1, 2. 1) Jósʼin mangóson je kjoatsjoacha kao kjoamakjain. 2) Jméni xi chótʼayá i̱ kjoaʼmiya jebi.

JE Jeobá kʼoatso nga tsjoále kjoanichikontʼain je choʼndale xi kixi tjíofitʼale. Kʼoasʼin bakóniná nga tsjoakená. Kʼoa kuinga tsjoachañá nga je títjon koantsjoakená (1 Juan 4:19). Kʼianga sa tsjoacha sa tsjoacha koaan je Jeobá ngisaa nʼio koa̱ntajasa kjoamakjainná kʼoa ngisaa kʼoakʼoé tokoán nga tse kjoanichikontʼain tsjoále Jeobá je xi tsjoake (tʼexkiai Hebreos 11:6). *

² Je Jeobá mele nga sichikontʼain je choʼndale nga̱ je toxá kʼoasʼínni. Nga ñaki taja sʼe̱jna kjoamakjainná tjínnele kʼoakʼoé tokoán nga tse kjoanichikontʼain tsjoále Jeobá je xi ñaki kao ni̱ma̱le básjaini. Ñaki “makjainná [...] nga kjoakixi nga tjío je kjoa xi choyalee” (Hebreos 11:1). Kʼoa ñaki  kʼoatjín tokoán nga sichikontʼain Jeobá je xi kixi tjíofitʼale. Kataʼyala, jósʼin basenkaoná je kjoanichikontʼain xi kʼoainá. Jósʼin kisichikontʼain Jeobá je choʼndale nichxin kjoatse kʼoa jósʼin tísíchikontʼain nichxin xi tiyoaa ndʼaibi.

3. Jméni xi tsoná Jeobá ya Malaquías 3:10.

³ Je Jeobá kʼoatso nga sichikontʼain je choʼndale xi kixi tjíofitʼale. Kʼoatso nga sichikontʼainná tsa kʼoénelee yaoná jokji bichó nganʼioná nga si̱xálee. Je Jeobá itso: “Chótʼayakaonáo [...] a tsílaxó skoxʼáno ngʼajmi kʼoa nʼio tse kjoanichikontʼain tsjoano saʼnda nga tsín tijme xi ñʼai koa̱nchonnino” (Malaquías 3:10). Kʼiatsa kʼoasʼiaan tibakoñá nga bʼailee kjoanda.

4. Ánni nga makjainniná jme xi kitso je Jesús ya Mateo 6:33.

⁴ Je Jesús kʼoakitsole je chjotale nga je Niná tsjoále jme xi machjénle kʼiatsa kui títjon sikatío je xále Niná (tʼexkiai Mateo 6:33). * Kuinga kʼoakitsoni Jesús nga̱ be nga sítjoson Jeobá jmeni xi tso (Isaías 55:11). Kʼiatsa ñaki makjainná tʼatsʼe Jeobá kʼoati ñaki kʼoakʼoé tokoán nga sitjoson én jebi: “Likui xin koatejnale, nitsjionkonjinle” (Hebreos 13:5). Én jebi basenkaoná nga kʼoati makjainná jme xi kitso Jesús ya Mateo 6:33.

5. Ánni nga basenkaoniná ngatsʼiaa jmeni xi kitsole Jesús je Pedro.

