KJOAʼMIYA XI CHOTʼAYA 33
KJOAJNDA 130 Si̱chatʼalee xíngiaa
Jósʼin bekon Jeobá je xi ai jée bajngi kʼoa jósʼiaan nga chjénngilee
“Tsa jngo xi tsajngi jée, tíjnajngoná xi fajinná” (1 JUAN 2:1).
XI TÍNCHJA̱NI
Jmé xi bakóyaná jokoan kʼianga ai jée tsakajngi jngo chjotale Cristo ya jtín xi kisʼejna Corinto.
1. Jméni xi mele Jeobá.
JE Jeobá toxá kʼoasʼin kisindaniná nga ñá xi kuixónñá jmeni xi sʼiaan nga nyaon nyaon. Tonga je xi ngisa chjíle kuinga je Jeobá kʼoaitʼalee yaoná kʼoa nga naxinandále kuiyojiaan. Nga tsjoake Jeobá ngatsʼi chjota kui xi mele nga ndasʼin katabatio, nga miyole katama kʼoa nga katabatio ngantsjai nichxin (Deut. 30:19, 20; Gál. 6:7, 8).
2. Jméni xi mele Jeobá nga sʼin je xi bajngijée (1 Juan 2:1).
2 Je Jeobá kui xi mele nga ñá chjoéjiaan jmeni xi sʼiaan kʼoa alikui ʼya xi bʼénele nga je síxále. Kʼoa tsa jngo chjotale Cristo xi jekisʼenngindá ai jée koa̱njngí chʼasjejin jinjtín kʼiatsa tsín kʼoakoa̱nnile jéele (1 Cor. 5:13). Ninga kʼoalani, je Jeobá kui xi mele nga katasíndaya yaole nga̱ kui xá kisikasénni je ʼNdíle i̱ Sonʼnde nga kʼienntjainá ánni nga jchatʼaniná kʼiatsa kʼoakoa̱nniná je jéená (tʼexkiai 1 Juan 2:1). a Je Niná nʼio tsjoakená kʼoa kui xi mele nga kʼoakoa̱nniná kʼiatsa so̱kojéená (Zac. 1:3; Rom. 2:4; Sant. 4:8).
3. Jmé xi chótʼayajiaan i̱ kjoaʼmiya jebi.
3 Je Jeobá kʼoatsoná josʼin síkjaʼaitsjen tʼatsʼe jée kʼoa josʼin bekon chjota xi ai jée bajngi. Kui xi mele nga kʼoatisʼin si̱kjaʼaitsjeen josʼin síkjaʼaitsjen. I̱ kjoaʼmiya jebi, jan koya tjínni xi chótʼayajiaan. Xi títjon, jósʼin kisʼendajin nga ai jée tsakajngi jngo chjotale Cristo xi ya Corinto tsʼe. Xi majaoni, kui chótʼayajiaan je kjoafaʼaitsjen xi kitsjoa Pablo jokinikao je xi tsakajngijée kʼianga jekʼoakoannile jéele. Kʼoa xi majanni, jósʼin bekon Jeobá je xi ai jée bajngi.
