1. Ánni nga nʼio chjínile nga mangínsʼenngindá (chótsenlai sén xi faʼaitʼa ibi).

NGA xki̱ nó, je xi Biblia ʼmiyale, jmi mani je xi fisʼenngindá. Kʼoa nʼio nkjín mani xi sʼa xti, tjínkʼa xi saʼnda sʼa xtiʼndí. Tsakui nichxin choʼndale Jeobá ma je xijchále. Kʼoa ji, a jekʼinsʼenngindái. Tsa jaon, nʼio nda kinʼiai, nga̱ kui xi tjínnele kʼoasʼin je xi chjotale Cristo ma, kʼoa kui xi machjén nga koa̱n kuitjo̱ntje (Mat. 28:19, 20, TNM; 1 Ped. 3:21, TNM).

2. Ánni nga tsín koa̱n kuinókjonsíñá nga kʼoaitʼalee yaoná je Jeobá.

² Ningalani tse kjoanichikontʼain tjenkao nga mangínsʼenngindá, kʼoati xá tjenkao. Ánni. Nga̱ nichxin nga tsangínsʼenngindá, jaon tsakixónñá kʼianga itso xi kichjonanginá: “Xi totʼatsʼe kjoabʼechjíntjaile Jesucristo, a jekʼoakoannili je jéeli kʼoa a jetsakʼaitʼalai yaoli je Jeobá kʼianga kʼoasʼiain josʼin mele”. Kʼianga tsangínsʼenngindá kʼoasʼin tsakakoá nga jetsakʼaitʼalee yaoná je Jeobá, xi tsonile, nga kʼoatsakʼinlee nga tsjoachaa kʼoa nga kui títjon si̱kʼéjnaa jmeni xi mele. A skanni  kʼoakjimaná nga kʼoakinʼia. Maijin. Kʼianga yaoná bʼaitʼalee Niná alikuikʼia nga chʼaosʼin bichótsjoá. Nga̱ tsa tsín je Jeobá si̱xálee, jé Na̱i koanentsjaná. Kʼoa je Na̱i, alikui mandosinle nga kuitjo̱ntje. Tosaa kui xi mele nga tsín tisʼe̱niná je kjoachoya nga koa̱n kuiyoaa ngantsjai nichxin kʼoa nga tsín je Jeobá si̱xálee.

3. Jmé kjoanichikontʼain tísʼeli nga jetsakʼaitʼalai yaoli je Jeobá.

³ Tikjaʼaitsjenlai je kjoanichikontʼain xi tísokóli kʼianga jetsakʼaitʼalai yaoli je Jeobá kʼoa kʼinsʼenngindái. Nga jetsakʼaitʼalai yaoli je Jeobá, ngisaa tjínjngo tokuin nga i̱sí: “Je Jeobá yaa tíjnakaona; alikui tsokjoan. Jmé xi sikaona je chjota” (Sal. 118:6). Tsínsa jmeni xi nʼio chjíle nga je Niná tibʼainganʼiolee kʼoa nga ndasʼin tiyoaa ngixko̱n.

4, 5. 1) Ánni kʼoabixónsíñá nga jngo jngóñá nga kjinená kʼianga jetsakʼaitʼalee yaoná je Jeobá. 2) Jmé kjoa xi bitjatojiaan ngatsʼiaa tojotjín nóná.

⁴ Kʼiatsa jekʼinsʼenngindái, kʼianga sʼe̱li je kjoamiyo kao Jeobá, alikui tije xijcháli beni. Ninga sʼa ya tijnakoai je xijcháli, ji kjineli kjoásjai je kjoabitjontjaili. Ánni nga nʼio tjínnile kjoandosin nga kuenta sʼiain jebi. Nga̱ tsín ʼyai jme kjoa xi kuitjátojin nichxin xi nroaján. Tobʼelañá, tsakui nichxin kʼia kʼinsʼenngindái nga sʼa ʼndí tisui. Tonga tsa jekjimajchíngai ndʼaibi, jejin tíbʼantjaiya jotísʼe tokuin. Itso jngo tsoti: “Kʼianga sʼa ʼndí kjoaan, kʼianga nóná bichó kʼoa tsín jme pastel chinee ya ndʼiaskuela, alikui chʼao sʼe tokoán nga testigole Jeobá maa. Tonga kʼianga jekjimajchíngaa kʼoa kui nimetokoán nga tjín xi sóyokoaa, tjínnele nga ñaki kʼoakʼoé tokoan nga kui xi ngisa ndatjín nga si̱tjosoán je kjoatéxomale Niná”.

