KJOAʼMIYA XI CHOTʼAYA 31
KJOAJNDA 12 Nʼio ngʼa tíjna Jeobá, Nináná
Jméni xi kisʼin Jeobá nga tsakʼasjentjainá
“Niná kʼoasʼin koantsjoake sonʼnde nga kitsjoa je xi tojngo ʼndíle” (JUAN 3:16).
XI TÍNCHJA̱NI
Jmé xi kisʼin Jeobá nga ndasʼin kuiyoaa ngixko̱n, nga chjotatsje koaan kʼoa nga koa̱n kuiyoaa ngantsjai.
1, 2. 1) Jméni xi jée tsole Biblia kʼoa jósʼin tjóxinná je jée xi kichʼá (chótsenlai jñani tso “Jósʼin tsoyanile”). 2) Jmé xi chótʼayajiaan i̱ kjoaʼmiya jebi kao kjoaʼmiya xi ngikʼa (chótsenlai xi faʼaitʼa página 32, jñani “Xi tibʼexkiai” tso).
KʼIANGA chotʼayajiaan jmeni xi kisʼin Jeobá nga tsakʼéchjíntjainá tʼatsʼe jée kao kjoabiya ʼyañá jokji tsjoakená. Tsa toñá alikui koa̱nná chʼa̱sjexinlee yaoná je jée xi kichʼá, a nga̱ nyaon nyaon bijnyijée kʼoa nga chjotajée maa biyañá (Rom. 5:12). Tonga je Jeobá kʼoatsoná nga kjoaʼaxin je jée kao kjoabiya.
2 Ningalani chjotajée maa je Jeobá tíbasenkaoná nga miyole koaan, kʼoa jela 6,000 nó nga kʼoatísʼín josaʼnda nga kisinda títjon je chjota. Nga chjotajée maa kjoabiya choʼndá, tonga je Jeobá alikui mele nga kuiyá, kui xi mele nga kuiyoaa ngantsjai (Rom. 6:23). I̱ kjoaʼmiya jebi jan koya tjínni xi chótʼayajiaan. Xi títjon, jmé kjoachoya tsjoáná Jeobá. Xi majaoni, jmé xi kisʼin choʼndale Niná nichxin kjoatse nga nda tsakatio ngixko̱n ninga chjotajée koan. Kʼoa xi majanni, jósʼin tsakʼéchjíntjainá Jesús.
JMÉ KJOACHOYA TSJOÁNÁ JEOBÁ
3. Ánni nga chjotajée koanni je Adán kao Eva.
3 Je Jeobá kui xi koanmele nga tsjoa katasatío kon Adán kao Eva. Kuinga naskánachonni jña kisikatío, kisikixan, kʼoakitsole nga katamankjínya kʼoa nga naskánakatasíchon Sonʼnde. Tojngokjoán koya jme xi tsakʼéchjoale kʼoa kʼoakitsole nga kuiyá kʼiatsa tsín sitjosonle. Kʼoa tojosʼin jeʼyaa, je Na̱i kui xi koanmele nga tsakajngijée Adán kao Eva. Tonga je Na̱i alikui tsjoake Jeobá kao chjota. Kʼoa ʼndele nga je Jeobá sitjosonle Adán kao Eva jé Na̱i tsakʼaʼénle. Nga kʼoakisʼin, tsakajngijée kʼoa kʼoakoan jokitsole Jeobá, kitjochʼinle, koanjchínga kʼoa kʼieen (Gén. 1:28, 29; 2:8, 9, 16-18; 3:1-6, 17-19, 24; 5:5).
4. Ánni nga jtikeni Jeobá je jée, kʼoa ánni basenkaoniná nga tsín kuijnyíjée (Romanos 8:20, 21).
