1. Jmé xi koa̱n si̱kjaʼaitsjenjiaan kʼianga chótsenlee jme xi kisinda Jeobá.

KʼIANGA si̱kjaʼaitsjenjiaan jme xi kisinda Jeobá ya ngʼajmi kao i̱ Sonʼnde, tsakui nichxin kʼoati sa̱tío tokoán jokisʼe kon je David, nga i̱ kitso nga tsakʼétsʼoa: “Kʼianga kotsen jochon ya ngʼajmi, je xi ndsai kinindani, je sá kao je niño xi ji kinindai, ʼyáni je chjota kʼianga kuenta tinʼiani, kʼoa ʼyáni je chjota nga kʼoasʼin nikuindani” (Sal. 8:3, 4). Tojo kitso David, tsakui nichxin tokʼoamaná nga kui nikjaʼaitsjeen nga nʼio yʼai kjoan je niño kʼoa nga kuenta sʼínná je Jeobá. Tonga tojosʼin jchaa, je Jeobá kuenta kisʼin je Adán kao Eva kʼoa jo familiale sʼin tsabekon.

2. Jméni xi koanmele Jeobá nga katasʼín je Adán kao Eva.

² Jé Adán kao Eva xi títjon xtile Jeobá koan i̱ Sonʼnde. Je Jeobá kui xi koanmele nga katamankjínya je xtile, kuinga i̱ kitsonile: “Nkjín xti katasʼeno kʼoa katamankjínyao, titsao sonʼnde kʼoa jon tjanentsjao” (Gén. 1:28). Je Niná kui xi koanmele nga xti katasʼele je Adán kao Eva kʼoa nga katasíkuinda je Sonʼnde. Kʼiatsa kisitjosonlani jme xi tsakʼéndajin Jeobá, tjíojin saʼnda ndʼaibi je kʼoa kao xtile kʼoa familialejin Jeobá mani.

3. Ánni kʼoabixónsíñá nga chjí tsabekon Jeobá je Adán kao Eva nga ya tsakatiojinle je familiale.

³ Je Jeobá chjí tsabekon je Adán kao Eva nga ya tsakatiojinle je familiale. Kʼianga kui nchja̱ni josʼin kisinda Jeobá je chjota, ya Hebreos 2:7 itso: “Ngisa nangi tsakʼejnalai kaoni tsa je ánkje. Kitsʼailai kjoajeya kao kjoangʼa”. Je Niná alikui kʼoasʼin kisinda je chjota joni je ánkje, nga̱ je ánkje ngisaa tse nganʼio tjínle, ngisaa chjine kʼoa ngisaa tse jmeni  xi male sʼín (Sal. 103:20). Tonga tokui jebi xi tsín mangóson je chjota kao ánkje. Kʼianga kisinda Jeobá je Adán kao Eva, nʼio ndasʼin kisikatío.

4. Jmé xi koanle je Adán kao Eva nga tsín kisitjosonle Jeobá, kʼoa jmé xi chótʼayajiaan i̱ kjoaʼmiya jebi.

 ⁴ Je Adán kao Eva alikui tiya tsakatiojinnile je familiale Jeobá. Tojosʼin jchaa i̱ kjoaʼmiya jebi, nga kʼoakisʼin alikui tinda tsakationi je xtile. Tonga je Jeobá alikui tísíkʼantjaiya jme xi tjínndajinle, kui xi mele nga xtile katama ngantsjai je chjota xi sitjosonle. Kui títjon jchaa josʼin tíbakóná Jeobá nga chjí bekonná. Xijekoa̱n, kui chótʼayajiaan jme xi sʼiaan kʼiatsa mená nga ya kuiyojiaan je familiale Jeobá. Kʼoati jchaa jmé kjoanichikontʼain xi sʼe̱le je xtile Jeobá xi koatio ngantsjai nichxin i̱ Sonʼnde.

