Ya 2 Corintios 12:2, 3 je Pablo jngo chjota kisikʼaxki̱ xi “kitjoé saʼnda xi majanni ngʼajmi”. ʼYá xi kinchja̱ni. Ya carta xi kiskile Pablo je chjota xi ya Corinto tsʼe kʼoakitso nga je Niná jo pastro sʼin kisichjén (2 Cor. 11:5, 23). Xijekoan, kui kinchja̱ni je sén xi kisakole kʼoa jme xi tsakʼéjnatsenle je Niná. Je texto jebi aliʼyasa xi síkʼaxki̱ xi kjaʼaí. Kuinga kʼoabixónñá nga je chjota xi sén kisakole kʼoa xi tjín xi kisikʼéjnatsenle Niná jéní Pablo (2 Cor. 12:1, 5, TNM).

Kui xi tsonile nga je chjota xi “kitjoé” saʼnda “xi majanni ngʼajmi” kao “ya ʼndenaxó” jé Pablo (2 Cor. 12:2-4, TNM). Kʼianga kʼoakitso nga tjín xi kisʼejnatsenle kui tsoyanile nga kui kisakole jmeni xi sʼa kʼoakoa̱n.

Jméni xi “majanni ngʼajmi” kitsole je Pablo.

Kʼianga ngʼajmi síkʼaxki̱ je Biblia nkjín koya tínchja̱ni. Tobʼelañá, sakʼoaa ñaki ngʼajmi tínchja̱ni (Gén. 11:4; 27:28; Mat. 6:26). Sakʼoaa je chjotaxá sonʼnde xotsole (Dan. 4:20-22). Kʼoati kui tínchja̱ sakʼoani je xi ya ngʼajmi batéxoma, jolani je Chjotaxá xi tíjnandale Niná (Apoc. 21:1).

Tonga jmé xi kinchja̱ni je Pablo kʼianga xi “majanni ngʼajmi” kitso. Ya Biblia sakʼoaa jan kʼa síkʼaxki̱ tsa jmeni ánni nga nʼio kataʼyanile (Is. 6:3; Ezeq. 21:27; Apoc. 4:8). Kʼianga xi “majanni ngʼajmi” kitso je Pablo kui kinchja̱ni jngo chjotaxá xi nʼio ngʼa tíjna: je Chjotaxále Niná, je Jesucristo kao xi 144,000 mani xi ya koai ngʼajmi (chótʼai Perspicacia para comprender las Escrituras, volumen 1, página 473, 476). Kui je Chjotaxále Niná kinchja̱ni je pastro Pedro kʼianga kʼoakitso nga kui tichoyalee je “ngʼajmi chjotse” xi kʼoakitso Niná nga tsjoá (2 Ped. 3:13).

Kʼoa jmé xi kinchja̱ni nga “ʼndenaxó” kitso je Pablo.

Kʼianga ʼndenaxó síkʼaxki̱ je Biblia nkjín koya tínchja̱ni. Xi títjon, kui nchja̱ni tʼatsʼe jñani kinikatío je chjota xi títjon, kuinga kʼoabixónñá nga kui xotsole je ʼNdenaxó xi sʼe̱jna i̱ Sonʼnde. Xi majaoni, tochajinle kui xotsole nga nyʼán sʼin koatio je choʼndale Niná kʼianga jesʼe̱jna je sonʼnde chjotse. Kʼoa xi majanni, kʼoajin tikui tínchja̱ni je kjoanda xi tjínle xi ya tjíokao Jeobá ya ngʼajmi, ʼndenaxó xi tsʼe Niná xi síkʼaxki̱ ya Apocalipsis 2:7 (chótʼai Xo̱n xi Bájinkonná xi tsʼe 1 sá julio nó 2015, página 12, 13 párrafo 8).

Tsakui nichxin kui kinchja̱ni nga jan koya jebi kʼianga tsakʼéyanajmí jme xi faʼaitʼa 2 Corintios 12:4.

Xi tochoa én:

Je “xi majanni ngʼajmi” xi síkʼaxki̱ ya 2 Corintios 12:2 tochajinle kui tínchja̱ni nga koatexoma Jesús kao xi 144,000 mani, je xi “ngʼajmi chjotse” ʼmile (2 Ped. 3:13).

Kuinga “xi majanni ngʼajmi” ʼminile nga̱ je Chjotaxá jebi jé xi ngisasa ngʼa tíjna.

Kʼianga kui nchja̱ni je “ʼndenaxó” jña “kitjoé” je Pablo tochajinle kui xotsole: Xi títjon, je ʼndenaxó xi sʼe̱jna i̱ Sonʼnde. Xi majaoni, nga nyʼán kuiyoaa kʼoa nga jtín kuiyoaa ya sonʼnde chjotse. Kʼoa xi majanni, “ʼnde xi naskáchon xi tsʼe Niná” ya ngʼajmi. Ya sonʼnde chjotse sʼe̱ní nga jan koya jebi.

Nichxin xi nroaján je “ngʼajmi chjotse” kao “sonʼnde chjotse” jtín sʼin koatio. Tojngo sixá je Chjotaxále Niná xi tíjna ngʼajmi kao je chjota xi Jeobá sixále nga jesʼe̱jna je ʼNdenaxó i̱ Sonʼnde.