A tsakʼexkianí je Xo̱n xi Bájinkonná xi chriansʼa kitjo. A koaanli kʼoasí jmeni xi kjonangi ibi:

Je xijchá xi xin naxinandá faʼaini, ánni nga kui kuenta sʼinni je én xi male xtile nga kuitsoyale xi tʼatsʼe Niná.

Je xti kui én male je én xi nokjoa ya ndʼiaskuela kao ya ʼnde jña bichókatio. Kʼoati kjenndiaa nga jao koya én male je xti. Jé xi xijchá ma tjínnele skoéjin jñá jtínni koai, a yaa jñani nokjoa je én xi male, axo yaa jñani kui nokjoa je én xi nokjoa ya jñani tjío. Kuinga machjénni nga sikjaʼaitsjen jñáni ngisa majinle je xtile kʼoa jñáni kuinyakao nga ngisa nda sixále Niná. Je xijchá xi chjotale Cristo ma, kui ngisa kuenta sʼín jmeni xi machjénle je ʼndíxtile tikʼoajinni nga to yaole koaini (w17.05, p. 10-13).

Je Jesús i kitsole je Pedro: “A ngisa tsjoachanái kaoni tsa jebi”. Jméni je xi “jebi” kitsole (Juan 21:15).

Je Jesús kui kinchja̱ni je jti̱ kʼoa kao je negosio xi sʼín je Pedro nga jti̱ bʼasjengindá. Kʼianga jekʼien je Jesús, je Pedro ijngokʼa kui xá kisʼin nga jti̱ tsʼasjengindá. Je chjotale Cristo machjén nga sikjaʼaitsjenjin jókji chjí be je xá ya jinni̱ma̱le (w17.05, p. 21-23).

Je Elias Hutter, jósʼin kitsoyale je xtiskuelale nga koanle je én hebreo.

Kui xi koanmele nga ngisa choa ñʼai katamale je xtiskuelale nga skoe̱ jña kinroani nga jngó jngó letra hebreo xi nroatʼa Biblia kʼoa jósʼin nga tsín mangóson kao je letra xi kisatiotʼale. Kʼianga koan tsakʼéxkia je xtiskuelale, nʼio jma kisikjoan je letra hebreo, kʼoa je letra xi tsakatíotʼale nga tongini kʼoa nga maskanni, alikui jma kisikjoan. Je Traducción del Nuevo Mundo de las Santas Escrituras (con referencias) kʼoati me sʼin faʼaitʼa je nota xi tjío ngitsʼinle (wp17.2, p. 11, 12).

Jméni xi kuenta sʼin jngo chjotale Cristo tsa ndatjín nga pistola kʼoa tsa tjo̱ sʼe̱le nga sikuinda yaole.

Je Jeobá nʼio bechjí je kjoabijnachonle chjota. Nga kʼoakitsole je chjotale Jesús nga jngo ki̱cha̱ espada katabajngi, ali tsakuijin xi kitsonile nga yaole sitoánntjai (Luc. 22:36, 38). Je choʼndale Niná ki̱cha̱bʼenyi síkʼóya ki̱cha̱ espadale. Je kjoabijnachonle chjota ngisaa nʼio chjíle tikʼoajinni tsojmi xi tjínle. Machjén nga jchaxkoán je kjoafaʼaitsjenle xi ngikʼa (2 Cor. 4:2). Kʼoa kʼoénelee yaoná nga nda sʼiaan (w17.07, p. 31, 32).

Ánni nga kjaʼaí kjaʼaísʼin bʼéyanajmísíni je Mateo kao Lucas tʼatsʼe nga tosʼa koanjchínga je Jesús.

Je Mateo kui ngisa nchja̱ni xi tʼatsʼe José. Tobʼelañá, bʼéyanajmí jókisʼin kʼianga kisʼejinle nga ʼndí yʼa je María. Je Mateo kʼoati bʼéyanajmí nga jngo ánkje kʼoakitsole je José nga ya Egipto katafi kʼoa nga kʼoakitsole nga kjuinroa ijngokʼani. Je Lucas kui ngisa nchja̱ni xi tʼatsʼe María. Tobʼelañá, kʼoatso jókoan kʼianga kikonle je Elisabet. Kʼoati bʼéyanajmí jmeni xi kitso je María kʼianga ya yo̱ngo̱ tsakʼejna je Jesús (w17.08, p. 32).

Jmé kjoa xi tífaʼatojin je Biblia jokji nga tífaʼato je nó.

Nga tífaʼato je nó, tíbʼantjaiyaa josʼin nokjoa je én xi koanchjén nga kichji je Biblia. Sakʼoaa je chjotaxá fajin nga bʼantjaiya je én xi nokjoa. Kʼoa batiochjoa kʼa je chjota nga kui én xi nchja̱ chjota katafaʼatoya je Biblia (w17.09, p. 19-21).

Jñánile je kjoatsjoacha xi ngisasa ngʼa tíjna.

Ya Biblia, kui én griego xi agápe tso síchjén kʼianga kui nchja̱ni nga kʼoasʼin koakoá je kjoatsjoacha josʼin mele Jeobá. Ali tsa tokuijin tínchja̱ni josʼe tokoán, kao xáná bakoñá nga ñaki tsjoacha kjoaixiaa je xíngiaa (w17.10, p. 7).