1. Jósʼin basenkaoná nga kui chobayañá josʼin tsaʼyaxkoaan je Énle Niná.

 JEJIN nkjín kʼa bʼeyanajmiá josʼin tsaʼyaxkoaan Énle Niná kʼianga kui kjonanginá je ndsʼee. Tsjoa sʼe tokoán nga bʼéyanajmíná je ndsʼee josʼin tsabexkon Jeobá kʼoa josʼin tsjoake koan. Kʼoati tsjoa sʼená nga bʼeyanajmílee jotjío tokoán nga Énle Niná tichotʼayá (Rom. 1:11). Nga kʼoasʼin chobanajmiá kui faʼaitsjenná nga tse kjoanda tjínná nga testigole Jeobá maa. Kʼoati basenkaoná nga tosi tonda kʼoasʼin mangínkoaa yaoná jotso je Énle Niná, ánni nga tsjoa sʼe̱ni kon Jeobá kʼoa nga nda kuiyoñá ngixko̱n (3 Juan 4).

2. Jmé xi chótʼayajiaan i̱ kjoaʼmiya jebi.

² I̱ kjoaʼmiya jebi kui chótʼayajin kʼa ánni nga tsjoachañá je Énle Niná. Kʼoati jchaa jméni xi sʼiaan nga tosi tonda chjí jchatokoán kjoanda jebi. Nga kui jebi chótʼayajiaan nʼio tsjoa sʼe̱ tokoán nga je Jeobá jaʼaikaojinná naxinandále (Juan 6:44). Kʼoa ngisaa koa̱nmená chja̱kaonajmíñá xi kjaʼaí je Énle Niná.

3. Ánni nga tsjoachañá je Énle Niná.

³ Nkjín koya tjínni anni nga tsjoachañá je Énle Niná. Xi ngisa chjíle kuinga tsjoachaa je Jeobá nga̱ jé tsoyaná jokjoantjínni xi kixi. Yaa Biblia tsoyaná nga nʼio tse  nganʼio tjínle, nga je kisinda ngʼajmi kao Sonʼnde. Nga Nʼainá mani tsjoakená kʼoa mandosinle xi tʼatsaan (1 Ped. 5:7). Je Jeobá “jngoo Niná xi tjínle kjoamatokon kʼoa xi mamake chjota, likui tokjoan síjtile yaole kʼoa nʼio tjínle xi ñaki kjoatsjoacha kʼoa kao xi ñaki kʼoatjín” (Éx. 34:6). Kui kjoatéxomakixi tsjoake Jeobá (Is. 61:8). Aon male Jeobá kʼianga kjoañʼai chjaʼá kʼoa kjoaʼaxin je kjoañʼai kʼianga kuichoka nichxin xi jetíjnachoa̱le (Jer. 29:11). Jemená nga katafaʼai nichxin nga kjoaʼaxin je kjoañʼai, kuinga nʼio tsjoachañá je Jeobá.

4, 5. Ánni nga jngo ki̱cha̱ʼba̱ kisingósonkaoni Pablo je kjoachoya xi tjínná.

⁴ Ijngo koya anni nga tsjoachañá je Énle Niná kuinga nʼio basenkaoná. Jngola choa̱ kataʼyaa. Nkjín koya jmeni xi bakóyaná je Biblia, jolani je kjoachoya xi tjínná tʼatsʼe nichxin xi sʼa nroa. Kʼianga kui kinchja̱ni Pablo jokji chjíle kjoachoya jebi, i kitso: “Je kjoachoyakaokjoabi xi tjínná kjoakixiní, kʼoa síkʼéjnanʼio ni̱ma̱ná joni tsa jngo ki̱cha̱ʼba̱ xi kjitʼanʼio” (Heb. 6:19). Tojo ma je ki̱cha̱ʼba̱ nga síkájnanʼio je barco, kʼoatisʼinni jmeni xi bakóya je Biblia, basenkaoná kʼianga kjoa bitjatojiaan.

⁵ Kʼianga kʼoakitso Pablo jé kinchja̱ni chjotale Cristo xi ya ngʼajmi koai. Tonga jmeni xi kitso kʼoati bʼakaotʼale je chjotale Cristo xi i̱ koyale koatio ngantsjai nichxin i̱ Sonʼnde nga jeʼndenaxó koa̱n (Juan 3:16). Nda bʼé tokoán kʼianga kui kjoachoya tjínná nga koa̱n kuiyoaa ngantsjai nichxin.