JMÉ XI KISʼIN JE JTÍN NGA AI JÉE TSAKAJNGI JNGO CHJOTALE CRISTO
4. Jméni xi koan ya jtín xi kisʼejna Corinto (1 Corintios 5:1, 2).
4 (Tʼexkiai 1 Corintios 5:1, 2). b Kʼianga kjin kikakóyason Pablo xi majanni kʼa, kʼiaa kisʼejinle nga jngo chjotale Cristo xi ai jée tíbajngi ya jtín xi tosʼa choatsele nga kisʼejna ya Corinto. Je chjotale Cristo jebi tijé tsakajnakaoni je na̱jonle. Je Pablo kʼoakitso nga nʼio chʼao kisʼin nga̱ saʼnda tsín kʼoasʼín je chjota xi tsín makjainle je Énle Niná, nga tojo ya jinjtín tíjnajin je xi tíbajngijée tjínkʼa xi kʼoasʼin kisikjaʼaitsjen nga tsín chʼaotjín jmeni xi kjima kʼoa nga kjoamatokon tjíobakóle je xi tsakajngijée. Tonga ʼyañá nga je Jeobá alikui tsjoáʼnde nga ʼya xi bajngijée jinnaxinandále. Nga jngo chjotale Cristo tsakajngijée tsínjin ndasʼin tsʼaxki̱ je jtín xi kisʼejna ya Corinto. Kʼoa tsa tosi tonda ya tsakʼejna jinjtín je xi tíbajngijée kʼoajinti chan kisʼin je chjotale Cristo xi ngikʼa. Jméni xi kitsole Pablo je jtín xi kisʼejna ya Corinto.
5. Jmé xi kitsole Pablo je chjotale Cristo (1 Corintios 5:13; kʼoati chótsenlai sén xi faʼaitʼa).
5 (Tʼexkiai 1 Corintios 5:13). c Jé Niná xi kʼoasʼin koanmele nga kʼoakitsole Pablo nga tjínnele chʼa̱sjejin jinjtín jngo chjota xi tsín kʼoamanile jéele. Kʼoa je chjotale Cristo xi kixi tjíofitʼale Niná kʼoatsakʼinle nga tsín tikoa̱n ya koajtani je chjota xi tíbajngijée kʼoa tsín koa̱n ya koakjenkao (1 Cor. 5:11). Kʼianga tjín xi bichikoaa chobanajmíkaoñá. Kuinga kʼoakitsonile Pablo je jtín nga tsín koa̱n ya simiyo je xi ai jée tíbajngi, ánni nga tsín kʼoatisʼinni tsanda je (1 Cor. 5:5-7). Kʼianga kʼoanikao jngo xi bajngijée tikui basenkaoni nga kʼoamanile je jéele kʼoa nga machoyale nga tsín ndatjín jmeni xi tísʼín. Kʼoati majinle nga tsín nda sʼe kon je Jeobá kʼianga ʼya xi bajngijée.
Jé Jeobá xi kʼoasʼin koanmele nga kʼoakitsole Pablo je chjotale Cristo xi Corinto tsʼe nga katachʼasjejin ya jinjtín je xi tsín kʼoakjimanile je jéele (Chótsenlai párrafo 5)
6. Jókisʼin je chjotale Cristo kʼianga jekichole carta xi kisikasénle Pablo, kʼoa jókisʼin je xi tsakajngijée.
6 Je Pablo kui kisikjaʼaitsjenjin jósʼin je chjotale Cristo xi Corinto tsʼe kʼianga jekuichole carta xi kisikasénle. Nga koanskanni, je Tito kʼoakitsole Pablo nga kisitjoson chjotale Cristo jmeni xi tsakʼinle (2 Cor. 7:6, 7). Kʼianga jejaʼato choatse nga kichole carta je jtín, je chjota xi tsakajngijée kʼoakoannile jmeni xi kisʼin, kisindayaa yaole kʼoa kisitjoson ijngokʼa jmeni xi tso Jeobá (2 Cor. 7:8-11). Jmésani xi kitsole Pablo je jtín.
JÓSʼIN TSABEKON JTÍN JE XI KʼOAKOANNILE NGA TSAKAJNGIJÉE
7. Jósʼin tsakasenkao nga kichʼasjejin jinjtín je xi tsakajngijée (2 Corintios 2:5-8).
7 (Tʼexkiai 2 Corintios 2:5-8). d Je Pablo i kitso: “Je xi kʼoakisʼin, tokoanlanile je kjoañʼaibi, nga nkjín koan xi jekisikjaʼále”. Tsakasenkao je chjota xi tsakajngijée kʼianga kichʼasjejin jinjtín nga̱ kʼoakoannile jmeni xi kisʼin (Heb. 12:11).
