1, 2. Jméni xi fiya jko̱ je chjota kʼianga nrʼoé je én xi ʼndenaxó tso.

NʼIO tsjoa tjíole je ndsʼee kʼianga jejetʼa je kjoajtíntse xi kisʼejnale ya Seúl (Corea), kʼoa je ndsʼee xi Corea tsʼe kichosíxatʼa je ndsʼee xi xin naxinandále xi toje tjíofini. Kʼoa i kitsole xínkjín: “Ya ʼNdenaxó ska̱jiaan”. Ánni nga ʼNdenaxó kisikʼaxki̱ni.

² Nichxin xi tiyoaa ndʼaibi, kʼianga kui én xi ʼndenaxó tso nrʼoé je chjota kjaʼaí kjaʼaísʼin fiya jko̱. Tjínkʼa xi kʼoatso nga to kuento. Kʼoa tjínkʼa xi kui síkjaʼaitsjen jngo ʼnde jñani naskánachon, jñani nda bijnaná kʼoa jñani nda sʼe tokoán, jolani jñani naxó kjintje. Kʼoa xi kao ñá, jméni je xi ʼNdenaxó ʼmi. A kjoaʼaí nichxin nga ʼNdenaxó koa̱n i̱ Sonʼnde.

3. Jñáni bʼaxki̱ títjon je én xi ʼNdenaxó tso ya Biblia.

³ Je Biblia kʼoatso nga kisʼe jngo ʼNdenaxó nichxin kjoatse kʼoa nga kʼoati sʼe̱ nichxin xi nroaján. Saʼnda nga títjon nchjani je Énle Niná tʼatsʼe je ʼndenaxó. Je Biblia xi Scío de San Miguel ʼmi, xi én latín kitjoénile nga jaʼatoya, ya Génesis 2:8 itso: “Saʼnda nga títjon tsakʼéjnaa je Nainá Niná jngo ʼndenaxó jñani nʼio tsjoa kisʼe kon je chjota xi kisinda kʼoa yaa kisikʼéjna”. Kʼianga én hebreo, je versículo jebi “ʼndenaxóle Edén” sʼin faʼatoya. Je én xi Edén tso kui tsoyanile jngo ʼnde jñani “tsjoa sʼe tokoán”, kʼoa nʼio nda bakinle nga kʼoatsakʼin ʼnde jebi, nga̱ nʼio  tse tsojmi xi ma chine kisʼe, naskánakoanchon kʼoa nyʼán sʼin tsakatiokao xínkjín je chjota kao cho̱ (Gén. 1:29-31).

4. Ánni kʼoabixónsíñá nga nʼio naskánakoanchon ya ʼndenaxóle Edén.

⁴ Je xi ʼndenaxó sʼin faʼatoya nga én hebreo, parádeisos sʼin faʼatoya nga én griego. Jngo enciclopedia xi kʼoatso kʼianga kui én jebi kinrʼoé jngo chjota griego, kui kiskaniya jko̱ jngo ʼnde jñani naskánachon, jñani tsín je xi chʼaotjín, jñani tjín je yá xi naskánakjoan xi nkjín koya to bale, jñani faʼa nandá xi tjín tsjetsje kʼoa nga bichókjen ndainandá je barré kao je cho̱ xi antílope ʼmi (Cyclopaedia, xi tsʼe M’Clintock kao Strong; tingósonkoai Génesis 2:15, 16). Jebi kui tsoyaná nga nʼio naskánakoanchon ya ʼndenaxóle Edén.

5, 6. 1) Ánni nga kichani je ʼNdenaxó nichxin kjoatse. 2) Jméni xi sakʼoa chjonangiaa.

⁵ Je Niná jngoo ʼndenaxó kisikatíojin je Adán kao Eva, tonga xijekoanni, alikui tiya tsakationi nga̱ tsín kisitjosonle Niná. Je kʼoa kao ntje̱le kisichaa ʼndenaxó jebi (Gén. 3:23, 24). Alikui tiʼya xi ya tsakationi jñani kisʼejna je ʼndenaxóle Edén, kʼoa kʼiaa kicha nga jaʼai je Jtsínʼio.