⁵ Alikui tsa toje xi sʼa xti xi ñʼai male. Ninga je xi jejchínga nga fisʼenngindá kʼoati kjoa faʼatojin. Tsakui nichxin kui kjoa faʼatojin xi tʼatsʼe kjoabixanle, tsa chʼin tsaotʼale kʼoa tsa tʼatsʼe xá. Tojotjín nóná, ngatsʼiñá nga chotʼayakaoná tsa kixi kjuintʼalee je Jeobá (Sant. 1:12-14).

6. 1) Jméni xi tjínnele si̱kjaʼaitsjain kʼianga jetsakʼaitʼalai yaoli je Jeobá. 2) Jmé xi tsoyali Filipenses 4:11-13.

⁶ Je xi koasenkaoli nga kixi kʼuíntʼalai je Jeobá tojme kjoa xi kuitjátojin, kuinga si̱kjaʼaitsjain nga kʼoatsakʼinlai je Jeobá, xi batéxomale ngʼajmi kao Sonʼnde, nga tosi tonda si̱xálai tojme kjoa xi kuitjátojin, ninga je xijcháli kao miyoli likui tije sixánile (Sal. 27:10). Tojme kjoa xi kuitjátojin, koaan si̱jélai je Jeobá nga katatsjoáli nganʼio nga kuitjosonli je xá xi tjenkao nga jetsakʼaitʼalai yaoli (tʼexkiai Filipenses 4:11-13). *

7. Jmé xi tsoyanile nga “kao kjoajkon kao kjoafatsé” kjoásjee je kjoabitjontjainá.

⁷ Je Jeobá kui xi mele nga miyole katamai. Tonga tjínnele kʼoénelai yaoli nga kjoásjai je kjoabitjontjaili kʼoa nga tsín si̱chai je kjoamiyo xi tjínli kao Jeobá. Ya Filipenses 2:12 (TNM), itso: “Tosi tonda tjasjao kjoabitjontjaino kao kjoajkon kao kjoafatsé”. Én jebi, kui xi tsonile nga tjínnele si̱kjaʼaitsjeen jósʼiaan nga si̱kuindaa je kjoamiyo xi tjínná kao Jeobá kʼoa nga kixi kjuintʼalee ninga kjoa kuitjátojiaan. Machjén nga si̱kuindaa yaoná, nga̱ tjínkʼa xi tsín tikixi kitʼanile Niná ninga nʼio nkjín nó kisixále tsakai. Jméni xi koasenkaoli nga kjoásjai je kjoabitjontjaili.

8. 1) Jósʼin tjínnele chótʼayá nga toñá. 2) Ánni nga nʼio chjínile nga chotʼayá je Biblia.

⁸ Nga miyole Jeobá koaan, tjínnele nga kuinóʼyalee kʼoa chja̱kaonajmiá. Kʼianga chotʼayá je Biblia nga toñá, kʼoasʼin noʼyanilee je Jeobá, xi tsonile, nga bʼexkiaa je Énle Niná kʼoa kao je xo̱n xi ya yʼangini, kʼoa si̱kjaʼaitsjenjiaan jmeni xi bʼexkiaa. Kʼianga chótʼayai nga toji, tikjaʼaitsjain nga tsín ya mangóson joma kʼiatsa examen kʼoéndai ya ndʼiaskuela, nga to bʼejinkuin jme xi chotʼayai. Kʼianga chótʼayai je Biblia, koaan kjoásjai kʼoa kataʼyasai jokjoan je Jeobá. Kʼiatsa kʼoasʼiain, kui xi koasenkaoli nga koa̱nchriantʼalai, kʼoa je sichriantʼali (Sant. 4:8).

