NGA kʼia, tokʼoa jemandosinna je Énle Niná. Je xo̱n xi Énle Niná faʼaitʼa xi kisʼeyole je mana nʼio koantsjoake kʼoa xi ngisa nʼio koantsjoake kui je sén xi faʼaitʼa. Je pana alikui koanmele nga Énle Niná tsakjákaonina je mana. Tonga nʼio koanndosinna xi tʼatsʼe Niná kʼoa nʼio nkjín koya jmeni xi kiskonangia, kuinga kʼia tsakakóyasínina je mana kʼianga tsín je pana. Kui xi tsakasenkaona nga kʼoati kisʼenngindá kʼoa nga kitsjoatʼale yaona je Jeobá. Yaa kisʼe̱nngindá ya Blackpool (Inglaterra), nga nó 1943 kʼoa te nóna nga kʼia.

Me kjitʼa nga ñatjen kitjokʼinyasuinjin kao mana. Kʼianga tsangínkʼinyalaijin Énle Niná je chjota gramófono kinichjainjin kʼoa nʼio yʼai kjoan, mela aon kilo ai. Nga sʼa tiʼndía nʼio ñʼai koanna nga tsakʼa aparato jebi nga kixinyasoan.

Kʼianga 14 nóna, koanmena nga precursor sʼin sixá. Tonga je mana kʼoakitsona nga je kjoanla títjon kjoakaonajmía je ndsʼee xi siervo sʼin tíjna (je xi superintendente xi tsʼe circuito ʼmi ndʼaibi). Je ndsʼee jebi kʼoakitsona nga títjonkjoanla jngo xá skotʼaya xi  so̱koʼanina yaona, kʼoa kʼoakisʼian jmeni xi kitsona. Jao nó kisixá kʼoa xijekoan ijngo xi superintendente ma kiskonangile tsa koa̱n nga precursor sʼin sixá kʼoa je ndsʼee jebi i kitsona: “Jmé xi tichoyakoai”.

Kʼianga sá abril nó 1949, je mana kao an kitjoníjin ya ndʼia jña tiyuijin kʼoa tsakichonsjeníjin ngayeje tsojmi xi tjíonajin kʼoa yaa tsangínkiyuijin ya Middleton, ya chrian Mánchester. Yaa tsakʼetsʼiakoaijin nga precursor sʼin kinixáijin. Ño sá nga koanskanni, tochan kʼoakixinle jngo ndsʼee xi kʼoati precursor sʼin tísíxá nga ñatjen kʼuínyasuinjin. Je sucursal kʼoakitsonajin nga ya kʼoainganʼiuijin jngo jtín xi tokʼia kisʼejna ya Irlam. Kjaʼaí jtín kitsjoanganʼio je mana kʼoa kao ijngo tichjaa xi kʼoati precursora sʼin kisixá.

An kʼoa kao je ndsʼee xi ñatjen kixinyasoan jin kisʼenenajin nga tsakjandiaijin je kjoajtín. Tosʼaa 17 nóna nga kʼia, kʼoa nga sʼa chjotse je jtín tochoa mani je ndsʼee xi koa̱n nga xá kʼoaile. Nga koanskanni, kʼoatsakʼinna nga sikʼantjaiya je jtín jña fia kʼoa nga ya kjuía ya Buxton, ya jtín jebi nʼio choa mani xi tsoyason kʼoa nʼio machjén nganʼio. Je kjoanda xi kisokona nga kʼoasʼin kisixá kui xi nʼio tsakasenkaona nga kitjosonna je xá xi tsakʼaina nga koanskanni.

Nga nó 1951, kʼiaa titsakʼendangáña je solicitud xi tsʼe Skuela xi tsʼe Galaad jña nichjine misionero. Tonga nga sá diciembre nó 1952 kʼoatsakʼinna nga sondado koa̱n. Kʼoakixian nga tsín sitjosoan nga̱ xále Niná tisʼian, tonga ya tribunal alikui koankjainle jmeni xi kixinle kʼoa jaon sá tsakatejnaʼya ndoyá. Kʼianga tojo sʼa ya tijnaʼya ndoyá, kʼoatsakʼinna nga koa̱n kjuía je skuela xi mani 22 xi tsʼe Galaad. Nga sá julio nó 1953, yaa kʼia ya Nueva York kʼoa kui kikoa jngo chitso xi Georgic ʼmi.

Nga jekichoa, kiña je kjoajtíntse xi “Sociedad del Nuevo Mundo” tsakʼin. Xijekoan, tren kiskoe nga kia ya South Lansing (Nueva York), jñani sʼe̱jna je Skuela xi tsʼe Galaad. Kʼianga jekitjojen je tren jngo karro  kiskoe saʼnda nga kichoa ya South Lansing. Tonga nga chriankʼia kitjoña ndoyá tochoa tao̱n yʼa, kʼoa jngo chjota xi ya ñatjen kitsjainjin 25 sentao tao̱n kitsjoana xi tsakatseña je boletole karro nga koan kichoa ya South Lansing.