5. Jósʼin bakoá nga bʼailee kjoanda Niná nga kʼoasʼin kisindaná jokjoan je.

⁵ Je Jeobá kʼoasʼin kisindaná jokjoan je (Gén. 1:26, 27). Kʼianga kʼoasʼin kisindaná je Niná jokjoan, koaan chjénngilee nga koakoá kjoatsjoacha, nga kixi koaan, nga koakoá kjoamatokon kao kjoatéxomakixi (Sal. 86:15; 145:17). Kʼianga bʼenelee yaoná nga kʼoanʼia, ʼyaxkónñá je Jeobá kʼoa bʼailee kjoanda (1 Ped. 1:14-16). Kʼianga kʼoanʼia jmeni xi sasénle tsjoa sʼe tokoán. Xi ijngosani, nga kʼoasʼin kisindaná Jeobá jokjoan, koaan kʼoakoa̱nkjoaan josʼin mele ánni nga ya kuiyojinñá je familiale.

6. Jósʼin tsakakó Jeobá nga chjí bekon je chjota kʼianga kisinda je Sonʼnde.

⁶ Je Jeobá jngo ʼnde xi nʼio naskáchon kitsjoaná. Nga kjesa síndajin Niná je chjota, títjonkjoanla je Sonʼnde kisinda (Job 38:4-6; Jer. 10:12). Nga nda chjota kʼoa nga ndʼé je Niná, nʼio nkjín koya tsojmi kisinda xi tsjoa báya tokoán (Sal. 104:14, 15, 24). Je Niná sakʼoa kisikjaʼaitsjenjin jmeni xi kisinda kʼoa “tsabe nga ñaki nda” (Gén. 1:10, 12, 31). Nga chjí bekon je chjota, jé kisikánentsja nga sikuinda jmeni xi tjín i̱ Sonʼnde (Sal. 8:6). Je Niná kui xi mele nga chjotatsje koa̱n je chjota kʼoa nga tsjoa sa̱tío kon ngantsjai nga sikuinda jmeni xi kisinda Niná. A bʼailee kjoanda je Jeobá nga kʼoasʼin sikatíoná nichxin xi nroaján.

7. Jósʼin bakó Josué 24:15, nga tjínná kjoandái nga koa̱n chjoéjiaan jmeni xi mená sʼiaan.

⁷ Je Jeobá tsjoáná kjoandái nga koa̱n chjoéjiaan jme xi mená sʼiaan. Nga kui kjoanda jebi tjínná koaan ñá chjoéjiaan jmeni xi mená sʼiaan (tʼexkiai Josué 24:15). * Je Niná nʼio tsjoa sʼe kon kʼianga kui chjoejiaan nga je nixálee (Sal. 84:11; Prov. 27:11). Nkjín koya jmeni xi koa̱n sʼiaan nga nda si̱chjén je kjoandái xi tjínná. Kataʼyala je choa̱ xi tsakʼéjna je Jesús.

8. Jngo koya kʼoasi josʼin kisichjén Jesús je kjoandái xi kisʼele.

⁸ Je Jesús jé xi ngikʼa títjon kuenta kisʼin, kʼoa ñá kʼoati koa̱n kʼoasʼiaan. Ñandia nga nʼio kijtale Jesús kao chjotatjenngile, tsakásjai jngo ʼnde jña koa̱n sikjáya. Tonga tsínni koan kisikjáya, nga̱ nʼio nkjín chjota xi jeya tjíokoyale nga kicho xi koanmele kinrʼoé xi tʼatsʼe. Je Jesús alikui koanjtile, tosaa koanmake je chjota kʼoa tsakakóyale xi tʼatsʼe Niná (Mar. 6:30-34). Jé Jeobá chʼasjengʼaa nga chjenngilee je Jesús kʼianga nikʼayaa nichxinná kao  nganʼioná nga binyakoaa xi kjaʼaí (Mat. 5:14-16). Kʼoa kʼoasʼin bakoñá nga mená ya kuiyojinlee je familiale Jeobá.

