A KʼOASʼIN nikjaʼaitsjeen nga maná bʼé kjoanda. Machjén nga si̱kjaʼaitsjenjiaan xi tʼatsʼe jebi. Je Biblia kʼoatso nga tsín tsjoá kjoanda chjota nichxin xi tiyoaa ndʼaibi (2 Tim. 3:2). Tjínkʼa chjota xi kʼoasʼin síkjaʼaitsjen nga bakinle jmeni xi bʼaile kʼoa kuinga kʼoatsoni nga tsín machjén nga tsjoá kjoanda. Tonga alikui sasénná nga kʼoasʼin síkjaʼaitsjen je chjota.

Je Jeobá kʼoatsole je choʼndale nga katatsjoá kjoanda (Col. 3:15; 1 Tes. 5:18). Nʼio basenkaoná nga kʼoanʼia. Kataʼyala kʼaa choa̱ josʼin basenkaoná.

Jngo koya anni nga machjénni nga kʼoee kjoanda, kuinga ngisa nda satío tokoán. Nda satío kon je xi tsjoá kjoanda kʼoa kao je xi bʼaile. Si̱kjaʼaitsjenla xi tʼatsʼe jebi. Kuinga binyakaoniná xíngiaa kʼoa tjín xi tsjoániná nga̱ be nga bakinná kʼoa kʼoasʼin bakóni nga mandosinle xi tʼatsaan. Kʼoa nga kʼoasíkaoná xíngiaa nda sʼe tokoán. Kʼoakoan je Rut. Kʼianga tsakakóle kjoanda je Boaz, je Rut ndajin kisʼe kon nga koanndosinle je Boaz nga nda tsakʼejna (Rut 2:10-13).

Jé Niná xi ngisa machjén nga kʼoailee kjoanda. Sakʼoaa nikjaʼaitsjeen je kjoatjao xi tsjoáná Niná, xi basenkaoná nga nijchá yaoná kʼoa xi basenkaoná nga ndasʼin biyoaa ngixko̱n (Deut. 8:17, 18; Hech. 14:17). Alikui tokʼoéjngoaa tokoán tʼatsʼe jmeni xi tsjoáná je Niná. Si̱kʼayaa nichxin nga si̱kjaʼaitsjenjiaan jokji kjoanda títsjoáná ñá kʼoa kao xíngiaa. Tsa kʼoasʼiaan, kui xi koasenkaoná nga koakoá kjoanda kʼoa ngisaa sʼe̱jngo tokoán nga tsjoakená kʼoa nga chjí bená (1 Juan 4:9).

Ali tokuijin xi machjén nga si̱kjaʼaitsjenjiaan jokji kjoanda bakóná je Jeobá kʼoa kao kjoanichikontʼain xi tsjoáná, kʼoati machjén nga kʼoailee kjoanda (Sal. 100:4, 5). Tsjoa sʼe tokoán kʼianga bʼé kjoanda.

Ijngo koya josʼin basenkaoná nga bʼé kjoanda kuinga ngisa mamiyoaa je xíngiaa. Machjénná ngatsʼiaa nga chjí jchatokonná. Kʼianga ni̱ma̱ná nroajinni nga bʼé kjoanda kʼianga ʼya xi basenkaoná, ngisaa mamiyosaa xíngiaa (Rom. 16:3, 4). Xi ijngosani, je chjota xi tsjoá kjoanda ngisaa tjíonda nga binyakao xi kjaʼaí. Nga sakóle kjoanda jngo chjota kʼoati sʼín tsanda je. Nga binyakoaa je xíngiaa ngisaa tsjoa satío tokoán. Je Jesús i kitso: “Tongisa ndaní nga kʼoee kaoni tsa nga chjoé” (Hech. 20:35).

Je chjota xi Robert Emmons ʼmi, xi ya síxá ya Universidad de California, kʼianga kui kiskotʼayason tʼatsʼe nga bʼé kjoanda, i kitso: “Kʼianga kʼoee kjoanda, machjén nga koa̱njinná nga machjénngañáná xíngiaa, sakʼoaa je xi ngikʼa binyakaoná kʼoa sakʼoaa ñá binyakoaa”. Kuinga kʼoabixónsíñá nga machjénngañáná xíngiaa. Tobʼelañá, kʼianga kui tsjoáná xíngiaa tsojmi xi ma chine kʼoa tsa kʼiaje̱ nga basenkaoná nga chʼin katʼaná (1 Cor. 12:21). ʼYani xi tsjoá kjoanda, majinle jmeni xi sʼín xi ngikʼa xi tʼatsʼe. Kʼoa ñá, a kʼoasʼin nganá nga bʼé kjoanda.