9. Jñánile je xi títsjoáná je naxinandále Niná xi tíbasenkaoli nga chotʼayai nga toji.

⁹ Je naxinandále Jeobá nʼio nkjín koya jmeni xi títsjoáná xi basenkaoná nga nda chótʼayá. Jaola koya kataʼyaa jmeni xi koa̱nsjaili ya jw.org xi tsʼe én kastía, jñani “Jóvenes” tso, yaa faʼaitʼa je xi “Actividades para estudiar la Biblia” ʼmi, xi kuitsoyali jósʼin basenkaoná jmeni xi tsoya je Biblia. Xi tiyani, faʼaitʼa je xi “¿Qué enseña realmente la Biblia?” ʼmi, xi koasenkaoli nga koa̱ntaja kjoamakjainli kʼoa koa̱nli koakoyalai xi kjaʼaí tʼatsʼe jmeni xi makjainli. Kʼoa ya rebista ¡Despertad! xi tsʼe abril de 2009, koa̱nsjaisali je kjoafaʼaitsjen xi koasenkaoli nga chótʼayai, ya jñani “Los jóvenes preguntan. ¿Cómo disfrutar la lectura de la Biblia?” tso. Kʼianga kjoásjai je kjoabitjontjaili, nʼio chjíle nga chótʼayai kʼoa si̱kjaʼaitsjenjin jmeni xi chótʼayai (tʼexkiai Salmo 119:105). *

10. Ánni nga nʼio chjí bekonni kjoabʼetsʼoa je chjotale Cristo.

¹⁰ Tojosʼin tiʼyaa, kʼiaa noʼyalee je Jeobá kʼianga chotʼayá je Biblia. Tonga tsa mená chja̱kaonajmiá, tjínnele nga kʼoétsʼoalee. Ñá xi chjotale Cristo maa, ali tsa tokuijin bʼetsʼoañá nga tjínnele kʼoasʼiaan kʼoa tsa tokuije̱ nga nda katabichótsjoá jmeni xi mená. Nga bʼetsʼoaa nʼio chjíle, jé Niná chjakaonajmiá. Kʼoa je Jeobá mele kjuinrʼoéná (tʼexkiai  Filipenses 4:6). * Kʼiatsa jme xi tinikjáojin, tikjaʼaitsjain nga itso je kjoafaʼaitsjen xi tsjoá je Biblia: “Je Jeobá tikʼami je chʼáli, kʼoa jé koasenkaoli” (Sal. 55:22). A makjainli nga koasenkaoli tsa kʼoasʼiain. Miyón mani je ndsʼee xi tjíobinyakao, kʼoati koasenkaoli tsanda ji.

11. Ánni nga tjínnenile ntsjaintsjai kʼoailai kjoanda je Jeobá.

¹¹ Tjínnele ntsjaintsjai kʼoétsʼoalee je Jeobá, ali tsa tokʼiajin nga machjénná nga katabasenkaoná. Je Biblia itso: “Tʼao kjoanda” (Col. 3:15). Tsakui nichxin sakʼoa nʼio si̱kjáojiaan je kjoa xi tjínná kʼoa si̱chajiaan je kjoanichikontʼain xi títsjoáná je Jeobá. A koaan kʼoasʼin kʼoéndajin nga jan koya si̱kjaʼaitsjain nga jngó jngó nichxin tʼatsʼe jme xi kʼoainilai kjoanda je Jeobá. Jngo tsoti xi Abigail ʼmi, xi 12 nóle nga kisʼenngindá, itso: “Kʼoasʼin sikjaʼaitsjen nga tsínsa ʼya xi tjín xi kʼoasikji bakinle nga kʼoailee kjoanda joni je Jeobá. Tjínnele nga kʼoailee kjoanda ngantsjai tʼatsʼe jmeni xi tsjoáná. Ñandia nga i̱ tso xi kinrʼoe: Tsa tokuilani tsojmi sʼe̱ná nyaon tʼatsʼe je xi tibʼainilee kjoanda Jeobá ndʼai, jótjín tsojmi sʼe̱ná”.

12, 13. Ánni nga nʼio chjínile nga si̱kjaʼaitsjenjin jósʼin tiʼyai nga nda chjota je Jeobá.

