KJOAʼMIYA XI CHOTʼAYA 35
KJOAJNDA 123 Si̱tjosonlee jtínle Niná kʼoa kixi kjuintʼalee
Jósʼin binyakao xi chjotajchínga sʼin tjío je xi chʼasjejin jinjtín
“Ngisa tse kjoatsjoa sʼe̱ ya ngʼajmi xi tʼatsʼe jngo chjotatsʼen xi sikʼantjaiya kjoafaʼaitsjenle kaoni tsa ñokan kaoni xjaʼaonño xi tjínle kjoakixi, xi tsín tsa machjénle nga sikʼantjaiya kjoafaʼaitsjenle” (LUC. 15:7).
XI TÍNCHJA̱NI
Ánni nga tjínkʼani xi chʼasjejin jinjtín kʼoa jósʼin binyakao je xi chjotajchínga sʼin tjío nga kʼoakatamanile jéele kʼoa nga nda katabatio ijngokʼani ngixko̱n Jeobá.
1, 2. 1) Jósʼin síkjaʼaitsjen Jeobá tʼatsʼe chjota xi toxá sʼínni nga bajngijée. 2) Jméni xi mele Jeobá nga sʼin je xi bajngijée.
JE Jeobá alikui totsjoáʼnde nga bijnyijée (Sal. 5:4-6). Kui xi mele nga si̱tjosoán kjoatéxomale. Ninga kʼoalani, be nga chjotajée maa kʼoa alikui kui koyale nga kuitjoson tsjetsjená ngayeje kjoatéxomale (Sal. 130:3, 4). Tjínkʼa “chjota xi tsín bexkón Niná”, xi toxá sʼínni nga bajngijée, nga̱ tokui fini nga síchatʼaná Niná (Jud. 4). Tonga je Jeobá alikui sasénle nga kʼoasʼín chjota, kʼoa ya Biblia kʼoatso nga kjoeson chjota jebi kʼianga kjoaʼaí kjoajchán xi Armagedón ʼmi (2 Ped. 3:7; Apoc. 16:16).
2 Je Jeobá “kaile nga jngo xi cha̱”. Ya kjoaʼmiya xi jaʼato kui tsaʼyaa nga kui xi mele Jeobá nga kʼoakatamanile jmeni xi sʼín je xi bajngijée (2 Ped. 3:9). Jé Jeobá kjenngile xi chjotajchínga sʼin tjío nga tsejta ma, kuinga ngasin nganda binyakaoni je ndsʼee xi bajngijée nga nda katabatio ijngokʼani ngixko̱n Jeobá. Ninga nkjín kʼa chjakaonajmí je ndsʼee xi kabajngijée, alikui tongatsʼi nga tsjoáʼnde nga bʼainganʼiole kʼoa nga kʼoamanile je jéele (Is. 6:9). Kʼianga kʼoama, jméni xi sʼín je xi chjotajchínga sʼin tjío.
“CHJA̱ʼAXION [ . . . ] JE CHJOTATSʼEN XI TÍJNAJINNO”
3. 1) Tojo tso Biblia, jméni xi nikao xi tsín kʼoamanile nga ai jée bajngi. 2) Ánni kʼoabixónñá nga tije xosíkaoni yaole nga chʼasjejin jinjtín.
3 Kʼianga tsín kʼoamanile jéele jngo chjota xi ai jée bajngi, je xi chjotajchínga sʼin tjío kui fitjenngi kjoafaʼaitsjen xi tsjoá ya 1 Corintios 5:13, jñani tso: “Chja̱ʼaxion [ . . . ] je chjotatsʼen xi tíjnajinno”. Nga chʼasjejin jinjtín je xi bajngijée tijé xosíkaoni yaole (Gál. 6:7). Ánni. Nga̱ chʼa̱sjejin jinjtín tsa tsín kʼoaʼén kʼianga jenkjín kʼa kjoakaonajmí je xi chjotajchínga sʼin tjío (2 Rey. 17:12-15). Tsa tsín kʼoaʼén kʼoasʼin koakoni nga tsín timenile sitjoson jotso Énle Niná (Deut. 30:19, 20).
4. Ánni sʼejinkonni je jtín nga chʼasjejin je xi tsín kʼoamanile jéele.