8. Jmé xi kitsole Pablo nga koanskanni je chjotale Cristo.
8 Je Pablo kʼoakitsole chjotale Cristo nga tjínnele sichatʼale je xi ai jée tsakajngi. Kʼoakitsole nga katabakóle nga tsjoake kʼoa nga nda katakjoéya. Jmeni xi kuitsole kʼoa josikao kʼoasʼin koakonile nga jekisichatʼale. Kʼoa je xi tsakajngijée kʼoati skoe̱le kon nga tsjoa tjío kon je ndsʼe̱ nga kicho ijngokʼani jinjtín.
9. Ánni nga tjínkʼani xi tsín kisasenle nga ya jtín kichokʼejnajin ijngokʼa je xi kʼoakoannile jéele.
9 A tjínkʼa chjotale Cristo xi tsín kisasenle nga nda kitjoéya ijngokʼani ya jinjtín je xi kʼoakoannile jéele. Ningalani tsín kʼoatso Biblia, tsakui nichxin tjínkʼa xi tsín kisasenle kʼoa tsa tsakʼéngijti kon. Nga nda tjíosíxále je Jeobá kʼoa nga tjíobʼénele yaole nga tjíosítjoson jotso je kjoatéxomale Niná, tsakui nichxin tjínkʼa xi kʼoasʼin kisikjaʼaitsjen nga tsín ndatjín nga nda tjoéya ijngokʼani jinjtín je chjota xi ai jée tsakajngi (tingósonkoai Lucas 15:28-30). Ánni nga nʼio chjínile nga ndasʼin kiskoéya ijngokʼa je xi kʼoakoannile nga ai jée tsakajngi.
10, 11. Jméni xi koan tsa tsínlani kisichatʼale xi chjotajchínga sʼin tjío je xi kʼoakoannile nga tsakajngijée.
10 Tsínjin nda kisʼe kon je xi kʼoakoannile jéele tsa tsín kitsjoaʼndele je xi chjotajchínga sʼin tjío nga kichokʼejnajin ijngokʼani ya jinjtín kʼoa tsa tsín nda kiskoéya je jtín. Kʼoajinsʼin kisikjaʼaitsjen nga tsín tikʼia sichatʼanile Jeobá kʼoa nga toxitsjoa ninga sindaya yaole.
11 Alikuijin tindasʼin tsakationi ngixko̱n Jeobá je chjotale Cristo tsa tsín kisichatʼale je xi kʼoakoannile jéele, nga̱ tsínjin je Jeobá kiskenngile. Nga̱ je Jeobá tíjnandaa nga síchatʼale je chjota xi kʼoamanile jéele. Tsa tsínlani kisichatʼale je xi kʼoakoannile jéele kuijin kʼoakisʼin jmeni xi mele je Na̱i. Nga̱ je Na̱i nʼio tsʼen kʼoa kui xi mele nga tsín tije Jeobá sixá ijngokʼanile chjota xi ai jée tsakajngi (2 Cor. 2:10, 11; Efes. 4:27).
12. Jmé xi tjínnele kisʼin je chjotale Cristo xi Corinto tsʼe nga je Jeobá kiskenngile.
12 Jmé xi tjínnele kisʼin je chjotale Cristo xi Corinto tsʼe nga je Jeobá kiskenngile kʼoa nga tsínkui kʼoakisʼin josʼin mele Na̱i. Tjínnele kʼoasʼin tsabekon je chjota xi kʼoakoannile jéele josʼin bekon Jeobá. I kitso kʼa tʼatsʼe Jeobá je xi kiski Biblia. Je David i kitso: “Nda chjotai kʼoa tijnandaní nga nichatʼai” (Sal. 86:5). Je Miqueas i kitso: “Aliʼya xi mangósonkoai jonʼiai ji, nga nichatʼalai kʼoa nga tsínkui kuenta nʼiai je jée xi bajngi chjota” (Miq. 7:18). Kʼoa Isaías i kitso: “Katasíkʼéjna je ndiaale chjotatsʼen kao je chjota xi chʼao tjío kjoafaʼaitsjenle, kʼoa katanroanrʼoeni Jeobá, nga̱ koakóle kjoamatokon, kʼoa katanroanrʼoeni Nináná nga̱ nʼio male síchatʼa” (Is. 55:7).
