1, 2. Ánni machjénsíni nga je Jeobá si̱tjosonlai kʼianga chjoéjin jmeni xi sʼiain (chótsenlai sén xi faʼaitʼa ibi).

TSA sʼa xti, tsakui nichxin nʼio nkjín kjoafaʼaitsjen bʼaili tʼatsʼe jmeni xi koa̱n sʼiain nichxin xi nroaján. Tsa je maestroli, tsa je xi tsjoá kjoafaʼaitsjen ya ndʼiaskuela kʼoa tsa kjaʼaísa chjota kʼoatsoli nga jngo carrera chótʼayai jñani nʼio tse tao̱n kuinje̱li. Tonga je Jeobá alikui kui kjoafaʼaitsjen jebi tsjoáli. Mele nga nda chótʼayai ya ndʼiaskuela ánni nga koa̱n so̱koʼanili yaoli (Col. 3:23). Tonga kʼianga kui chjoéjin jmeni xi sʼiain, je Jeobá kʼoatso nga kui kʼuíntjenngi je kjoatéxomale. Nga̱ kui xi koasenkaoli nga jchai jmeni xi mele Jeobá nga sʼiaan je nichxin xi toje tífikjetʼa (Mat. 24:14).

² Je Jeobá bení jmeni xi koa̱n nichxin xi nroaján kʼoa nga tongi choasa nichxin tíjna nga kjoetʼa jmeni xi chon sonʼnde (Is. 46:10; Mat. 24:3, 36). Kʼoati nʼio nda bená nga jngó jngoá. Bení jmeni xi tsjoa bʼé tokoán kʼoa jmeni xi ba bʼé tokoán. Ningalani jngo chjota xi nda kjoafaʼaitsjen  tsjoáná, tonga tsa tsín ya Biblia bʼangini jmeni xi tso alikuijin koasenkaoná (Prov. 19:21).

3, 4. Jméni xi koanle je Adán kao Eva kʼoa kao ntje̱le nga tsín kisitjosonle Jeobá.

³ Saʼnda nichxin kjoatse tjín je kjoafaʼaitsjen xi tsín ndatjín. Jé Na̱i kitsjoa títjon je kjoafaʼaitsjen xi tsín ndatjín. Kʼoakitsole je Adán kao Eva nga ngisa tsjoa sa̱tío kon kʼiatsa toje skoéjin jmeni xi sʼin (Gén. 3:1-6). Tonga nga kʼoakitso je Na̱i to yaole kini. Kui xi koanmele nga je skoe̱xkón kʼoa nga je sitjosonle chjota ʼndele nga je Jeobá jchaxkón. Tonga je Na̱i alijme xi ndatjín kitsjoale je Adán kao Eva. Jé Jeobá kitsjoale ngayeje xi kisʼele. Jolani je kjoabixanle, je ʼndenaxó jñani tsakatio kʼoa nga kʼoasʼin kisinda nga koa̱n koatio ngantsjai nichxin.

⁴ Tonga je Adán kao Eva alikui je Jeobá kisitjosonle kʼoa alikui timiyole koanni. Nga kʼoakisʼin, tsee kjoa kichomani. Koanjchíngaa kʼoa kʼieen, joma jngo naxó nga xí kʼianga bichá. Je ntje̱le Adán kao Eva kjoañʼai kisʼele xi totʼatsʼe jée (Rom. 5:12). Kʼoa nichxin xi tiyoaa ndʼaibi, me ngatsʼi chjota xi tojo tsín sítjosonle Niná. To yaole sítjosonle nga kʼoasʼín josʼin mele (Efes. 2:1-3). Nga tsín ndasʼin bichómani nga kʼoasʼín je chjota, yaa ʼyañá nga “tsín kjoachjine, [...] xi koa̱n kontra kʼoéjnale je Jeobá”, xi tsonile, ngayeje kjoafaʼaitsjen xi kontra tíjnale jmeni xi tso je Jeobá alikui ndasʼin bichómani (Prov. 21:30).