4 Kʼianga tsín kʼoamanile jéele jngo chjota chʼasjejin jinjtín, kʼoa je xi chjotajchínga sʼin tjío bájinkon je jtín nga tsínti testigole Jeobá mani chjota jebi. a Ali tsakuijin sʼejinkonni nga kjoasoa nikʼéjnajin je xi chʼasjejin, kuinga sʼejinkonni jtín nga katasítjoson jme xi tso Biblia, nga tsín tiya katakjenkaoni kʼoa tsínti je katabájtani (1 Cor. 5:9-11). Ánni nga kʼoatsoniná je Jeobá. Je Pablo i kitso: “Nda tsa tochoa naʼyo̱san, sísan ngayije naʼyo̱” (1 Cor. 5:6). Tsa tsín chʼa̱sjejin jinjtín je chjota xi tsín kʼoamanile jéele, je ndsʼee xi ngikʼa kʼoajinsʼin sikjaʼaitsjen nga tsín machjén nga sitjoson jotso kjoatéxomale Jeobá (Prov. 13:20; 1 Cor. 15:33).
5. Jósʼin nikjaʼaitsjeen tʼatsʼe xi chʼasjejin jinjtín, kʼoa ánni.
5 Ninga tsín tiya fajtañá xi tsínti testigole Jeobá mani alikui kʼoasʼin nikjaʼaitsjeen nga tsínti kjoaʼaíkʼejnajinni jtín. Yaa mangóson joma nga cha jngo ʼndíbarré, nga bichókʼejnajin ijngokʼanile xínkjín kʼianga jemasjai. Tonga tsa tsín sindaya yaole kʼoa tsín kʼoasʼin jmeni xi kitsole Jeobá nga kitsjoatʼale yaole likuijin sʼe̱le kjoabijnachon ngantsjai nichxin (Ezeq. 18:31). Tonga nga tíjnasa nichxin kʼoa nga tíbakó kjoamatokon Jeobá koaan kjoaʼaíkʼejnajin ijngokʼani jtín. Jósʼin binyakao xi chjotajchínga sʼin tjío xi chʼasjejin jinjtín.
JÓSʼIN BINYAKAO XI CHJOTAJCHÍNGA SʼIN TJÍO XI CHʼASJEJIN JINJTÍN
6. Jósʼin binyakao xi chjotajchínga sʼin tjío je xi chʼasjejin jinjtín.
6 Kʼianga ʼya xi chʼasjejin jinjtín, alikui totsjionkon je xi chjotajchínga sʼin tjío. Kʼianga kʼoakuitsole nga tsínti testigole Jeobá koa̱nni, kʼoati kuitsole jme xi tjínnele sʼin nga koa̱n kʼoéjnajin ijngokʼani jtín. Kʼoakuitsole nga koaisíxatʼa ijngokʼa kʼianga jekjoaʼato jngo jao sá. Kʼiatsa koa̱njyole kʼiaa kjoakaonajmí ijngokʼa nga kʼoakatamanile jéele ánni nga koa̱n testigole Jeobá koa̱n ijngokʼani. Tonga tsa tojo kje síndayajin yaole nga kʼia, jméni xi sʼin je xi chjotajchínga sʼin tjío. Tojo koaisíxatʼa nga koa̱nskanni nga kjoakaonajmí.
7. Kʼianga ʼya xi chʼasjejin jinjtín, jósʼin kjenngile Jeobá je xi chjotajchínga sʼin tjío nga bakó kjoamatokon (Jeremías 3:12).
7 Je xi chjotajchínga sʼin tjío jé Jeobá kjenngile nga bakó kjoamatokon, kuinga kʼoasʼin bekonni je xi chʼasjejin jinjtín josʼin bekon Jeobá. Tobʼelañá, kʼianga tsínti kisitjosonnile je chjota israelita alikui totsakʼéjngo kon Jeobá. Kʼianga tjíobajngijée kisikasénle profeta nga kʼoakitsole nga katasíndaya yaole. Tojosʼin kichotʼayá ya kjoaʼmiya xi majaoni, je Jeobá kʼoakitsole Oseas nga katasíchatʼale je chjoónle kʼoa nga katabʼejnakao ijngokʼa ninga tojo sʼa tíbajngijée. Nga kʼoatsakʼinle Oseas, kʼoasʼin tsakakónile Jeobá je chjota israelita nga nʼio tjínle kjoamatokon (Os. 3:1; Mal. 3:7). Joni Jeobá, je xi chjotajchínga sʼin tjío kui xi mele nga kʼoakatamanile jéele xi chʼasjejin jinjtín kʼoa binyakao nga tsín ñʼai katamale nga kjoaʼaíkʼejnajin ijngokʼani naxinandále Niná (tʼexkiai Jeremías 3:12). b