9. Jmé xi tjínnele kuenta sʼin je xi xijchá ma.

⁹ Je Jeobá kui kjoanda tsjoále je chjota nga koa̱n sʼe̱le xti kʼoa nga je kjinele kuitsoyale je ʼndíxtile nga tsjoake katama Niná kʼoa nga je katasíxále. Kʼiatsa tjínli ʼndíxti, a chjí ʼyatokuin je kjoanda xi tjínli. Ningalani tse nganʼio tjínle je ánkje, tonga alikui kui kjoanda kitsjoale Jeobá nga xti sʼe̱le. Kʼianga kuenta sʼin jebi xi xijchá ma, nʼio chjí skoe̱kon je kjoanda xi tjínle. Kui xá kjinele je xi xijchá ma nga kʼoasʼin sijchá je ʼndíxtile josʼin mele Jeobá kʼoa nga kuitsoyale je kjoatéxomale (Efes. 6:4; Deut. 6:5-7; Sal. 127:3). Je naxinandále Niná nkjín koya bʼasje xi ya Biblia yʼangini xi kuinyakao xi xijchá ma nga kuitsoyale je ʼndíxtile, jolani xo̱n kao video, canción, kʼoa jmesani xi faʼaitʼa ya página xi tíjnaná ya Internet. Jebi kui bakóná nga je Jeobá kao Jesús nʼio tsjoake je ʼndíxti (Luc. 18:15-17). Je Jeobá nʼio tsjoa sʼe kon kʼianga je sínʼiotʼa yaole je xi xijchá ma kʼoa nga síkuinda ʼndíxtile. Nga kʼoasʼin bakóyale je ʼndíxtile binyakao nga ya koatiojinle je familiale Jeobá ngantsjai nichxin.

10, 11. Jmé kjoanda xi koa̱n sʼe̱ná nga tsakʼéchjíntjainá je ʼNdíle Niná.

¹⁰ Je Jeobá kisikasén je ʼNdíle i̱ Sonʼnde nga tsakʼéchjíntjainá nga koa̱n ya kuiyojin ijngokʼalee je familiale. Tojosʼin kaʼyaa ya  párrafo 4, je Adán kao Eva alikui tiya tsakatiojinnile je familiale Jeobá, kʼoati kisicha je xtile kjoanda jebi (Rom. 5:12). Kʼianga toxá tsín kisitjosonnile Niná je Adán kao Eva, kuinga tsín tikitsjoaʼndenile Niná nga ya tsakatiojinle je familiale. Kʼoa jókoa̱nni je xtile. Nga nʼio tsjoakená je Jeobá, tsakásjaile jokisʼin ánni nga koa̱n xtile kuitsonile je xi sitjosonle. Jé Jesús kisikasén nga tsakʼéchjíntjainá (Juan 3:16; Rom. 5:19). Kʼoa nga kʼoasʼin kʼienntjainá je Jesús, je Niná 144,000 mani chjota kiskoéjin xi kixi tjíofitʼale nga jo xtile sʼin skoe̱kon (Rom. 8:15-17; Apoc. 14:1).

¹¹ Xi ijngosani, kʼoati millón mani chjota xi kʼoatjíosʼín josʼin mele Niná. Kui kjoachoya tjínle nga ya koatiojinle je familiale Niná kʼianga jekjoaʼato xi jngo jmi nó (Sal. 25:14; Rom. 8:20, 21). Ndʼaibi nga kui kjoachoya tjínle jo Nʼaile sʼin bekon je Jeobá (Mat. 6:9). Kʼianga jekjoaʼáyanile kʼien kʼoati kui kjoanda sʼe̱le nga skoe̱ xi tʼatsʼe Jeobá. Je xi sitjosonle Niná kʼoati familiale Niná koa̱n nga jekoai nichxin.

12. Jmé xi chótʼayajiaan ndʼaibi.

¹² Tojosʼin tiʼyaa, je Jeobá nʼio tse kjoanda tíbakóle je chjota. Xtile jetsole je chjotale Cristo xi ya ngʼajmi koai, kʼoa je chjota xi nʼio “nkjín mani” kʼoati kui kjoachoya títsjoále nga xtile Niná koa̱n kʼianga jekjoaʼaí sonʼnde chjotse (Apoc. 7:9). Jmé xi machjén nga sʼiaan ndʼaibi kʼiatsa mená nga ya kuiyojinlee je familiale Jeobá ngantsjai nichxin.

13. Jmé xi sʼiaan tsa mená ya kuiyojinlee je familiale Jeobá (Marcos 12:30).

¹³ Nga ni̱ma̱ná kjuinroajinni nga si̱xálee Jeobá kʼoasʼin koakonilee nga tsjoachaa (tʼexkiai Marcos 12:30). * Je kjoanda xi ngisa nʼio chjíle xi títsjoáná je Jeobá kuinga ma ʼyaxkoán. Kʼianga nitjosoán je kjoatéxomale kʼoasʼin bakoñá nga tsjoachaa (1 Juan 5:3). Jngo koya  xi koa̱n si̱tjosoán kui jmeni xi kitso je Jesús, nga chjotatjenngile si̱koaa je chjota kʼoa nga katafisʼenngindá (Mat. 28:19). Je Jesús kʼoati kitso nga tjínnele tsjoacha katamaa xíngiaa (Juan 13:35). Je Jeobá yaa naxinandále sikatíojin je xi sitjosonle (Sal. 15:1, 2).