4 Yaa Biblia kisʼetʼaxo̱n jokoan Adán kao Eva ánni nga koa̱njinniná jokji jtike Jeobá je jée. Nga̱ kʼianga bijnyijée alikui tinda biyoñá ngixko̱n kʼoa biyañá (Is. 59:2). Je Na̱i nʼio tsjoake je jée, kuinga koanmenile nga tsakajngijée Adán kao Eva kʼoa kʼoati kui xi mele nga kuijnyíjée tsanda ñá. Je Na̱i kʼoajinsʼin kisikjaʼaitsjen nga tsínti kuitjosonni jmeni xi tjínndajinle Jeobá, tonga alikui koanjinle jokji tsjoakená Niná. Ninga kʼoakoan, tojo sitjoson Jeobá jme xi tjínndajinle nga̱ nʼio tsjoake chjota kʼoa kuinga kitsjoaniná kjoachoya (tʼexkiai Romanos 8:20, 21). b Be Jeobá nga tjín chjota xi tsjoake koa̱n kʼoa xi je sijéle nganʼio nga tsín koa̱njngíjée. Jé kisindaná, Nʼainá mani, kui xi mele nga tsínti kuiyáñá kʼoa nga chjotatsje koaan. Kataʼyala jméni xi kisʼin.
5. Jókitso Jeobá nga kitsjoa kjoachoya kʼoa kʼiáni kʼoakitso (Génesis 3:15).
5 (Tʼexkiai Génesis 3:15). c Kʼiaa kitsjoa jngo kjoachoya Jeobá kʼianga kʼoakitso jokoa̱ntʼain je Na̱i. Jngo ntje̱ kisikʼaxki̱ xi koase̱nne jko̱ Na̱i kʼoa kʼoendajin je kjoa xi kisʼe ya Edén (1 Juan 3:8). Tonga je Na̱i kjoañʼai kjoanla kisikjaʼá ntje̱ jebi kʼoa kisikʼieen. Kitsjoaʼnde Jeobá nga kʼoakoan ningalani nʼio aon koanle, nga̱ millón chjota xi kui kjoanda sʼe̱le nga chjotatsje koa̱n kʼoa nga koa̱n koatio ngantsjai.
JÓKISʼIN CHJOTA NICHXIN KJOATSE NGA NDA TSAKATIO NGIXKO̱N NINÁ NINGA CHJOTAJÉE MA
6. Jmé xi kisʼin Abel kao Noé nga koanchriantʼale Jeobá.
6 Nga jejaʼato nichxin, tochoa choaa tsakʼéjnatsen Jeobá jmeni xi tjínnele sʼin chjota nga nda koatio ngixko̱n. Jé Abel xi títjon koa̱nkjainle tʼatsʼe Jeobá, je xi majaoni tile Adán. Je Abel tsjoake koan Jeobá kʼoa kui xi koanmele nga nda katasʼe kon kʼoa nga sichriantʼale, kuinga cho̱ kitsjoatʼanile. Nga cho̱ kiskoʼnda, nkjín barré kitsjoatʼa, kʼoa je Jeobá “kisasenle je Abel kʼoa kao jmeni xi kitsjoatʼa” (Gén. 4:4). Nga jeki nichxin, kʼoati kisasenle nga cho̱ kitsjoatʼale Noé, nga je Noé tsjoake koan Jeobá kʼoa jé kisinʼiotʼa (Gén. 8:20, 21). Nga kisasenle Jeobá nga cho̱ tsakʼaitʼale kui tsakakó nga mele si̱chriantʼalee kʼoa nga nda kuiyoaa ngixko̱n ninga chjotajée maa. d
7. Jmé xi bakóyaná nga kisitjoson Abrahán kʼianga kʼoatsakʼinle nga je ʼndíle katatsjoátʼa.
7 Je Abrahán koankjainle xi tʼatsʼe Jeobá. Kʼoa ñandia kʼoakitsole Jeobá nga je ʼndíle katatsjoátʼa, xi Isaac tsakʼin. Je Abrahán kʼoakisʼin jokitsole Jeobá ninga ba kisʼe kon. Tonga kʼianga jetísíkʼien ʼndíle tsakai, je Jeobá kʼoakitsole nga tsín kʼoakatasʼín. Nʼio chjíle jme xi bakóyaná je choa̱le Abrahán. Kui bakóyaná nga nʼio tsjoakená Jeobá, kuinga kisikasénni ʼNdíle nga kʼienntjainá (Gén. 22:1-18).
