná kʼoa xi tsín to yaole fini.
7. Jmé kjoanichikontʼain sokóle je precursor kao misionero.
7 Tsakui nichxin ya jtín jñani mangián tjío xi misionero sʼin tjíosíxá, xi precursor especial kʼoa tsa precursor regular sʼin tjíosíxá. Jngo tjíjtsa Sonʼnde tjío je ndsʼee kao tichjaa xi ñaki tokui xá tjíosʼín nga tsoyason kʼoa nga tsoyale Biblia chjota. Nga kʼoatjíosʼín nkjín chjota tjíobinyakao nga chjotale Cristo kjima. Ningalani me tongatsʼi ndsʼee jebi nga tsín tse tao̱n tjínle, tonga nʼio síchikontʼain Jeobá (Mar. 10:29, 30). Nʼio tsjoa satío tokoán nga tjío je ndsʼee xi kʼoasʼin tjíosíxále Niná ya jinjtín.
8. Ánni nga nʼio chjí bekonni Jeobá nga jngó jngó xi jetsoyason.
8 Ali tsa tojejin ndsʼee xi xá kjinele kao xi ñaki to xále Niná tjíosʼín xi chjíle jmeni xi sʼín ya jinjtín. Ngatsʼi xi tsoyason nʼio chjí be je Jeobá kao je jtín (Rom. 10:15; 1 Cor. 3:6-9). Nga̱ je xá xi kjinele xi tjío jinjtín kuinga chjotatjenngile Cristo sikao je chjota (Mat. 28:19, 20; 1 Tim. 2:4). Ngatsʼi xi jetsoyason, ni jekisʼenngindá kʼoa ni mai, kui ngisa tsjoále kjoandosin nga tsoyason (Mat. 24:14).
9. Ánni nga nʼio chjí ʼyatokonñá je tichjaa.
9 Je Jeobá kʼoati nʼio chjíle je xá xi tsjoále tichjaa ya jinjtín. Je Jeobá nʼio chjí be je tichjaa xi kixi tjíofitʼale, jolani xi jechixan, xi na̱ ma, xi yánchjínkʼan kʼoa kao xi tjíotoje. Ya Biblia nkjín yánchjín síkʼaxki̱ xi nda kisixále Niná, xi chjine koan, xi kisʼele kjoamakjain, xi kao kjoatsjoa kisixá, xi nʼiojin koan, xi nda chjota koan kʼoa xi kui kʼoakisʼin xi ndatjín (Luc. 8:2, 3; Hech. 16:14, 15; Rom. 16:3, 6; Filip. 4:3; Heb. 11:11, 31, 35). Nʼio bʼailee kjoanda je Jeobá nga tjío tichjaa xi kʼoati sʼín ya jinjtín.
10. Ánni nga chjí ʼyatokonñá je ndsʼee xi jekoanjchínga.
10 Kʼoati tse kjoanda tjínná nga kʼoati tjío je ndsʼee xi jekoanjchínga. Tjínkʼa xi jenʼio kjoatse tjíosíxále Jeobá kʼoa xi tosi tonda kixi tjíofitʼale. Kʼoa tjínkʼa xi sʼa choatsele nga tsabe je Énle Niná. Nkjín ndsʼee jebi xi chʼin bʼetʼale nga jekjimajchínga kʼoa tsín tichókjoanile nga tsjoánganʼio ya jinjtín kʼoa nga tsoyason. Ninga kʼoalani, tosi tonda tsoyason jokji tjen kʼoamale, sínʼiojin xi kjaʼaí kʼoa tsoyale xá. Nʼio binyakaoná je kjoafaʼaitsjen xi tjínle ndsʼee jebi. Alikui jao tjín tokoán nga bechjí Jeobá kʼoa kʼoati chjí ʼyatokoán tsanda ñá (Prov. 16:31).
11, 12. Jósʼin basenkaoli choa̱le je xi sʼa xti xi tjío ya jinjtín.