8. Jósʼin basenkaoná choa̱le ti xi ki nga ngisa nda majinná jokji tsjoakená Jeobá (Lucas 15:7).
8 Kataʼyala je choa̱le ti xi ki. Tojosʼin kichotʼayá ya kjoaʼmiya xi majaoni, kʼianga tsabe nʼaile nga tínroa ti jebi, kitokanrʼoe nga kitsoakjá kʼoa tsakʼéndsoʼa (Luc. 15:20). Ningalani kje síjéjin kjoanichatʼa tile, tosaa je kitokanrʼoe kʼoa kʼoakisʼin josʼín jngo nʼai xi nʼio tsjoake xtile. Kʼoati sʼín je xi chjotajchínga sʼin tjío kʼianga jngo choʼndale Jeobá chʼasjejin jinjtín, binyakao nga katabatiojin ijngokʼani naxinandále Niná (Luc. 15:22-24, 32). Kʼianga kʼoamanile jéele jngo chjota tsee kjoatsjoa sʼe ya ngʼajmi kao i̱ Sonʼnde (tʼexkiai Lucas 15:7). c
9. Jméni xi tsole Jeobá je xi ai jée bajngi.
9 Tojosʼin jekaʼyaa, je Jeobá alikui tsjoáʼnde nga tosi tonda ya batiojin naxinandále je xi tsín kʼoamanile jéele. Ninga kʼoalani, alikui totsjionkon nga̱ kui xi mele nga nda kʼoéjna ijngokʼani ngixko̱n. Ya Oseas 14:4 kui bakóyaná josʼin bekon Jeobá je xi kʼoamanile jéele. Itso: “Sichatʼale nga kitsjionkonna. Tsjoake koa̱n nga̱ likui tijtinina”. Nga kʼoasʼin síkjaʼaitsjen Jeobá, machjén nga kuenta sʼin je xi chjotajchínga sʼin tjío tsa jetísíndaya yaole je xi kichʼasjejin. Kʼoa je xi kichʼasjejin jinjtín machjén nga sikjaʼaitsjenjin nga tsjoake Jeobá kʼoa nga mele nga kʼoéjnajin ijngokʼani naxinandále.
10, 11. Jósʼin binyakao xi chjotajchínga sʼin tjío xi jekjoatse kichʼasjejin jinjtín.
10 Tjínkʼa xi jekjoatse kichʼasjejin jinjtín kʼoa xi tsínti tjíobajngijéeni, kʼoa tjínkʼa xi saʼnda tsínti faʼaitsjennile ánni nga kʼoakoantʼainni. Je xi chjotajchínga sʼin tjío tjínnele koasjaiya jñáni tjío kʼoa machjén nga koaisíxatʼa. Koaan kʼoetsʼoantjai nga kuichokonle kʼoa kʼoakuitsole nga koa̱n kʼoéjnajin ijngokʼani naxinandále Niná tsa je xi mele. Tsa jenkjín nó nga kichʼasjejin jinjtín, alikuijin tinʼio tíjnani kjoamakjainle. Tonga tsa mele kʼoéjnajin ijngokʼani naxinandále Niná, jé xi chjotajchínga sʼin tjío kʼoakuitsole jngo ndsʼee kʼoa tsa jngo tichjaa nga katatsoyale Biblia ninga kje bʼejnajin ijngokʼajinni naxinandále Niná. Jé xi chjotajchínga sʼin tjío kʼoakuitso ngantsjai ʼyáni xi kuitsoyale Biblia.
11 Jé Jeobá kjenngile je xi chjotajchínga sʼin tjío nga bakó kjoamatokon. Kuinga básjaini kʼoa binyakao je chjota xi mele nga kjoaʼaíkatiojin ijngokʼa naxinandále Niná. Kʼiatsa ʼya xi kʼoamanile jéele kʼoa tsa tsínti tíbajngijéeni ndi̱toon bʼejnajin ijngokʼani naxinandále Niná (2 Cor. 2:6-8).
12. 1) Kʼiáni nga nda skósonnile je xi chjotajchínga sʼin tjío tsa koa̱n kʼoéjnajin ijngokʼa naxinandále Niná je xi ai jée tsakajngi. 2) Ánni nga tsín koa̱n kʼoakuixónsíñá nga tsín tikʼia koakonile kjoamatokon Jeobá je chjota xi ai jée tsakajngi (kʼoati chótsenlai nota).