8. Jmé xi kitsoyanile nga cho̱ kitsʼaitʼale Niná nichxin kjoatse (Levítico 4:27-29; 17:11).
8 Kʼianga jesiento nó jaʼato, kui kjoatéxoma kitsjoale Jeobá je chjota israelita nga cho̱ tsjoátʼale ánni nga koa̱n jchatʼanile jéele (tʼexkiai Levítico 4:27-29; e 17:11 f). Nga kʼoakisʼin chjota israelita kui kitsoyanile nga je Jeobá tsjoá xi kʼoechjíntjainá ánni nga tondiaa jchatʼani jéená. Je Niná profeta kisichjén nga kitsoya jña kjuinroani xi kʼoechjíntjainá. Je Jeobá jé ʼNdíle kisikasén. Nga kjoañʼai jaʼá je ʼNdíle kʼoa nga kinikʼien yaa koanngóson jokoan ngasʼa nga cho̱ kitsʼaitʼale (Is. 53:1-12). Je Jeobá kitsjoaa je ʼNdíle nga kʼienntjainá ánni nga koa̱n jchatʼani jéená kʼoa koa̱n kuiyoñá ngantsjai.
JMÉ XI KISʼIN JESÚS NGA TSAKʼASJENTJAINÁ
9. Jmé xi kitso Juan Bautista (Hebreos 9:22; 10:1-4, 12).
9 Kʼianga nó 29, je Juan Bautista i kitso kʼianga tsabe Jesús: “Koeni ʼndí barréle Niná, xi faʼáxin jéele chjotasonʼnde” (Juan 1:29). Nga kʼoakitso Juan, kʼoasʼin tsaʼyanile nga je Jesús je ntje̱ xi kinokjoani. Nga kʼienntjainá Jesús tjínjngoo tokoán nga koa̱n jchatʼa je jéená kʼoa nga koa̱n kuiyoaa ngantsjai nichxin (tʼexkiai Hebreos 9:22; g 10:1-4, 12 h).
10. Jósʼin tsakakó Jesús nga je jaʼainchja̱le xi chjotajée.
10 Je Jesús be nga kjoañʼai chjaʼá nga chjotajée maa, kuinga kuenta kisʼinni chjota xi aon tjío kon xi totʼatsʼe jéele, kʼoa kʼoakitsole nga je katafitjenngile. Kinchjale xi xʼin kao xi yánchjín xi kʼoasʼin tsaʼyale nga nʼio chʼao kisʼin. I kitso: “Chjota xi nda tjío, likui machjénle chjinexki, tojé xi tjíomʼe xi machjénle”. Kʼoa i kitsosa: “Tsín chjota xi kixijin jeʼe̱ nchjale, tojé xi chjotajée” (Mat. 9:12, 13). Kʼoakisʼin Jesús jokitso. Kʼianga jngo chjoón kicho xi ndáxko̱n tsakanéjonni ndso̱ko̱, ngasin nganda tsakjákaonajmí kʼoa kisichatʼale jéele (Luc. 7:37-50). Tsakakóyale Énle Niná jngo chjoón samaritana ningalani be nga tsín nda tífikao yaole chjoón jebi (Juan 4:7, 17-19, 25, 26). Nga chjotajée maa biyañá, tonga je Jeobá kitsjoale nganʼio je Jesús nga koa̱nle sikjaʼáyale xi jekʼien, xi xʼin, xi yánchjín kao xtiʼndí (Mat. 11:5).
11. Ánni nga nda kisationi kon chjota xi tse jée tsakajngi nga kikonle Jesús.
11 Ninga je chjota xi tse jée tsakajngi, nda kisatio kon nga kikonle Jesús, nga̱ je Jesús koanmake kʼoa kisijinle yaole jotjío kon chjota jebi (Luc. 15:1, 2). Kisinʼio kon kʼoa nda kisikao nga koankjainle xi tʼatsʼe (Luc. 19:1-10). Kʼoati kisʼin Jesús tojo sʼín je Nʼaile nga nʼio tjínle kjoamatokon (Juan 14:9). Nga kʼoakisʼin, kʼoasʼin tsakakóni nga tsjoakená Jeobá, nga mamakená kʼoa nga mele koasenkaoná. Tsakasenkao chjota jme xi kisʼin Jesús, kisindaya yaole kʼoa chjotatjenngile koan (Luc. 5:27, 28).