14. Jósʼin bakoá nga tsjoachaa xíngiaa (Mateo 9:36-38; Romanos 12:10).

¹⁴ Tsjoacha katamaa xíngiaa. Kui kjoatsjoacha xi ngisa bakó je Jeobá (1 Juan 4:8). Je Niná tokʼoa jetsjoakená kʼianga kjesa ʼyaxkonjián (1 Juan 4:9, 10). Kʼianga tsjoacha maa xíngiaa, jé Jeobá tichjenngilee (Efes. 5:1). Jngo koya josʼin koa̱n koakoá nga tsjoachaa je chjota kʼiaa nga kʼuínyalee jotjínni xi tʼatsʼe Jeobá kʼianga choa̱lesa (tʼexkiai Mateo 9:36-38). * Kʼoasʼin kuinyakaoñá je chjota nga koa̱n ya koatiojinle je familiale Niná. Kʼianga jngo chjota fisʼenngindá tjínnele nga tosi tonda tsjoacha koaan kʼoa koakolee kjoaxkóntokon (1 Juan 4:20, 21). Tobʼelañá, tsa tsín sa̱sénná jmeni xi sʼin, alikui koa̱n kʼoasʼin si̱kjaʼaitsjeen nga toxá kasʼínni kʼoa tsakuije̱ nga to yaole fini, tosa koakolee kjoaxkóntokon kʼoa kʼoasʼin si̱kjaʼaitsjeen nga ngisa ngʼa tíjna tikʼoajinni ñá (tʼexkiai Romanos 12:10; * Filip. 2:3).

15. ʼYáni xi koa̱n koakolee kjoamatokon kʼoa ndʼé si̱koaa.

¹⁵ Koakolee kjoamatokon ngatsʼi chjota kʼoa ndʼé si̱koaa. Kʼiatsa mená nga ya kuiyojinlee je familiale Niná ngantsjai, tjínnele kʼoasʼin kjuinkoaa yaoná jotso je Biblia. Tobʼelañá, je Jesús kʼoakitso nga tjínnele koakolee kjoamatokon ngatsʼi chjota kʼoa nga ndʼé si̱koaa, saʼnda je xi jtikená (Luc. 6:32-36). Kʼiatsa ñʼai maná nga nitjosoán jebi, machjén nga kʼoasʼin si̱kjaʼaitsjeen kʼoa kʼoasʼiaan jokisʼin je Jesús. Kʼianga nitjosonlee Jeobá jokji tjen kʼoamaná kʼoa nga mangíntjenngiaa je choa̱le Jesús, kʼoasʼin bakoñá nga mená ya kuiyojinlee je familiale Niná ngantsjai.

16. Jméni xi sʼiaan nga tsín chʼaosʼin katabʼaxki̱ je naxinandále Jeobá.

¹⁶ Alikui kʼoaiʼndee nga chʼaosʼin katabʼaxki̱ je naxinandále Jeobá. Ya yaniʼya, nga nda choa̱ batío je xti xi majchínga kʼoati sʼín je xtiʼndíndsʼe̱. Kʼianga sítjoson jmeni xi tso je Énle Niná, nʼio nda choa̱ batío. Tonga tsakui xi chʼaotjín kʼoasʼin xti jebi, kʼoajin tikui choa̱ koaitjenngi xtiʼndíndsʼe̱. Kʼoakjoanti ma ya jinnaxinandále Jeobá. Kʼiatsa jngo chjotale Cristo xi tsín tikixi koaitʼanile Niná kʼoa kui koaitjenngi je kjoafaʼaitsjen xi tjínle chjota xi yátsʼi̱n binyále Niná kʼoa tsa tsín tinda koaikaonije̱ yaole, tsakui nichxin kʼoatisʼin skénngi xi ngikʼa. Kʼianga ʼya xi kʼoasʼín, chʼaosʼin bʼaxki̱ je naxinandále Jeobá (1 Tes. 4:3-8). Alikui je chjénngilee chjota xi tsín nda choa̱ batío kʼoa tsín kʼoaiʼndee nga totjín totjenni kjoa xi si̱kjinnilee je Niná.