11 Kʼoa je xi sʼa xti, tsee kjoa faʼatojin nga sʼa kjimajchínga nga̱ kui bʼetʼale je kjoafaʼaitsjen xi tjín sonʼnde xi je Na̱i kaníbason (1 Juan 5:19). Nʼio tsjoa satío tokoán nga tsjoá je énle ya jinjtín, nga tsoyason, kʼoa nga sítoánntjai jmeni xi makjainle. Jon xi sʼa xtio, nʼio chjíle jmeni xi nʼiao (Sal. 8:2).
12 Tjínkʼa je ndsʼee kao tichjaa xi kʼoasʼin síkjaʼaitsjen nga tsín chjíle jmeni xi sʼín ya jinjtín. Kataʼyala jmé xi kuinyakaoná nga tsín jao sa̱tío tokoán nga nʼio chjíle jmeni xi nʼia.
ALIKUI JAO KʼOÉ TOKOÁN NGA NʼIO CHJÍLE JMENI XI NʼIA YA JINJTÍN
13, 14. Ánni nga kʼoasʼin síkjaʼaitsjen kʼani nga tsín chjíle jmeni xi sʼín ya jinjtín.
13 Kataʼyala xi majaoni koya xi bakóyaná je choa̱ xi kisichjén Pablo. Kui kinchja̱ni nga tjínkʼa xi kʼoasʼin síkjaʼaitsjen nga tsín chjíle jmeni xi sʼín ya jinjtín. I kitso: “Tsa je ndso̱ko̱ kuitso: Ali anjian ndsa̱, kui nga li tsʼe yaobejian. Ali tokui nga tsín tsa tsʼe koa̱nni yaobe. Kʼoa tsa xo̱ño kuitso: Ali anjian xko̱n, kui nga li tsʼe yaobejian. Ali tokui nga tsín tsʼe koa̱nni yaobe” (1 Cor. 12:15, 16). Jmé xi bakóyaná jmeni xi kitso Pablo.
14 Tsakui si̱ngósonkoaa jmeni xi nʼia kao jme xi sʼín je ndsʼee ya jinjtín, alikuijin jchaa jokji chjíle jmeni xi nʼia. Tjínkʼa xi nʼio nda tsoya, tjínkʼa xi nda male bʼéndajin josʼin maxá ya jinjtín, kʼoa tjínkʼa xi nʼio be josʼin sínʼiojin je ndsʼee. Tsakui nichxin kʼoasʼin nikjaʼaitsjeen nga tsín maná ñá kʼoanʼia josʼín je. Kʼoasʼin bakoñá nga nangitokon maa (Filip. 2:3). Tonga tsa toje ndsʼee si̱ngósonkao ʼndeʼndee yaoná chanjin kjuinroajen tokoán. Tojo kitso Pablo, chanjin kʼoasʼin si̱kjaʼaitsjeen nga tsín josʼin bʼainganʼioá ya jinjtín. Jmé xi kuinyakaoná nga tsín kʼoasʼin si̱kjaʼaitsjeen.
15. Tojo tso 1 Corintios 12:4-11, jméni xi kuenta sʼiaan tojmeni xi maná nʼia.
15 Tjínkʼa je chjotale Cristo xi tsakatio nga siglo 1 xi kjaʼaí kjaʼaí kjoatjao kitsjoale Jeobá (tʼexkiai 1 Corintios 12:4-11). * Ningalani kjaʼaí kjaʼaí kjoatjao tsakʼaile, nʼio chjíle jmeni xi kisʼin nga jngó jngó. Tikʼoasʼinni ndʼaibi, ningalani tsín tikui kjoatjao tsjoániná ndʼaibi je nganʼiotsje, je Jeobá nʼio chjí bekonná ngatsʼiaa ninga kjaʼaí kjaʼaínile xi maná nʼia.
16. Jmé kjoafaʼaitsjen kitsjoa Pablo xi tjínnele kjuintjenngiaa.
16 ʼNdele nga je ndsʼee si̱ngósonkoaa yaoná, tosa kui kjuintjenngiaa je kjoafaʼaitsjen xi kitsjoa pastro Pablo, nga kitso: “Kʼoasʼin jngójngó katakotʼa xi titsʼeni xá. Kʼiaa sʼe̱le kjoajeya xi totʼatsʼe xáleʼni. Ali totʼatsʼe xále xikʼajin bʼasjejeyani yaole” (Gál. 6:4).