5. 1) Jméni xi kitso je Jeobá. 2) Jósʼin ʼyañá nga ñaki kʼoatjín jmeni xi kitso.

⁵ Je Jeobá kʼoakitso nga sʼe̱ chjota xi koa̱nmele skoe̱xkón kʼoa xi sixále, jolani je xi sʼa xti (Sal. 103:17, 18; 110:3). Je Jeobá nʼio tsjoake ngatsʼi je ʼndíxti, jolani ji. Alikui jao tjínná nga nʼio tsjoa tjín tokuin tʼatsʼe jmeni xi títsjoáli je Jeobá (tʼexkiai Salmo 103:5; * Prov. 10:22). Je xi títsjoáná je Jeobá kui xi basenkaoná nga mataja je kjoamakjainná, je miyo xi kixi, josʼin koa̱n nga ngisasa nda si̱xálee, kao je kjoandái xi tjínná.

6. Ánni machjénsíni nga si̱tajai je kjoamakjainli, kʼoa jósʼin basenkaoli je Jeobá.

⁶ Ñá xi chjotaa alikui mangósoán kao je ʼndícho̱, nga̱ toxá kʼoasʼin koanndañá nga machjénná xi tʼatsʼe Niná (Mat. 4:4). Kʼianga noʼyá jmeni xi tsoná, sʼená kjoamajintokon, kjoachjine kʼoa tsjoa satío tokoán. Je Jesús i kitso: “Ngisa toxkón ndani je xi nrʼoé énle Niná, kʼoa xi sítjoson” (Luc. 11:28). Kʼianga koa̱ntaja je kjoamakjainná, je Jeobá kui Biblia síchjén kʼoa kao jmeni xi síkasénná “je choʼnda xi nʼiotʼakon, xi nda be xá” (Mat. 24:45; Is. 65:13, 14).

7. Jósʼin basenkaoli ngayeje xi tʼatsʼe Jeobá nroani.

⁷ Ngayeje xi tʼatsʼe Jeobá nroani tsjoáli kjoachjine nga ndasʼin si̱kjaʼaitsjain, kʼoa nkjínsa koya josʼin koasenkaoli (tʼexkiai Proverbios 2:10-12). * Tobʼelañá, jchani nga to énndiso nga  kʼoatso je chjota nga tsín Niná, kʼoa nga tjínnele nga tse tao̱n sʼe̱ná kʼoa nga nkjín tsojmi sʼe̱ná nga tsjoa sa̱tío tokoán. Kʼoati koasenkaoli nga tsín ya ska̱jin je kjoa xi chʼaotjín kʼoa kao je xi sikiʼaonli. Tsa kʼoasʼiain, chjinee koain kʼoa kui xi ndatjín chjoéjin, kʼoa kʼoasʼin jchani nga tsjoakeli je Jeobá kʼoa nga mele nda kuijnai (Sal. 34:8; Is. 48:17, 18).

8. Tsa si̱chriantʼalai je Niná ndʼaibi, jósʼin koasenkaoli nichxin xi nroaján.

⁸ Tochoasa nichxin cha nga kjoetʼa jmeni xi chon sonʼnde, kʼoa tojé Jeobá xi koa̱nle sikuindaná. Tojé xi koa̱nle tsjoáná jmeni xi koa̱nchjénná, saʼnda je tsojmi xi chi̱nee (Hab. 3:2, 12-19). Kuinga machjénsíni ndʼaibi nga si̱chriantʼalai Nʼainá xi tíjna ngʼajmi kʼoa nga je si̱nʼiotʼai (2 Ped. 2:9). Ninga tojme kjoa xi kuitjátojin, kʼoasʼe̱ tokuin jokitso je David, nga i̱ kitso: “Jé Jeobá sʼian kuenta ngantsjai. Nga je tíjna ngakixina, alikui jme xi koa̱nna” (Sal. 16:8).

