1. Jmé kjoa xi jaʼatojin je José kʼoa jókisʼin.

 NʼIO ñʼai tjín kjoa jaʼatojin je José, je tile Jacob. Jngo chjoón xi i̱ kitsole: “Sojnakaonái”. Ningalani je chjoónle Potifar xokitsole nga koájnakao, xi naile mani, je José alikui kʼoakisʼin. Tsakui nichxin tjínkʼa xi kʼoakuitso ánni koankainile je José nga tsakajnakao, nga̱ tsín ya tíjna Potifar kʼoa je José to choʼnda ma. Kʼoa tsa tsín sijyo José totaonjin skoe̱ chjoón jebi. Ninga kʼoalani, alikui kʼoakisʼin je José ninga ntsjaintsjai kʼoakitsole nga katabajnakao. Ánni. Je José i kitso: “Ánni nga kui kʼoasʼinsíña je xi nʼio chʼaotjín kʼoa nga jée koanjngisíña ngixko̱n Niná” (Gén. 39:7-12).

2. Ánni koanjinnile José nga tseni jée ngixko̱n Niná kʼianga nichajngiaa.

² Jmé xi tsakasenkao José nga koanjinle nga nʼio chʼaosʼin tíjna ngixko̱n Niná nga je koájnakao jngo chjoón xi jexʼin tjínle. Nga̱ jaola siento nó koanskanni nga i̱ tso kjoatéxoma xi tsakʼaile Moisés: “Ali nichajngijin” (Éx. 20:14). Jmeni xi jebe je José tʼatsʼe Jeobá koanjinle josʼin síkjaʼaitsjen xi tʼatsʼe kjoachajngi. Tobʼelañá, be nga kʼoasʼin tsakʼéndajin Niná nga tojngo chjoón jngo xʼin koatiokao xínkjín nga jekuixan. Tsakui nichxin kisʼejinle josʼin tsakasenkao Jeobá je Sara, xi majchákjinle koanni kʼianga jao rey xi koanmele tsakajnakao. Kʼoajin tifaʼaitsjenle nga kʼoatisʼin kisikuinda Jeobá je Rebeca, je chjoónle Isaac (Gén. 2:24; 12:14-20; 20:2-7; 26:6-11). Nga kui kisikjaʼaitsjen jebi je José koanjinle jmeni xi ndatjín kʼoa xi chʼaotjín ngixko̱n Niná. Nga tsjoake koan Jeobá kʼoati tsjoake koan kjoatéxomale kʼoa kisitjoson.

3. Jmé xi chótʼayajiaan i̱ kjoaʼmiya jebi.

 ³ Tsjoachañá je kjoatéxomakixile Niná. Tonga nga chjotajée maa ngatsʼiaa tsakui nichxin kʼoatisʼin si̱kjaʼaitsjeen josʼin síkjaʼaitsjen chjota xi tsín Niná síxále tʼatsʼe xi ndatjín kao xi chʼaotjín (Is. 5:20; Rom. 12:2). Kuinga kui chótʼayajinsíñá jósʼin tíjna je kjoatéxomakixile Niná kʼoa jósʼin basenkaoná nga tsjoacha maa. Xijekoa̱n, jan koya tjínni xi chótʼayajiaan xi koasenkaoná nga ngisa tsjoacha koaan je kjoatéxomale Jeobá.

4. Jméni xi sʼín chjota nga tsín kjoatéxomakixile Niná fitjenngi.

⁴ Kʼianga jaʼai Jesús i̱ Sonʼnde, je chjota xi tsakinyatítjonle religión nʼio kixi tsakʼasje yaole. Tonga je Jesús kʼoakitsole nga tsín nda kisʼin nga totaon tsabe xi kjaʼaí kʼoa nga totsʼe kjoatéxoma kisichjén tʼatsʼe jmeni xi ndatjín kao xi chʼaotjín (Ecl. 7:16; Luc. 16:15). Nichxin xi tiyoaa ndʼaibi, tjín je xi kʼoati sʼín joni chjota jebi. Kʼoasʼin síkjaʼaitsjen nga tsín chʼaotjín jmeni xi sʼín. Ngʼa bʼasje yaole kʼoa tobesin xi kjaʼaí. Alikui sasénle Niná nga kʼoasʼín je chjota nga̱ tsínkui kjoatéxomakixile fitjenngi.