¹² Jé Jeobá tsakasenkao je rey David kʼianga nʼio tse kjoa jaʼatojin. Je David ñaki jesoaa tsabe josʼin tsakasenkao je Jeobá, kʼoa i kitso: “Chótʼao kʼoa kataʼyao nga nda chjota je Jeobá; tsjoa tjínle je chjota xi je sínʼiotʼa” (Sal. 34:8). Je bersíkulo jebi kui tsoya nga nʼio chjíle nga jisoa kataʼyai nga nda chjota je Jeobá. Kʼianga bʼexkiai je Biblia kao je xo̱n xi Énle Niná yʼangini, kʼoa nga ʼmi je kjoajtín, sʼejinli tʼatsʼe je chjota xi tjíobinyakao Niná nga kixi kjima. Tonga nga sa nda sa nda jchai xi tʼatsʼe Jeobá, machjén nga jisoa kataʼyai jósʼin tíbasenkaoli. Kʼoa ji, jósʼin tiʼyai nga nda chjota je Jeobá.

¹³ Ñá xi chjotale Cristo maa, ʼyañá nga nda chjota je Jeobá. Jngo koya josʼin ʼyaa, kuinga kʼoatsoná nga si̱chriantʼalee je kʼoa kao ʼNdíle. Je Jesús i kitso: “Niʼyajin xi koa̱n nga kjoaʼaíkonna, tsa je Nʼainá xi kisikasénna likui kjoaʼaíkao” (Juan 6:44). A makjainli nga je Jeobá xi koanmele nga i̱ tijnajin naxinandále. Tsakui nichxin jngo xi sʼa xti xi i̱ kuitso: “Kʼoasʼin koanmele je Jeobá nga je xijcháná ya tjíojin naxinandále, tonga an tofitjenngile”. Tonga nga tsakʼaitʼalai yaoli je Jeobá kʼoa kʼinsʼenngindái tsakakoní nga tjínli kjoamiyo xi kao Jeobá. Kʼoa ndʼaibi, a nda bexkonli. Je Biblia itso: “Tsa jngo xi tsjoake Niná, Niná xi nda be nga je” (1 Cor. 8:3). Tʼenelai yaoli ngantsjai nga chjí jchatokuin nga naxinandále Jeobá tijnajin.

14, 15. Ánni nga sitajani je kjoamakjainli nga kʼuínyasuin.

¹⁴ Kʼoati ʼyai nga nda chjota je Jeobá kʼianga ʼyai josʼin basenkaoli nga nokjoani kjoamakjainli ya ndʼiaskuela kʼoa kʼianga ʼmiyasuin. Tjínkʼa xi ñʼai male nga fákaonajmíni Énle Niná je xtiskuela xínkjín nga̱ tsín be jokuitso. Tsakui nichxin kui kjoa bitjatojin. Kʼoa ngisajin ñʼai koa̱nli tsa nkjín mani xi kuinókjoayajinlai. Jmé xi koasenkaoli.

¹⁵ Xi títjon, kui tikjaʼaitsjain ánni nga tjínjngosíni tokuin tʼatsʼe jmeni xi makjainli. Ya jw.org, faʼaitʼa je xi binyakaoná nga chotʼayá, kʼoa nkjín én tíbitjo. Kui xá kisʼendani nga koasenkaoli nga si̱kjaʼaitsjenjin  jmeni xi makjainli, ánni nga kui makjainnili kʼoa jósʼin kʼuínyai jmeni xi makjainli. Koaan chʼa̱sjeʼai nichxin nga tjasjai. Kʼiatsa ñaki tjínjngo tokuin tʼatsʼe jme xi makjainli kʼoa nda chótʼayai, kui xosikaoli nga kuinókjoani tʼatsʼe Jeobá (Jer. 20:8, 9).