12 Je xi chjotajchínga sʼin tjío tjínnele nʼio nda skósonnile tsa koa̱n kʼoéjnajin ijngokʼa naxinandále Niná je xi ai jée tsakajngi. Jolani tsa xtiʼndí tsabetaon, tsa kontra tsakʼejnale naxinandále Niná kʼoa tsa toxá kisʼinni nga koan kitsjion je chjoónle kʼoa tsa xʼinle. Je xi chjotajchínga sʼin tjío tjínnele kuenta sʼin tsa jekʼoakoan kjoaixinile jéele (Mal. 2:14; 2 Tim. 3:6). Machjén nga sikuinda jtín je xi chjotajchínga sʼin tjío. Tonga kʼoati ʼyaa nga kui xi mele Jeobá nga katabʼejnajin ijngokʼani naxinandále je xi kʼoamanile jéele kʼoa xi síndaya yaole. Ningalani nʼio nda skósonnile je xi chjotajchínga sʼin tjío tsa koa̱n kʼoéjnajin ijngokʼa naxinandále Niná je xi ai jée tsakajngi, alikui koa̱n kʼoasʼin sikjaʼaitsjen nga tsín tikʼia koakonile kjoamatokon je Jeobá (1 Ped. 2:10). d
JMÉ XI TJÍNNELE SʼIN JE JTÍN
13. Jónikoaa je ndsʼee xi bichakjáyale kʼoa jónikoaa je xi chʼasjejin jinjtín.
13 Tojosʼin jetsaʼyaa ya kjoaʼmiya xi jaʼato, sakʼoa kui én sʼejinkoaan jinjtín nga jngo ndsʼee jetsakichakjáyale. Kʼianga kʼoama tojo koaan chja̱kaonajmiá je ndsʼee nga̱ jekʼoakoannile jéele kʼoa tsín tikui xi chʼaotjín kʼoatísʼínni (1 Tim. 5:20). Nga tojo ndsʼee mani machjén nga kʼoainganʼiolee ánni nga tosi tonda kui kʼoasʼinni xi kixi tíjna (Heb. 10:24, 25). Tonga kʼianga jngo xi chʼasjejin jinjtín, alikui tije fajtañá kʼoa tsín tije bichikaoñá (1 Cor. 5:11).
14. Jósikoaa je xi chʼasjejin jinjtín (kʼoati chótsenlai sén xi faʼaitʼa).
14 Kʼianga jngo xi chʼasjejin jinjtín ali tsakuijin xi tsonile nga tsínti kuenta sʼianñá. ʼYañá nga tsín koa̱n je kjoájtaa, tonga kui xi kuitsoni josʼin nikjaʼaitsjeen nga jngó jngoá nga jeʼyaa jotso kjoatéxomale Jeobá tsa mená kʼoakʼuínlee nga katafi kjoajtín, jolani tsa jngo xíngiaa kʼoa tsa jngo xi miyoná koanni. Ngasʼa alikui nitiʼndaa kʼianga bichó kjoajtín jngo xi kichʼasjejin jinjtín, tonga ndʼaibi kui xi kuitsoni josʼin nikjaʼaitsjeen nga jngó jngoá nga jeʼyaa jotso kjoatéxomale Jeobá tsa si̱tiʼndaa kʼianga kuicho kjoajtín. Tonga tsín koa̱n tse chja̱kaonajmiá kʼoa tsín koa̱n je kjoájtaa.
Nga jeʼyaa jotso kjoatéxomale Jeobá, nga jngó jngóñá xi kuixónñá tsa kʼoakʼuínlee nga katafi kjoajtín je xi kichʼasjejin jinjtín kʼoa tsa si̱tiʼndaa nga kuicho kjoajtín (Chótsenlai párrafo 14)
15. ʼYá xi nchja̱ni 2 Juan 9-11 (kʼoati chótsenlai je recuadro “ A tikuini je jée xi kisikʼaxki̱ Juan kao Pablo”).