⁶ A kjoaʼaí nichxin nga ʼNdenaxó koa̱n ijngokʼa i̱ Sonʼnde. Jmé choa̱ xi bakóná jokoa̱n. A koaan kuiyoaa ya ʼNdenaxó kao je xíngiaa. A koaanná kuixónyaa ánni nga tsín jao tjínni tokoán nga kjoaʼaí nichxin nga ʼNdenaxó koa̱n i̱ Sonʼnde.

7, 8. 1) Jméni xi kitsole Jeobá je Abrahán. 2) Jméni xi kisikjaʼaitsjen je Abrahán kʼianga kʼoakitsole Niná nga koa̱nchikontʼain “ngatsʼi naxinandá xi tjín sonʼnde”.

⁷ Yaa Biblia jñani nda kuitsoyaná, nga̱ tʼatsʼe Niná kinroani, kʼoa jé tsakʼéjna ʼNdenaxó nichxin kjoatse. Tobʼelañá, ya Biblia kʼoatso nga je Jeobá kʼoakitsole je Abrahán nga sinkjínya je ntje̱le “joni tsa niño xi tjín ngʼá kʼoa joni tsa tsomí xi tjín ndaindáchikon”. Kʼoa i kitsosale: “Kʼoa kao je ntje̱li koa̱nchikontʼainni ngatsʼi naxinandá xi tjín sonʼnde nga̱ kanitjosonní énna” (Gén. 22:17, 18). Xijekoanni, je Niná kʼoati kitsole je tile kʼoa kao tindaile Abrahán (tʼexkiai Génesis 26:4; * 28:14 *).

⁸ Alikui jña kʼoatso je Biblia tsa kʼoasʼin koankjainle je Abrahán nga ya ngʼajmi sʼe̱le kjoanda je chjota. Kʼianga kʼoakitsole je Niná nga “ngatsʼi naxinandá xi tjín sonʼnde” koa̱nchikontʼain, kuijin kisikjaʼaitsjen nga i̱ Sonʼnde jñani kʼoakoa̱n. Jmésa choa̱ xi faʼaitʼa ya Biblia xi tsoyaná nga i̱ Sonʼnde sʼe̱jna je ʼndenaxó.

9, 10. Jmésa choa̱ xi tjín xi kʼoati tsoyaná nga sʼe̱jna ʼndenaxó i̱ Sonʼnde nichxin xi nroaján.

⁹ Je David kui kinchja̱ni tʼatsʼe je nichxin nga tsín tisʼe̱ni je chjotatsʼen (Sal. 37:1, 2, 10). Kʼoakitso nga “je xi ndʼé tsʼee koa̱n i̱ sonʼnde, kʼoa ñaki kʼoetsaojin jokji nyʼán sʼin koatio”. Kʼoati i̱ kitso: “Je xi kixi tsʼee koa̱n sonʼnde, kʼoa i koatioson ngantsjai nichxin” (Sal. 37:11, 29; 2 Sam. 23:2). Jósʼin tsakinyakao én jebi je chjota xi kʼoakisʼin josʼin mele Niná. Koankjainle nga kjoaʼaí nichxin nga sʼe̱jna jngo ʼndenaxó joni je ʼndenaxóle Edén, nga̱ tojé chjota xi kixi koatio i̱ Sonʼnde.

¹⁰ Je chjota israelita xi kʼoakitso nga je Niná bʼétsʼoale yátsʼin tsakinyále nga jekoanni. Kuinga kitsjoaʼndeni je Jeobá  nga je chjota babilonio kichosíkje naxinandá kʼoa nʼio nkjín xi ya Babilonia kinikatíonʼio (2 Crón. 36:15-21; Jer. 4:22-27). Tonga je profetale Niná kʼoakitso nga 70 nó kjoaʼato nga koai ijngokʼani je chjota israelita ya ʼndele. Kitjoson nga kʼia je én jebi, tonga jmeni xi koan nʼio tse xi tsoyaná ndʼaibi. Chótʼayajinla kʼaa xi tʼatsʼe jebi kʼoa jchañá jméni xi tsoyaná tʼatsʼe je ʼNdenaxó xi sʼe̱jna i̱ Sonʼnde.