 ⁵ Je pastro Pedro ñandia i̱ kitsole Jesús: “Jinjin jekinikatuíjin ngayije, kʼoa jejinroatʼalaijin. Jméni tsokʼoa xi sʼe̱najin” (Mateo 19:27). Je Jesús alijo kitsole Pedro nga kui kiskonangi. Tosa kʼoakitsole chjotale nga je Jeobá sichikontʼain jme xi tjíosʼín nga tjíosíxále. Ninga kuilani xá kʼoaile nga koa̱nskanni je pastro kao xi ngikʼa choʼndale Niná nga ya koatexomakao Jesús ya ngʼajmi, je Jesús kʼoati kitsole nga sʼe̱le kjoanichikontʼain xi tiʼakʼiani. Kitsole: “Toʼyanibe xi tʼatsʼe jaʼaínna kisikʼéjna ndʼiale, axo ndsʼe̱, axo ndichja, axo nʼaile, axo na̱le, axo chjoónle, axo ʼndíxti, axo nangi, ngijngo siento kʼoatjín kʼoaile, kʼoa sʼeele kjoatjao xi kjoabijnachon ngantsjai” (Mateo 19:29). Kʼoa nichxin xi tiyoaa ndʼaibi, sokóná ya jinjtín xi jo nʼainá, xi jo na̱ná, xi jo xtiná, xi jo ndsʼee kʼoa xi jo ndichjaa maná. Kjoanichikontʼain jebi ngisaa nʼio chjíle tikʼoajinni tojmeni xi nikatioá nga xále Niná nʼia.

6. Jósʼin basenkaoná nga ʼyaa nga sichikontʼainná je Jeobá.

⁶ Kʼianga ʼyaa jme kjoanichikontʼain xi tsjoáná je Jeobá kui xi basenkaoná nga kaná je kjoa xi bitjatojiaan. Ali tsa tondʼaijin nga tsjoáná kjoanichikontʼain, ngisaa tse kjoanichikontʼain sʼe̱ná nichxin xi nroaján (1 Timoteo 4:8). Nga ñaki kʼoakʼoé tokoán “nga Niná tsjoá[le] chjíle je chjota xi nʼio básjai nga je” koasenkaoná nga kixi koanngíntʼalee (Hebreos 11:6).

7. Ánni nga kʼoabixónsíñá nga ya mangóson ki̱cha̱ʼba̱ je kjoachoya xi tjínná.

⁷ Kʼianga kinchja̱ya Jesús ya jngo sonnindo, i kitso: “Tʼetsjoaotakon, kʼoa tʼejngotakon, nga̱ je chjíno nʼio tse koa̱n ya ngʼajmi. Kʼoasʼin kitjenngikontrale je xi kinchjaya tʼatsʼe Niná, xi títjon tjíono” (Mateo 5:12). Tjínkʼa choʼndale Niná xi ya ngʼajmi kʼoaile kjoanda. Kʼoa tjínkʼa xi i̱ kʼoaile kjoanda nga i̱ koatio sonʼnde ngantsjai nichxin kʼianga jeʼndenaxó koa̱n. Kʼoa nʼio tsjoa bʼé tokoán jebi (Salmo 37:11; Lucas 18:30). Je kjoachoya xi tjínná yaa mangóson “joni tsa jngo ki̱cha̱ʼba̱” (Hebreos 6:17-20). Tojo ma jngo ki̱cha̱ʼba̱ nga kui basenkao je chitso nga tsín jme xi male kʼianga ntjao̱ kʼoa nga jtsí tjín, je kjoachoya xi tjínná kui xi basenkaoná kʼoa tsjoáná nganʼio nga chókjoajinná je kjoa xi sʼená.

8. Jósʼin basenkaoná je kjoachoya xi tjínná nga tsín nʼio nikjáojiaan.

⁸ Je kjoachoya xi tjínná kʼoati koasenkaoná kʼianga tsín nʼio si̱kjáojiaan. Tojo ma je bálsamo nga síkinjenyʼánjon je yaoná, kʼoati sʼin síkinjenyʼánjin ni̱ma̱ná jmeni xi tongini tso Jeobá nga sʼin. Nda sʼe tokoán nga ʼyaa nga sikuindaná je Jeobá kʼiatsa je si̱kʼamiaa ngayeje kjoa xi  tjínná (Salmo 55:22). Je “Niná ngisa totse male sʼín ngayije kjoa jo kji xi nijé” (Efesios 3:20). Én jebi kui xi tsonile nga ngisa nʼio tse tsjoáná Jeobá jokji nijélee.

