1, 2. Jósʼin basenkaoná Romanos 5:12.

ROMANOS 5:12 itso: “Kui je xi jée ʼmi jaʼasʼenjin sonʼnde xi totʼatsʼe jngo chjota. Kʼoasʼin tjín kjoabiya xi totʼatsʼe jéebe. Kʼoa je kjoabiyabe kʼoasʼin kitsaotʼale ngatsʼi chjota, nga̱ tsajngi jée ngatsʼi”. Testo jebi nʼio nda ʼyaa kʼoa kjitʼaa nichjén nga ʼmiyalee Biblia je chjota.

² Bersíkulo jebi nʼio nkjín kʼa faʼaitʼa ya libro Jmé kjoanni xi bakóya je Biblia. Kʼianga chotʼayá je kjoaʼmiya 3, 5 kao 6 kao xtiná kʼoa tsa kao xi kjaʼaí, bʼexkiañá Romanos 5:12. Kui xá bʼexkiañá nga ʼmiyalee ánni nga tsín ʼndenaxóni Sonʼnde, ánni koanchjénni nga koanchjíntjé kʼoa ánni nga biyañá. Tonga je bersíkulo jebi kʼoati koasenkaoná nga ngisasa chjí jchatokoán je kjoamiyo xi tjínná kao Jeobá. Xi ijngosani, koasenkaoná nga tosi tonda si̱tjosonlee kʼoa nga chóyalee jmeni xi tongini tso.

3. Jméni xi tjínnele si̱kjaʼaitsjeen.

 ³ Chjotajéeñá ngatsʼiaa kʼoa sokójéená nga nyaon nyaon. Tonga je Jeobá bakóná kjoamatokon nga̱ bení nga chjotajée maa kʼoa tíjnandaa nga síchatʼaná (Salmo 103:13, 14). Je Jesús kʼoakitso nga tjínnele si̱jélee kjoanichatʼa je Jeobá (Lucas 11:2-4). Kʼianga jesíchatʼaná Jeobá je jéená likui titjínnenile nga tosi tonda kui si̱kjaʼaitsjenjiaan. Kataʼyala ánni nga koa̱n sichatʼaniná je Jeobá.

4, 5. 1) Jméni xi tsoyaná Romanos 5:12. 2) Jmé xi tínchja̱ni je én xi kjoandale Niná tso.

⁴ Ya karta xi tsʼe Romanos, tobʼelañá ya kapítulo 6, basenkaoná nga majinná jósʼin síchatʼaná je Jeobá. Ya kapítulo 3 kʼoatso nga chjotajée maa ngatsʼiaa. Kʼoa xijema, je Pablo itso: “Fetʼale jée xi tokjoatjao, xi totʼatsʼe kjoandale Niná, nga̱ Cristo tsakʼéchjíntjai xi tʼatsʼe” (Romanos 3:23, 24). Nga kjoandale Niná kitso je Pablo kui tínchja̱ni nga tsín jme xi síjéngajaoniná Niná ninga nʼio tse kjoanda tsakakóná kʼoa ninga tsín bakinná kjoandale.

⁵ Jngo chjota xi tʼatsʼe Biblia kotʼayason kʼoatso nga kʼianga kui faʼaitʼa ya Biblia je én xi kjoandale Niná tso kui tínchja̱ni jme xi kisʼin Niná kao Cristo nga tsakʼasjentjainá tʼatsʼe jée kao kjoabiya. Kuinga ya Traducción del Nuevo Mundo “kjoanda xi tsín bakinná” sʼin jaʼatoyani én jebi. Kataʼyala jméni xi kisʼin Niná tʼatsaan, jósʼin basenkaoná ndʼaibi je kjoanda xi tsakakóná kʼoa jmé kjoachoya tsjoáná tʼatsʼe nichxin xi nroaján.

6. ʼYáni xi koasenkao je kjoanda xi tsakakó Niná, kʼoa jósʼin koasenkao.