13. Ánni ndatjínni nga kitjoʼndele je xi kʼoakoannile jéele nga kichokʼejnajin ijngokʼani jinjtín (chótsenlai recuadro “ Kʼiáni kichokʼejnajin ijngokʼani ya jtín xi kisʼejna Corinto je xi kichʼasjejin”).
13 Kʼianga skénngile Jeobá je chjotale Cristo xi Corinto tsʼe, tjínnele nda skoéya je xi kʼoakoannile jéele kʼoa tjínnele koakole nga nʼio tsjoa tjío kon nga kuichokʼejnajin ijngokʼani jinjtín. Tsa sichatʼale chjota jebi, je Pablo kʼoakitso nga kʼoasʼin tjíobakó nga tjíosítjoson ngayeje jme xi tso Jeobá (2 Cor. 2:9). Kʼianga kichʼasjejin jinjtín je chjota xi ai jée tsakajngi, kui xi tsakasenkao nga kʼoakoannile jéele. Ningalani tosʼa choa sá tjínle nga kʼoakoan, je xi chjotajchínga sʼin tjío tjínnele jetsakjákaonajmí chjota jebi nga kʼoakitsole nga koa̱n kʼoéjnajin ijngokʼani jinjtín.
JÓSʼIN CHJÉNNGILEE JEOBÁ NGA TJÍNLE KJOAMATOKON KʼOA NGA KIXI JME XI SʼÍN
14, 15. Jmé xi bakóyaná josʼin kisʼendajin je kjoa xi kisʼe ya jtín xi kisʼejna Corinto (2 Pedro 3:9; kʼoati chótsenlai sén xi faʼaitʼa).
14 Kui xá kisʼetʼani ya Biblia josʼin kisʼendajin je kjoa xi kisʼe ya jtín xi kisʼejna Corinto nga ñá kuitsoyaná (Rom. 15:4). Jmeni xi koan kui bakóyaná nga tsín tsjoáʼnde Jeobá nga ʼya xi ai jée bajngi jinnaxinandále. Nga tjínle kjoamatokon je Jeobá tjínkʼa xi kʼoatso nga totsjoáʼndele jngo chjota xi tsín kʼoamanile jéele nga tosi tonda ya jinjtín bʼejna. Tonga ʼyañá nga tsín kʼoatjín jebi. Ningalani tjínle kjoamatokon alikui totsjoáʼndele nga ʼya xi ai jée bajngi kʼoa nga ʼya xi faʼatone kjoatéxomale (Jud. 4). Alikuijinni kjoamatokon koakoná tsa tsjoáʼndele nga tosi tonda ya jinjtín kʼoéjna jngo chjota xi tsín kʼoamanile jéele. Tsa tosi tonda ya jinjtín kʼoéjna chjota jebi, tsakui nichxin chan kui xi chʼaotjín kʼoasʼin xi ngikʼa (Prov. 13:20; 1 Cor. 15:33).
15 Jmeni xi koan ya jtín xi kisʼejna ya Corinto kʼoati kui bakóyaná nga tsín mele Jeobá nga ʼya xi tojchajin. Tosaa kui xi mele nga kuitjontjai je chjota. Bakóle kjoamatokon je xi síndaya yaole kʼoa xi mele nga je sixá ijngokʼanile (Ezeq. 33:11; tʼexkiai 2 Pedro 3:9 e). Kʼianga kʼoakoannile jéele je chjota xi kichʼasjejin ya jtín xi kisʼejna Corinto kʼoa nga kisindaya yaole, jé Jeobá tsakándiaale Pablo nga kʼoakitsole je chjotale Cristo nga tjínnele sichatʼale kʼoa nga nda skoéya ijngokʼani.