9. Jméni xi tjínnele sʼiaan nga sichikontʼainná je Jeobá.

⁹ Kʼianga sichikontʼainná je Jeobá, tjínnele nga sʼe̱ná kjoamakjain kʼoa nga si̱tjosonlee. Je Moisés i kitsole je chjota israelita: “Je Jeobá Nináli sichikontʼainli ya ʼnde xi tsjoákjoatjaoli nga ya kuijnai, tonga tokʼianí tsa ñaki nda si̱tjosuin, tsa nda kuinóʼyai jmeni xi tso je Jeobá Nináli kʼoa tsa nda si̱tjosuin je kjoatéxoma xi titsjoale ndʼaibi. Nga̱ je Jeobá Nináli ñaki kʼoasʼin sichikontʼainli jotítso” (Deuteronomio 15:4-6). Nʼio nkjín koya tjínni anni nga ñaki makjainniná nga sichikontʼainná je Jeobá kʼiatsa tosi tonda kixi kjuintʼalee.

10, 11. Jósʼin kisichikontʼain Jeobá je José.

¹⁰ Je Biblia kui xá kichjini nga koasenkaoná kʼoa nkjín choa̱ faʼaitʼa josʼin kisichikontʼain Jeobá je choʼndale xi tsakatio nichxin kjoatse (Romanos 15:4). Tobʼelañá, nʼio nda choa̱ tsakʼéjnaná je José. Nga títjon, je xtindsʼe̱ jo choʼnda sʼin tsakaténa. Xijekoan, je chjoónle naile énndiso tsakáne nga kʼoakitso nga tjín xi kisʼin je José, kʼoa ndoyá tsakʼejnaʼya ya Egipto. A kichajinle xi tʼatsʼe Jeobá nga kʼoasʼin ndoyá tsakʼejnaʼya. Mai. Je Biblia kʼoatso nga je Jeobá tosi tonda ya tjen tsakʼejnakao je José kʼoa kuinga nda kitjoni ngayeje jme xi kisʼin (Génesis 39:21, 23). Ninga kʼoasikji tse kjoa jaʼatojin je José, tsejta koan kʼoa kiskoyá nga je Jeobá koasenkao.

¹¹ Jósʼin kisichikontʼain Jeobá je José. Jngo jao nó nga koanskanni, je Faraón kisikʼéjnandaí je José kʼoa nʼio ngʼa xá kitsjoale, jé koanjaonile je chjotaxá xi tsakatéxoma ya Egipto (Génesis 41:1, 37-43). Je José kao chjoónle jao xti kisʼele. Je xi títjon Manasés kitsole nga̱ kʼoakitso José nga je Niná tsakjaʼáxinle ngayeje kjoañʼai xi tíjnajin kʼoa ngatsʼi je ndʼiale nʼaile. Xi ijngo, Efraín kitsole nga̱ je José kʼoakitso nga je Jeobá kisinkjínya ya ʼnde jña to kjoañʼai tjín (Génesis 41:51, 52). Kuinga kisichikontʼainni je Jeobá nga kixi koan José. Nga kʼoakisʼin nʼio nkjín chjota israelita kʼoa kao chjota egipcio kitjontjai nga koan kjinrá. Je José koanchoyale nga tʼatsʼe Jeobá jaʼaini ngayeje kjoanichikontʼain xi tsakʼaile (Génesis 45:5-9).

12. Jméni xi tsakasenkao Jesús nga kixi koan.

¹² Je Jesucristo kisitjosonle je Niná ninga nʼio tse kjoa jaʼatojin. Kʼoa je Jeobá nʼio tse kjoanda kitsjoale. Jméni xi tsakasenkao je Jesús nga kʼoasʼin kixi koan. Je Biblia kʼoatso nga kuinga kiskanile je yá kjoañʼai nga kui kisikjaʼaitsjen je kjoatsjoa xi kiskoyale (Hebreos 12:2, TNM). Nʼiojin tsjoa kisʼe kon je Jesús nga tsakʼasjetsje jaʼaínle Niná. Je Niná nda kisʼele jokisʼin je Jesús kʼoa nʼio  tse kjoanichikontʼain kitsjoale. Kʼoa je Biblia kʼoatso nga ya tíjnatʼa ngakixile Niná. Kʼoati tso nga je Niná nʼio ngʼa xá kitsjoale Jesús kʼoa “kitsjoale je jaʼaín xi ngisasa totítjon tíjna kaoni tsa ngayije jaʼaín” (Filipenses 2:9).

