1. Ánni kʼoakitsosínile Jeobá je Jesús nga katasíkuinda je chjotatjenngile.

 JNGO nitje̱n tongini nga tojeme ni̱kʼien je Jesús kʼoakitsole je Nʼaile nga katasíkuinda je chjotatjenngile (Juan 17:15, 20). Je Jeobá síkuindaa ngantsjai je choʼndale. Tonga je Jesús be nga ngisa nʼio kʼoetʼale Na̱i je chjotatjenngile, kuinga machjénnile nga je Jeobá koasenkao.

2. Tojo tso Salmo 33:18-20, ánni nga tsín kuijkónñá kʼianga kjoa bitjatojiaan.

² Jmeni xi chon sonʼnde nʼio bʼetʼale chjotatjenngile Cristo. Je kjoa xi bitjatojiaan síkinroajen tokoán kʼoa kotʼayakaoná tsa tosi tonda kixi kjuintʼalee Niná. Tonga alikui koa̱n kuinókjoaan tojosʼin jchaa i̱ kjoaʼmiya jebi. Je Jeobá kuenta sʼínná, be jme kjoa xi bitjatojiaan kʼoa tíjnandaa nga koasenkaoná. Jaola choa̱ xi faʼaitʼa Biblia chótʼayajiaan jñani bakóná nga kuenta sʼín Jeobá je xi tsokjónke (tʼexkiai Salmo 33:18-20). b

3. Ánni nga toñá tiyoaa ma sakʼoaniná.

³ Ningalani ʼyaa nga nʼio nkjín mani je ndsʼee kao tichjaa, tsakui nichxin sakʼoa kʼoasʼin si̱kjaʼaitsjeen nga toñá tiyoaa. Tobʼelañá, je xi sʼa xti, tsakui nichxin toje tjío koa̱nle kʼianga kuitsoya ya ndʼiaskuelale josʼin makjainle kʼoa tsa kʼiaje̱ nga xin jtín fi. Tsakui nichxin sakʼoa ba sʼená, tsa nikʼajenlee tokoán kʼoa tsa kʼoasʼin nikjaʼaitsjeen nga toñá tiyoaa  nga kui kjoa bitjatojiaan. Tsakui nichxin tsín tso tokoán nga ʼya xi kʼoéyanajmílee jme kjoa xi tibitjatojiaan nga̱ kʼoasʼin nikjaʼaitsjeen nga tsín ʼya xi koa̱njinle kʼoa tsa saʼnda kʼoasʼin si̱kjaʼaitsjeen nga tsín ʼya xi mandosinle xi tʼatsaan. Kʼianga toñá tiyoaa maná ngisaa ba sʼe tokoán kʼoa ngisaa nroajen tokoán. Tonga je Jeobá tsín mele nga kʼoasʼin si̱kjaʼaitsjeen.

4. Ánni nga i̱ kitsoni je profeta Elías: “Toʼansa xi tijna”.

⁴ Kataʼyala choa̱le profeta Elías. Tsʼato 40 nichxin tsakʼamjechjinga nga̱ je Jezabel kʼoakitso nga sikʼien (1 Rey. 19:1-9). Kʼianga jngo ngijao tíjnangi i kitsole Jeobá: “Toʼansa xi tijna” (1 Rey. 19:10). Kʼoasʼin kisikjaʼaitsjen nga tsín tiʼya profeta tjínni, nga tojesa. Je Abdías 100 profeta kisikatíoʼma nga tsín je Jezabel kisikʼien (1 Rey. 18:7, 13). Tsakui nichxin kʼoasʼin kisikjaʼaitsjen Elías nga jekinikʼien ngatsʼi profeta xi kisikatíoʼma Abdías kʼoa tsakui kʼoasʼin kisikjaʼaitsjenni nga toje tíjna. Kʼoa tsakui nichxin kuinga kʼoasʼin kisikjaʼaitsjenni nga tsín ʼya xi je Jeobá kitʼale kʼianga jetsakakó Jeobá nga toje xi ñaki Niná ya nindo Carmelo. Kʼoa tsakuije̱ nga kʼoasʼin kisikjaʼaitsjenni nga tsín ʼya xi be jokji kjoa tíjnajin kʼoa nga tsín ʼya xi koanndosinle xi tʼatsʼe. Alikui tsoyayeje Biblia ánni nga kʼoakisʼeni kon je Elías. Tonga ʼyañá nga koanjinle Jeobá kʼoa be josʼin tsakasenkao.