11. 1) Jósʼin kitjoson jmeni xi tso Isaías 11:6, 9. 2) Jméni xi kʼoati chjonangiaa.

¹¹ (Tʼexkiai Isaías 11:6, 9). * Je Niná jé Isaías kisichjén nga kʼoakitso kʼianga sʼe̱le kjoanyʼán je chjota israelita je xi sʼa xti kʼoa kao xi jejchínga, kʼoa nga tsín josikao je cho̱ kao chjotatsʼen. Kui tsoyaná jokoanchon ya ʼndenaxóle Edén (Is. 51:3). Kitjoson nga kui nichxin je én xi tongini kinokjoa. Tonga kʼoati tso je én jebi nga “kui kjoankjíntokonle Jeobá sʼe̱ ngakjijnda sonʼnde josʼin kijna jngojngo je nandá ya ndáchikon”. Kʼiáni kʼoakoa̱n.

12. 1) Jmé kjoanichikontʼain kisʼele je xi kitjoni ya Babilonia. 2) Jósʼin ʼyañá nga sʼa kuitjoson jmeni xi tso Isaías 35:5, 6, 8, 9.

¹² (Tʼexkiai Isaías 35:5, 6, 8, 9). * Je Isaías tongini kʼoakitso nga je chjota israelita xi kuitjoni Babilonia alikui chjota kʼoa alikui cho̱ tsokjonle. Nʼio sʼe̱ je tsojmintje nga̱ nʼio sʼe̱ nandá, tojo koanchon ya ʼndenaxóle Edén (Gén. 2:10-14; Jer. 31:12). A tokʼiaa nga kitjoson én jebi. Je én xi tongini kinchja̱ je Isaías kʼoatso nga koa̱nndaya je xi xka̱, xi chjiʼngé kʼoa kao je xi jtaya. Tonga alikui kʼoakoan jebi kʼianga nichxinle chjota israelita. Kui xi tsoyaná nga sʼa kʼoakoa̱n nichxin xi nroaján.

13, 14. Jósʼin tsabe je chjota israelita xi kitjoni ya Babilonia nga kitjoson jmeni xi tso Isaías 65:21, 22, tonga jmésani xi cha nga kuitjoson (chótsenlai sén xi fitsʼiani kjoaʼmiya jebi).

¹³ (Tʼexkiai Isaías 65:21, 22). * Kʼianga jekichoni je chjota israelita ya ʼndele, tsín niʼya xi ndakjoan, alijme tsojmintje tjín. Tonga xijekoan kisichikontʼain je Niná. Nʼiojin tsjoa kisatio kon nga tsakʼénda je ndʼia jñani tsakatioʼya, kʼoa nga tsakʼéntje tsojmi kʼoa kiskine je tole yá.

¹⁴ Je Isaías kʼoakitso nga kʼoakjitse kuiyoaa “jokji tse male jngo yá”. Tjínkʼa je yá xi jmi nó male. Nga kʼoakjitse kuiyoaa tjínnejinle nga tsín jme chʼin sʼe̱ná. Nʼiojin naskánakoa̱nchon kʼianga jekuitjoson jmeni xi kitso je Isaías, kʼoa alikui jao tjínná nga kʼoakoa̱n.

15. Jméni xi tongini tso je librole Isaías.

¹⁵ Jmeni xi tso je librole Isaías tsoyaná nga ʼndenaxó koa̱n i̱ Sonʼnde nichxin xi nroaján. Je Niná sichikontʼain je chjota jngo tjíjtsa Sonʼnde. Alikui titsʼen koa̱nni je cho̱ kʼoa alikui tisʼe̱ni je chjotatsʼen. Koa̱nndayaa je chjota xi xka̱, xi jtaya kʼoa xi tsín ma fi. Je chjota kʼoenda ndʼiale kʼoa kʼoentje je tsojmi xi ski̱ne. Ngisaa nʼio nkjín nó koatio tikʼoajinni je yá. Je  Biblia kʼoatso nga kʼoakoa̱n nichxin xi nroaján. Jókʼuínlee kʼiatsa jngo chjota kʼoakuitsoná nga tsínkʼia kʼoakoa̱n jmeni xi tso je Biblia. Ánni nga makjainniná nga ʼndenaxó koa̱n i̱ Sonʼnde. Je Jesús kitsoyaa xi tʼatsʼe jebi.