12. Jméni xi kitso Jesús tʼatsʼe jokoa̱ntʼain.
12 Je Jesús nkjín kʼa kʼoakitsole chjotatjenngile jmeni xi koa̱ntʼain. Kʼoakitsole nga tjín xi yátsʼi̱n koasenle kʼoa nga yá sʼe̱tʼa nga ni̱kʼien (Mat. 17:22; 20:18, 19). Kʼoati be nga kʼoasʼin jchatʼani je jéená kʼianga kuiyántjainá, tojo kitso Juan kao profeta. Kʼoati kitso nga nkjín chjota koa̱nkjainle xi tʼatsʼe kʼianga jekjoaʼáyanile (Juan 12:32). ʼYani xi koa̱nkjainle tʼatsʼe Jesús kʼoa skénngi choa̱le, nda koatio ngixko̱n Jeobá kʼoa jchatʼa je jéele (Rom. 6:14, 18, 22; Juan 8:32). Kui kjoanda sʼe̱ná xi totʼatsʼe nga nʼiojin koan Jesús ninga tse kjoañʼai tsakjaʼá nga kʼienntjainá (Juan 10:17, 18).
13. Jókinikao Jesús nga kinikʼien, kʼoa jméni xi bakóyaná xi tʼatsʼe Jeobá (kʼoati chótsenlai sén xi faʼaitʼa).
13 Tsee kjoañʼai tsakjaʼá je Jesús. Jngo chjotatjenngile xi yátsʼi̱n tsakasénle, kitsoaa chjota xi jtike, totaon tsabe, énndiso tsakáne kʼoa kʼoakitso nga katanikʼien. Xijekoan, yá tsakátʼa sondado nga kisikʼien. Kiskale Jesús nga kʼoakoantʼain. Kʼoa je Jeobá nʼio aon koanle nga kʼoakoantʼain ʼNdíle. Ningalani nʼio tsjoake kʼoa ninga tse nganʼio tjínle Jeobá, alikui tsakʼasjentjai. Kuinga tsín kʼoakisʼinni nga tsjoakená. Je Jesús i kitso: “Niná kʼoasʼin koantsjoake sonʼnde nga kitsjoa je xi tojngo ʼndíle, jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai” (Juan 3:16).
Ninga nʼio aon koanle Jeobá, kitsjoaʼnde nga kinikʼien ʼNdíle nga koa̱n ndái kuiyolee je jée kao kjoabiya (Chótsenlai párrafo 13)
14. Jméni xi bakóyali nga kʼienntjainá je Jesús.
14 Kʼoasʼin tsakakóni Jeobá nga nʼio tsjoakená ngatsʼiaa nga kisikasén ʼNdíle nga kʼienntjainá ninga chjotajée maa. Kʼoa kʼoasʼin bakóniná nga tsjoakená nga jngó jngoá. Jósʼe tokuin nga kui nikjaʼaitsjain jokji kjoama̱ tsakʼéngi Niná nga tsakʼéchjíntjainá nga chjotatsje koaan kʼoa nga koa̱n kuiyoaa ngantsjai (1 Juan 4:9, 10). Ninga chjotajée maa ndʼai, mele koasenkaoná nga je si̱xálee kʼoa nga chjotatsje koaan nichxin xi nroaján.
15. Jmé xi machjén nga sʼiaan kʼianga so̱koná kjoanda xi tjenkao nga kʼienntjainá Jesús.
15 Jngoo kjoatjao xi nʼio chjíle kitsjoaná Jeobá kʼianga kisikasén ʼNdíle nga kʼienntjainá ánni nga koa̱n jchatʼani jéená. Tonga nga koa̱n jchatʼa je jéená machjén nga kʼoasʼiaan jokitso je Juan Bautista kao Jesús, nga kitso: “[Kʼoakatamanino jéeno] nga̱ jenroa machrian kjoatéxomale ngʼajmi” (Mat. 3:1, 2; 4:17). Machjén nga kʼoakoa̱nniná je jéená tsa mená nga je Jeobá si̱xálee kʼoa tsa mená si̱chriantʼalee. Yaa kjoaʼmiya xi ijngo kuitsoyaná jósʼin tíjna nga kʼoamaniná jéená, kʼoa jósʼin basenkaoná nga nda biyoaa ngixko̱n Jeobá ninga chjotajée maa.