16. Jméni xi koasenkaoli nga tsín kuinókjuin nga kuinókjoani tʼatsʼe jmeni xi makjainli.

¹⁶ Tsakui nichxin tojo kuinókjuin nga kuinókjoani tʼatsʼe jmeni xi makjainli ninga nda kuijnandai. Tobʼelañá, jngo tsoti xi 18 nóle, xi kʼia kisʼenngindá nga tosʼa 13 nóle, itso: “ʼBeña jmeni xi makjainna, tonga sakʼoaa ñʼai mana xinyale xi kjaʼaí”. Jméni xi sʼín tichjaa jebi. Kʼoatso nga kʼoasʼin nchja̱ josʼín ngantsjai. Itso: “Je xtiskuela xíngia alikui tsokjón nga kʼoatso josʼin síkjaʼaitsjen. A tsí koa̱n kʼoatisʼian tsanda an. Kʼoa i xinle kʼianga tjín xi bʼeyanajmíle: Ñandia kʼianga Biblia tixinya, i koan... Kʼoa xijema, tosi tonda kui bʼeyanajmíle jmeni xi tixinle. Ningalani likui ñaki tʼatsʼe Biblia tixinyale, tonga tjínkʼa xi mandosinle kʼoa sakʼoaa kjonangina jmé xi sʼian kʼianga xinya je Biblia. Nga kʼoasʼian, ngisaa choa ñʼai mana nga fakaonajmíña tʼatsʼe Énle Niná. Kʼoa nʼio nda sʼe tokoan ngantsjai nga kui nchjaña tʼatsʼe je xi kixi”.

17. Ánni nga nʼio chjínile nga tsín kuinókjoaan kʼianga kuinókjoañá tʼatsʼe jmeni xi makjainná.

¹⁷ Kʼiatsa ʼyaxkuín kʼoa mandosinli xi ngikʼa, kʼoajinti sikaoli tsanda je. Kataʼyala josʼin síkjaʼaitsjen je Olivia, jngo tsoti xi 17 nóle, xi sʼa ʼndí kji nga kisʼenngindá, itso: “Kui kitsokjonle ngantsjai nga kʼoasʼin sikjaʼaitsjen je chjota nga ñaki tokui xá sʼiaan nga Biblia xinya kʼiatsa kui kjoakaonajmíña”. Tonga je tsoti jebi chan likui tikʼoasʼin kisikjaʼaitsjenni. ʼNdele nga tso̱kjon, itso xi kisikjaʼaitsjen: “Nʼio nkjín xti xi tsín be tʼatsʼe testigole Jeobá, kʼoa toñá xi bená. Jmeni xi sʼiaan kuijin xi kuitsoni josʼin sikjaʼaitsjen. Tsa soaná nga kui nokjoañá tʼatsʼe jmeni xi makjainná, kʼoa tsa tinokjonkaoñá nga tinokjoaa, tsakui nichxin kʼoasʼin sikjaʼaitsjen nga tsín tsjoa tjín tokoán nga testigole Jeobá maa. Likuijin ndasʼin sikjaʼaitsjen tsa kʼoasʼiaan. Tonga tsa ñaki tjínjngo tokoán nga nokjoañá tʼatsʼe jmeni xi makjainná kʼoa tsín kuinókjoaan nga chja̱kaonajmíñá, kʼoajinti skoe̱xkónná”.

18. Jméni xi tjínnele sʼiain kʼianga kjoásjai je kjoabitjontjaili.

¹⁸ Tojosʼin tiʼyaa, nʼio tjínle kjoandosin kʼianga kjoásjai je kjoabitjontjaili. Tjínnele kʼoéxkiai je Biblia kʼoa si̱kjaʼaitsjenjin jmeni xi tso, machjén nga kʼoétsʼoalai Niná kʼoa tikjaʼaitsjain je kjoanichikontʼain xi títsjoáli. Kui xi koasenkaoli nga sʼe̱jngo tokuin nga miyoli ma je Jeobá. Kʼoa kui xosikaoli nga kuinókjoani tʼatsʼe jmeni xi makjainli (tʼexkiai Salmo 73:28). *

19. Ánni nga nʼio chjínile nga kʼoénelee yaoná kʼianga so̱koná je kjoabitjontjai.

¹⁹ Je Jesús i kitso: “Tsa ʼyani xi mele nga kjuinroatjenngina, katatsjionkon yaole kʼoa katakjoé je yá kjoañʼaile kʼoa katanroatjenngi kjitʼana” (Mat. 16:24, TNM). Kʼianga kjuintjenngilee je Jesús, machjén nga kʼoaitʼalee yaoná je Jeobá kʼoa kjuinsʼenngindá. Tsa kʼoasʼiaan, tse kjoanichikontʼain sʼe̱ná ndʼaibi kʼoa sʼeená kjoabijnachon xi tsínkʼia fetʼa kʼianga jesʼe̱jna je sonʼnde chjotsele Niná. Kuinga tosi tonda kjoásjeñá je kjoabitjontjainá.