⁶ Nga kʼoasʼin tsakajngijée je Adán, ngatsʼiaa tsakinná jée kao kjoabiya. Kuinga kʼoatsosíni Biblia nga “totʼatsʼe jngo kjoatsʼantjaikjoa xi tsʼe jngo chjotabe, kjoabiya tsakatéxoma”. Tonga je Jeobá nʼio tse kjoanda tsakakóná nga kitsjoa je Jesucristo, je xi tsakʼasjentjainá ngatsʼiaa (Romanos 5:12, 15, 17). Nga kisitjoson je Jesucristo “kjaínga nkjín xi chjotakjoakixi koa̱n” kʼoa sʼeele “kjoabijnachon ngantsjai” (Romanos 5:19, 21).

7. Ánni kʼoabixónsíñá nga kjoanda tsakakóná Niná nga kitsjoa xi tsakʼéchjíntjainá, kʼoa ánni nga tsín bakinniná kjoanda jebi.

⁷ Si̱kjaʼaitsjenla jebi: Je Jeobá nʼio tsakakóná kjoanda nga kitsjoa je ʼNdíle nga tsakʼéchjíntjainá tʼatsʼe jée kao kjoabiya. Koanjin tsa tsín kʼoakisʼin. Alikui bakinná jmeni xi kisʼin tʼatsaan je Jeobá kao Jesús. Nʼio bʼailee kjoanda nga koa̱n jchatʼa je jéená kʼoa nga koa̱n kuiyoaa ngantsjai nichxin. Josʼin mangínkoaa yaoná kao kui bakonilee je Niná nga ʼyachjiá jmeni xi kisʼin tʼatsaan.

8. Jmé kjoafaʼaitsjenni xi tsín kixi tíjna.

⁸ Je Niná síchatʼaa je jéená ninga je xi nʼio ai. Tonga tsín koa̱n nga tokui kʼoasʼianñá  xi chʼaotjín kʼoa kʼoakuixoán nga sichatʼaná je Jeobá. Kʼoasʼin kisikjaʼaitsjen kʼa je chjotale Cristo kʼianga siglo 1, ninga tjíosa kʼa je pastrole Jesús nga kʼia (tʼexkiai Judas 4). * Ndʼaibi, machjén nga si̱kuindaa yaoná kʼoa tsín kʼoaiʼndee nga kʼoatisʼin si̱kjaʼaitsjeen.

9, 10. Ánni kʼoakitsoni je Pablo nga je kʼoa kao chjotale Cristo xi ngikʼa nga joxi jekʼien xi tʼatsʼe jée.

⁹ Je Pablo kʼoakitsole je chjotale Cristo nga tsín kixi tíjna nga kʼoasʼin sikjaʼaitsjen nga sichatʼale Niná tojmeni xi sʼin. Kʼoakitsole nga tjínnele kjoaʼaxinle yaole kjoafaʼaitsjen jebi, i kitsole: “Ñá xi joni tsa tiyokʼen, nga likui tiñá ʼyanía jée” (tʼexkiai Romanos 6:1, 2). * Jósʼin tsoyanile jmeni xi kitso je Pablo.

¹⁰ Xi totʼatsʼe kjoabʼechjíntjaile Jesús, je Niná kisichatʼale je Pablo kʼoa kao chjotale Cristo kʼianga siglo 1. Je Jeobá kao nganʼiotsjele kiskoejinni nga xtile koa̱n. Tsa kixi koa̱n, koaan koatio ngantsjai ya ngʼajmi kʼoa yaa koatexomakao je Cristo. Tonga nga sʼa i̱ tjío sonʼnde, jókitsonile je Pablo nga joxi jekʼien tʼatsʼe je jée. Kui xi kitsonile nga jetsʼantjaiya josʼin kikao yaole. Kʼoa nga kitsoya je Pablo xi tʼatsʼe jebi, kui kisikʼaxki̱ jokoan je Jesús. Kʼoakitso nga likui ti kjoabiya tsakatéxomanile nga̱ espíritu koan nga jejaʼáyanile. Kʼoa je Pablo i kitsole je chjotale Cristo: “Joni tsa tiyokʼennío tʼatsʼe jée, tonga tiyochonnío tʼatsʼe Niná nga tiyokao Cristo Jesús Nainá” (Romanos 6:9, 11). Je chjotale Cristo ñaki kisikʼantjaiya yaole, nga̱ tsín tikitsjoaʼndeni nga kui xi chʼaotjín kisikinjele. Tsakʼénele yaole nga kui kʼoakisʼin xi sasénle Niná.

