Ali tsakuijin kinchja̱ni. Je Na̱i alikui kʼoakitsole Eva nga kuiyá kʼoa nga xin kʼoéjnakon ijngokʼani tsakui to ski̱ne xi tsakʼéchjoale Niná. Je Na̱i jngoo ye̱ kisichjén nga kʼoakitsole je Eva nga tsín kuiyá. Kui xi kitsonile nga tosi tonda kʼoéjnakon kʼoa nga ngisa ndasʼin kʼoéjna nga tsín je Niná koatexomale (Gén. 2:17; 3:3-5).

Tsa tsín ya Edén kinroani nga kʼoasʼin makjain kʼale je chjota nga tojo bʼejnakon je ni̱ma̱ná kʼianga jebiyaa, jñá jaʼaini kjoafaʼaitsjen jebi. Alikuikjoan ʼyaa. Je religión ndiso kʼiaa jeson nga nichxinle Noé nga jaʼai je Jtsínʼio. Je Noé kao familiale choʼndale Niná koan kʼoa tojé xi kinjengile yaole. Kichangi ngayeje kjoafaʼaitsjen ndiso xi kisʼe nga kui nichxin.

Nga kʼoasʼin makjainle chjota nga tojo bʼejnakon je ni̱ma̱ná nga jebiyaa, kʼiajin kinroatsʼiani nga jejaʼato je Jtsínʼio. Kʼianga kisikʼantjaiya Niná josʼin nchja̱ chjota nga jngó jngó ya Babel, tsangabason ngakjijnda Sonʼnde, kʼoajinsʼin kisikjaʼaitsjen nga bʼejnakon je ni̱ma̱ná kʼianga jebiyaa (Gén. 11:8, 9). Kuinga tsín ʼyanile kʼiákjoánni kinroatsʼiani nga kʼoasʼin koankjainle je chjota xi tʼatsʼe jebi. Je xi tsín jao tjínná, kuinga je Na̱i, xi “nʼaile kjoandiso” ʼmile jé xokisʼin nga kʼoasʼin koankjainle chjota kʼoa nʼiojin tsjoa sʼele nga nʼio tsangabason je kjoafaʼaitsjen jebi (Juan 8:44).