17. Jósʼin koasenkaoná tsa kjuintjenngiaa je kjoafaʼaitsjen xi kitsjoa Pablo.
17 Tsa kjuintjenngiaa je kjoafaʼaitsjen xi kitsjoa Pablo kʼoa tsa kuenta sʼiaan jme xi nʼia, jchañá nga tjín jmeni xi maná nʼia xi tsín kʼoasʼín xi kjaʼaí. Tobʼelañá, tsakui nichxin jngo xi chjotajchínga sʼin tíjna tsín nanda male tsjoá kjoanokjoaya, tonga nʼio nda tsoyason. Tsakui nichxin tsín nanda male bʼéndajin je xá xi sʼe ya jinjtín, tonga tsakui nichxin je ngisa básjai ndsʼee kʼianga síjéle kjoafaʼaitsjen nga̱ nʼio ndʼé. Kʼoa tsa kʼoasʼin ʼyaleje̱ nga nʼio nda chjota (Heb. 13:2, 16). Kʼianga kuenta sʼiaan jmeni xi maná nʼia tsjoa sa̱tío tokoán josʼin bʼainganʼioá ya jinjtín. Kʼoa alikuijin koa̱nxinkonchá je ndsʼee tʼatsʼe jmeni xi male sʼín.
18. Jmé xi sʼiaan nga ngisasa nda koa̱nná kʼuínyasoán.
18 Tojme xá xi kjinená ya jinjtín, tjínnele sa nda sa nda koa̱nná kʼuínyasoán je Énle Niná. Kʼianga tsoyaná Jeobá, jé naxinandále síchjén. Tobʼelañá, kʼianga satíoná je kjoajtín nga jinle xomana sakóyaná jósʼin nga ngisasa nda kʼuínyasoán. A tinichjénñá je kjoafaʼaitsjen xi bʼainá nga satíoná kjoajtín jebi.
19. Jósʼiaan nga koa̱n kjuian je Skuela xi síchjine je xi bakóyason tʼatsʼe Chjotaxále Niná.
19 Jñani kʼoati nʼio nda sakóyaná yaa Skuela xi síchjine je xi bakóyason tʼatsʼe Chjotaxále Niná. Koaan koai skuela jebi je ndsʼee kao tichjaa xi ñaki to xále Niná tjíosʼín, xi 23 nóle saʼnda xi 65 nóle. A kʼoasʼin nikjaʼaitsjeen nga tsínkʼia kʼoakoa̱nná ñá nga kjuian skuela jebi. ʼNdele nga kui si̱kjaʼaitsjeen ánni nga tsín koa̱n kjuinñá, tosa kui si̱kjaʼaitsjeen ánni nga meniná kjuian skuela jebi. Kʼoa xijekoa̱n, kui si̱kjaʼaitsjeen jmeni xi koa̱n sʼiaan nga koa̱n koanngián. Machjén nga kʼoénelee yaoná kʼoa kʼoati koasenkaoná je Jeobá nga koa̱n kjuian skuela jebi.
KʼOASʼIN SI̱CHJÉN JMENI XI MANÁ NʼIA NGA KUINYAKOAA JE NDSʼEE
20. Jmé xi bakóyaná jotso Romanos 12:6-8.
20 Xi majanni koya xi bakóyaná je choa̱ xi kisichjén Pablo yaa faʼaitʼa ya Romanos 12:6-8 * (tʼexkiai). Kui síkʼaxki̱ ijngokʼa nga tsín tongóson jmeni xi maná nʼia. Tonga kʼoakitso Pablo nga kʼoasʼin si̱chjén jmeni xi maná nʼia nga jngó jngoá nga si̱nʼiojiaan kʼoa kʼoainganʼiolee je ndsʼee.
21, 22. Jmé xi bakóyaná jokoan je Robert kao Felice.