11. Nichxin xi tiyoaa ndʼaibi, jósʼin jekʼien xi tʼatsʼe jée je chjotale Cristo.

¹¹ Kʼoa ñá, jósʼin jekʼieen xi tʼatsʼe jée. Tsakui nichxin kui xi chʼaotjín kʼoakinʼia nichxin kjoatsʼe nga kje ʼyajián josʼin síkjaʼaitsjen je Jeobá. Nga kʼia, “choʼndale jée” koan (Romanos 6:19, 20). Tonga kʼianga jekoanjinná josʼin mele Niná nga kjuinkoaa yaoná, kinikʼantjaiyañá yaoná, tsakʼaitʼalee yaoná kʼoa tsangínsʼenngindáñá. Ñaki kʼoatsakʼé tokoán nga je Jeobá si̱tjosonlee kʼoa nga kui kʼoasʼiaan jmeni xi sasénle. Ndaí tsakiyolee je jée kʼoa “choʼndale xi kjoakixi” koan (Romanos 6:17, 18).

12. Jméni xi machjén nga chjoéjiaan.

¹² Je Pablo i kitso: “Li bʼaiʼndejinlao jéebe nga koatexoma yajin yaono xi biya, nga kʼoasʼin si̱tjosonnilao xi kjoachi̱nga̱le” (Romanos 6:12). Machjén nga chjoéjiaan jmeni xi mená sʼiaan. A kʼoaiʼndeñá nga kui xi chʼaotjín sikinjená axo kʼoéchjoalee yaoná. Chjónangilee yaoná jebi: “Kʼianga kui xi chʼaotjín simetokoan, a tsjoaʼndele yaona nga tosi tonda kui sikjaʼaitsjen kʼoa chan kʼoasʼian xi chʼaotjín. Axo kjitʼanangi faʼaxian jinkjoafaʼaitsjenna xi chʼaotjín”. Tsa ʼyachjiá je kjoanda xi tsakakóná Niná, kʼoénejinlee yaoná nga kui kʼoasʼiaan jmeni xi sasénle.

13. Jmé choa̱ xi bakóná nga koa̱n kui xi ndatjín kʼoasʼiaan.

¹³ Kʼianga siglo 1, ya naxinandá Corinto tjínkʼa chjota xi ché koan, xi tixʼin xínkjín tsakjayokaoni, xi kisichajngitʼale chjoónle kʼoa tsa xʼinle, xi xkóson tsakʼétsʼoale kʼoa xi cháchʼi̱ koan. Tonga nga tsabe xi tʼatsʼe Jeobá kʼoa koantsjoake, kisikʼantjaiyaa yaole. Soa koanle tʼatsʼe jmeni xi kisʼin (Romanos 6:21; 1 Corintios 6:9-11). Je chjotale Cristo xi tsʼe Roma kʼoati kisikʼantjaiya yaole. Je Pablo i kitsole: “Niʼi̱tséjin bʼaiʼndelao jée jo tjín jko̱yale yaono, nga kjoatsʼen síchjén. Tosa Niná tʼaiʼndelao yaono, joni tsa xi kʼen kinikjaʼáyanile, tjíokonni ndʼaibi. Kʼoati tʼaiʼndelao Niná ngayije jko̱yale yaono, nga koa̱nchjénle xi tʼatsʼe xi kjoakixi” (Romanos 6:13). Je Pablo likui jao kisʼele nga je chjotale Cristo koaanle nga kui xi ndatjín kʼoasʼin ánni nga koakonile Niná je kjoandale.