6, 7. Jósʼin tsakasenkao Yvonne jmeni xi bakóya je Biblia tʼatsʼe nichxin xi sʼa nroa.

⁶ Kataʼyala jokoan jngo tichjaa xi Yvonne ʼmi. Tsín Énle Niná kotʼaya nga sʼa ʼndí kji kʼoa kitsokjonle je kjoabiya. Ñandia nga jngo libro tsakʼéxkia xi i̱ tso xi tjítʼa: “Kuicho jngo nichxin nga kuiyá ngatsʼiaa”. Itso: “Alikui kisʼefe nga tokuila kisikjaʼaitsjen én jebi, kui nʼio kisikjaʼaitsjenjian tʼatsʼe nichxin xi sʼa nroa. I kixian: Ánni nga tochoatse biyochonñá, jmé xá tijnaña, kʼoa likui mena kuiyáa”.

⁷ Kʼianga jekoanjchínga Yvonne kʼiaa tsabexkon je testigole Jeobá. Itso: “Koankjainna nga koa̱n kuiyoaa ngantsjai nichxin kʼianga jeʼndenaxó koa̱n Sonʼnde”. Nʼio tsakasenkao nga tsabe jokjoantjínni je Énle Niná, nga̱ itso: “Ndʼaibi, jenda bajnafe nga̱ tsín tikui sikjaʼaitsjenña tʼatsʼe nichxin xi sʼa nroa kʼoa tsa tʼatsʼe kjoabiya”. Je Yvonne nʼio chjí be je Énle Niná kʼoa fákaonajmíni xi kjaʼaí je kjoachoya xi tjínle (1 Tim. 4:16).

8, 9. 1) Jméni xi kisʼin je chjota xi kinchja̱ni Jesús nga chjí tsabe je kjoanyiná xi koansjaile. 2) Jótjín tokuin nga ʼyai je Énle Niná.

⁸ Je Énle Niná kʼoati ya tíjnajin je én xi bakoyasoán tʼatsʼe Chjotaxále Niná. Je Jesús yaa kisingósonkao jngo kjoanyiná xi tíjnaʼma je én xi bakoyasoán tʼatsʼe Chjotaxále Niná. I kitso: “Je kjoatéxomale ngʼajmi yaa mangóson joni tsa kjoanyiná xi tíjnaʼma jinle nangi. Kʼia nga jngo chjota koansjaile, tsakʼéjnaʼma. Kui nga tsjoale xi tʼatsʼe, ki katéna ngayije xi tjínle, kʼoa tsakatse je nangibe” (Mat. 13:44). Je chjota jebi alikui toxá tíbásjaini je kjoanyiná xi tíjnaʼma. Tonga kʼianga koansjaile tsakaténa ngayeje xi tjínle nga koan tsakatse je nangi jñani tíjnañe je kjoanyiná jebi. Kuinga kʼoakisʼinni nga̱ koa̱njinle nga ngisa chjíle kjoanyiná jebi tikʼoajinni jokji kjoama̱ kʼoengi nga tjoéle.

 ⁹ A kʼoati kji chjí ʼyatokoán tsanda ñá je Énle Niná. Tsín jme xi tjín i̱ Sonʼnde xi kʼoasikji tsjoa báya tokoán jokji tsjoa sʼená kʼianga je Jeobá nixálee ndʼaibi kʼoa nga koa̱n kuiyoaa ngantsjai nichxin kʼianga jekoatexoma Chjotaxále Niná i̱ Sonʼnde. Jokjitse kjoama̱ kʼoéngiaa nga nda kuiyoaa ngixko̱n Jeobá alikui toxitsjoani. Nʼio tse kjoanda tjínná nga miyole Niná maa. Nga kui kʼoanʼia jmeni xi sasénle Jeobá kui xi nʼio tsjoa bʼé tokoán (Col. 1:10).

10, 11. Jmé xi tsakasenkao Michael nga kisikʼantjaiya yaole.