9. 1) Tojo tso Juan 6:44, jméni xi sʼín je Jeobá. 2) Jméni xi tsín mangóson nga ʼyaxkoaan jngo xi testigole Jeobá ma kʼoa jngo xi tsínkui.

⁹ Kʼianga tosʼa ʼyaxkuin jngo xi tsín testigole Jeobá ma, tosʼajin choa ʼyai xi tʼatsʼe. Tsakui nichxin tokui ʼyai joʼmi kʼoa jokji. Kʼoa kʼianga ʼyaxkuin jngo testigole Jeobá, ʼyaní nga tsjoake Jeobá, kʼoa nga je Jeobá xi koanmele nga ya naxinandále tsakʼejnajin (tʼexkiai Juan 6:44). * Ningalani xin tsʼe kʼoa kjaʼaísʼin tsen yaole, ʼyaní xi tʼatsʼe, kʼoa je kʼoati be xi tʼatsi.

10, 11. Jmé kjoanda xi tjínná ngatsʼiaa xi choʼndale Jeobá maa, kʼoa jósʼin basenkaoná jebi.

¹⁰ Kʼoati ʼyai nga kʼoati kui nchja̱ “én xi tsje” (Sof. 3:9). Xi tsonile, nga tojngo kjoamakjain tjínno, nga tsje mangínkao yaono, nga jngo kjoachoya tjínno tʼatsʼe nichxin xi nroaján, kʼoa nkjínsa koya kjoanda xi tjínno. Kui jebi xi tjínnele jchaa tʼatsʼe jngo chjota, nga̱  kui basenkaoná nga ninʼiotʼaa kʼoa nga miyoná mani ngantsjai.

¹¹ Nga choʼndale Jeobá mai, tjínli miyo xi kixi jngo tjíjtsa Sonʼnde, ningalani tsín ʼyaxkuin ngatsʼi. A koaan kʼoakuitso jngo xi tsín choʼndale Jeobá ma nga tjínle miyo xi kixi.

12. Jméni xi koa̱n sʼiain nga ngisasa nda si̱xálai je Niná.

¹² (Tʼexkiai Eclesiastés 12:1). * A meli nga ngisasa nda si̱xálai je Niná. Tsakui nichxin tibʼenelai yaoli nga nyaon nyaon bʼexkiai je Biblia, nga bʼai énli ya jinjtín kʼoa nga ʼmiyasuin. Jósʼe tokuin nga nda bichótsjoá jme xi niʼai kʼoa kʼianga kʼoaʼmili nga nda tinʼiai. Nʼiojin tsjoa sʼe tokuin. Nga̱ kui tinikʼéjna títjuin je xále Niná tikʼoajinni tojmeni, tojo kisʼin Jesús (Sal. 40:8; Prov. 27:11).

13. Ánni nga ngisa ndani nga je ni̱xálee Niná tikʼoajinni nga kui kuichotjenngiaa jmeni xi tjín sonʼnde.

¹³ Tsa kʼoénelai yaoli nga tsesa si̱xálai je Niná, nʼio tsjoa sʼe̱ tokuin kʼoa jchani nga nda tinichjain kjoabijnachonli. Je pastro Pablo i kitso: “Kixi tiyo. Ali nikʼantjaiyajion. Ngisa tse tixásalao Nainá ngantsjai, nga̱ ʼyanío nga je xáno nga tiyokao Nainá ali tokjoatjaojin” (1 Cor. 15:58). Je chjota kui fitjenngi jmeni xi tjín sonʼnde, jolani nga tse tao̱n sʼe̱le kʼoa nga nʼio kataʼyale. Kʼoa kʼianga jebichótjenngi jebi alikuini ñaki tsjoa satío kon (Luc. 9:25). Kʼoakoan je rey Salomón (Rom. 15:4).