13, 14. Jósʼin bekon Jeobá jmeni xi nʼia kʼianga nixálee.

¹³ ʼYañá nga nʼio bechjí Jeobá jme xi nʼia kʼianga nixálee. Bení jomaná kʼianga sakʼoa kʼoasʼin nikjaʼaitsjeen nga tsín kuitjosonná je xále. Kʼoati mamakená nga bijtajinná je xá xi nʼia kʼoa tsa kʼiaje̱ nga tsín ʼyaa josʼin kuijnyíʼaa je familianá. Kʼoati be jomaná tsa depresión tjínná kʼoa tsa jmesani chʼin xi tsín tsjoáʼndená nga kʼoakji nixálee jonʼia ngasʼa. Koaan kʼoakʼoé tokoán nga bechjí je Jeobá nga kixi mangíntʼalee ninga kjoa tibitjatojiaan (tʼexkiai Hebreos 6:10, 11). *

¹⁴ Je Jeobá i ʼmile: “Ji xi Noʼyai kjoabʼetsʼoa”. Kʼoa ʼyañá nga nrʼoéná kʼianga bʼetsʼoalee (Salmo 65:2). “Je Nʼai xi tsʼe kjoamatakon, kʼoa Niná xi tsʼe ngayije kjoanijetakon” tsjoáná jme xi machjénná nga tosi tonda kixi koaan. Tsakui nichxin je sichjén je ndsʼee nga kuinyakaoná (2 Corintios 1:3). Je Jeobá tsjoa sʼele kʼianga bakolee kjoamatokon xíngiaa kʼoa nga binyakoaa. Je Biblia itso: “Je xi bakóle kjoanda je xi ma̱ tíjna jé Jeobá síkinyale, kʼoa jé tsjoángajaonile jmeni xi sʼín” (Proverbios 19:17; Mateo 6:3, 4). Kʼianga binyakoaa je ndsʼee, joxi jéni Jeobá tibʼailee kʼoa kʼoatso nga tsjoángajaoniná jme xi kʼoee.

15. Jmé kjoanda xi ngisa choyalai nga kʼoaili (chótsenlai sén xi fitsʼiani kjoaʼmiya jebi).

¹⁵ Je chjotale Cristo xi ya ngʼajmi koai kui koyale nga tsjoále Jesús “je kjoakixi xi joni jngo korona” (2 Timoteo 4:7, 8). Tonga tsa tsín ya tjínná kjoachoya ya ngʼajmi kʼoati kʼoainá kjoanda. Miyón mani “xi kjaʼaí barré” ʼmile xi koyale nga i̱ Sonʼnde kʼoaile kjoabijnachon xi tsínkʼia fetʼa kʼianga jeʼndenaxó koa̱n. Chjota jebi “ñaki kʼoetsaojin jokji nyʼán sʼin koatio” (Juan 10:16; Salmo 37:11).

16. Jósʼin sínʼiojin tokoán jme xi tso 1 Juan 3:19, 20.

¹⁶ Tsakui nichxin sakʼoa kʼoasʼin nikjaʼaitsjeen nga tsín nʼio tse xi tinʼia nga tinixálee je Jeobá. Kʼoa tsakui nikjaʼaitsjenje̱ tsa nda tísʼele Jeobá jmeni xi tinʼia. Kʼoa tsakui nichxin saʼnda kʼoabixoán nga tsín bakinná je kjoanichikontʼain xi kʼoainá. Tonga alikui koa̱n si̱chajiaan nga “ngisa ngʼa tíjna Niná kaoni tsa ni̱ma̱ná. Je ñaki be ngayije kjoa” (tʼexkiai 1 Juan 3:19, 20). * Tsa kuinga nixánilee je Jeobá nga tjínná kjoamakjain kʼoa nga tsjoachaa, koaan kʼoakʼoé tokoán nga sichikontʼainná ninga kʼoasʼin nikjaʼaitsjeen nga tsín nʼio tse jmeni xi tinʼia (Marcos 12:41-44).