¹⁰ Nkjín ndsʼee xi nkjín koya jme xi tjíosíkatío nga je Jeobá tjíosíxále. Tjínkʼa xi tjíosíkatío je xá xi sʼín ninga nda njele tsakai. Tjínkʼa xi tsín tikui kjoanyiná básjaini kʼoa tjínkʼa xi ñaki kisikʼantjaiya yaole nga je Jeobá kisixále. Kʼoakisʼin je Michael nga jetsabe Énle Niná. Nga sʼa xti, nga kjesa kotʼayajin je Énle Niná kui xi artes marciales ʼmi kiskotʼaya. Itso: “Tsjoa kisʼe tokoan nga taja koan. […] Kʼoasʼin kisikjaʼaitsjen sakʼoa nga tsín ʼya xi sikinjena”. Tonga nga jekiskotʼaya Biblia koanjinle josʼin síkjaʼaitsjen Jeobá xi tʼatsʼe kjoatsʼen (Sal. 11:5). Kʼianga kui bʼéyanajmí tʼatsʼe ndsʼee kao tichjaa xi kitsoyale Biblia, itso: “Alikui kʼoakitsona nga sikʼéjna je artes marciales, tosaa kui kitsoyana jokjoantjínni je Énle Niná”.

¹¹ Kʼianga tsabesa xi tʼatsʼe Jeobá je Michael sa tsjoake sa tsjoake koan. Je xi nʼio tsakasenkao kuinga koanjinle nga mamake Niná je chjota. Je Michael koanjinle nga tjínnele sikʼantjaiya yaole. Itso: “ʼBeña nga nʼio ñʼai koa̱nna nga sikʼéjna je karate. Tonga kʼoati ʼbe nga tsjoa sʼe̱ kon Jeobá tsa sikʼéjna je karate kʼoa ñaki tjínjngo tokoan nga tsín toxitsjoa nga je Niná nixálee”. Je Michael nʼio chjí tsabe nga koanjinle jokjoantjínni je Énle Niná kʼoa kui xi tsakasenkao nga kisikʼantjaiya yaole (Sant. 1:25).

12, 13. Jósʼin tsakasenkao je Mayli nga koanjinle jmeni xi tso je Biblia.

¹² Kʼianga kʼoatso Biblia jokji chjíle je Énle Niná yaa síngósonkao jngo lámpara xi síʼisen jñani njio chon (Sal. 119:105; Efes. 5:8). Je Mayli, xi Azerbaiyán tsʼe nʼio tsjoa tjín kon nga kjimajinle jotjínni je Énle Niná. Kjaʼaí kjaʼaí religión tjíojin je xijchále, je pale musulmán kʼoa je male judía. Je Mayli itso: “ʼBeña nga tíjna Niná, tonga tjín jmeni xi to jao tsakʼé tokoan. Kui kisikjaʼaitsjen jmé xá kisindaniná Niná. Kʼoati tsín koanjinna ánni kjoañʼai chjaʼañá jokjitse biyoaa, kʼoa tikjoañʼai chjaʼangáñá nga bichoaa jña lʼí tífaʼájnga̱. Je chjota kʼoatso nga je Niná xosʼín ngayeje jmeni xi ma kʼoa kuinga i̱ kixinña: A tokʼoa síkaoná Niná josʼin mele. A tsjoa sʼe kon nga kjoañʼai chjaʼá”.

¹³ Je Mayli tosi tonda tsakásjaiya jmeni xi to jao tsakʼé kon. Xijekoanni, tsakʼinyale Biblia kʼoa testigole Jeobá koan. Itso: “Nga koanjinna jmeni xi tso Biblia tsjoa tjín tokoan. Alikui tikʼoasʼin sikjaʼaitsjenña josʼin sikjaʼaitsjen ngasʼa”. Joni je Mayli, ngatsʼiaa xi je Jeobá nixálee chʼasjengʼañá nga̱ jeʼyaa jokjoantjínni xi tʼatsʼe. Je Biblia itso: “Niná xi kinchja̱no jña nga isenxkón, jitjoo jña nga njio” (1 Ped. 2:9).