14. Jmé xi bakóyali je choa̱le Salomón.

¹⁴ Je Salomón nyiná koan kʼoa tsee nganʼio kisʼele, tonga koanmele nga tsakʼétsaojin jmeni xi chon sonʼnde (Ecl. 2:1-10). Tsakʼéndaa ndʼia xi naskánakjoan, nʼio naskánakisichon jña tsakʼejna, kʼoakisʼin tojmeni xi koanmele. Tonga alikuini tsjoa kisʼe kon nga kʼoakisʼin. Nga̱ jesoaa kʼoakitso nga toxitsjoani kʼoa nga tsínni jme chjíle ngayeje jmeni xi kisʼele (Ecl. 2:11). Jósʼin koasenkaoli je choa̱le Salomón.

15. Ánni machjénsíni nga sʼe̱li kjoamakjain, kʼoa jósʼin koasenkaoli tojo tso Salmo 32:8.

¹⁵ Nkjín chjota xi kʼiani kʼoamale jmeni xi kasʼín kʼianga jekjoa tjíojin. Tonga je Jeobá alikui mele nga kjoa sʼe̱li. Kui xi mele nga kuinóʼyalai kʼoa si̱tjosonlai jmeni xi tsoli. Kʼianga kʼoasʼiain machjén nga sʼe̱li kjoamakjain, kʼoa alikuikʼia kʼoakoa̱nnili jmeni xi sʼiain. Kʼoa je Jeobá alikuikʼia sichajin josʼin tinixálai (Heb. 6:10). Kuinga machjénni nga taja katasʼejna je kjoamakjainli. Kʼoa jchani nga kjoanda tsini ngayeje jmeni xi tsoli je Jeobá (tʼexkiai Salmo 32:8). *

16. Ánni nga tjínnesínile nga chjí jchaa kʼoa nga nda si̱chjén je kjoandái xi tjínná.

¹⁶ Je Pablo i kitso: “Jña nga tjín je Espíritu Santo xi tsʼe Nainá [Jeobá], ya tjín kjoandaí” (2 Cor. 3:17). Je Jeobá tsjoake je kjoandái kʼoa kʼoasʼin kisindaná nga kʼoati tsjoacha katamaa tsanda ñá. Tonga mele nga nda si̱chjáin je kjoandái xi tjínli, nga̱ kui xi koasenkaoli. Tsakui nichxin ʼyaxkuin je xti xi pornografía kotsenle, xi síchajngi, tsakui  kʼoasʼín jmeni xi xkón síkatío kjoabijnachonle, tsa droga kjen kʼoa tsa xán ʼbi. Tongotjojin nga tsjoa satío kon, tonga xi jemani tseni kjoa batiojin, nga̱ kui tsjentʼale jmeni xi chʼaotjín, tjochʼinle kʼoa saʼnda tjínkʼa xi biya (Gál. 6:7, 8). Tsee kjoandái tjínle male, tonga to yaole bʼanachale (Tito 3:3).

17, 18. 1) Ánni kʼoabixónsíñá nga ndái biyoaa kʼianga nitjosonlee je Jeobá. 2) Jméni xi tsín mangóson je kjoandái xi kisʼele nga títjon je Adán kao Eva kʼoa kao je kjoandái xi tjínle je chjota ndʼaibi.

¹⁷ Kʼianga nitjosonlee je Jeobá basenkaoná. Nda biyoaa kʼoa sʼená kjoandái (Sal. 19:7-11). Kʼianga nda nichjain je kjoandái xi tjínli, xi tsonile, nga kʼoasʼin ʼmikoai yaoli jotso je kjoatéxomale Niná, be je Jeobá kʼoa kao je xijcháli nga koa̱n kʼoaisali kjoandái. Je Jeobá kui xi mele nga ndái koatio kjoaixi je choʼndale xi kixi tjíofitʼale. Je Biblia itso: “Kʼoaile nga kʼoéyondaí kao kjoajeya xi tsʼe ʼndíle Niná” (Rom. 8:21).