21 Kataʼyala jokoan je Robert, * jngo xi chjotajchínga sʼin tíjna. Xin naxinandá kitsjoánganʼio, kʼoa xijekoan, yaa Betel xi tíjna naxinandále kinikasén. Ninga kʼoatsakʼinle nga tsín tsakui tínikʼantjaiyani tsa chʼao kisʼin, i kitso: “Nkjín sá nga tsín nda kisʼe tokoan nga̱ kʼoasʼin kisikjaʼaitsjen nga tsín nda kisitjosoan je xá xi kisʼenena. Sakʼoaa kʼoasʼin kisikjaʼaitsjen nga ngisa nda nga kuitjoa ya Betel”. Je xi tsakasenkao nga tsjoa kisʼe ijngokʼani kon, kʼiaa nga tsakjákaonajmí jngo xi chjotajchínga sʼin tíjna, kʼoakitsole nga machjénná nga maskanni jmeni xi tsoyaná je Jeobá nga títjon. Je Robert koanjinle nga tsín tokui kuenta sʼin josʼin kisixále Niná jñani kinikasén nga títjon, nga tosa kui ngisa tsjoále kjoandosin josʼin tísíxále Niná ndʼaibi.
22 Me kʼoati kisʼe kon je ndsʼee Felice Epíscopo. Je ndsʼee jebi kao chjoónle kʼiaa jetʼale je Skuela xi tsʼe Galaad nga nó 1956, kʼoa superintendente xi tsʼe circuito sʼin tsakʼejna ya Bolivia. Je chjoónle ʼndí kisʼele kʼianga nó 1964. Je Felice itso: “Ñʼai koannajin nga kinikʼéjnaijin josʼin kinixálaijin Jeobá. Ñanó nga tokui tsakʼejinkon ʼndeʼnde. Tonga jé Jeobá tsakasenkaona nga tsín tikʼoasʼin kisikjaʼaitsjenña, kʼoa kui ngisa kuenta kisʼian je xá xi kjinena nga nʼai ma”. A kʼoati satío tokoán joni Robert kao Felice. A tínroajen tokoán tsa tsín tikʼoasʼin tinixánilee Niná josʼin kinixálee ngasʼa. Tsa kʼoalani kjimaa, tsjoa sa̱tío tokoán tsakui ngisa kuenta sʼiaan josʼin koa̱n si̱xálee Niná ndʼaibi kʼoa josʼin koa̱n kuinyakoaa je ndsʼee. Tosi tonda si̱xálee Niná kʼoa kʼoasʼin si̱chjén jmeni xi maná nʼia nga kuinyakoaa xi kjaʼaí. Kʼoati tsjoa sa̱tío tokoán kʼianga si̱nʼiojiaan je ndsʼee.
23. 1) Jméni xi si̱kʼayalee nichxinná. 2) Jmé xi chótʼayajiaan ya kjoaʼmiya xi ijngo.
23 Nʼio chjí bená nga jngó jngoá je Jeobá. Kui xi mele nga kʼoakʼoé tokoán nga familiale maa. Tsa si̱kʼayaa nichxin nga si̱kjaʼaitsjenjiaan josʼin si̱nʼiojiaan je ndsʼee kʼoa tsa kuinyakao kjoaixiaa, jchañá nga nʼio chjíle jmeni xi nʼia ya jinjtín. Jósʼin ʼyatokoán xi ngikʼa. Jósʼin koakoá nga chjí ʼyatokoán. Yaa kjoaʼmiya xi ijngo chótʼayajiaan xi tʼatsʼe jebi.
KJOAJNDA 24 Tangínmiaa ya nindole Jeobá
^ párr. 5 Ngatsʼiñá nga mená kʼoakʼoé tokoán nga chjí bekonná je Jeobá. Tsakui nichxin kui nikjaʼaitsjeen jósʼiaan nga chjí skoe̱konná je Jeobá. I̱ kjoaʼmiya jebi kui chótʼayajiaan nga nʼio chjíle jmeni xi nʼia nga jngó jngoá ya jinjtín.
^ párr. 6 1 Tesalonicenses 2:6-8: “Ali tsa je kjoajeyale chjota tsakijnyisjaijin, nitsaonjion, nitoʼyajinsa xi tsʼe, nda tsa koannajin nga jon kinichʼánelaijin, nga̱ pastrole Cristo níjin. 7 Tosa koanʼindajinjin kao jon, joni tsa jngo na̱ xi síkaki, xi kjoétjao ʼndíle. 8 Kʼoasʼin tonʼio tjaochalaijin, nga menajin nga kʼoailaijin ali tsa toje énnda tʼatsʼe Niná, saʼnda menajin kʼoailaijin ni̱ma̱najin. Kjaínga tjaocha koanlaijin”.