5. Jméni xi kisʼin Jeobá nga tsakakóle Elías nga tsín toje tíjna.

⁵ Je Jeobá nkjín koya josʼin tsakasenkao je Elías. Tobʼelañá, kʼoakitsole nga katabʼéyanajmíle jotjín kon. Jao kʼa nga i̱ kitsole: “Jméni xi tinʼiai i̱bi Elías” (1 Rey. 19:9, 13). Kʼoa nga jao kʼa nʼio nda tsakasénño Jeobá jmeni xi kitso Elías. Je Jeobá tsakakó jokji nganʼio tjínle kʼoa kʼoakitsole Elías nga je koasenkao. Kʼoakitsole nga nʼiosa nkjín chjota tjín ya naxinandá Israel xi je Jeobá bexkón (1 Rey. 19:11, 12, 18). Ndajin kisʼe kon Elías kʼianga tsakʼéyanajmíle Jeobá jotjín kon kʼoa nga kʼoakitsole Jeobá nga je koasenkao. Je Jeobá  kitsjoaxále Elías. Kʼoakitsole nga je koaikasénnda Hazael nga rey sʼin kʼoéjna ya Siria, nga je koaikasénnda Jehú nga rey sʼin kʼoéjna ya Israel kʼoa nga profeta koa̱n je Eliseo (1 Rey. 19:15, 16). Nga kʼoasʼin kitsjoaxále Jeobá tsakasenkao je Elías nga nda kisʼe kon. Kʼoa je Jeobá jé Eliseo kisikasén nga tsakasenkao je Elías. Jméni xi sʼiaan tsa kʼoasʼin nikjaʼaitsjeen nga toñá tiyoaa kʼoa nga machjén nga je Jeobá koasenkaoná.

6. Jméni xi koa̱n kʼuínlee je Jeobá kʼianga toñá tiyoaa maná (Salmo 62:8).

⁶ Je Jeobá kui xi mele nga kʼoéyanajmílee jotjín tokoán kʼianga kʼoétsʼoalee. Be josatío tokoán kʼoa kʼoatsoná nga koa̱n kʼoétsʼoalee tokʼiani, nga̱ ʼyañá nga kjuinrʼoéná (1 Tes. 5:17). Nʼio sasénle Jeobá kʼianga bʼetsʼoalee (Prov. 15:8). Jméni xi koa̱n kʼuínlee je Jeobá kʼianga toñá tiyoaa ma sakʼoaná. Koaan kʼoéyanajmílee jotjín tokoán tojo kisʼin Elías (tʼexkiai Salmo 62:8). c Kʼoéyanajmílee jmeni xi makjáojinná kʼoa jotjín tokoán. Kʼoakʼuínlee nga katabasenkaoná jmeni xi sʼiaan. Tobʼelañá, tsa sʼa xti, jméni xi sʼiain kʼiatsa toji tijnai mali kʼoa tsa tsín tso tokuin nga nokjoani xi tʼatsʼe Jeobá ya ndʼiaskuela. Koaan kʼoatʼinlai Jeobá nga katabasenkaoli nga nʼiojin katamai, kʼoa kʼoatʼinlai nga katatsjoáli kjoachjine ánni nga koa̱nnili josʼin kʼuínyai jmeni xi makjainli (Luc. 21:14, 15). Kʼoa jméni xi koa̱n sʼiain tsa nikʼajenlai tokuin. Kʼoatʼinlai Jeobá nga katabasenkaoli nga kuitso tokuin nga kʼoéyanajmílai jotjín tokuin jngo ndsʼee xi jetjínle kjoafaʼaitsjen kʼoa kʼoatʼinlai Jeobá nga katabasenkao ndsʼee jebi nga koa̱njinle jotjín tokuin. Alikui toñá tiyoaa koa̱nná kʼiatsa kʼoéyanajmílee Jeobá jotjín tokoán, tsa kuenta sʼiaan josʼin basenkaoná kʼianga bʼetsʼoalee kʼoa tsa bʼaiʼndelee xi kjaʼaí nga binyakaoná.