16, 17. Kʼiáni kinchja̱ni je Jesús xi tʼatsʼe ʼNdenaxó.

¹⁶ Yá kinikʼientʼa je Jesús ningalani tsín jme jée tsakajngi. Kʼoa jao chjotaché kitsjentjenbʼatʼakao yá. Jngo xi koankjainle nga rey je Jesús, i kitsole: “Jesús, tikjaʼaitsjennái kʼianga jekoatexomai” (Luc. 23:39-42, TNM). Jmeni xi kitsole Jesús je chjotaché jebi, kʼoati tsjoáná kjoachoya tsanda ñá. Kjaʼaí kjaʼaí tso je chjota xi tʼatsʼe Lucas 23:43. Tjínkʼa je chjota xi tʼatsʼe Biblia kotʼayason xi jngo coma kʼoa tsa jao punto síkatíole nga tongini jñani “ndʼaibi” tso, kʼoa je texto jebi isʼin síkinchja̱: “Ñaki kʼoaxin kjoaixile: ndʼaibi yaa kuijnakaonái ya ʼNdenaxó”. Tonga a kui jebi xi kitso je Jesús.

¹⁷ Nʼio nkjín én xi coma síchjénle kʼianga ngisa nda katamajinná jmeni xi tsoya. Tonga je xo̱njchá xi kjio saʼnda nichxin kjoatse, alikui síchjén je coma, punto kʼoa tsa kjaʼaísanile. Kuinga jao satíonile je chjota tʼatsʼe jmeni xi kitso je Jesús. A i kitso: “Ñaki kʼoaxin kjoaixile: ndʼaibi yaa kuijnakaonái ya ʼNdenaxó”. Axo i kitso: “Ñaki kʼoaxin kjoaixile ndʼaibi: yaa kuijnakaonái ya ʼNdenaxó”. Je xi síkʼatoya je Biblia kʼoabʼé josʼin makjainle nga jngó jngó. Kʼoa kuinga kjaʼaí kjaʼaí tsoni nga jngó jngó je Biblia.

18, 19. Jmé kjoafaʼaitsjen xi basenkaoná nga majinná jmeni xi kitso je Jesús.

¹⁸ Si̱kjaʼaitsjenjinla jmeni xi tongini kitsole Jesús je chjotatjenngile. I kitsole: “Kʼoasʼin jan nichxin kao jan nitje̱n kʼoéjnajin nangi je ʼndíle chjota”. Kʼoati i̱ kitsole: “Je ʼndíle chjota kʼoasʼin kʼoaitʼale ntsja chjota. Kʼoa chjota sikʼen, kʼoa xi koa̱njanni nichxin si̱kjaʼáyanile” (Mat. 12:40; 16:21; 17:22, 23; Mar. 10:34). Je pastro Pedro kʼoakitso nga kʼoakoan kjoaixi (Hech. 10:39, 40). Kui xi tsoyaná nga je Jesús kʼoa kao je chjotaché tsín ya ki jñani tíjna jngo ʼndenaxó nichxin kʼianga kʼien. Je Biblia kʼoatso nga jan nichxin jaʼáyanile je Jesús (Hech. 2:31, 32). *

¹⁹ Tojosʼin tiʼyaa, je Jesús i kitsole je chjotaché: “Ñaki kʼoaxin kjoaixile ndʼaibi”. Kʼianga nichxinle Moisés kʼoati kui én koanchjén. Tobʼelañá, ñandia nga i̱ kitso: “Je én jebi xi kʼoasʼin tibʼenele ndʼaibi tjínneli ya kʼoéjnajin ni̱ma̱li” (Deut. 6:6; 7:11; 8:1, 19; 30:15).