Je Skuela xi tsʼe Galaad nʼio tsakasenkaonajin nga kʼoakinʼiaijin tojmeni xi totʼatsʼe ngatsʼi chjota (1 Corintios 9:22). Je Paul Bruun, Raymond Leach kʼoa kao an yaa kinikasénnajin ya Filipinas. Tonga nkjín sá kichoyaijin nga tsakʼainajin je visanajin. Xijekoan, chitso tsangínkoaijin kʼoa kitjatoníjin ya Rotterdam, mar Mediterráneo, canal de Suez, océano Índico, saʼnda nga kichuijin ya Malasia kao Hong Kong. Ñachanñato nichxin tsakimajinjin ndáchikon. Tochan kichuijin jñani tíchoyanajin ya Manila nga 19 sá noviembre nó 1954.

Tochan koannganajin ya ʼnde jebi kʼoa kao kostumbre xi tjínle je chjota kʼoa kao je én xi nchja̱. Nga títjon yaa tsakʼainganʼiuijin nga jainjin jngo jtín xi tíjna ya Quezón, kʼoa nʼio nkjín mani je chjota xi inglés nchja̱. Kuinga tojngo jao én tagalo maninajin nga jekicho jaon sá, tonga je xi tsakasenkaonajin kuinga ijngokʼa kinikʼantjaiyanajin.

Kʼianga sá mayo nó 1955, nga jekichonijin nga tsangínkʼinyasuinjin jao karta kjio ya ndʼianajin. Je Raymond kao an kʼoatsakʼinnajin nga superintendente xi tsʼe circuito koai̱njin. Tosʼaa 22 nóna nga kʼia, tonga kui xi tsakasenkaona nga ngisa koanna kʼoakisʼian tojmeni xi totʼatsʼe ngatsʼi chjota.

Tobʼelañá, kʼianga jesuperintendente xi tsʼe circuito koan je kjoanokjoaya xi títjon kitsjoa yaa jñani kijna jngo tienda, yakjoán ya ʼnyo kaye. Tochan koanjinna nga ya Filipinas kʼoasʼin ngale je ndsʼee nga ya nchja̱yajinle chjota ya yandiaa nga tsjoá kjoanokjoaya. Nga kisixatʼa nga jngó jngó je jtín xi kjinentsja je circuito yaa kitsjoa kjoanokjoaya ya jña kjio ndʼiabasen, ya jinndi̱tsi̱n,  ya jña kjio cancha xi tsʼe basquet, ya parque kʼoa me kjitʼa nga ya kitsjoa kjoanokjoaya ya xi̱ngi̱le kaye. Ñandia kʼianga ya tijna jngo ʼnde xi San Pablo ʼmi toxkia nʼio tsakʼa jtsí kʼoa likui tikoan kitsjoaña kjoanokjoaya ya jinndi̱tsi̱n, kʼoa kʼoakixinle je ndsʼee xi kjinele nga tosa ya katasʼejna kjoanokjoaya ya Ndʼia jña chotʼayá. Nga jekoanskanni je ndsʼee kiskonangina tsa ma nga kʼoasʼin satío kjoanokjoaya.

Yaa tsakatejnaña ya niʼyale je ndsʼee, ninga tsín síxkónkjoan je niʼyale nʼio tsje chon. Je xi tsakajnane jngo xi jo nijña kji kʼoa to yáte kjia je niʼya. Kʼoa nga tsín baño jñani ma bindoyaa, tsakasjaile jokisʼian nga tsakangoya ninga tsakʼakjákaoña najñona. Karro fikoa kʼoa chitso fikoa ya isla. Jokji tse nga tsakʼamje nga kisixále Niná nikʼiajinla kisʼena karro.

To chaan koanna je én tagalo, ninga tsín toxá tsakʼinyanina. Toyaa koannina nga kinrʼoele je ndsʼee nga tsoyason kʼoa nga kisixatʼa je jtín. Je ndsʼee kʼoati tsakinyakaona, ngasin nganda kʼoakitsona josʼin nokjoa kʼoa kʼoati kisikixiyandana.

