1, 2. Jmé xi chótʼayajiaan i̱ kjoaʼmiya jebi.

SI̱KJAʼAITSJENLA tsa nʼio machjénná jmeni xi si̱kasénná, tonga tsa tsín ndi̱to̱n tífaʼai chanjin kui si̱kjaʼaitsjeen ánni kjibʼachxinnile. Kuinga i̱ tsoni ya Proverbios 13:12: “Je xi tsín ndi̱to̱n bitjoson tsjoáchʼinle ni̱ma̱ná”. Tonga tsa sʼe̱jinná ánni nga kjibʼachxinnile tsejtajin koaan kʼoa chóyajinlee saʼnda nga kjoaʼaí.

² I̱ kjoaʼmiya jebi nkjín kjoafaʼaitsjen xi faʼaitʼa Biblia jchaa xi koasenkaoná nga tosi tonda tsejta koaan (Miq. 7:7). Xijekoa̱n, jao koya tjínni xi jchaa kʼiáni machjén nga tsejta koaan kʼoa nga chóyaa nga je Jeobá koasenkaoná. Kʼoati chótʼayajiaan je kjoanichikontʼain xi sʼe̱le xi tsejta koa̱n.

3. Jmé kjoafaʼaitsjen xi tsjoáná Proverbios 13:11.

³ Ya Proverbios 13:11 jngo choa̱ faʼaitʼa xi bakóyaná nga nʼio chjíle nga tsejta maa. Itso: “Je kjoanyiná xi ngotjo sokóniná ngotjo feni, tonga je xi tochoa choa bʼexkoá sa tse sa tsee koa̱n”. Je texto jebi kui bakóyaná nga nʼio ndasʼin bichómani jmeni xi sʼín jngo chjota xi chjine nga̱ tsejta ma kʼoa nda kosonnile jmeni xi sʼín.

4. Jmé kjoafaʼaitsjen xi nroatʼa ya Proverbios 4:18.

⁴ Ya Proverbios 4:18 kʼoatso nga “je ndiaale chjotakixi kʼoasʼin mangóson joni tsa lʼíle tsʼuí nga sʼa maʼisen, sa isen sa iseen ma saʼnda nga machon isen isen”. Je én jebi kui bakóyaná nga je Jeobá tochoa choaa tsoyale je naxinandále jmeni xi tjínndajinle. Je texto jebi kʼoati basenkaoná  nga majinná joma jngo chjotale Cristo kʼianga síkʼantjaiya yaole kʼoa nga síchriantʼale je Jeobá. Nichxin tjenkao jebi nga̱ tsín tongotjo bʼantjaiyani jngo chjota. Tsa nʼio nda chótʼayajiaan je Biblia kʼoa si̱tjosoán je kjoafaʼaitsjen xi tsjoáná je Énle Niná kao naxinandále, sa tse sa tsee xi koa̱njinná, ngisaa nda chjénngilee jokjoan je Cristo kʼoa ngisaa nda jchaa je Niná. Kuila kataʼyaa je choa̱ xi kisikʼéjna je Jesús nga kitsoya xi tʼatsʼe jebi.

5. Jmé choa̱ xi kisichjén Jesús nga kitsoya nga nichxin tjenkao nga síkʼantjaiya yaole jokjoan jngo chjota.

⁵ Kʼianga kisikʼéjna choa̱ je Jesús, kui kisingósonkao je Énle Niná kao jngo na̱xi̱n. Tojo ma je na̱xi̱n nga tobijbi mangʼa kʼoati ma je Énle Niná ya jinni̱ma̱le jngo chjota xi mele skoe̱ tʼatsʼe Niná. I kitso je Jesús: “Je na̱xi̱n mantje, majchá, tonga likui be chjotabe [je xi bʼéntje] josʼin mani. Toya mantje jinnangi nga toje. Títjon bitjo je̱ʼe̱, kʼia ma nyo̱ti̱n, jaskan ma ni̱ji̱n” (Mar. 4:27, 28). Jmé xi kinchja̱ni je Jesús. Kui kitsoya nga je chjota xi nrʼoé Énle Niná kʼoati ma joma jngo na̱xi̱n kʼoa tsa jngo tocho nga tobijbi mangʼa. Tobʼelañá, yaa ʼyañá joma je chjota xi ʼmiyalee Biblia nga ʼyaa nga tobijbi síkʼantjaiya yaole kʼoa nga machriantʼale je Jeobá (Efes. 4:22-24). Tonga ʼyañá nga je Jeobá xosʼín nga kʼoama (1 Cor. 3:7).

