1. Jmé xá xi bánele Jeobá je xi xijchá ma.

JE Jeobá toxá kʼoasʼin kisindani je Adán kao Eva nga koa̱nmele xti sʼe̱le. Kuinga i̱ tsoni je Biblia: “Je xti jngoo kjoatjao xi tʼatsʼe Jeobá tínroani” (Sal. 127:3). Nga koa̱njinná jme xi tsoyanile én jebi, si̱kjaʼaitsjenla tsa jngo miyoná kʼoakuitsoná nga tao̱nle kʼoéjnatjoá kʼoa tsa nʼio tse mani tao̱n jebi. Ndajin sʼe̱ tokoán nga kui kjoanda tísíjéná, tonga kʼoajin tikoa̱nkjáojinná josʼin si̱kuindaa tao̱n xi sikʼéjnatʼainná. Tikʼoasʼinni je Jeobá, miyoná mani kʼoa ngisaa nʼio chjíle jmeni xi bánele je xi xijchá ma tikʼoajinni tao̱n. Kui xá bánele nga sikuinda je ʼndíxtile nga ndasʼin koatio kʼoa nga tsjoa sa̱tío kon.

2. Jmé xi chótʼayajiaan i̱ kjoaʼmiya jebi.

² I̱ kjoaʼmiya jebi kui chótʼayajiaan ʼyáni xi kʼoakuitso tsa xti sʼe̱le xi jechixan kʼoa tsa mai, kʼoa kʼiáni. Kʼoa jméni xi sʼin je xi xijchá ma nga tsjoa katasatío kon je ʼndíxtile. Kataʼyala kʼaa kjoafaʼaitsjen xi tsjoá je Énle Niná xi kuinyakao xi jechixan nga nda skoéjin jmeni xi sʼin.

3. 1) ʼYáni xi kʼoakuitso tsa xti sʼe̱le xi jechixan kʼoa tsa mai. 2) Jmé kjoafaʼaitsjen xi faʼaitʼa Biblia kuenta sʼin je xi miyole mani kʼoa kao xínkjín xi jechixan.

³ Tjín ʼnde jñani kʼoasʼin ngale chjota nga tokjoan xtile sʼele kʼianga jebixan. Tsakui nichxin je xi xínkjín mani kʼoa tsa kjaʼaí chjota xi kʼoakuitsole nga xti katasʼele. Jngo ndsʼee xi Asia tsʼe, xi Jethro ʼmi *, itso: “Ya jinjtín tjínkʼa ndsʼee xi jetjínle xti xi kʼoatsole je xi tsínle nga katasʼele”. Kʼoa ijngo ndsʼee xi Asia tsʼe, xi Jeffrey ʼmi itso: “Tjínkʼa xi  kʼoatsole xi jechixan nga tsín ʼya xi sikuinda nga jekoa̱njchínga tsa tsín sʼe̱le xti”. Nga jngó jngó xi jechixan xi kuitsoni tsa sʼe̱le xti kʼoa tsa mai. Jé kjinele skoéjin jmeni xi sʼin (Gál. 6:5). Ningalani je xi miyole mani kao xínkjín kui xi mele nga tsjoa katasatío kon, tonga tjínnele sijinle yaole nga je xi jechixan xi kuitsoni tsa sʼe̱le xti kʼoa tsa mai (1 Tes. 4:11, TNM).

4, 5. 1) Jñánile xi jao koya tjínnele kjaoyani xi jechixan. 2) Kʼoasi kʼiáni tjínnele kjaoyani tsa sʼe̱le xti kʼoa tsa mai.

⁴ Je xi mele nga xti sʼe̱le, tjínnele kjaoyani kʼiáni sʼe̱le kʼoa jótjín xti sʼe̱le. Tonga kʼiáni tjínnele kui kjaoyani xi tʼatsʼe jebi. Kʼoa ánni nga nʼio tjínnile kjoandosin nga kui kjaoyani.

⁵ Je xʼin kao je chjoón xi jetjínndajinle nga kuixan tjínnele kʼia kjaoyani tsa sʼe̱le xti kʼoa tsa mai kʼianga kje bixanjin, nʼio tjínle kjoandosin nga ngóson sʼin sikjaʼaitsjen xi tʼatsʼe jebi. Kʼoa tjínnele kʼoati kuenta sʼin tsa bele kon nga kuitjosonle jokji xá tjenkao nga xti nijchá. Tjínkʼa xi kʼoasʼin bʼéndajin nga kʼia sʼele xti nga jefaʼato jngo nó kʼoa tsa jao nó nga jekabixan, nga kʼoasʼín sʼeele nichxin nga mangakaole xínkjín kʼoa nga nʼio sʼejna je kjoabixanle, nga̱ nganʼio machjénle kʼoa nichxin machjénle je xti (Efes. 5:33).