20. Jméni xi kitso jngo chjota xi basenkaoná nga majinná jmeni xi kitso je Jesús.

²⁰ Jngo chjota xi Biblia síkʼatoya, xi ya Oriente Medio tsʼe, i kitso: “Kui je én xi ndʼaibi tso xi nʼio nchja̱ni je texto jebi, kʼoa tjínnele i̱ kuitso: Ñaki kʼoaxin kjoaixile ndʼaibi: yaa kuijnakaonái ya ʼNdenaxó”. Kʼiaa kʼoakitso je Jesús nichxin nga kinikʼien, tonga sʼaa kuitjoson. Kʼoasʼin nchja̱ je chjota xi ya tsʼe, nga jngo nichxin kʼoatso jmeni xi koa̱n kʼoa skaanni bitjoson. Jngo Biblia xi én sirio kichji kʼianga siglo 5, itso: “Kʼoaxin kjoaixile ndʼaibi nga ji yaa kuijnakaonái ya ʼNdenaxóle Edén”. Tsjoánganʼioná ngatsʼiaa én jebi.

21. Jósʼin ʼyañá nga tsín ya ngʼajmi ki je chjotaché nga kʼien.

²¹ Je chjotaché alikui kʼoatsakʼinle nga  ya ngʼajmi koai. Saʼnda tsín be nga je Jesús kui tsakʼéndajinkao chjotatjenngile nga ya koatexomakao ya ngʼajmi (Luc. 22:29). Kʼoa chjota jebi saʼnda kje fisʼenngindájin (Juan 3:3-6, 12). Je Jesús kui xi kitsole je chjotaché nga i̱ Sonʼnde sʼe̱jna je ʼndenaxó. Xi ijngosani, nga jenkjín nó koanskanni, je pastro Pablo kui tsakʼéyanajmí tʼatsʼe jngo chjota xi jngo sén tsabe “xi ya kitjoé ya ʼndenaxó” (2 Cor. 12:1-4, TNM). Tonga je Pablo kao xi ngikʼa chjotatjenngile Jesús, toxá kitjoejinni nga ya ngʼajmi koai kʼoa nga ya koatexomakao je Jesús. Tonga je Pablo kui kinchja̱ni je “ʼndenaxó” xi i̱ Sonʼnde sʼe̱jna. * Kʼoa ñá, a koaan ya kuiyoaa.

22, 23. Jméni xi choyalee.

²² Je David tongini kʼoakitso nga kjoaʼaí nichxin nga “je xi kixi tsʼee koa̱n sonʼnde” (Sal. 37:29; 2 Ped. 3:13). Kui kinchja̱ni je nichxin kʼianga je chjotasonʼnde sitjoson je kjoatéxomale Niná. Ya Isaías 65:22 itso: “Nga̱ jokji tse male jngo yá kʼoakji tse koa̱nle naxinandána”. Jebi kui xi tsonile nga koatio ngantsjai nichxin je chjota. A ñaki choyalee nga kʼoakoa̱n. Jaon, nga̱ ya Apocalipsis 21:1-4 kʼoatso nga likui tisʼe̱ni je kjoabiya kʼianga jekjoaʼaí sonʼnde chjotse, nga kʼia je Niná tsee kjoanichikontʼain tsjoále je choʼndale.

²³ Tojosʼin jekaʼyaa, je ʼNdenaxó xi títjon kisʼejna ali tondiaa kichajin. Je Niná kʼoakitso nga sichikontʼain je chjotasonʼnde. Kʼoa tongini kʼoakitsole je David nga je chjota xi kixi tsʼee koa̱n i̱ Sonʼnde kʼoa koatio ngantsjai nichxin. Xi ijngosani, je én xi tongini kinchja̱ je Isaías basenkaoná nga kao kjoatsjoa choyalee kʼianga kuitjoson jmeni xi kitsole Jesús je chjotaché. Kʼoa koaan ya kuiyoaa ya ʼNdenaxó. Kʼianga kjoaʼaí nichxin jebi, kuitjoson jmeni xi kitso je ndsʼee kʼianga kisʼejnale je kjoajtíntse ya Corea, nga kitso: “Ya ʼNdenaxó ska̱jiaan”.