Nga bʼé kjoanda kʼoati binyakaoná nga tsjoa satío tokoán. Je kjoafaʼaitsjenná male kjoejin jmeni xi faʼasʼenjin. Je chjota xi tsjoá kjoanda kui síkjaʼaitsjen xi nda bʼé kon kʼoa alikui kui nʼio bʼéya jko̱ tsa jme kjoa tjínle. Kʼianga ʼyaa nga ndasʼin bichómani nga bʼé  kjoanda kui xosíkaoná nga tosi tonda kʼoanʼia. Nga kʼoasʼin nikjaʼaitsjeen kui mangíntjenngiaa jokitso je pastro Pablo, nga kitso: “Tsjoá tʼaotakon ngantsjai nga tiyokao Nainá” (Filip. 4:4).

Tsa kʼoee kjoanda kui xi koasenkaoná nga tsínkui si̱kjaʼaitsjeen xi sikinroajen tokoán. Alikui koa̱n nga kʼoakji koakoá kjoanda kʼoa kʼoakji koa̱nxinkonchá xíngiaa, alikui koa̱n kʼoakji ba kʼoé tokoán kʼoa kʼoakji kʼoéngijtiaa tokoán. Xi ijngosani, je chjota xi tsjoá kjoanda, tomajngoni kon jmeni xi tjínle kʼoa alikui nkjínsa tsojmi básjai (Filip. 4:12).

Ñá xi chjotale Cristo maa ʼyañá nga kui xi mele je Na̱i nga si̱kinroajeen tokoán kʼoa nga ba katasʼená nga kjoa bitjatojiaan. Kui xi mele nga tsín tsjoa katasʼená kʼoa nga tokui kʼoéngijtiñá tokoán tojmeni xi koa̱ntʼeen. Tsa kʼoasʼiaan, tsínjin tinda kʼuínyasonñá je Énle Niná. Nga bʼé kjoanda, kʼoati kui bakoá je kjoanda xi tsjoá je nganʼiotsjele Niná, jolani nga tsjoa satío tokoán tʼatsʼe jmeni xi tsjoáná je Niná kʼoa tʼatsʼe nga makjainná nga kuitjoson jmeni xi tso (Gál. 5:22, 23).

Ñá xi choʼndale Niná maa tjínjngoo tokoán nga kʼoatjín jmeni xi jekaʼyaa. Tonga kʼoati majinná nga tsín to jekoasʼin kichʼañá nga bʼé kjoanda kʼoa nga tsjoa satío tokoán. Ninga kʼoalani, alikui si̱kinroajeen tokoán. Koaanná nga kʼoee kjoanda. Kuinga machjénsíni nga nyaon nyaon si̱kjaʼaitsjenjiaan jósʼin kʼoee kjoanda. Tsa kʼoasʼiaan, kʼoasʼin koa̱nnganá. Kʼoa ngisaa tsjoa sa̱tío tokoán tikʼoajinni je chjota xi tokui bʼéjintokon je kjoa xi faʼatojin. Si̱kjaʼaitsjenjiaan jmeni xi títsjoáná Niná kao jmeni xi sʼín je chjota nga binyakaoná nga nda satío tokoán kʼoa nga tsjoa satíoná. Kʼoati koa̱n tsa jao kʼoa tsa jan koya kʼoétʼaxoaan nga nyaon nyaon tʼatsʼe jmeni xi kʼoaiñá kjoanda.

Je chjota xi kui kotʼayason tʼatsʼe xokoajkoaa kʼoatso nga ngisa nda síxá je xokoajkoaa kʼianga ningalee yaoná nga bʼé kjoanda, kʼoa ngisaa choa ñʼai maná nga kui nikjaʼaitsjeen xi ndatjín. Je chjota xi tsjoá kjoanda ngisaa tsjoa satío kon. Kuinga machjénsíni nga kuenta sʼiaan jmeni xi tjínná xi tsjoa bʼé tokoán, kuenta sʼiaan jmeni xi ndatjín kʼoa kʼoee kjoanda. ʼNdele nga tokʼoéjngoaa tokoán, kjuintjenngiaa kjoafaʼaitsjen xi tsjoá je Biblia nga kʼoatso nga kʼoailee kjoanda Jeobá nga̱ nda chjota, kʼoailee kjoanda tʼatsʼe ngayeje jmeni xi tsjoáná (1 Crón. 16:34; 1 Tes. 5:18).