¹⁸ Kui kjoandái jebi xi kisʼele tsakai je Adán kao Eva. Ya ʼndenaxóle Edén tokuikjoán xi kisʼechjoale nga tsín koa̱n ski̱ne jngo tole yá (Gén. 2:9, 17). A nʼio ñʼai tíjna je kjoatéxoma jebi. Mai. Alikui mangóson kao kjoatéxoma xi bʼasje je chjotasonʼnde, kʼoa saʼnda bʼéne nga kjoanʼio bitjosonle.

19. Jósʼin bakóyaná je Jeobá kʼoa kao Jesús nga ndái biyoaa.

¹⁹ Josʼin bekonná je Jeobá yaa bakoni nga nʼio chjine. ʼNdele nga nʼio nkjín kjoatéxoma tsjoáná, kao kjoatsejta bakóyaná nga si̱tjosoán je kjoatéxomale. Kui xi mele nga kjuintjenngiaa je kjoafaʼaitsjen xi nroatʼa Biblia kʼoa nga jtichaa katamaa xi chʼaotjín (Rom. 12:9). Jngo choa̱ josʼin bakóyaná je Jeobá kui jmeni xi kitso je Jesús ya jngo jko̱nindo, nga kui kinchja̱ni tʼatsʼe jmeni xi jée ska̱nijinná (Mat. 5:27, 28). Kʼianga jekoatexomaná je Jesús ya sonʼnde chjotse, tosi tonda koakoyaná nga kʼoasʼin jchatokoán je xi ndatjín kao xi chʼaotjín josʼin bekon je (Heb. 1:9). Koasenkaoná nga chjotatsje koaan kʼoa nga tsje sʼe̱ je kjoafaʼaitsjenná. Nga kʼia alikui ʼya xi tikoa̱njngíjéeni kʼoa alikui tijme kjoa sʼe̱ni. Nga kui nichxin, je Jeobá tsjoáli je kjoandái xi tongini kitso.

20. 1) Jósʼin síchjén Jeobá je kjoandái xi tjínle. 2) Jósʼin basenkaoná je choa̱ xi bʼéjnaná je Niná.

²⁰ Alikui xi tsonile nga totjóʼndená kʼoasʼiaan tojmeni xi mená, nga̱ tsjoachañá je Niná kʼoa kao xíngiaa. Tokui xi tsoná je Jeobá nga chjénngilee. Ningalani tjínle ʼnde nga kʼoasʼin tojmeni xi mele, bakóná kjoatsjoacha (1 Juan 4:7, 8). Kuinga kʼoabixónsíñá nga tokʼia ndái kuiyoaa tsa je Niná chjénngilee.

21. 1) Jméni xi kitsole David je Jeobá. 2) Jméni xi chótʼayá ya kjoaʼmiya xi ijngo.

²¹ A ʼyachjíní ngayeje jmeni xi títsjoáli je Jeobá. I̱ kjoaʼmiya jebi kui kaʼyaa nga je Jeobá sítajaa je kjoamakjainná, nga sʼená miyo xi kixi, nga ngisasa nda si̱xále Niná, kʼoa nga sʼe̱ná kjoandái (Sal. 103:5). Kʼoajinti tjín tokuin joni je David kʼianga i̱ kitsole je Jeobá: “Tibakonái je ndiaa xi tsʼe kjoabijnachon. Nʼio tse kjoatsjoa tjín ya ngixkuin, tjín kjoatsjoa ngantsjai nichxin ya ngakixili” (Sal. 16:11). Ya kjoaʼmiya xi ijngo kui chótʼayajiaan jmeni xi nʼio chjíle xi nchja̱ni Salmo 16. Kʼoati koasenkaoli jósʼin nga nda kʼuínkoai yaoli kʼoa nga tsjoa sʼe̱ tokuin.