14, 15. Jméni xi tsakui nichxin chjonangilee yaoná.

¹⁴ Kʼoati ma nichxin xi tiyoaa ndʼaibi. Tjínkʼa je chjotale Cristo xi kʼoati kisʼin ngasʼa jokisʼin je chjota xi tsakatio ya Corinto. Tonga nga tsabe xi tʼatsʼe Jeobá, kisikʼantjaiyaa yaole kʼoa kisitsjee yaole. Ngatsʼiñá nga kinikʼantjaiyaa yaoná nga̱ kui xi mená kʼoasʼiaan jmeni xi sasénle je Jeobá. Jósʼin koakoá nga ʼyachjiá je kjoanda xi tsakakóná Niná. Kʼiaa nga kuixkantʼakoaa je xi chʼaotjín kʼoa kʼoasʼin si̱chjén kjoabijnachonná nga je Jeobá si̱xálee.

¹⁵ Tjínnele kʼoénelee yaoná nga tsínkui jée kuijnyá jokisʼin je chjota xi tsakatio ya Corinto. Alikui koa̱n nga tosi tonda kuijnyíjée kʼoa kʼoasʼin si̱kjaʼaitsjeen nga koakoná kjoanda je Jeobá kʼoa sichatʼaná. Kʼoa jósʼin nikjaʼaitsjeen tʼatsʼe je jée xi tosʼa choa kjoa ma kʼale. A nitjosonlee je Jeobá (Romanos 6:14, 17).

16. Jósʼin ʼyañá nga tsín tokui xi kʼoéchjoalee yaoná je jée xi síkʼaxki̱ ya 1 Corintios 6:9-11.

¹⁶ Si̱kjaʼaitsjenla je pastro Pablo. I kitso: “Tonga an toxá yao nía. Kisatenatʼale jéebe nangi tijnale. Alikui machoyana jme xi sʼian anbi, ni kʼoajin sʼian je xi mena, tonga je xi chʼaoke̱, jebe xi kʼoasʼian” (Romanos 7:14, 15). Ningalani tsínkui kʼoakisʼin je Pablo jmeni xi síkʼaxki̱ ya 1 Corintios 6:9-11, kʼoakitso nga tojo tsakajngijée. Koanmele kui kʼoakisʼin jmeni xi sasénle Niná, kuinga tsakʼénenile yaole nga kui xi ndatjín kisʼin (tʼexkiai Romanos 7:21-23). * Machjén nga kjuintjenngiaa je choa̱le kʼoa kʼoénelee yaoná nga si̱tjosonlee je Jeobá.

17. Ánni nga tsín bʼendisosíñá xi chjotale Cristo maa.

¹⁷ Tobʼelañá, kʼianga si̱xálee je Jeobá  ʼyañá nga tjínnele chjotakixi koaan kʼoa tsín kʼoéndisoaa (tʼexkiai Proverbios 14:5; * Efesios 4:25 *). Tsín mená nga kʼoakoankjoaan jokjoan je Na̱i xi “nʼaile kjoandiso” ʼmile. Kʼoati si̱kjaʼaitsjeen nga kuinga kʼienni je Ananías kao chjoónle nga tsakʼéndiso. Kuinga tsín bʼendisoñá (Juan 8:44; Hechos 5:1-11). Tonga nga chjotakixi maa ali tsa tokuijin xi tsonile nga tsín énndiso kuinókjoaa. Tsa ʼyachjí kjoaixiaa je kjoanda xi tsakakóná Niná kʼoati tjínnele kixi koaan tʼatsʼe xi kjaʼaí kjoa. Kataʼyala.

18, 19. Jméni xi tsín tjínnele kʼoasʼiaan nga chjotakixi koaan.