6, 7. Jmé xi bakóyaná josʼin tsakʼénda Jeobá je Sonʼnde.

⁶ Kʼianga jmeni xi sʼín je Jeobá, alikui tsa xitso xiská kʼoasʼín. Kuinga kʼoasʼínni nga nda katabʼaxki̱ je jaʼaínle kʼoa nga koasenkao xi kjaʼaí. Kuila kataʼyaa jokisʼin nga tsakʼénda je Sonʼnde.

⁷ Je Biblia tsoyaná josʼin tsakʼénda Jeobá je Sonʼnde. Kʼoatso nga “tsakʼéchoya”, tsakʼéndaa “xjáoja̱ma̱le” kʼoa kisikʼéjnaa “la̱jao̱xingile” (Job 38:5, 6). Kʼoati tso je Biblia nga kisikʼaya nichxin je Jeobá nga kisikjaʼaitsjenjin je xále (Gén. 1:10, 12). A majinná jokisatio kon je ánkje nga tsabe jmeni xi kisinda je Jeobá. Nʼiojin  tsjoa kisatio kon, nga̱ je Biblia kʼoatso nga saʼnda kiskiʼndáxá nga tsakʼasjengʼa Niná (Job 38:7). Jebi kui bakóyaná nga nʼio nkjín jmi nó kisʼengile je Jeobá nga tsakʼénda je Sonʼnde, nga kisinda je niño kao ngatsʼi je xi tjíokon. Kʼoa kʼianga kiskotsenle Niná ngayeje jmeni xi tsakʼénda kʼoakitso “nga nʼio nda ngayeje” (Gén. 1:31).

8. Jmé xi chótʼayajiaan ndʼaibi.

⁸ Tojosʼin tiʼyaa, ya Biblia nkjín kjoafaʼaitsjen faʼaitʼa xi bakóyaná nga nʼio chjíle nga tsejta maa. Ndʼaibi, jaola koya kataʼyaa kʼiáni machjén nga tsejta koaan nga chóyaa nga je Jeobá koasenkaoná.

9. Kʼiáni machjén nga tsejta koaan nga chóyaa nga je Jeobá koasenkaoná.

⁹ Kʼianga kʼoasʼin nikjaʼaitsjeen nga tsín ndi̱to̱n basenkaoná je Jeobá nga bʼetsʼoalee. Kʼiatsa nganʼio nijélee je Jeobá nga ska̱ná je kjoa xi tjínná kʼoa tsa kʼoaʼmileeje̱ nga katabasenkaoná jñani ñʼai maná, tsakui nichxin kʼoasʼin nikjaʼaitsjeen nga tsín ndi̱to̱n basenkaoná. Ánni nga tsín tokjoan ʼya sakʼoañá josʼin basenkaoná je Jeobá kʼianga bʼetsʼoalee.

10. Kʼianga kʼoétsʼoalee je Jeobá, ánni machjénsíni nga tsejta koaan tsa tsín ndi̱to̱n koasenkaoná.

¹⁰ Nrʼoéná je Jeobá kʼianga bʼetsʼoalee (Sal. 65:2). Kʼoa nga kʼoanʼia kʼoasʼin bakonilee nga makjainná xi tʼatsʼe (Heb. 11:6). Je Jeobá kʼoati kuenta sʼínná tsa ñaki kʼoatjín tokoán nga kʼoasʼiaan jmeni xi ʼmilee kʼoa nga si̱tjosoán josʼin mele (1 Juan 3:22). Kʼiatsa kʼoaʼmilee je Jeobá nga katabasenkaoná nga tsín tikui kʼoasʼianñá xi tsín sasénle, machjén nga tsejta koaan kʼoa kʼoasʼiaan joʼmilee je Jeobá kʼianga bʼetsʼoalee. Tsakui nichxin kui kinchja̱ni je Jesús nga tsín tokjoan koasenkaoná je Niná kʼianga bʼetsʼoalee, nga kitso: “Tijáo, kʼoa kʼoaino. Tijnyísjao kʼoa koa̱nsjaino. Tikjanetʼao xo̱ntjoa, kʼoa tjóʼaino. Toʼyanibe xi síjé, bʼaile. Kʼoa je xi bajngisjai, masjaile. Kʼoa je xi síkjanetʼa xo̱ntjoa, tjóʼaile” (Mat. 7:7, 8). Tsa kʼoasʼiaan jokitso je Jesús kʼoa tsa kjitʼa kʼoétsʼoaa, ñaki sʼe̱jngo tokoán nga nrʼoéná je Niná nga bʼetsʼoalee kʼoa koasenkaoná (Col. 4:2).