7. Jméni xi bakóyali jokoan je Mauricio.

⁷ Nʼio chjíle je xá xi tsjoáná Jeobá ngatsʼiaa. Je Jeobá kuenta sʼín kʼoa chjí be josʼin bʼainganʼioá ya jinjtín kʼoa nga ʼmiyasoán (Sal. 110:3). Kʼianga kui nikʼayalee nichxin je xále Niná, jósʼin basenkaoná nga tsínla kui nikjaʼaitsjeen je xi síkʼajenle tokoán. Kataʼyala tʼatsʼe jngo ti xi Mauricio ʼmi. d Nga to chriankʼia kisʼenngindá je Mauricio jngo xi nʼio miyole mani xi tobijbi kisikjinle Jeobá. Itso: “To jao kisʼe tokoan kʼianga kisikjinle Jeobá je miyona. Kui kisikjaʼaitsjenjian tsa kuitjosonna jmeni xi kixinle Jeobá nga kitsjoatʼale yaona kʼoa tsa tosi tonda naxinandále Jeobá koatejnajian. Toʼan tijna koanna kʼoa kʼoasʼin kisikjaʼaitsjen nga tsín  ʼya xi koa̱njinle jotjín tokoan”. Jméni xi tsakasenkao ndsʼee jebi. Itso: “Tsakasenkaona nga ngisa tse kixinyasoan, nga tsín to yaona kiña kʼoa nga tsín tokui kisikjaʼaitsjen ʼndeʼnde jotjín tokoan. Tsjoa kisʼe tokoan nga ñatjen kixinyasoan kao je ndsʼee kʼoa tsín titoʼan tijna koannina”. Tojo basenkaoná ninga tsín ñaki ʼyaa je ndsʼee kʼianga ʼmiyasoán. Kʼoati basenkaoná nga ñatjen ʼmiyasoán kao ndsʼee tsa teléfono kuinókjoaa kʼoa tsa carta chjiá. Jmésani xi tsakasenkao je Mauricio. Itsosa: “Ngisaa kitsjoanganʼioa ya jinjtín, ngisaa kiskotʼaya kʼoa nda tsakatejnandale jmeni xi bʼakaona ya jinjtín. Nga kʼoakisʼian, koanjinna nga tsjoakena je Jeobá kao je ndsʼee”.

8. Jósatío tokoán nga ñʼai tjín kjoa bitjatojiaan.

⁸ ʼYañá ngatsʼiaa nga kjoa kuitjátojiaan nichxin fetʼa xi tiyoaa ndʼaibi (2 Tim. 3:1). Tonga tsín majinná jme kjoa xi kuitjátojiaan kʼoa kʼiáni kjoaʼaínená. Tsakui nichxin koa̱ntsínná tao̱n, tsa táo chʼin ska̱tʼaná kʼoa tsa jngo xíngiaa kuiyá. Tsakui nichxin nʼio si̱kjáojiaan kʼoa tsín tijchañá josʼiaan, ngisaa tsa nkjín kjoa kjoaʼaínená. Si̱kjaʼaitsjenjiaan nga kuenta sʼínná Jeobá kʼoa nga je koasenkaoná nga chókjoajinná tojme kjoa xi kuitjátojiaan.

9. Jmé kjoa xi jaʼatojin je Job.

⁹ Kataʼyala xi tʼatsʼe je Job. Toxijña nʼio tse kjoa jaʼaine. Tojngo nichxin kisʼejinnile nga kisicha ngayeje cho̱ntjele, je choʼndale kao ʼndíxtile (Job 1:13-19). Kʼianga kʼoasikji kjoa tíjnajin tosa táo chʼin kiskatʼangále (Job 2:7). Nga kʼoasikji kjoa tsakʼejnajin i kitso: “Jekichobena josʼin tijna. Alikui timenina koatejnakoan” (Job 7:16).

10. Jméni xi kisʼin Jeobá nga tsakasenkao je Job nga kichokjoajinle je kjoa xi jaʼatojin (chótsenlai sén xi faʼaitʼa ya portada).

¹⁰ Je Jeobá kuenta kisʼin ngayeje kjoa xi jaʼatojin je Job. Kʼoa nga tsjoake tsakasenkao nga kichokjoajinle je kjoa xi jaʼatojin kʼoa nga tosi tonda kixi kitʼale. Jesoaa Jeobá tsakjákao je Job, kʼoakitsole jokji kjoachjine tjínle, nga tsjoake kʼoa nga síkuinda ngayeje jmeni xi kisinda. Nʼio nkjín cho̱ kisikʼaxki̱ kʼianga kitsoyale xi tʼatsʼe jebi (Job 38:1, 2; 39:9, 13, 19, 27; 40:15; 41:1, 2). Kʼoati je Elihú kisichjén Jeobá nga tsakasenkao kʼoa kitsjoanganʼiole je Job. Je Elihú kʼoakitsole Job nga síchikontʼain ngantsjai Niná je xi chókjoajinle kjoa xi faʼatojin kʼoa xi tosi tonda je síxále. Tonga je Jeobá kʼoati kui xi koanmele nga kjoafaʼaitsjen kitsjoale Elihú je Job. Je Elihú ngasin nganda tsakjákaonajmí je Job nga koanjinle ánni nga kjoa tífaʼatojinni. Kʼoakitsole nga tsín mangósoán kao Jeobá, nga̱ jé kisinda ngʼajmi kao Sonʼnde (Job 37:14). Je Jeobá kʼoakitsole je Job nga katabʼétsʼoantjai nga jan miyole xi tsín ndasʼin kinchja̱ni xi tʼatsʼe (Job 42:8-10). Jósʼin basenkaoná ndʼaibi je Jeobá kʼianga ñʼai tjín kjoa bitjatojiaan.