6. Nga ñʼai chon nichxin xi tiyoaa ndʼaibi, jméni xi sʼín kʼa xi jechixan.

⁶ Tjínkʼa chjotale Cristo xi kui fitjenngi choa̱le nga jan xtile Noé kao yánchjínle, nga tsín tokjoan xti kisʼele (Gén. 6:18; 9:18, 19; 10:1; 2 Ped. 2:5). Je Jesús kui kisingósonkao jokoanchon nichxinle Noé kao nichxin xi tiyoaa ndʼaibi, kʼoa alikui jao tjínná nga nʼio ñʼai kjimachon nichxin xi tiyoaa ndʼaibi (Mat. 24:37; 2 Tim. 3:1). Nga sa ñʼai sa ñʼai kjimachon, tjínkʼa xi jechixan xi kʼoasʼin bʼéndajin nga tsín tokjoan xti sʼe̱le, nga̱ kui xi mele nga ngisasa tse sixále je Niná.

7. Jósʼin kuinyakao xi jechixan je kjoafaʼaitsjen xi faʼaitʼa Lucas 14:28, 29 kao Proverbios 21:5.

⁷ Kʼianga kjaoyani tsa mele nga xti sʼe̱le kʼoa jótjín sʼe̱le, je chjoón kao je xʼin xi tjínle kjoafaʼaitsjen tjínnele nda skósonnile tsa kuitjosonle je xá xi tjenkao nga xti sʼe̱le (tʼexkiai Lucas 14:28, 29). * Je xijchá xi jetjínle xti kʼoatso nga tao̱n  sʼengi, nga nichxin kʼoa nga nganʼio machjénle nga nijchá je xti. Kuinga tjínnile kjoandosin nga kui jebi skónangile yaole xi jechixan: “A machjén nga si̱xáijin nga joaijin nga so̱koʼanajin je familianajin. A ngóson sʼin nikjaʼaitsjainjin tʼatsʼe jmeni xi machjénnajin. Tsa si̱xálanijin nga joaijin, ʼyáni xi sikuinda je xtinajin. ʼYá tsʼe kjoafaʼaitsjen koaitjenngi josʼin sikjaʼaitsjen kʼoa jmeni xi sʼin”. Je chjoón kao je xʼin xi kuenta sʼín jebi, kui fitjenngi je kjoafaʼaitsjen xi tsjoá Proverbios 21:5 * (tʼexkiai).

8. 1) Jméni xi kuenta sʼin je chjotale Cristo xi jechixan. 2) Jmé xi sʼín je xʼin xi tsjoake chjoónle.

⁸ Je nʼai kao je na̱ tjínnele nga sikʼayale nichxin je xtile. Tsa tiʼa tiʼa sʼe̱nile xti, ñʼaijin koa̱nle nga kʼoakji nichxin sikʼayale jokji machjénle je xti. Tjínkʼa je xijchá xi kʼoatso nga bijtajinle. Tsakui nichxin je xi na̱ nʼio kuijtale nga sikuinda je xtile kʼoa tsín tikuitsoni kon nga skótʼaya, nga kʼoetsʼoa kʼoa nga kjitʼa kuitsoyason. Tsakui nichxin kʼoati ñʼai koa̱nle nga koasenño jmeni xi kifaʼa kjoajtín. Je xʼin xi tsjoake chjoónle basenkao nga kʼoati síkuinda je xtile ya niʼyale kʼoa nga satío kjoajtín. Tobʼelañá, basenkao je chjoónle jme xá xi tjín ya yaniʼya, bʼénele yaole nga kotʼayajtín kao familiale nga xki̱ xomana kʼoa kjitʼaa bitjotsoyason kao familiale.

9, 10. Jméni xi nʼio tjínle kjoandosin nga sʼin je xijchá xi mele kuinyakao je ʼndíxtile.

⁹ Jméni xi machjén nga sʼin je xijchá xi mele nga kuitsoyale je ʼndíxtile nga tsjoake katama Jeobá. Jósʼin sikuinda nga tsínkui jtsaojin je kjoa xi tjín sonʼnde. Kataʼyala kʼaa choa̱.

¹⁰ Tʼetsʼoalao je Jeobá nga tijélao nganʼio. Kataʼyala jokisʼin je Manóah kao chjoónle, xi xijchále koanni je Sansón. Kʼianga kisʼejinle nga jngo ʼndí sʼe̱le, jé Jeobá kisijéle nganʼio nga kuitsoyale josʼin sijchá je ʼndí xi sʼe̱le.