11. Jósʼin basenkaoná Hebreos 4:16 kʼianga kʼoasʼin nikjaʼaitsjeen nga sakʼoa tsín ndi̱to̱n basenkaoná Niná kʼianga bʼetsʼoalee.

¹¹ Tsakui nichxin kʼoasʼin nikjaʼaitsjen sakʼoaa nga tsín ndi̱to̱n basenkaoná je Jeobá nga bʼetsʼoalee, tonga je Jeobá kʼoatsoná nga kʼiakjoan koasenkaoná kʼianga machjénná (tʼexkiai Hebreos 4:16). * Kuinga tsín koa̱n kʼoasʼin si̱kjaʼaitsjenñá nga tsín nda tísʼín je Jeobá tsa tsín kʼia basenkaoná kʼiani nga mená ñá. Tobʼelañá, nʼio nkjín mani xi jekjoatse nga kui tjíosíjéle Jeobá nga skoe̱ jósʼin je Chjotaxále nga kjoaʼaxin ngayeje xi chʼaotjín i̱ Sonʼnde. Je Jesús kʼoakitso nga kui si̱jé nga katabatéxoma je Chjotaxále Niná i̱ Sonʼnde (Mat. 6:10). Tsínjin nda sʼiaan tsa tsín tikoa̱nkjainniná xi tʼatsʼe Niná tokuini nga tsín kʼia tífetʼa jmeni xi chon sonʼnde kʼianga mená ñá (Hab. 2:3; Mat. 24:44). Xi ngisa ndatjín nga sʼiaan kuinga tosi tonda chóyalee je Jeobá saʼnda nga kjoaʼaxin jmeni xi chon sonʼnde. Kʼoa tsín jao kʼoé tokoán nga koasenkaoná kʼianga kʼoétsʼoalee. Je kjoafetʼa kʼiakjoán kjoaʼaí kʼianga choa̱le, nga̱ je Jeobá jetíjnachoa̱le je nichxin kao hora kʼiani kʼoakoa̱n.  Kʼoa koa̱njinná ngatsʼiaa nga ñaki kʼiakjoán choa̱le nga kʼoakoa̱n (Mat. 24:36; 2 Ped. 3:15).

12. Kʼiáni nga ngisa ñʼai koa̱nná nga tsejta koaan.

¹² Kʼianga tsín kixi tíjna jme xi matʼeen. Nichxin xi tiyoaa ndʼaibi, tjín chjota xi totaon be xi xʼin kao xi yánchjín, xi totʼatsʼe josʼin tsen yaole, jña kitjenni, josʼin ngale, jñani tsʼe kʼoa tsa tokuije̱ nga chʼin tjínle kʼoa tsa yo̱ma̱ kjoan yaole. Nkjín choʼndale Niná xi totaon tjíoʼya xi totʼatsʼe nga kui makjainle jmeni xi tso Biblia. Tsakui kjoa jebi tiyojiaan, si̱kjaʼaitsjenjiaan nga i̱ kitso je Jesús: “Je xi jchókjoale saʼnda nga kjoetʼani, jebi kuitjontjai” (Mat. 24:13). Kʼoa jósʼiaan tsakui sʼe̱jinná nga jngo ndsʼee xi ai jée kabajngi. Tsa jetjínjinle xi chjotajchínga sʼin tjío, a tsejta koaan kʼoa a kʼoéjngoñá tokoán nga kʼoasʼin kʼoendajin kjoa josʼin mele Jeobá. Jméni xi sʼin xi chjotajchínga sʼin tjío.