11. Jósʼin basenkaoná Biblia kʼianga kjoa bitjatojiaan.

¹¹ Alikui jesoa Jeobá fákaoná ndʼaibi tojo kisikao je Job, kui Biblia síchjén nga fákaoná (Rom. 15:4). Nʼio tsjoánganʼioná nga kʼoatsoná nga ndasʼin kuiyoaa nichxin xi sʼa nroa. Kataʼyala kʼa kjoafaʼaitsjen xi faʼaitʼa Biblia xi tsjoánganʼioná nga kjoa bitjatojiaan. Kao kui Biblia kʼoatsoniná je Jeobá nga tsín jme xi kʼoechjoale nga tsjoake koa̱nná ninga tojme kjoa xi kuitjátojiaan (Rom. 8:38, 39). Kʼoati tsoná je Jeobá nga chrian tíjnale ngatsʼi  xi nchja̱le, xi tsonile, nrʼoéle kʼianga bʼétsʼoale (Sal. 145:18). Je Jeobá kʼoatsoná nga chókjoajinná tojme kjoa xi kuitjátojiaan tsa je si̱nʼiotʼaa kʼoa tsjoa sa̱tío tokoán ningalani kjoañʼai chja̱ʼá (1 Cor. 10:13; Sant. 1:2, 12). Je Énle Niná kʼoati tsoná nga tofaʼato je kjoa xi bitjatojiaan ndʼaibi kʼoa nga tsín mangóson kao je kjoanda xi tsjoáná Jeobá nga koa̱n kuiyoaa ngantsjai nichxin (2 Cor. 4:16-18). Je Jeobá kʼoatso nga kjoaʼaxin je Na̱i kao xi kʼoasʼín joni je, nga̱ jé xosʼín nga kjoa biyojiaan (Sal. 37:10). A tjínjinkon kʼai texto xi koasenkaoli kʼianga kjoa kuitjátojin nichxin xi sʼa nroa.

12. Jméni xi sʼiaan nga koasenkaoná je Énle Niná.

¹² Nga koasenkaoná je Énle, kui xi mele Jeobá nga kʼoasʼin si̱ngalee yaoná nga ntsjaintsjai kʼoéxkiaa je Biblia kʼoa nga si̱kjaʼaitsjenjiaan jmeni xi tso. Tsa kʼoasʼiaan jmeni xi majinná nga bʼexkiaa Biblia, ngisaa nʼio sʼe̱jna kjoamakjainná kʼoa ngisaa koa̱nmiyoaa je Niná. Kui xi koasenkaoná nga chókjoajinná je kjoa xi kuitjátojiaan. Tsjoáná je nganʼiotsjele Jeobá tsa koa̱nkjainná jmeni xi tso je Énle, kʼoa kui nganʼiotsjele tsjoánganʼioná nga chókjoajinná tojme kjoa xi kuitjátojiaan (2 Cor. 4:7-10).

13. Jósʼin basenkaoná nga chókjoajinná je kjoa xi bitjatojiaan nga tsoyaná xi tʼatsʼe Niná “je choʼnda xi nʼiotʼakon, xi nda be xá”.