15 Tsakui nichxin i̱ kuixoán: “A tsí kʼoaná tso Biblia nga ya bʼainganʼiole je xi jée bajngi kʼiatsa si̱tiʼndaa” (tʼexkiai 2 Juan 9-11). e Tojo tso ya versículo xi tjío nga tongini, ya 2 Juan 9-11 jé nchja̱ni chjota xi kontra tjíole naxinandále Niná kao xi tokʼoa tjíosʼínʼnde nga bʼanachale xi kjaʼaí nga kui kʼoakatasʼín jmeni xi bʼéchjoa Biblia (Apoc. 2:20). Je xi chjotajchínga sʼin tjío alikui koaisíxatʼa tsa jngo chjota xi kontra tíjnale naxinandále Niná kʼoa tsakui tíkaníbason xi chʼaotjín. Ninga kʼoalani, tojo koaan sindaya yaole je xi kʼoasʼín. Tonga nga kjesa síndayajin yaole alikui koa̱n si̱tiʼndaa kʼoa tsín koa̱n kʼoakʼuínlee nga katafi kjoajtín.
CHJÉNNGILEE JEOBÁ NGA BAKÓ KJOAMATOKON
16, 17. 1) Jméni xi mele Jeobá nga katasʼín je xi bajngijée (Ezequiel 18:32). 2) Jméni xi sʼín xi chjotajchínga sʼin tjío nga ñatjen síxá kao Jeobá.
16 Nga aon kjoaʼmiya xi tichotʼayajiaan kui bakóyaná nga tsín mele Jeobá nga ʼya xi kjoeson (tʼexkiai Ezequiel 18:32). f Kui xi mele nga kʼoakatamanile je xi bajngijée (2 Cor. 5:20). Jokji tífaʼato nichxin, je Jeobá kʼoatsole xi jekisikjinle nga kʼoakatamanile jéele kʼoa nga katasíchriantʼa ijngokʼanile. Je xi chjotajchínga sʼin tjío tsee kjoanda tjínle nga ñatjen síxá kao Jeobá nga binyakao je xi ai jée bajngi nga kʼoakatamanile jéele (Rom. 2:4; 1 Cor. 3:9).
17 Nʼio tsjoa satío kon je xi tjío ya ngʼajmi kʼianga jngo chjota kʼoamanile jéele. Je Jeobá nʼio tsjoa sʼe kon kʼianga bʼejnajin ijngokʼa jinjtín jngo xi jekisikjinle tsakai. Si̱kjaʼaitsjejiaan nga bakóná Jeobá kjoamatokon kao kjoanda. Tsa kʼoasʼiaan, sa tsjoacha sa tsjoacha koaan nichxin nga nyaon (Luc. 1:78).
KJOAJNDA 111 Xi tsjoa fáya tokoán
a Alikui tikui én si̱chjénñá je xi tsakichonsjejin naxinandále Niná tso. Kui én si̱chjén xi chʼasjejin jinjtín tso (1 Corintios 5:13).
b Jeremías 3:12: “T’in k’oa i̱ t’inlai je naxinandá Israel: Nroánrʼoenináo chjotaxíjin, tso Jeobá. Ali josikaono nga̱ kixiña, tso Jeobá. Alikui tondiaa kʼoengijtia tokoan”.
c Lucas 15:7: “Kʼoaxinno nga kʼoasʼin ngisa tse kjoatsjoa sʼe̱ ya ngʼajmi xi tʼatsʼe jngo chjotatsʼen xi sikʼantjaiya kjoafaʼaitsjenle kaoni tsa ñokan kaoni xjaʼaonño xi tjínle kjoakixi, xi tsín tsa machjénle nga sikʼantjaiya kjoafaʼaitsjenle”.
d Ya Biblia kʼoatso nga tjínkʼa chjota xi tsín jchatʼale jéele, jolani je xi ñaki kʼoatjío kon nga kontra batiole Niná. Tojé Jeobá kao Jesús xi be josʼin kʼoendajinle kjoa (Mar. 3:29; Heb. 10: 26, 27).
e 2 Juan 9-11: “Toʼyani xi faʼantjaile, kʼoa xi likui bʼéyojinkon kjoafaʼaitsjenle Cristo, likui tjínle Niná. Kʼoa je xi bʼéyojinkon kjoafaʼaitsjenle Cristo, tjínle Nʼainá kao ʼndíle. 10 Tsa jngo xi kjoaʼaíkonno, xi tsín yʼa kjoafaʼaitsjenle Cristo, ali bʼaiʼndejinlao ya niʼyano, niʼmijinlao: Nda kafaʼai. 11 Je xi tsole: Nda kafaʼai, bʼakaotʼale xále xi tsín nda”.
f Ezequiel 18:32: “Alikui sasénna nga ʼya xi mʼe, tso Jeobá xi batéxomale ngayeje. Kuinga nroánrʼoenináo kʼoa tiyochon”.