5. Tojo tso je Biblia, jmé xi tsoyanile nga kixi maa. Tikʼaxki̱ kʼai choa̱.

⁵ Nʼio naskásʼin tíjna je kjoatéxomakixi. Kui xi tsonile nga kui kʼoanʼia jmeni xi sasénle Niná. Kʼianga “kjoatéxomakixi” síkʼaxki̱ Biblia kui nchja̱ni nga kʼoasʼin mangínkoaa yaoná jotso kjoatéxomale Jeobá. Tobʼelañá, kʼoakitsole Jeobá je chjota xi tsojmi baténa nga ndakjoán katabʼécho̱ya kʼoa nga tsín jme xi sichale (Deut. 25:15). Tobʼelañá, jngo chjotale Cristo xi mele nga kixi koa̱n machjén nga tsín sichéson kʼianga negocio sʼín. Xi ijngosani, je xi tsjoake kjoatéxomakixile Jeobá alikui sasénle nga totaon ʼya xi kjaʼaí. Kʼoa nga mele ndasʼin kʼoéjna ngixko̱n Niná jé kuenta sʼín ngantsjai kʼianga jme xi sʼín (Col. 1:10).

6. Ánni nga jeni Jeobá xi koa̱nle tsjoáná kjoatéxoma tʼatsʼe jmeni xi ndatjín kao jmeni xi chʼaotjín (Isaías 55:8, 9).

⁶ Je Biblia kʼoatso nga ya tíjna je kjoatéxomakixi jñani tíjna Jeobá. Kui xi tsonile nga tʼatsʼe nroani je kjoatéxomakixi (Jer. 50:7). Nga je Jeobá kisindaná, tojékjoán xi tiʼndele nga kʼoakuitsoná jmeni xi ndatjín kʼoa jmeni xi chʼaotjín. Kʼoa nga ñaki tsje je Niná alikui mangóson josʼin síkjaʼaitsjen kʼoa josʼin nikjaʼaitsjeen ñá nga̱ chjotajée maa (Prov. 14:12; tʼexkiai Isaías 55:8, 9). b Tonga koaan kʼoasʼin kjuinkoaa yaoná jotso kjoatéxomale Jeobá nga̱ kʼoasʼin kisindaná jokjoan je (Gén. 1:27). Kʼoa ñaki kao kjoatsjoa nitjosoán kjoatéxomale. Nga tsjoacha je Jeobá bʼenelee yaoná nga chjenngilee jokjoan (Efes. 5:1).

7. Ánni ndatjínni nga tjín kjoatéxoma. Jngo choa̱ tʼejnai.

⁷ Nda biyoaa nga nitjosoán je kjoatéxomale Jeobá nga kʼoatsoná jmeni xi ndatjín kʼoa jmeni xi chʼaotjín. Ánni. Jngola choa̱ si̱kʼéjnaa. Si̱kjaʼaitsjenla jókoa̱n tsa totsen tsen kʼoakuitso nga jngó jngó banco jotjín chjíle je tao̱n, alikuijin ndasʼin kuichomani. Kʼoa ya jngo hospital tsa tokʼoasʼin sixki nga jngó jngó chjinexki josʼin mele tjínjinkʼa chjota xi kuiyá.  Ndasʼin bichómani nga mangíntjenngiaa je kjoatéxoma xi tjín. Kʼoatisʼinni, nda biyoaa nga kui kjoatéxomale Niná mangíntjenngiaa.

8. Jmé kjoanda xi sʼe̱le je xi tsjoake kjoatéxomakixile Niná.

⁸ Je Jeobá síchikontʼain je xi sítjoson kjoatéxomale. Itso: “Je xi kixi tsʼee koa̱n sonʼnde kʼoa i koatio ngantsjai nichxin” (Sal. 37:29). Tikjaʼaitsjenlai josʼin kuiyoaa kʼianga kui kjoatéxomale Jeobá koaitjenngi ngatsʼi chjota. Nʼio tsjoa sa̱tío tokoán, nda kjuinkoaa xíngiaa kʼoa jtín sʼin kuiyoaa. Kui xi mele Jeobá nga kʼoasʼin kuiyoaa. Kuinga nʼio tsjoachañá je kjoatéxomakixile. Jméni xi sʼiaan nga ngisa tsjoacha koaan. Janla koya kataʼyaa xi koasenkaoná.