Jokji nga ki nó, nʼio tsakasenkaona je xá xi tsakʼaina nga kisindayasa yaona. Nga nó 1956, je ndsʼee Nathan Knorr yaa kichosíxatʼa Filipinas kʼoa jngo kjoajtíntse xi asamblea nacional tsakʼin kisʼejna. An tsʼakaona xi tʼatsʼe noticia ya kjoajtíntse. Ñʼai koanna tonga jé ndsʼee tsakinyakaona. Saʼnda tsín jngo nó jaʼato nga ijngo kjoajtíntse kisʼejna kʼoa an superintendente koan xi tsʼe kjoajtíntse. Jé kicho je ndsʼee Frederick Franz xi ya kichoni jña tjen tísʼendiaanile je naxinandále Niná kʼoa nʼio nda choa̱ tsakʼéjnana xi koa̱n skenngile. Kʼianga kitsjoa  kjoanokjoayale je ndsʼee Franz kui tsakʼakjá je najño xi barong tagalog ʼmi xi síchjén je chjota xi ya tsʼe Filipinas. Kʼoa je ndsʼee xi ya tsʼe nʼio tsjoa koanle.

Nʼio tse xi tsʼantjaiya josʼin tijna kʼianga kʼoatsakʼinna nga superintendente xi tsʼe distrito koa̱n. Nga kui nichxin, kui tsakakolaijin chjota je video xi La felicidad de la Sociedad del Nuevo Mundo ʼmi. Me ngantsjai nga ya tsakakuijin je video jña nʼio faʼa chjota. Tonga je na̱tse̱ nʼio kisijtinajin, nga̱ je lʼíle proyector nʼio tjentʼale. Ñaki koantjainjon kʼoa tsín ʼyani xi kisitsje. Ninga tse kjoama̱ kisʼengi nga kisatio kjoajtín, tonga je xi tsjoa tsakʼé tokoan kuinga tsaʼbe nga tokʼoakoanle je chjota nga je naxinandále Niná tíjnaa jngo tjíjtsa Sonʼnde.

Je naʼmi kʼoakitsole je chjotaxá nga tsín katatsjoáʼndenajin nga kjoajtíntse katasatío. Kʼianga ya kisatio kjoanokjoaya chrian jña kjio yo̱ngo̱, kisikjane je campanale yo̱ngo̱, tojoni nga tsín ʼya xi katanrʼoé. Ninga kʼoalani kisʼin tosi tonda tsakʼinyale Énle Niná je chjota xi ya tsʼe kʼoa ndʼaibi nʼio nkjín mani xi Jeobá tjíosíxále.

Nga nó 1959, kʼiaa kʼoatsakʼinna nga ya kjuísixá ya sucursal xi tíjna ya Filipinas. Nʼio tse jmeni xi koanna nga ya kisixá. Nga jekoanskanni, kʼoatsakʼinna nga kjuísixatʼa xi kjaʼaí naxinandá jñani tjío je sucursal. Jñani kʼia yaa kiskajian je Janet Dumond, jngo misionera xi ya títsjoánganʼio ya Tailandia. Karta kichji choatselaijin xíngijin kʼoa xijekoan chixanníjin. Jekjoan 51 nó nga ñatjen tinixálaijin Jeobá.

Jekjoan 33 naxinandáyʼai fisixatʼa je ndsʼee kʼoa nʼio tsjoa tjínna. Je xi tsakasenkaona nga kitjosonna xá jebi kui je kjoanda  xi tsakʼaina nga títjon, nga̱ sakʼoaa likui choa ñʼai maná nga kjaʼaí kostumbre tjínle chjota jñani bichoaa. Nga kʼoasʼin tsakʼamje kui xi tsakasenkaona nga koanchoyana nga je Jeobá tsjoake toʼya chjotani (Hechos 10:34, 35).

Je Janet kao an tojo yaa tiyuijin ya sucursal xi tíjna ya Quezón. Nʼio tsjoa tjíonajin nga ya Filipinas tinixáijin. Nga sʼa jeʼe̱ nichxin kjoan 60 nóján tosʼala 20,000 mani xi jetsoyason kʼoa ndʼaibi 200,000 mani. Ningalani jetsʼato 60 nó nga i̱ titsjoanganʼioa i̱ naxinandá jebi, tojo tijnandaña nga kʼoasʼian jmeni xi tso je Jeobá. Tobʼelañá, jmeni xi sʼa tsʼantjaiyajin je naxinandále Jeobá tibʼenelaijin yaonajin nga tinitjosuinjin.

Tibʼenelaijin yaonajin nga kʼoatinʼiaijin josʼin tíbándiaa je Jeobá kʼoa nʼio tsjoa tjío tokuinjin nga kʼoatinʼiaijin. Nga ngisa kuinyakoaijin je ndsʼee, kʼoati tinikʼantjaiyajinjin josʼin tinijcháijin yaonajin. Kʼiatsa je Jeobá xi kʼoasʼin mele, tiyondaníjin nga tosi tonda kʼoasʼiainjin tojmeni xi totʼatsʼe ngatsʼi chjota.