¹⁸ Kʼiatsa mená nga chjotakixi koaan, likui tokui xi machjén nga tsín kʼoéndisoaa. Tobʼelañá, je Jeobá kʼoakitsole je chjota israelita nga tsín siché, nga tsín kʼoanacha kʼoa nga tsín énndiso koane xínkjín. Ánni nga tsín tjínnenile kui kʼoasʼin. Kuinga je Jeobá i̱ kitsole: “Tjínnele nga tsje koaon, nga̱ an Jeobá Nináno, tsjeña” (Levítico 19:2, 11). Ningalani tsín énndiso kuinókjoaa, tonga  tsakui kʼoakuixoán kʼoa tsakui kʼoasʼiaan jmeni xi kʼoasʼin sijinlee xi ngikʼa jmeni xi tsínni kʼoatjín, tsínjin chjotakixi kjimaa.

¹⁹ Tobʼelañá, tsa jngo chjota kʼoakuitsole je naile kʼoa tsa je xi ñatjen síxá nga tjínnele xátí kuitjo xále nga̱ tsʼe chjinexki tífi, tonga likuini kui nga xátí koaini. Kuinga vacación jekoai nga menile xátí kuitjo. Kʼoa tongotjoni nga xki koaikatse kʼoa tsa maije̱ tjín xi koaikʼéchjí ya tsʼe chjinexki. A kixi kjima tsa kʼoasʼin axo totíbʼanachaa. Jmeni xi kitso alikuini ñaki kʼoatjín. Je chjota sakʼoaa bʼanacha kʼianga tjín xi mele kʼoa tsakuije̱ nga tsín jme kjoa sʼe̱le. Tonga ñá, jé Jeobá nitjosonlee kʼoa kʼoatsoná nga tsín tjínnele chʼa̱nachaa. Xi mená kʼoasʼiaan kui jmeni xi kʼoatso Niná nga kixi tíjna kʼoa tsje tíjna (Romanos 6:19).

20, 21. Jméni xi tsín tjínnele kʼoasʼiaan kʼiatsa ʼyachjiá je kjoanda xi tsakakóná Niná.

²⁰ Alikui nichajngiaa, alikui machʼiaa kʼoa tsínkui kʼoanʼia je jée xi nʼio ai tjío. Tonga tsa ʼyachjiá je kjoandale Niná, kʼoati tsínkui kʼoasʼiaan jmeni xi tsín sasénle. Tobʼelañá, ali tsa tokuijin xi bʼechjoalee yaoná je kjoachajngi, kʼoati tsínkui bʼetsaojinkoaa xi jndí tíjna. Kʼoa ali tsa to kjoachʼi̱jin xi bʼechjoalee yaoná, kʼoati likui nʼio tse ʼyoá. Tsakui nichxin ñʼai koa̱nná, tonga koaan kʼoéchjoalee yaoná.

²¹ Kʼoénelee yaoná nga kjuintjenngiaa kjoafaʼaitsjen xi kitsjoa Pablo nga kitso: “Li bʼaiʼndejinlao jéebe nga koatexoma yajin yaono xi biya, nga kʼoasʼin si̱tjosonnilao xi kjoachi̱nga̱le” (Romanos 6:12; 7:18-20). Alikui koa̱nná nga ñaki chja̱ʼaxinlee yaoná je jée. Tonga nga bixkantʼakoaa tojmeni xi chʼaotjín bakoñá nga ʼyachjiá je kjoanda xi tsakakóná Jeobá kao Jesús.

22. Jmé kjoanichikontʼain so̱koná tsa ʼyachjiá je kjoandale Niná.

²² Je Jeobá síchatʼaná kʼoa nʼio chjí ʼyaa nga bakóná kjoanda. Kʼoénelee yaoná nga tsínkui kʼoasʼiaan jmeni xi kʼoatsoná Niná nga chʼaotjín, ninga tsín chʼaotjín male je chjota. Jmé kjoanichikontʼain so̱koná tsa kʼoasʼiaan. Je Pablo i kitso: “Ndʼaibindai nga jejitjondaílao jée, kʼoa choʼndale Niná koaon, kʼoasʼin kjimajchájinno xi koa̱ntsjejinnino. Kʼoa xi kjoetʼani jebi kjoabijnachon ngantsjai ní” (Romanos 6:22).