A koaanli kʼoasí jme xi kjonangi i̱bi xi ya yʼangini je Xo̱n xi Bájinkonná xi tsʼe nó 2019.

Jmé xi tsoyanile nga i̱ tsoná je Niná: “Nijngojin ki̱cha̱ xi kjuinroaneli xi kuinje̱le” (Is. 54:17).

Alikui jao tjínná nga basenkaoná Niná “kʼianga bʼetʼaná je chjotatsʼen” (Is. 25:4, 5). Je chjotakontraná alikui koa̱nle nga tondiaa sikiʼaonná (w19.01, p. 6, 7).

Jósʼin tsakakó kjoatéxomakixi je Niná nga kjoañʼai kitsjoale je chjota cananeo kao chjota israelita xi tsín kisitjoson.

Je Niná kjoañʼai kitsjoale je chjota xi kisichajngi kʼoa xi totaon tsabe je yánchjín kao ʼndíxti. Tonga kisichikontʼain je xi kisitjoson kʼoa xi tsakakó kjoatéxomakixi (w19.02, p. 22, 23).

Jmé xi koa̱n sʼiaan kʼiatsa jngo xi tsín choʼndale Jeobá ma tíbʼétsʼoa.

Koaan tojyó kuiyoaa kʼoa koakoá kjoaxkóntokon. Tonga alikui koa̱n nga “kʼoakatama” kuixoán kʼoa tsa ntsja xíngiaa kuindoaa. Tsa mená koaan toñá kʼoéjnaa je kjoabʼetsʼoa ya jinni̱ma̱ná (w19.03, p. 31).

Jókji xkón tíjna nga xtiʼndí ʼyataon.

Tsee jée bajngi je xi xtiʼndí betaon, nga̱ síkiʼaon je ʼndíxti. Je chjota xi kʼoasʼín bajngijée ngixko̱n jtín, ngixko̱n chjotaxá kʼoa ngixko̱n Jeobá. Ya naxinandá jñani kʼoatso je kjoatéxoma nga tjínnele sʼe̱jinkon je chjotaxá kʼianga xtiʼndí ʼyataon, je xi chjotajchínga sʼin tjío sítjoson kjoatéxoma (w19.05, p. 9, 10).

Jósʼin si̱kʼantjaiyaa jotjín kjoafaʼaitsjenná.

Jan koya tjínni xi koa̱n sʼiaan: kʼoétsʼoalee Jeobá, si̱kjaʼaitsjenjiaan josʼin koa̱n si̱ndayaa yaoná kʼoa nda chósonnilee ʼyáni xi si̱miyoaa (w19.06, p. 11).

Jméni xi koa̱n sʼiaan nga tongini kuiyondaa kʼianga chjota koaitjenngikená.

Machjén nga tosi tonda si̱miyoaa je Jeobá, ñaki kʼoakʼoé tokoán nga tsjoakená kʼoa nga tsínkʼia tsjiónkonná, nyaon nyaon kʼoéxkiaa Biblia kʼoa kjitʼa kʼoétsʼoaa. Ñaki kʼoéjngoaa tokoán nga tse kjoanichikontʼain kjoaʼaíkao je Chjotaxále Niná, kʼoéjintokoán je textole Biblia kao canción xi jndalee Jeobá (w19.07, p. 2-4).

Jmé xi koa̱n sʼiaan nga kuinyakoaa je xíngiaa nga kuitjontjai.

Machjén nga si̱jinlee yaoná jotjío kon, nda choa̱ kʼoéjnaa ánni nga koa̱nndosinsínile je Énle Niná, tsejta katamaa kʼoa ndʼé katamaa (w19.08, p. 15-17).

Tojo tso Mateo 11:28, jósʼin tsjoáná kjoanikjáya je Jesús.

Je xi bándiaaná nʼio nda chjota, miyoná mani je xi ñatjen nixá kʼoa nʼio chjíle je xá xi nʼia (w19.09, p. 23).

Jósʼin basenkaoná je Niná nga koa̱nmená kʼoasʼiaan josʼin mele kʼoa nga tsjoánganʼioná nga kʼoasʼiaan (Filip. 2:13).

Kʼianga bʼexkiaa je Énle Niná kʼoa nga nikjaʼaitsjenjiaan jmeni xi tso, je Niná basenkaoná nga koa̱nmená kʼoasʼiaan josʼin mele kʼoa kʼoati tsjoánganʼioná nga kuitjosonná josʼin mele. Je nganʼiotsjele basenkaoná nga ngisasa nda si̱xálee (w19.10, p. 21).

Jméni xi títjon sʼiaan nga kjesa bʼendajinjián jme xi sʼiaan.

Aon koya xi koa̱n sʼiaan: nda kuijnatsʼinyaa, si̱jélee Niná kjoachjine, si̱kjaʼaitsjenjiaan ánni nga kʼoasʼiansíñá tsa jmeni, jmékjoánni xi mená sʼiaan kʼoa kuenta sʼiaan jokji tjen bichó nganʼioná (w19.11, p. 27-29).

A kui kinchja̱ni je Na̱i nga tsakjákao Eva nga tojo bʼejnakon je ni̱ma̱ná kʼianga jebiyaa.

Ali tsakuijin kinchja̱ni. Je Na̱i alikui kʼoakitsole Eva nga xin kʼoéjnakon ijngokʼani, kui xi kitsole nga tsín kuiyá. Je kjoafaʼaitsjen xi tso nga tojo bʼejnakon je ni̱ma̱ná nga jebiyaa kʼiaa kichangi nga nichxinle Noé nga jaʼai je Jtsínʼio. Tsakui nichxin kʼia tsʼatsen ijngokʼa jebi kʼianga kjesa síkixoyajin Niná je xjáo xi tsakʼénda chjota ya Babel (w19.12, p. 15).