Je pastro Pablo i kitsole je chjotale Cristo xi Tesalónica tsʼe: “Tsa jngo xi tsín sikitjoson énnajin xi tjítʼa xo̱nbi, chótsenlao je chjotabi” (2 Tes. 3:14). Ngasʼa tojé xi chjotajchínga sʼin tjío fitjenngi kjoafaʼaitsjen jebi kʼianga batekjáyale jngo ndsʼee xi tsín nda tífikao yaole kʼoa nga tsín síndaya yaole ndsʼee jebi ninga jenkjín kʼa bʼaile kjoafaʼaitsjen. Je xi chjotajchínga sʼin tjío jngoo kjoanokjoaya tsjoá nga bájinkon je jtín nga jngo ndsʼee xi tsín tísítjoson je kjoafaʼaitsjen xi tíbʼaile. Kʼoa je ndsʼee xi ngikʼa alikui tije símiyoni je ndsʼee xi tsín nda tísʼín. Tokʼiaa fákao nga bichó kjoajtín kʼoa nga bitjotsoyason.

Ndʼaibi kʼoasʼin majinná nga je kjoafaʼaitsjen xi kitsjoa Pablo nga jngó jngóñá nga tjínnele kjuintjenngiaa. Alikui tijngo kjoanokjoaya tsjoáni xi chjotajchínga sʼin tjío nga koajinkon je jtín kʼiatsa ʼya xi tsín nda tífikao yaole. Ánni nga tsʼantjaiyani josʼin majinná tsakai. Kataʼyala jmeni xi kitso Pablo nga tongini nga kitsjoa kjoafaʼaitsjen jebi.

Je Pablo kʼoakitso nga tsakatio kʼa chjotale Cristo xi tsín nda kikao yaole ya jinjtín kʼoa tsín kisitjoson je kjoafaʼaitsjen xi kitsjoale. Tobʼelañá, i kitsole: “Tsa jngo xi kaile síxá, kʼoati tsín koa̱kjen”. Ningalani kʼoatsakʼinle nga katabajngiʼa yaole tjínkʼa xi tsín kʼoakisʼin kʼoa to énndiso kisisin. Jósʼin tjínnele tsaʼyatokon chjota jebi nga tsín kisitjoson je kjoafaʼaitsjen xi tsakʼaile (2 Tes. 3:​6, 10-12).

Je Pablo i kitso: “Chótsenlao je chjotabi”. Kʼianga én griego kui nchja̱ni nga nda chótsenlee ʼyáni xi tsín nda tífikao yaole kʼoa tsín tije si̱miyoñá. Ngatsʼi chjotale Cristo nga kʼoakitsole Pablo, ali tsa tojejin xi chjotajchínga sʼin tjío (2 Tes. 1:1; 3:6). Nga jngó jngó chjotale Cristo xi tjínnele kitjenngi kjoafaʼaitsjen jebi. Kʼianga tsabe tsa ʼyani xi tsín tísítjoson kjoatéxomale Niná alikui tiya tsakájtani.

Jebi alikui xi tsonile tsa kʼoasʼin jchatokon jonikao je xi chʼasjejin jinjtín, nga̱ je Pablo i kitsosa: “Kʼoasʼin tʼinyalao joni tsa ndsʼao”. Je chjotale Cristo tsakjákaonajmí nga kicho kjoajtín kʼoa nga kitsoyason je xi tsín nda tífikao yaole, tonga alikui tiya kinchja̱nile tsa jme sʼuí tsakatío kʼoa tsa jmesa xi kisʼin. Je Pablo kʼoakitso ánni nga kʼoakoa̱ntʼainni chjota jebi. I kitso: “Jméni nga koa̱nsoanile”. Nga tsín tiʼya xi kisimiyoni tsakui nichxin kisikjaʼaitsjenjin nga chʼao tísʼín kʼoa kisindaya yaole (2 Tes. 3:​14, 15).

Kʼoa ñá, jósʼin kjuintjenngiaa kjoafaʼaitsjen xi kitsjoa Pablo. Kuenta sʼiaan tsa kjoaixi nga tsín nda tísʼín je ndsʼee, nga̱ je Pablo alijejin kinchja̱ni je ndsʼee xi kui kʼoasʼín jmeni xi tsín sasénná ñá. Kʼoati tsín je kinchja̱ni je ndsʼee xi sakʼoa tjín jmeni xi tsoná kʼoa tsa tjín xi síkaoná. Jé kinchja̱ni je xi nkjín kʼa bʼaile kjoafaʼaitsjen tonga toxá sʼínni nga tsín sítjoson.

Kʼiatsa jchaa nga jngo ndsʼee xi tsín tísítjoson kjoafaʼaitsjen xi tsjoá Biblia a alikui koa̱n nga tosi tonda je si̱miyoaa kʼiatsa tibʼetsaojiaan kʼoa tsa jmesa xi sʼiaan. Tonga koaan chja̱koaa nga bichó kjoajtín kʼoa kʼianga bitjotsoyason. Tonga tsín koa̱n nga kjaʼaí ndsʼee kʼoéyanajmílee nga tsín tije tinimiyoñá xi tsín nda tífikao yaole. Nga̱ jngó jngóñá nga tjínnele si̱tjosoán jmeni xi kitso Pablo, kʼoa kʼianga jesindaya yaole je ndsʼee xi tsín nda tísʼín koaan si̱miyo ijngokʼá.