Kʼoati sʼín je ndsʼee josʼín je Jeobá nga bakó kjoatsjoacha kao kjoamatokon, nda kjoéya je xi batiojin ijngokʼani ya jtín (Chótsenlai párrafo 14, 15)
16. Jósʼe tokuin nga nikjaʼaitsjenjin josʼin kisʼendajin kjoa xi kisʼe ya jtín xi kisʼejna Corinto.
16 Nga chotʼayajiaan josʼin kisʼendajin je kjoa xi kisʼe ya jtín xi kisʼejna Corinto, ʼyañá nga tsjoakená Jeobá kʼoa nga kixi jmeni xi sʼín (Sal. 33:5). Nga ʼyaa jokjoan ngisaa titsjoa sʼengáni tokoán nga je ʼyaxkoán. Nga chjotajée maa ngatsʼiaa machjénná nga sichatʼaná. Bʼailee kjoanda Jeobá nga tsakʼéchjíntjainá nga koa̱n jchatʼa je jéená. Nʼio nda satío tokoán nga ʼyaa nga tsjoakená kʼoa nga kui xi mele nga nda kuiyoaa.
17. Jmé xi chótʼayajiaan ya kjoaʼmiya xi fisani.
17 Tsa ʼyani xi ai jée koa̱njngí ndʼaibi, jósʼin xi chjotajchínga sʼin tjío nga skénngile Jeobá nga koako kjoatsjoacha kʼoa nga kuinyakao je xi kabajngijée nga kʼoakatamanile jéele. Kʼoa jósʼiaan tsa ʼyani xi chʼa̱sjejin jinjtín kʼoa tsa ʼya xi tjóʼndele nga kjoaʼaíkʼejnajin ijngokʼani. Kui jebi chótʼayajiaan ya kjoaʼmiya xi fisani.
KJOAJNDA 109 Kao ni̱ma̱ná katamatsjoachaa xíngiaa
a 1 Juan 2:1: “Ngatsʼio ʼndíxtina, je kjoabi kjino, jméni nga tsín kuijnyisínio jée. Tsa jngo xi tsajngi jée, tíjnajngoná xi fajinná ngixko̱n Nʼainá, je Jesucristo xi tjínle kjoakixi”.
b 1 Corintios 5:1, 2: “Xi kjoakixi noʼyale nga tjín kjoachajngi jinno nga jon, tonga kjoachajngi xi kʼoatjín xi niyajin tjín jinle chjota xi li judíojin. Kʼoasʼin tjín jngo xi tíjnakao je chjoónle nʼaile. 2 Jon kʼoasʼin ngʼakon timao, niʼaonjin koanno, jméni nga tjóxinsínino je xi kʼoakisʼin kui kjoabi”.
c 1 Corintios 5:13: “Je xi tʼaxin tjío, Niná bʼéndajinle. Chja̱ʼaxion tsokʼoa je chjotatsʼen xi tíjnajinno nga jon”.
d 2 Corintios 2:5-8: “Tsa jngo xi jekisibana, likui kisibana nga toʼan, tonga saʼnda kisikʼakaotʼa i̱tséno ngatsʼio. Kʼoasʼin xian, jméni nga tsín tse éntsjoʼa sichjénsínia. 6 Je xi kʼoakisʼin, tokoanlanile je kjoañʼaibi, nga nkjín koan xi jekisikjaʼále. 7 Tosa jon tichatʼalao, kʼoa tijetakonlao, jméni nga je xi kʼoakisʼin likui ya kjoejin kjoaba xi nʼio tse. 8 Tokui kjoa bʼetsʼoanino nga si̱kixiyatsaon je kjoatjaochano xi tʼatsʼe nga je”.
e 2 Pedro 3:9: “Je Nainá likui sitseya xi kisisʼengi, josʼin síkjaʼaitsjen kʼa nga matseyale, tonga tjínle kjoatsejta xi tʼatsaan. Kaile nga jngo xi cha̱. Tomele nga kjuicho síkʼantjaiya kjoafaʼaitsjenle ngatsʼi”.