9. Jmé xi koasenkaoná nga tsjoacha koaan je kjoatéxomakixi.

⁹ Xi títjon: Tsjoacha katamaa je xi tsjoáná kjoatéxoma. Tsa mená nga tsjoacha koaan je kjoatéxomakixi ngisaa machjén nga tsjoacha koaan je xi kʼoatsoná jmeni xi ndatjín kao xi chʼaotjín. Kʼianga ngisa tsjoacha koaan je Jeobá ngisaa koa̱nmená si̱tjosoán kjoatéxomale. Tobʼelañá, tsa tsjoakelani koan Jeobá je Adán kao Eva likuijinkʼia jaʼatone kjoatéxomale (Gén. 3:1-6, 16-19).

10. Jmé xi kisʼin Abrahán nga koanjinle josʼin síkjaʼaitsjen Jeobá.

¹⁰ Likui mená nga kʼoati sʼiaan jokisʼin je Adán kao Eva. Nga tsín kʼoati sʼiaan machjén nga sa nda sa nda jchaxkoaan je Jeobá, chjí jchatokoán jokjoan kʼoa kʼoatisʼin si̱kjaʼaitsjeen josʼin síkjaʼaitsjen. Sa tsjoacha sa tsjoachajin koaan tsa kʼoasʼiaan. Jolani je Abrahán nʼio tsjoake koan je Niná. Ninga tsín ndi̱to̱n koanjinle jme xi kitso Jeobá nga sʼin alikui jaʼatone kjoatéxomale, tosaa tsakʼénele yaole nga ngisa nda tsabexkon. Tobʼelañá, kʼianga kisʼejinle nga kʼoakitso Jeobá nga sikjeson je Sodoma kao Gomorra, kʼoasʼin kisikjaʼaitsjen nga tsín kixi tíjna jmeni xi sʼin je Jeobá, nga tojngo sikjeson je xi kixi kao xi tsʼen. Alikui koankjainle tsa kʼoasʼin Niná, kuinga ngasin nganda kʼoakitsonile josʼin síkjaʼaitsjen. Je Jeobá kinrʼoé jme xi kitsole, kʼianga jetsakjáonajmí, je Abrahán koanjinle nga kui fini Jeobá jotjío ni̱ma̱le chjota kʼoa nga tsínkʼia kjoañʼai tsjoále je xi nda chjota kʼianga síkjeson je chjotatsʼen (Gén. 18:20-32).

11. Jósʼin tsakakó Abrahán nga tsjoake koan Jeobá kʼoa nga je kisinʼiotʼa.

¹¹ Alikui kichajinle Abrahán josʼin tsakjákaonajmí Jeobá tʼatsʼe Sodoma kao Gomorra. Ngisaa tsjoake koan kʼoa ngisaa tsabexkón je Jeobá. Kʼianga jenkjín nó jaʼato, ñʼai tjín kjoa jaʼatojin Abrahán kʼoa yaa tsakakóni tsa ñaki je Jeobá kisinʼiotʼa. Je Jeobá kʼoakitsole nga je Isaac katatsjoátʼale, je ʼndíle. Nga kʼia, alikui tijokitsoni Abrahán nga̱ jenda bexkon Jeobá, tosaa kʼoakisʼin jme xi tsakʼinle. Tonga tojo ñʼaijin koanle nga tsakatíonda jmeni xi koanchjénle nga tsjoátʼa je ʼndíle. Kuijin kisikjaʼaitsjen jmeni xi koanjinle tʼatsʼe Jeobá, nga̱ be nga kui xi kixi tjín kʼoasʼín ngantsjai je Niná. Je pastro Pablo kʼoakitso nga je Abrahán koanjinle nga koa̱n sikjaʼáyanile Jeobá je Isaac (Heb. 11:17-19). Nga̱ je Jeobá kʼoakitsole nga ya ntje̱le Isaac kjuinroani jngo naxinandá, kʼoa nga kui nichxin kje tsínjinle xti je Isaac. Nga nʼio tsjoake koan Abrahán je Jeobá ñaki tsakʼéjngo kon nga kui xi kixi tjín kʼoasʼin. Ninga tsín choa ñʼai koanle je  Abrahán kisitjosonle je Niná nga̱ koankjainle xi tʼatsʼe (Gén. 22:1-12).

