JE Diana jetsʼato 80 nóle, kʼoa je xʼinle kui chʼin xi Alzheimer ʼmi kisʼele kʼoa yaa kikʼejna ya jñani makuinda je chjota xi jejchínga saʼnda nga kʼien. Kʼoati kʼien nga jao xtile, kʼoa je Diana cáncer kisʼele. Ningalani tse kjoa jaʼatojin, kʼianga be je ndsʼee nga bichó ya kjoajtín kʼoa nga títsoyason kʼoatso nga tsjoa tjínntsjaile.

Je John tsʼato 43 nó nga viajante koan. Nʼio tsjoake koan nga kui xá jebi kisʼin, tonga kisikʼéjnaa xále nga kisikuinda jngo xi xínkjín mani xi chʼin tjínle. Kʼianga tsaojin je ndsʼee xi bexkon nga sʼe kjoajtíntse kʼoatso nga tojo kʼoasʼín je ndsʼee John josʼín ngantsjai, nga nʼio tsjoa tjín kon.

Jméni xi binyakao je Diana kao John kʼianga tsjoa tjío kon. A koaan nga tsjoa sʼe̱ kon ʼyani xi kjoañʼai tífaʼatojin kʼoa tsa síkʼéjna josʼin tísíxále Jeobá tsakai. Je Biblia itso: “Je xi kixi tsjoa koa̱nle xi kao Jeobá” (Sal. 64:10). Kʼianga ngisa nda koa̱njinná tʼatsʼe jebi, kuila chótʼayajiaan jmeni xi ñaki tsjoa bʼé kjoaixi tokoán kʼoa jmeni xi mai.

Nkjín koya tjín xi tsjoa báya tokoán, jolani kʼianga bixaan, kʼianga sʼená xti kʼoa kʼianga kʼoaʼminá josasʼin si̱xálee je Niná. Kʼoa toxá kʼoasatíoni tokoán, nga̱ kʼoasʼin kisindaná je Jeobá. Jé tsakʼénda je kjoabixan, kʼoasʼin kisindaná nga koa̱n sʼe̱ná xti, kʼoa jé tsjoáná kjoanda nga ma nixálee (Gén. 2:18, 22; Sal. 127:3; 1 Tim. 3:1).

Tonga sakʼoaa tsín tsjoa satío tokoán. Jolani xi jechixan, alikui tsjoa satío kon kʼianga biya tsa je xʼin kʼoa tsa je chjoón, kʼoa tsa kuije̱ nga sichajngitʼale xínkjín (Ezeq. 24:18; Os. 3:1). Kʼoa tsa maije̱ je xti likui kʼoaʼénle xijchále kʼoa alikui tisitjosonnile je Niná kʼoa kuichonsjejin naxinandále Niná. Tobʼelañá, je xtile profeta Samuel alikui kixi sʼin kisixále Niná, kʼoa je rey David tsakajngijée kʼoa tsín tindasʼin tsakationi ya yaniʼyale (1 Sam. 8:1-3; 2 Sam. 12:11). Ngayeje  kjoa jebi kui xi tsín titsjoa bʼéni tokoán, kʼoa tsee kjoaʼaon síkatíojinná.

Sakʼoaa tsín tikʼoasʼin nixánilee je Niná josʼin mená, xi totʼatsʼe chʼin, je xá xi kjinená ya yaniʼya kʼoa tʼatsʼe jmeni xi bʼantjaiyajin naxinandále Niná. Nkjín je ndsʼee xi kʼoatso nga faʼaitsjenle jokji tsjoa kisatio kon josʼin kisixále Niná tsakai.

Tsakui nichxin kʼoasʼin si̱kjaʼaitsjeen nga tongotjo nga tsjoa satío tokoán. Je choa̱le Samuel, David kao xi kjaʼaísa choʼndale Niná bakóná nga tjín jmeni xi tsjoa bʼé tokoán ngantsjai ninga kjoa kuitjátojiaan kʼoa ninga kʼoantjaiya josʼin tiyoaa.