^ párr. 15 1 Corintios 12:4-11: “Tonga tjín josʼin bʼabí kjoatjao, tonga tijeni Espíritu. 5 Kʼoa tjín josʼin bʼabí xá, tonga tijeni Nainá. 6 Kʼoa tjín josʼin bʼabí nganʼiole xá, tonga tijeni Niná xi kʼoasʼin síxájinle ngatsʼi chjota ngayije kui kjoabi. 7 Tonga nga jngójngó kʼoasʼin bʼaile nga sikʼatsen je Espíritu Santo, jméni nga kʼoasʼin nda koatiosíni ngatsʼi. 8 Xi kjoakixi, totʼatsʼe je Espíritu Santo bʼaile jngo chjota én xi tsʼe kjoafaʼaitsjen xi nda tjín, kʼoa ngijngo én xi tsʼe kjoachjine, josʼin nga tijeni Espíritu Santo tsjoá. 9 Kʼoa totʼatsʼe tijeni Espíritu Santo bʼaile xi ngijngo nga makjainle, kʼoa ngijngo, je kjoatjaobe nga male sínda totʼatsʼe tijeni Espíritu Santo. 10 Kʼoa ngijngo, bʼaile nganʼio xi male síxájin kjoaxkón. Kʼoa ngijngo, nga nʼio nda nchja̱ya. Kʼoa ngijngo, nga male kotʼajin espíritu. Kʼoa ngijngo, nga kjaʼaí én male nchja̱. Kʼoa ngijngo, nga male síkʼatoya én. 11 Tonga tojngo, xi tijeni Espíritu Santo, kʼoasʼin síxájin ngayije kjoabi, nga síkʼabíle nga jngójngó ngatsʼi xi titsʼeni kjoatjao, josʼin mele nga je”.
^ párr. 20 Romanos 12:6-8: “Kʼoasʼin kjaʼaíngá kjoan kjoatjaole Espíritu Santo xi tjínle nga jngójngó. Josʼin kitsʼaile kjoandale, kʼoasʼin katasíchjén. Tsa kjoatjaobe nga nchja̱yajinni, katasíchjén josʼin choa̱le nga makjainle, 7 axo tsa je kjoatjaobe nga síxá, katasíchjén josʼin bʼaile nga síxá, axo je xi bakóya, kʼoasʼin katasíchjén josʼin bʼaile nga bakóya. 8 Je xi bʼétʼain, katasíchjén josʼin bʼaile nga bʼétʼain. Je xi síkʼabí kjoatjao, kʼoakatasʼín kao kjoanda. Je xi ma ngʼajko̱le, nda katasíkuinda. Je xi mamake, kʼoakatasʼín kao kjoatsjoa”.
^ párr. 21 Alikui tsa ñaki kʼoaʼmi kʼa chjota xi bʼaxki̱ i̱bi.
^ párr. 65 XI TÍNCHJA̱NI SÉN XI FAʼAITʼA: Jan sén xi kui bakó jmeni xi ma nga kjesa fitsʼiajin je kjoajtín, nga jetísʼejna kʼoa nga jefetʼa. Sén xi títjon: Jngo xi chjotajchínga sʼin tíjna nda kjoeya je chjota xi bichó, jngo ndsʼee xi sʼa ti sonido tíbʼéjnanda kʼoa jngo tichjaa tífákaonajmí jngo tichjaa xi jejchínga. Sén xi majaoni: Je xi sʼa xti kao xi jejchínga kjomingʼa ntsja nga tsjoá énle nga tíchotʼaya je Xo̱n xi Bájinkonná. Sén xi majanni: Jngo ndsʼee kao chjoónle tjíosítsjee ya Ndʼia jña chotʼayá. Jngo tichjaa xi tíbasenkao tsotiʼndíle nga tao̱n tísíkʼatjenya ya kaxa̱. Jngo ndsʼee xi sa ti xi tísítsje jñani nya revista. Kʼoa jngo ndsʼee xi jngo tichjaa xi jekoanjchínga tífákaonajmí nga tísínʼiojin.