12. Jósʼin koa̱n chjénngilee je Abrahán (Salmo 73:28).

¹² Jósʼin koa̱n chjénngilee je Abrahán. Machjén nga sa nda sa nda jchaxkoaan je Jeobá. Tsa kʼoasʼiaan, ngisaa koa̱nchriantʼalee kʼoa ngisaa tsjoacha koaan (tʼexkiai Salmo 73:28). c Kʼoatisʼin si̱ngalee yaoná nga kʼoasʼin si̱kjaʼaitsjeen joni Jeobá (Heb. 5:14). Alikuijin si̱jyoaa kʼiatsa ʼya xi kʼoakuitsoná nga kui xi chʼaotjín kʼoasʼiaan. Saʼnda tsínjin kui si̱kjaʼaitsjeen nga kui kʼoasʼiaan jmeni xi chʼao kʼoe kon je Niná, nga̱ mená nga tosi tonda miyoná koa̱nni. Jmésa xi machjén nga sʼiaan nga koakoá nga tsjoachaa je kjoatéxomakixile Niná.

13. Jméni xi sʼiaan nga kjoásjee je kjoatéxomakixi (Proverbios 15:9).

¹³ Xi majaoni: Kʼoénelee yaoná nga nyaon nyaon nga tsjoacha koaan je kjoatéxomakixi. Nga ngisa tsjoacha koaan je kjoatéxomale Jeobá yaa mangóson jonʼia nga nitajaa yaoná, machjén nga kjitʼa ejercicio sʼiaan kʼoa koaan nga nyaon nyaon kʼoasʼiaan. Je Jeobá be jokji tjen bichó nganʼioná nga̱ tsín tsʼatone kʼoakji síjéná jokji tjen kʼoakoa̱nná (Sal. 103:14). Je Jeobá kʼoatsoná nga tsjoake je xi kjoatéxomakixi básjai (tʼexkiai Proverbios 15:9). d Kʼianga mená nga ngisa nda si̱xálee Niná bʼenelee yaoná nga bitjosonná josʼin bʼendajiaan. Kʼoatinʼia nga fasjee je kjoatéxomakixi. Kʼoa jé Jeobá koasenkaoná nga sa nda sa nda sʼiaan nga jekoai nichxin (Sal. 84:5, 7).

14. Jméni je xi “najñoki̱cha̱ xi ngoyale kjoa xi tjínle kjoakixi” ʼmile, kʼoa ánni nga kui machjénniná.

¹⁴ Nga tsjoakená Jeobá kʼoatsoná nga tsín ñʼai tjín nga kuitjosonná jmeni xi tsoná (1 Juan 5:3). Kʼianga kʼoanʼia basenkaoná kʼoa machjénná nga nyaon nyaon. Si̱kjaʼaitsjenla jmeni xi kisikʼaxki̱ Pablo  xi basenkaoná (Efes. 6:14-18). Jméni je xi síkuinda ni̱ma̱ná. Je “najñoki̱cha̱ xi ngoyale kjoa xi tjínle kjoakixi”, xi tsonile, je kjoatéxomale Jeobá. Tojosʼin basenkao ni̱ma̱ná je najñoki̱cha̱, je kjoatéxomale Jeobá kʼoatisʼin síkuinda je ni̱ma̱ná, xi tsonile jokjoaan. Kuinga nʼio machjénsíni nga chʼa̱kjá ʼndeʼndee je najñoki̱cha̱ xi ngoyale kjoa xi tjínle kjoakixi (Prov. 4:23).