Je Jesús ñaki tsjoa kisʼe kjoaixi kon. Nʼio ndasʼin tsakʼejna ya ngʼajmi. I kitso: “Nʼio tsjoa kisʼena ngantsjai nichxin nga ya tsakatejna ngixko̱n [Jeobá]” (Prov. 8:30). Tonga kʼianga jaʼai i̱ Sonʼnde sakʼoaa kjoa jaʼatojin. Ninga kʼoalani, kao kjoatsjoa kisitjoson je xále Nʼaile (Juan 4:34). Jméni xi tsakasenkao kʼianga kiskale je kjoañʼai xi jaʼatojin kʼianga tojeme ni̱kʼien. Je Biblia kʼoatso nga kichokjoajinle ngayeje kjoañʼai xi totʼatsʼe “je kjoatsjoa xi kisʼejna ngixko̱n” (Heb. 12:2). Jaola koya chótʼayajiaan jmeni xi kitso je Jesús tʼatsʼe xi ñaki tsjoa báya tokoán.

Ñandia kʼianga 70 chjotatjenngile Jesús xi nʼio tsjoa tjío kon nga jaʼaini nga kikakóyason kʼoa nga nkjín ánkje tsʼen tsakʼasjejinle chjota, je Jesús kʼoakitsole nga tsínkui xi tsjoa katabáya kon nga ánkje tsʼen tsakʼasjejinle je chjota. I kitsole: “Tosa tsjoa katasʼeno nga je jaʼaínno jetjítʼa ya ngʼajmi” (Luc. 10:1-9, 17, 20). Tsjoa sʼe tokoán kʼianga jngo xá sʼená jinnaxinandále Niná, tonga je xi ngisa chjíle kʼoa xi ngisa tsjoa báya tokoán kuinga nda bijnaa ngixko̱n Niná.

Ñandia kʼianga je Jesús tíbakóyale je chjotankjín, jngo chjoón xi chjota judío kitjenni kʼoakitso nga nʼiojin tsjoa tjínle je na̱le Jesús nga nʼio nda bakóya. Tonga je Jesús i kitsole: “Ngisa toxkón ndani je xi nrʼoé énle Niná, kʼoa xi sítjoson” (Luc. 11: 27, 28). Je xijchá xi nda sʼín je ʼndíxtile, nʼiojin tsjoa satío kon. Tonga tsa mele nga ngisa tsjoa sa̱tío kon machjén nga sitjosonle je Jeobá kʼoa nga nda koatio ngixko̱n.

Kʼiatsa mená nga tsjoa sa̱tío kjoaixi tokoán, machjén nga nda kuiyoaa ngixko̱n je Jeobá. Ningalani kjoa bitjatojiaan, alikui kui xosikaoná nga tsín titsjoa satíoni tokoán. Kʼianga kaná kʼoa kixi mangíntʼalee je Jeobá, ngisaa mataja je kjoatsjoachaná xi kao je (Rom. 5:3-5). Je Jeobá kʼoati tsjoále je nganʼiotsjele xi je sínʼiotʼa, kʼoa je nganʼiotsje basenkaoná nga sʼená kjoatsjoa (Gál. 5:22). Kuinga i̱ tsoni Salmo 64:10: “Je xi kixi tsjoa koa̱nle xi kao Jeobá”.