¹³ Jé Jeobá basenkao “je choʼnda xi nʼiotʼakon, xi nda be xá” nga nkjín koya jmeni xi tsjoáná xi binyakaoná nga nʼio satío kjoamakjainná kʼoa nga tjenyatokon biyoaa, jolani xo̱n xi Énle Niná yʼangini, video kao canción (Mat. 24:45). Machjén nga kuenta sʼiaan ngayeje kjoatjao jebi nga̱ kʼiakjoán bʼainá nga machjénná. Jngo tichjaa xi Estados Unidos tsʼe xi kʼoakitso jokji chjí bekon ngayeje kjoanda jebi xi tsjoáná naxinandále Niná. Itso: “Je xi 40 nó jetisixále Niná tsee kjoa tifaʼatojian xi tíkotʼayakaona tsa kixi kjuítʼale Niná”. Je tichjaa jebi nʼio tse kjoa tífaʼatojin. Kʼiaa kʼien je pajchále nga ya tsakʼejnaya carrole jngo chjotachʼi̱, táo chʼin kitsaotʼale je xijchále kʼoa kʼieen, kʼoa jao kʼa nga cáncer koanle je tichjaa. Jméni xi tsakasenkao. Itso: “Tísíkuindana ngantsjai je Jeobá. Tíbasenkaona nga tíchókjoajinna je kjoa xi tifaʼatojian nga tsoyana xi tʼatsʼe Niná je choʼnda xi nʼiotʼakon, xi nda be xá. Kʼoatixian jokitso je Job kʼianga i̱ kitso:  Saʼnda nga an xi kuiyá, kixi koa̱n” (Job 27:5).

14. Jósʼin síchjén Jeobá je ndsʼee nga basenkaoná kʼianga kjoa bitjatojiaan (1 Tesalonicenses 4:9).

¹⁴ Je Jeobá tsoyaná nga tsjoacha koaan je xíngiaa kʼoa nga kʼoainganʼiolee kʼianga ñʼai tjín kjoa faʼatojin (2 Cor. 1:3, 4; tʼexkiai 1 Tesalonicenses 4:9). e Joni je Elihú, je ndsʼee kao tichjaa kʼoati binyakaoná kʼianga kixi kjuintʼalee Jeobá nga kjoa bitjatojiaan (Hech. 14:22). Jngo tichjaa xi Diane ʼmi tsabe nga kʼoatjín kjoaixi jebi. Kʼianga táo chʼin kiskatʼale je xʼinle, je ndsʼee kitsjoanganʼiole kʼoa tsakinyakao nga tosi tonda koanchriantʼale Jeobá. Itso: “Nʼio ñʼai koanna nga kitjochʼinle je xʼinna, tonga tsaʼyaníjin josʼin tsakinyakaonajin Jeobá. Nʼio tsakinyakaonajin je ndsʼee xi tjío ya jinjtín. Alikui jme xi kichanajin. Kichosíxatʼanajin, kinchja̱najin, kitsoakjánajin... Kʼoa nga tsín mana sixákoa carro, jé kikaona kjoajtín kʼoa nga kixinyasoan kʼianga kʼoakoanna”. Nʼio tsjoa satío tokoán nga tsjoakená je ndsʼee kao tichjaa xi tjío ya jinjtín.

15. Ánni nga tjínjngoni tokoán nga chókjoajinná je kjoa xi kuitjátojiaan.

¹⁵ Ngatsʼiñá nga kjoa kuitjátojiaan. Tonga tojosʼin tiʼyaa, alikui toñá tiyoaa. Tojo sʼín jngo nʼai xi tsjoake xtile, je Jeobá kʼoasʼin síkuindaná ngantsjai. Je Jeobá tíjnandaa nga kjuinrʼoéná kʼianga kʼoakʼuínlee nga katabasenkaoná kʼoa nga tsjoánganʼioná (Is. 43:2). Tjínjngoo tokoán nga chókjoajinná tojme kjoa xi kuitjátojiaan, nga̱ tsjoáná je Jeobá jmeni xi koasenkaoná nga chókjoajinná: nga ma bʼetsʼoalee, je Biblia, nkjín koya tjínná xi tʼatsʼe Niná nroani kʼoa je ndsʼee tsjoakená.

16. Jméni xi machjén nga sʼiaan nga tosi tonda sikuindaná Jeobá.

¹⁶ Nʼio bʼailee kjoanda Jeobá nga Nʼainá mani kʼoa nga kuenta sʼínná nga jngó jngoá. Jé Jeobá “xi tsjoa báya tokoán” (Sal. 33:21). Jósʼin koakolee Jeobá nga bʼailee kjoanda kʼianga kʼoasʼin síkuindaná. Kʼiaa nga kuenta sʼiaan ngayeje jmeni xi tsjoáná. Kʼianga tosi tonda sikuindaná je Jeobá kʼoati machjén nga si̱tjosonlee ngantsjai jmeni xi tsoná kʼoa nga kui kʼoasʼiaan jmeni xi sasénle. Tsa kʼoasʼiaan, sikuindaná ngantsjai nichxin (1 Ped. 3:12).