15. Jósʼin chʼakjá je “najñoki̱cha̱ xi ngoyale kjoa xi tjínle kjoakixi”.

¹⁵ Jósʼin chʼakjá je “najñoki̱cha̱ xi ngoyale kjoa xi tjínle kjoakixi”. Kʼiaa nga kuenta nʼia je kjoatéxomale Jeobá nga nyaon nyaon. Nga sʼa tinikjaʼaitsjeen jmeni xi chobayañá, jme música xi kuinóʼyalee, josʼin kʼoétsaojiaan kʼoa tsa jme libro kʼoéxkiaa, i̱ tso xi si̱kjaʼaitsjeen: “Jmé xi kjoaʼasʼenjin ni̱ma̱na. A sa̱sénle je Jeobá. Axo kui faʼaijin xi tsín kixi tíjna ngixko̱n Jeobá, jolani kjoachajngi, kjoatsʼen kjoaxkaiʼa kʼoa nga to yaole fini chjota” (Filip. 4:8). Kʼiatsa kui kʼoasʼiaan jmeni xi sasénle Jeobá, kui kjoatéxomale koasenkaoná nga tsínkui si̱kʼasʼenjiaan ni̱ma̱ná xi chʼaotjín.

16, 17. Jósʼin basenkaoná jmeni xi tso Isaías 48:18 nga koa̱n kuitjosonná je kjoatéxomale Jeobá ngantsjai.

¹⁶ Jmé xi koasenkaoná tsa kʼoasʼin nikjaʼaitsjeen nga tsín kuitjosonná nga nyaon nyaon kʼoa jokji kjoaʼato nichxin je kjoatéxomale Jeobá. Si̱kjaʼaitsjenjinla je choa̱ xi síchjén Jeobá tojosʼin faʼaitʼa ya Isaías 48:18 e (tʼexkiai). Je Jeobá kʼoatso nga je kjoakixiná yaa mangóson je “xóle ndáchikon”. Si̱kjaʼaitsjenjinla tsa ya ndaindáchikon tiyoaa kʼoa tiʼyaa joma je xóle ndáchikon nga tifaʼai tifaʼaini, nga kʼia alikuijin kʼoasʼin si̱kjaʼaitsjeen nga kuicho nichxin nga tsín tikʼoakoa̱nni. Nga̱ ʼyañá nga jejmi nó tjínle nga kʼoakjima je xóle ndáchikon kʼoa tosi tonda kʼoakoa̱n.

¹⁷ Jméni xi sʼiaan nga ya katamangóson je kjoakixiná je xóle ndáchikon. Kʼianga jme xi mená sʼiaan kui títjon si̱kjaʼaitsjeen jmeni xi mele Jeobá nga sʼiaan, kʼoa xijekoa̱n kʼoasʼiaan. Ninga ñʼai koa̱nná nga chjoéjiaan jmeni xi sʼiaan, je Jeobá tíjnandaa ngantsjai nga koasenkaoná kʼoa nga kuitjosonná kjoatéxomale nga nyaon nyaon (Is. 40:29-31).

18. Ánni nga tsín koa̱n ñá kʼoakʼuínnilee josʼin xi ngikʼa.

¹⁸ Xi majanni: Kʼoaiʼndelee nga je Jeobá katabʼéndajin kjoa. Ningalani kʼoasʼin mangínkoaa yaoná jotso je kjoatéxomale Jeobá alikui koa̱n nga yaoná si̱ngósonkoaa kao josʼín xi kjaʼaí, kʼoa alikui koa̱n kʼoasʼin si̱kjaʼaitsjeen nga ngisa nda nʼia tikʼoajinni je. Alikui tiʼndená nga ñá kʼoakʼuínlee tsa sitjoson jotso je Jeobá kʼoa tsa mai. Kuenta sʼiaan nga jé Jeobá xi Juez sʼin tíjna jngo tjíjtsa Sonʼnde (Gén. 18:25). Ali tsañájián xi juez tísíkatíoná. Je Jesús itso kjoatéxoma xi kitsjoa: “Ali jéejin fanao, jméni nga tsín jée koanenino” (Mat. 7:1). f