17. Jmé kjoanichikontʼain xi títsjoáná Jeobá nichxin xi tiyoaa ndʼaibi.

 ¹⁷ Je Jeobá tísíchikontʼain naxinandále ndʼaibi ninga nichxin fikjetʼa tiyoaa kʼoa ninga je Na̱i kjinentsja sonʼnde. Jósʼin tísíchikontʼain. Títsjoáná jme xi machjénná xi tʼatsʼe Niná tínroani kʼoa nyʼán tiyoaa. Kʼoati títsjoáná kjoanda nga je ndsʼee kao tichjaa xi tjío jngo tjíjtsa Sonʼnde familianá mani, tojo kitso je Jesús (Isaías 54:13; Marcos 10:29, 30). Je Jeobá kʼoati tíbasenkaoná nga nyʼán tjío tokoán kʼoa nga tsjoa tjío tokoán (Filipenses 4:4-7).

18, 19. Jósʼe tokoán nga nikjaʼaitsjeen jokji tísíchikontʼainná je Jeobá.

¹⁸ Je Jeobá nʼio tísíchikontʼain je naxinandále jngo tjíjtsa Sonʼnde. Tobʼelañá, jngo tichjaa xi Alemania tsʼe xi Bianca ʼmi itso: “Nʼio tsjoale kjoanda Jeobá jokji basenkaona nga kjoa sʼena kʼoa nga ya tjen tíjnakaona nga nyaon nyaon. Nʼio chʼao chon sonʼnde kʼoa tsín tibeni josʼín je chjota, tonga alikui tsokjoan nga̱ jé tisixále. Nga jme xi sʼian kʼianga sixále, jngo siento ya kʼoakji tsjoángajaonina”.

¹⁹ Ijngosa choa̱ tíjnaná xi tsʼe Paula, jngo tichjaa xi Canadá tsʼe, xi 70 nóle. Likui nanda ma jme xi sʼín nga̱ likui timani yátsʼi̱n. Tonga kʼoatso nga tsínkui bʼéchjoale nga tsoyason. Itso: “Teléfono sichjén kʼianga xinyasoan kʼoa xinyaña tojñani. Nga tsín kjuinroajen tokoan, jngo cuaderno kijnana jñani bʼetʼa testole Biblia kʼoa jmeni xi nroatʼa xo̱n xi nichjén. Kjitʼaa bʼexkia cuaderno jebi kʼoa cuaderno xi tsjoánganʼiona sʼin kitsjoajaʼaínle. Alikui tondiaa nroajen tokoán kʼianga kui ngisa kuenta nʼia jme xi tsoná Jeobá nga tsjoáná. Je Jeobá tíjnandaa nga koasenkaoná tojme kjoa xi kuitjátojiaan”. Tsakui nichxin tsínkui kjoa tibitjatojiaan jme kjoa xi tjíofaʼatojin je Bianca kao Paula, tonga kʼoajinti faʼaitsjenná jokji kjoanichikontʼain títsjoáná je Jeobá ñá kʼoa kao xíngiaa. Tsjoa tjío tokoán ngatsʼiaa jokji tísíchikontʼainná Jeobá nichxin xi tiyoaa ndʼaibi kʼoa jokji sichikontʼainná nichxin xi nroaján.

20. Jméni xi tsín jao tjínná tsa tosi tonda si̱xálee Jeobá jokji bichó nganʼioná.

²⁰ Alikui jao tjínná nga nrʼoé je Jeobá kʼianga bʼetsʼoalee. Ñaki kʼoatjín tokoán nga tsjoáná jme xi tso kʼiatsa kʼoasʼiaan josʼin mele (Hebreos 10:35, 36). Tosi tonda si̱tajaa kjoamakjainná kʼoa si̱xálee Jeobá jokji bichó nganʼioná. Tsa kʼoasʼiaan, alikui jao tjínná nga sichikontʼainná (tʼexkiai Colosenses 3:23, 24). *