Jmeni xi kaʼyaa, kui xi tsakinyakao je Diana kao John nga tsín kisicha je kjoatsjoa xi kisʼele ninga tse kjoa jaʼatojin. Je Diana itso: “Kʼoasʼin tisinʼiotʼa je Jeobá josʼín je xtiʼndí nga je xijchále sínʼiotʼa”. Kʼoa itsosa: “Jé Jeobá tísíchikontʼainna nga tosi tonda kao kjoatsjoa xinyasoan”. Kʼianga nó 1998, kʼoatsakʼinle je John nga je kuitsoyale xi ya fi Escuela de Entrenamiento Ministerial, kʼianga kʼoatsakʼinle ngisaa tinda kiskotʼayangáni. Kʼoa kui xi tsakasenkao nga tsjoa kisʼe kon kʼoa nga tosi tonda nda kisixále je Jeobá, ninga tsínti viajante koanni. Nga kʼoakoan, kʼoatso nga tsín ñʼai koanle nga kisitjoson jme xi tsakʼinle, nga̱ ngantsjai nga tjíonda nga sítjoson jme xá xi tsjoále je Jeobá, kʼoatso nga tsín kʼoamanile josʼin tjíosíxále Jeobá ndʼaibi.

Nkjín ndsʼee xi kʼoati tso nga ñaki kʼoatjín jmeni xi tso Salmo 64:10. Kataʼyala je choa̱le ndsʼee xi tsʼato 30 nó tsakatio ya Betel xi tíjna Estados Unidos, kʼoa xi precursor especial sʼin kinikasén. I kitso: “Kʼianga nikʼéjnaa jmeni xi nʼio tsjoachaa, ba sʼe tokoán. Tonga alikui koa̱n nga kʼoakʼoé ngantsjai je tokoán”. Kʼianga kicho je ndsʼee jñani kinikasén nʼio nda kisixá kao je ndsʼee xi ya tsʼe. Kʼoa itsosa: “Kʼianga tsakʼetsʼoalaijin je Jeobá, kui kʼoatsakʼinlaijin jmeni xi koa̱nchjénnajin. Kʼoa kʼianga tsaʼyaijin nga kinrʼoénajin je Jeobá, nʼio tsjoa kisationajin kʼoa kitsjoanganʼionajin. Kʼianga jejaʼato nichxin nkjín ndsʼee xi precursor sʼin kisixá. Kʼoati kisokonajin je chjota xi nʼio nda kiskotʼaya je Énle Niná”.

Ndʼaibi ñʼai maná nga tsjoa sʼe tokoán. Sakʼoajin ba sa̱tío tokoán. Tonga jé Jeobá tsjoánganʼioná tojo tso ya Salmo 64:10. Ninga ba sʼe je tokoán, je Biblia itso: “Je xi kixi tsjoa koa̱nle xi kao Jeobá”. Xi tsonile, ninga tojme kjoa xi kuitjátojiaan, tsjoa sʼe tokoán tsa kixi kjuintʼalee je Jeobá. Kʼoa choyalee nga kjoaʼaí je “ngʼajmi chjotse” kao “sonʼnde chjotse”. Nga kʼia, je choʼndale Jeobá chjotatsje koa̱n kʼoa tsjoa sa̱tío kon ngantsjai nichxin tʼatsʼe ngayeje jmeni xi sʼin je Jeobá (Is. 65:17, 18).

Si̱kjaʼaitsjenla josʼin kuiyoaa nga kʼia: alikui tichʼin sʼe̱niná kʼoa sʼeená nganʼio. Alikui tikui kjoaʼaítsjenniná jme kjoa xi kitjatojiaan. Je Jeobá itso: “Kʼoa je kjoa xi jaʼato jetondiaa jchajin, alikui tikui kjoaʼaítsjennile ni̱ma̱ná”. Nga sʼe̱ kjoafaʼáya, koaan jcha ijngokʼá je xíngiaa xi jekʼien. Kʼianga kʼoakoa̱n, miyón koa̱nni chjota xi nʼio tsjoa sa̱tío kon jokisatio kon je xijchále je ʼndítsoti xi 12 nóle xi kisikjaʼáyale je Jesús (Mar. 5:42). Nga kui nichxin, ñaki kixi koa̱n ngatsʼi chjota xi koatio, kʼoa “tsjoa koa̱nle xi kao Jeobá” ngantsjai nichxin.