17. Jñánile kjoafaʼaitsjen xi nʼio si̱kuindalee yaoná, kʼoa ánni.

¹⁷ Je Jeobá si̱nʼiotʼaa kʼoa tsínkui si̱nʼiotʼaa je tsojmi xi tjín sonʼnde. Kʼiatsa kui títjon si̱kʼéjnaa je Chjotaxále kʼoa si̱tjosoán je kjoatéxomale, je Jeobá tsjoáná tsojmi xi chi̱nee, najño xi chʼa̱kjá kʼoa kao ndʼia (Sal. 55:22; Mat. 6:33). Kuinga tsín koa̱n kʼoasʼin si̱kjaʼaitsjenñá nga kui tsojmi xi tjín sonʼnde xi nda sikatíoná kʼoa  xi tsjoa kʼoee tokoán. ʼYañá nga kui xi nda kʼoee tokoán kʼiatsa kʼoasʼiaan josʼin mele Niná (Filip. 4:6, 7). Kʼoa ningalani bichó nganʼioná nga koa̱n nkjín tsojmi kuindá, kuenta sʼiaan tsa koa̱nsonniná nichxin nga si̱chjén kʼoa nga si̱kuindaa. Si̱kjaʼaitsjenjiaan jebi: “A kui ngisa nʼio tjentʼale je tsojmi xi tjínna”. Kuenta sʼiaan nga kui xi mele Jeobá nga ngisa ndasʼin si̱xálee. Kuinga tsín koa̱nni nga tokjaʼaíla kjoa kʼoailee kjoandosin. Alikui kʼoasʼiaan jokisʼin je ti xi tsakʼejna nga nichxinle Jesús, nga tosa kui nʼio kitsjentʼale je tsojmi xi tjínle ʼndele nga je Jeobá sixále. Nga kʼoakisʼin ti jebi, alikui ya kʼoéjnajinle je xi xtile Niná koa̱n nichxin xi sʼa nroa (Mar. 10:17-22).

18. Jmé kjoanda xi so̱kole kʼoa jmé kjoanichikontʼain xi sʼe̱le je chjota xi sitjosonle Niná.

¹⁸ Je chjota xi sitjosonle Niná kui kjoanda sʼe̱le nga tsjoake koa̱n Jeobá kʼoa nga je skoe̱xkón ngantsjai nichxin. Je xi i̱ Sonʼnde koatio kui kjoanda sʼe̱le nga je sikuinda Sonʼnde, nga̱ kui xá kisindani Jeobá nga chjota koatio. Jé Chjotaxále Niná xosʼin nga nda koa̱nchon ijngokʼani je Sonʼnde. Je Jesús kjoaʼaxin ngayeje kjoa xi tsakajngi je Adán kao Eva kʼianga tsín tiya familiale Niná tsakatiojinni. Kʼoa je Jeobá sikjaʼáyanile je chjota xi millón mani xi jekʼien nga koa̱n koatio i̱ Sonʼnde kʼianga jeʼndenaxó koa̱n kʼoa tsín tijme chʼin sʼe̱nile (Luc. 23:42, 43). Kʼianga jechjotatsje koa̱n nga jngó jngó je choʼndale Jeobá xi koatio i̱ Sonʼnde koako “kjoajeya kao kjoangʼa” tojo tso je Biblia (Heb. 2:7).

19. Jméni xi machjén nga si̱kjaʼaitsjenjiaan.

¹⁹ Kʼiatsa kui kjoachoya tjínli nga i̱ Sonʼnde kuijnai, je Niná tsjoakeli kʼoa kui xi mele nga ya kuijnajinlai je familiale. Tʼenelai yaoli jokji tjen kʼoakoa̱nli nga titjosonlai. Nyaon nyaon tikjaʼaitsjenjin je kjoanda xi kjoaʼaíkao Niná. Chjí jchatokuin je kjoanda xi tjínli nga je Jeobá ʼyaxkuín kʼoa nga kui kjoanda sʼe̱li ngantsjai nichxin nga je Jeobá chʼa̱sjengʼai.