KJOAJNDA 18 Kʼoailee kjoanda Niná tʼatsʼe kjoabʼechjíntjai
a JÓSʼIN TSOYANILE: Kʼianga jée síkʼaxki̱ Biblia kui nchja̱ni kʼianga kui kʼoanʼia jmeni xi tsín sasénle Jeobá kʼoa tsakui nga tsín nitjosoán jmeni xi tsoná. Kʼoati kui nchja̱ni nga chjotajée maa xi totʼatsʼe nga tsakajngijée Adán kʼoa kuinga biyañá.
b Romanos 8:20, 21: “Nga̱ ngayije xi kisʼenda sonʼndebi, nangi kinikʼéyole kjoa xi tsín jme nganʼio tjínle, ali tsa toje xi kʼoasʼin mele, tonga kʼoasʼin koanmele je xi nangi kisikʼéyole kao kjoachoyakaokjoa. 21 Kʼoasʼin tijeni je ngayije xi kisʼenda sonʼndebi, kuitjondaíle je kjoa xi kʼoasʼin bʼénʼiole xi tofitson. Kʼoaile nga kʼoéyondaí kao kjoajeya xi tsʼe ʼndíle Niná”.
c Génesis 3:15: “Kontra sʼin sikatíono, ji kʼoa kao je chjoón, kʼoa je ntje̱li kʼoa kao je ntje̱le. Je, yaa jkui koase̱nne kʼoa ji yaa ngisjaindso̱ko̱ chi̱nengi”.
d Je Jeobá kisasenle nga cho̱ kitsjoatʼale choʼndale nichxin kjoatse nga̱ be nga je Jesús kuiyántjai ngatsʼi chjota nga koa̱nskanni ánni nga koa̱n jchatʼanile jéele kʼoa koa̱n koationi ngantsjai (Rom. 3:25).
e Levítico 4:27-29: “Tsa ʼyani xi kui kʼoasʼin jmeni xi tsín sasénle Jeobá, tonga tsa tsín toxá sʼinni, 28 kʼoa tsa koa̱njinle nga kabajngijée, tjínnele jngo tindsoʼndí xi nda kji tsjoátʼa xi totʼatsʼe nga kabajngijée. 29 Yaa koane ntsja sonjko̱ cho̱ xi tsjoátʼa kʼoa kʼoati ya sikʼien jñani bʼaitʼa je cho̱ xi saká”.
f Levítico 17:11: “Nga̱ je kjoabijnachon xi tjínle je yao, yaa njín tíjnajin, kʼoa kui xá kitsjoaña nga ya jchatʼa jéeno ya sonxta, nga̱ jé njín xi síchatʼa je jée xi totʼatsʼe kjoabijnachon xi tjínle”.
g Hebreos 9:22: “Kʼoa me ngayije kʼoasʼin matsjeya kao njín, josʼin bʼéne je kjoatéxoma tsa tsín xíjten njín, likui koa̱n sʼe̱ kjoanichatʼa”.
h Hebreos 10:1-4, 12: “Je kjoatéxoma tjínle tongʼiánle je kjoanda xi kjoaʼaí, alikui tije soani je kjoabe. Je kjoatéxoma nikʼiajin male nga síjngo je xi kʼoasʼin binyachrianle, xi tsjoátʼakjitʼa tikuini njín nga jngójngó nó. 2 Tsa kʼoasʼin koan, likui tikitsjoatʼani tsakai, nga̱ je xi kʼoasʼin tsabexkón, likui tikisikjaʼaitsjenni xi tʼatsʼe jée, tsakai, nga ñaki ndiaa koantsje. 3 Tonga je njín xi sʼejten, xi tsjoátʼa, síkjaʼaitsjenjin je jée nga jngójngó nó. 4 Nga̱ je njínle toro, kʼoa xi tsʼe chato likui male faʼáxin je jée. 12 Tonga je Jesucristo, kʼia nga ndiaa kitsjoatʼa tojngo kjoatjao xi tʼatsʼe jée, tsakʼejnatʼa ntsja ngakixile Niná”.