14. Jméni xi sʼiaan nga sa tsjoacha sa tsjoacha koaan je Énle Niná (kʼoati chótsenlai je recuadro “ Xi kjaʼaísa choa̱”).

¹⁴ Je choa̱ xi tiʼyaa i̱bi kui bakóná jokji chjíle je Énle Niná, kʼoa nkjínsa choa̱ tjín. Koaan si̱kjaʼaitsjenjinsaa choa̱ xi bakóná  ánni nga tsjoachañá je Énle Niná. Nga sa tsjoacha sa tsjoacha koaan ngisaa koa̱nmená kʼoasʼiaan jmeni xi tso.

15. Jósʼin koakoá nga tsjoachaa je Énle Niná.

¹⁵ Jngo koya josʼin koakoá nga tsjoachaa je Énle Niná kʼiaa nga kjitʼa chótʼayá je Biblia kao xo̱n xi síkasénná naxinandále Niná. Ni chriansʼa kʼoa ni jekjoatsená nga tichotʼayá machjén nga tosi tonda kʼoasʼiaan. Kʼianga tosʼa kitjo títjon revista jebi nga én inglés kʼoakitso nga je Énle Niná yaa mangóson jngo naxó xi ya séjna ʼndekixí, xi kui jñá xi tsín nda kijnajtsane. Kʼiatsa mená nga koa̱nsjainá, machjén nga nʼio nda kjoásjee. Kʼoa nga jekoa̱nsjainá, alikui tokʼoéjngoaa tokoán. Tjínnele tosi tonda kuijnyísjesaa. Machjén nga kʼoénelee yaoná nga chótʼayá je Énle Niná kʼoa tsín toxitsjoani tsa kʼoasʼiaan.

16. Jósʼin chotʼayai ji je Biblia (Proverbios 2:4-6).

¹⁶ Alikui tongatsʼiaa nga tsjoachaa nga bʼexkiaa kʼoa nga chotʼayá, tonga je Jeobá kui xi mele nga tosi tonda kjoásjee kjoankjíntokon ánni nga koa̱njinniná jokjoantjínni xi tʼatsʼe (tʼexkiai Proverbios  2:4-6). b Nʼio koasenkaoná tsa kʼoénelee yaoná nga kʼoasʼiaan. Jngo ndsʼee xi Corey ʼmi kʼoatso nga tojngokjoán versículo xi kuenta sʼín kʼianga ñandia ñandia bʼéxkia je Biblia. Itso: “Bʼexkiaña je nota xi faʼaitʼa, bʼexkiaña je referencias marginales kʼoa kotʼayajinña. […] Nga kʼoasʼian nda majinna jmeni xi bʼexkia”. Koaan kʼoasʼin chótʼayá josʼín je ndsʼee kʼoa koaan kjaʼaísʼin chótʼayá, tonga tsa chʼa̱sjeʼaa nichxin nga chótʼayá je Biblia kʼoasʼin koakoñá nga chjí ʼyaa je Énle Niná (Sal. 1:1-3).

17. Jósʼin tsoyanile nga kʼoasʼin mangínkoaa yaoná jotso je Énle Niná (Santiago 1:25).

¹⁷ Ali tsa tokuijin xi machjén nga chótʼayá je Énle Niná. Machjén nga si̱tjosoán kʼoa kʼoasʼin kjuinkoaa yaoná jotso. Tsa kʼoasʼiaan, tsjoa sʼe̱ tokoán (tʼexkiai Santiago 1:25). c Jósʼin jchañá tsa kʼoasʼin timangínkoaa yaoná jotso je Énle Niná. Jngo ndsʼee xi kʼoatso nga tjínnele si̱kjaʼaitsjenjiaan jotinʼia, jñani nda tinʼia kʼoa jñani machjén nga si̱ndayasaa yaoná. Je pastro Pablo i kitso: “Je xi jejichotjenngilee, tokʼoasʼin séndiaa kjuinkaosaa tongóson kʼoétakoán” (Filip. 3:16).

18. Ánni nga bʼenenilee yaoná nga tosi tonda kʼoanʼia jotso je Énle Niná.

¹⁸ Si̱kjaʼaitsjenjiaan josʼin basenkaoná nga tosi tonda kʼoanʼia jotso je Énle Niná. Nda biyoaa, tsjoa sʼe kon Jeobá kʼoa nda satío kon je ndsʼee (Prov. 27:11; 3 Juan 4). Kuinga nʼio tsjoachañá je Énle Niná kʼoa kuinga kʼoasʼin mangínkaoñá yaoná jotso.