13. Jósʼin mele je Jeobá nga sʼe̱ndajin kjoa tsa jngo ndsʼee xi ai jée kabajngi.

¹³ Kʼianga sʼejinle xi chjotajchínga sʼin tjío nga ʼya xi ai jée kabajngi, jé Jeobá síjéle kjoachjine nga je katabándiaale nga kʼoasʼin kʼoendajin kjoa josʼin mele Jeobá (Sant. 3:17). Je xi chjotajchínga sʼin tjío kui xi mele nga koasenkao je xi jée kabajngi nga kʼoakatamanile je jéele (Sant. 5:19, 20). Kʼoati kui xi mele nga sikuinda je jtín kʼoa nga tsjoánganʼiole je xi aon tjío kon (2 Cor. 1:3, 4). Kʼianga sʼe̱jinle je xi chjotajchínga sʼin tjío nga jngo xi ai jée kabajngi, je xi títjon sʼin kuinga koasjaiya jokjoantjínni kjoa. Kʼoa nichxin tjenkao jebi. Xijekoa̱n, kʼoetsʼoa kʼoa kui Biblia sichjén nga ngasin nganda tsjoále kjoafaʼaitsjen je xi kabajngijée, kʼoa nga sikixiyanda josʼin bakinle (Jer. 30:11). Alikui nʼio tse sikʼachxin je xi chjotajchínga sʼin tjío nga kʼoendajin je kjoa, tonga kʼoati tsín koa̱n nga xitso xiská kʼoasʼin. Kʼianga kʼoasʼin fitjenngi je xi chjotajchínga sʼin tjío josʼin bándiaa je Jeobá, ndasʼin biyoaa ngatsʼiaa ya jinjtín. Ninga kʼoalani, tsakui nichxin tíjna ʼyani xi tojo aon tjín kon. Tsa ñálani xi kʼoatjín tokoán, jméni xi sʼiaan nga nda sʼe̱ ijngokʼani tokoán.

14. Jmé choa̱ xi faʼaitʼa ya Biblia xi koasenkaoná tsa tsín kixi tíjna jme xi kisikaoná jngo ndsʼee.

¹⁴ A sa jenʼio kisikiʼaonná tsa ʼyani, tsakui nichxin saʼnda ya jinjtín tíjna je xi kʼoakisikaoná. Tsa kʼoalani kjimatʼeen, ya Énle  Niná faʼaitʼa choa̱ xi basenkaoná kʼianga chóyaa nga je Jeobá kʼoendajin je kjoa. Tobʼelañá, je José, alikui kitsjoaʼnde nga tokui kisikʼajennile kon nga tsín kixi tíjna jme xi koantʼain, kʼoa alikui kui tsakʼéjinkon jmeni xi kisikao xtindsʼe̱. Tosaa kui ngisa kuenta kisʼin nga je Jeobá kisixále, kʼoa je Jeobá kisichikontʼain je José nga tsejta koan kʼoa nga kiskale (Gén. 39:21). Nga jeki nichxin, je José kisichatʼale je ndsʼe̱, kʼoa tsabe josʼin kisichikontʼain Jeobá (Gén. 45:5). Tojo kisʼin José, kʼoati nda satío tokoán kʼianga nichriantʼalee je Jeobá kʼoa nga choya nga je kʼoendajin kjoa (Sal. 7:17; 73:28).

15. Jméni xi tsakasenkao jngo tichjaa nga tsejta koan kʼoa nga kiskale nga tsín kixi tíjna jme xi koantʼain.

¹⁵ Tsakui nichxin tsínkjoan kʼoakoa̱ntʼeen jokoantʼain je José, tonga ngatsʼiñá nga aon maná nga ʼya xi totaon bená. Tsa ʼyani xi tsín kixi tíjna jme xi kisikaoná, ninga tsín testigole Jeobá ma, ndatjín nga kjuintjenngiaa je kjoafaʼaitsjen xi tsjoá Biblia (Filip. 2:3, 4). Kataʼyala jokisʼin jngo tichjaa kʼianga kisʼejinle nga tsín nda tísíkʼaxki̱ jngo chjoón xi ñatjen síxá. Ningalani aon koanle, alikui kui kini, tosaa kui kisikjaʼaitsjen je choa̱ xi tsakʼéjna Jesús nga tsín kʼoakitsongajaoni kʼianga totsakʼin tomanile (1 Ped. 2:21, 23). Je tichjaa jebi alikui kui nʼio kuenta kisʼin jmeni xi koan. Skanni kisʼejinle nga chʼinni tjínle je xi chʼaosʼin kisikʼaxki̱ kʼoa nga tse kjoanikjáojin tjínle nga kui nichxin. Koanjinle tichja jebi nga tsín toxá kisʼinni je chjoón xi ñatjen síxá. Tsjoa kisʼe kon nga tsejta koan kʼianga tsín kixi tíjna jme xi tsakʼinle.