19. Jósʼin tsakakó José nga koankjainle nga tjínle kjoatéxomakixi je Niná.

¹⁹ Si̱kjaʼaitsjenjinla ijngokʼá jokisʼin je José, jngo chjota xi kixi koan. Alikui jée tsakáne xi kjaʼaí ninga kʼia nga totaon tsaʼya.  Tijéni ndsʼe̱ xi totaon tsabe, jochoʼnda sʼin tsakaténa kʼoa kʼoakitsole nʼaile nga kʼien je José. Nga jenkjín nó jaʼato, kiskajin ijngokʼa je ndsʼe̱. Kʼianga je jetíbatéxoma koanjin nga totaon tsabe je ndsʼe̱ kʼoa nga kisijndangajaoni jme xi kisikao. Ningalani kʼoakoannile jme xi kisʼin je ndsʼe̱ kʼoasʼin kisikjaʼaitsjen nga sijndangajaoni José jme xi koantʼain. Tonga je José i kitsole: “Ali nokjonjion, nga̱ tsín Niná tijnangajaole” (Gén. 37:18-20, 27, 28, 31-35; 50:15-21). Je José nangitokon koan kʼoa kʼoasʼin kisikjaʼaitsjen nga toje Jeobá xi tiʼndele kʼoendajinle kjoa je xtindsʼe̱.

20, 21. Jmé xi koasenkaoná nga tsín ngisa kixi chʼa̱sjee yaoná tikʼoajinni xi kjaʼaí.

²⁰ Tojo kisʼin je José kʼoati bʼaiʼndelee Jeobá nga je katabʼéndajin kjoa. Tobʼelañá, tsín ʼyaa ánni kʼoasʼínni je ndsʼee tsa jmeni, nga̱ tsín ʼyaa jotjío je ni̱ma̱le. Tojé Jeobá xi be jotjío ni̱ma̱ná (Prov. 16:2). Je Niná tsjoake ngatsʼi chjota tojñani tsʼe, kʼoa itsoná: “Titseyao ni̱ma̱no” (2 Cor. 6:13). Je xi mená kuinga tsjoacha koaan ngatsʼi je ndsʼee, alikui mená nga ñá kʼoakuixoán tsa nda tjíosʼín kʼoa tsa chʼao tjíosʼín.

²¹ Kʼoati tsín ñá kʼoabixoán tsa nda tjíosʼín kʼoa tsa mai xi kjaʼaí chjota (1 Tim. 2:3, 4). Tobʼelañá, alikui ñá kʼoabixoán tsa nda tjíosʼín kʼoa tsa chʼao tjíosʼín xíngiaa xi tsín kotʼaya je Énle Niná, kʼoa tsín kʼoasʼin nikjaʼaitsjeen nga tsínkʼia koa̱nkjainle je Énle Niná. Tsa kʼoalani sʼin si̱kjaʼaitsjeen, ngʼakonjin kjimaa kʼoa ngisajin kixi tichʼasjee yaoná tikʼoajinni xi kjaʼaí. Je Jeobá títsjoáʼndesale ngatsʼi chjota nga kʼoakatamanile je jéele (Hech. 17:30). Je Jeobá chjotatsʼeen tsole je xi ngisa kixi bʼasje yaole tikʼoajinni xi kjaʼaí.

22. Ánni nga tsjoachani je kjoatéxomakixi.

²² Tsa tsjoachaa je kjoatéxomakixile Jeobá tsjoa sa̱tío tokoán kʼoa nda choa̱ koatiolee xi kjaʼaí. Tsa kʼoasʼiaan, tsjoake koa̱nná kʼoa tsjoake koa̱n Niná. Tosi tonda kjoásjee je kjoatéxomakixi (Mat. 5:6). Ñaki tjínjngoo tokoán nga kuenta sʼín je Jeobá nga nyaon nyaon kʼianga nitjosoán kjoatéxomale kʼoa nʼio tsjoa sʼe kon. Alikui si̱kʼajenlee tokoán ningalani tsín kjoatéxomakixi ndʼaibi, nga̱ ʼyañá nga je Jeobá tsjoake je chjota xi kixi (Sal. 146:8).