16. Jméni xi tsjoánganʼioná tsa tsín kixi tíjna jme xi kjimatʼeen (1 Pedro 3:12).

¹⁶ Tsa tsín kixi tíjna jme xi kjimatʼeen kʼoa tsa jmesa kjoa tibitjatojiaan xi aon bʼé tokoán, si̱kjaʼaitsjenjiaan nga je Jeobá chrian tíjnale “je xi nʼio aon tjío ni̱ma̱le” (Sal. 34:18). Je Jeobá tsjoakená nga̱ tsejta kjimaa kʼoa jé nikʼamiaa chʼáná (Sal. 55:22). Jé Jeobá xi Juez sʼin tíjna jngo tjíjtsa Sonʼnde kʼoa be ngayeje jmeni xi kjima (tʼexkiai 1 Pedro 3:12). * Tsa ñʼai  tjín kjoa tibitjatojiaan xi tsín ñá kʼoakoa̱nná kʼoéndajiaan, si̱kjaʼaitsjenjiaan nga machjén nga tsejta koaan nga chóyaa nga je Jeobá kʼoendajin kjoa.

17. Jméni xi tsoná je Jeobá tojosʼin faʼaitʼa ya Isaías 30:18.

¹⁷ Tochoasa chale nga nʼio tse kjoanichikontʼain tsjoáná Jeobá nga jekoatexoma Chjotaxále i̱ Sonʼnde. Ya Isaías 30:18 itso: “Tonga je Jeobá skóyakaola nga koakono kjoanda, kʼoa kuisótjeen nga koakono kjoamatokon. Nga̱ je Jeobá jngoní Niná xi kjoatéxomakixi tjínle. Nʼio tsjoa tjíole je xi je koyale”. Je xi kui nʼio koyale nga je Jeobá katabʼéndajin kjoa tsee kjoanichikontʼain sʼe̱le ndʼaibi kao nichxin xi sʼa nroa nga jekjoaʼaí sonʼnde chjotse.

18. Jmé kjoanichikontʼain xi choyalee.

¹⁸ Kʼianga jekjoaʼaí sonʼnde chjotse, xi choʼndale Niná maa alikui tikʼia nga kjoa kuitjátojinñá, kʼoa tsín tijme xi si̱kjáojinñá. Alikui tiʼya xi totaon skoe̱ni xínkjín kʼoa alikui tiʼya xi aon sa̱tíoni kon (Apoc. 21:4). Alikui tikui si̱kjáojinñá nga kui kjoásjee xi machjénná, nga̱ toxkia sʼee je tsojmi nga kʼia (Sal. 72:16; Is. 54:13). Nʼiojin ndasʼin kuiyoaa nga kui nichxin.

19. Jmé tʼatsʼeni xi tongini tísíkatíondaná je Jeobá.

¹⁹ Kʼianga tíbasenkaoná je Jeobá nga tinikatioá jmeni xi tsín sasénle kʼoa nga kui tibakoá xi ndatjín, je Jeobá tongini tísíkatíondaná josʼin kuiyoaa nga jekoatexoma Chjotaxále i̱ Sonʼnde. Alikui si̱kʼajenlee tokoán kʼoa tsín si̱xa̱nlee, nga̱ nʼio tse kjoanichikontʼain sʼe̱ná nichxin xi sʼa nroa. Nʼio ndasʼin kuiyoaa nga kʼia, kuinga machjénsíni nga tsejta katamaa, kʼoa tosi tonda chóyaa saʼnda nga sitjoson je Jeobá jmeni xi tongini tsoná.