11. Jméni xi koa̱n sʼin je xi xijchá ma nga koaitjenngi choa̱le Manóah, tojo tso Jueces 13:8.

¹¹ Je Nihad kao Alma, xi Bosnia-Herzegovina tsʼe, kui choa̱le Manóah kitjenngi nga kisijchá xtile, itso: “Tojo kisʼin je Manóah, kinijélaijin nganʼio je Jeobá nga ndasʼin si̱jcháijin ʼndíxtinajin. Kʼoa nkjín koya josʼin kitsjoanganʼionajin. Tobʼelañá, kao Biblia, xo̱n xi Énle  Niná yʼangini, kjoajtín kʼoa kao kjoajtíntse” (tʼexkiai Jueces 13:8). *

12. Jmé choa̱ xi tsakatíole je xtile María kao José.

¹² Nda choa̱ tatiolao je ʼndíxtino. Nʼio chjíle jmeni xi ʼmilao je ʼndíxtino. Tonga xi ngisa kuenta sʼín kui jmeni xi nʼiao. Alikui jao tjínná nga nʼio nda choa̱ tsakatíole je xtile María kao José, jolani je Jesús. Je José ali tokuijin xi kisʼin nga tsakajngiʼa familiale, kʼoati kitsoyale nga chjí tsabe nga tsakʼétsʼoale je Jeobá (Deut. 4:9, 10). Nga xki̱ nó kikao je familiale ya Jerusalén nga kisʼejna sʼuí Paxko, ningalani tsín kʼoatso je kjoatéxoma nga kjoanʼio tjínnele kʼoasʼin (Luc. 2:41, 42). Nga kui nichxin, tjínjinkʼa je xijchá xi kʼoasʼin kisikjaʼaitsjen nga nʼio kjin nga ya koaikao familiale, nga ñʼai koa̱nle kʼoa nga chjí sʼe̱ngile. Tonga je José tsabechjí jmeni xi tʼatsʼe Niná nroani kʼoa kitsoyale je ʼndíxtile nga kʼoati katasʼín. Kʼoa je María nʼio nda tsabe jotso je kjoatéxomale Niná. Jmeni xi kitso kʼoa jmeni xi kisʼin nʼiojin tsakinyakao je ʼndíxtile nga tsjoake koan je Énle Niná.

13. Jmé xi kisʼin jngo ndsʼee kao chjoónle nga kiskenngi je choa̱le María kao José.

¹³ Je Nihad kao Alma, xi kanikʼaxkiaa ya párrafo 11, kui choa̱le María kao José kitjenngi nga tsakasenkao je tile nga tsjoake katama Jeobá kʼoa nga katasíxále. Itso: “Kao kui jmeni xi kinʼiaijin tsakʼinyanilaijin je tinajin nga ndasʼin bichómani nga nitjosoán je kjoafaʼaitsjen xi tsjoá je Énle Niná”. Kʼoa je Nihad itsosa: “Tsa mená nga nda sixále Niná je ʼndíxtiná ñákjoanla títjon kʼoénelee yaoná nga nda si̱xálee Jeobá”.

14. Ánni tjínnenile skoe̱ je xi xijchá ma ʼyani xi símiyo je ʼndíxtile.

¹⁴ Tinyakao je ʼndíxtino nga nda miyo katasʼele. Je xi nʼai kao xi na̱ ma, tjínnele skoe̱ ʼyani xi símiyo je ʼndíxtile kʼoa jmeni xi sʼín. Kʼoa tjínnele skoe̱ ʼyani xi fákaonajmí je ʼndíxtile ya redes sociales kʼoa tsa kao teléfono. Nga̱ tochale kʼoatisʼin sikjaʼaitsjen kʼoa kʼoatisʼin josʼín je miyo xi sʼe̱le (1 Cor. 15:33).

15. Jmé choa̱ xi bʼéjnale je ndsʼee xi Jessie ʼmi je xi xijchá ma.

¹⁵ Jmé xi koa̱n sʼin je xi xijchá ma tsa tsín nanda be xi tʼatsʼe computadora, celular kʼoa tsa tableta. Jngo ndsʼee xi Filipinas tsʼe, xi Jessie ʼmi, itso: “Ningalani tsín nanda ʼyaijin tʼatsʼe jmeni xi sʼa kjimatsen ndʼaibi, alikui kui tsakʼéchjoanajin nga tsakʼinyalaijin je ʼndíxtinajin nga xkón tíjna tsa tsín nda si̱chjén je ki̱cha̱ xi tjín ndʼaibi, jolani je computadora, celular kʼoa tsa tableta”. Alikui tsakʼéchjoale je xtile nga kui kisichjén. Itso: “Kʼoakixinle je ʼndíxtina nga nʼio basenkaoná je computadora, celular kʼoa tsa tableta nga chotʼayá xi kjaʼaí én, nga chotʼayajiaan jme xi faʼa ya kjoajtín kʼoa nga bʼexkiaa je Biblia nga nyaon nyaon”. Jon xi xijchá mao, a jetsakʼexkiao kʼoa a jekichotʼayajion kao ʼndíxtino je kjoafaʼaitsjen xi faʼaitʼa ya jw.org^® jñani “Xti” tso, tʼatsʼe jotjínni nga mensaje kʼoa nga foto nikasén. A jekichotsenlao kao ʼndíxtino je video xi A tokui títso tínchja̱li je celularli kʼoa tsa tabletali ʼmi kao xi Chósonnilai josʼin tichjain je redes sociales ʼmi. * Je video jebi tsjoále kjoafaʼaitsjen ʼndíxtino nga ndasʼin sichjén je computadora, celular kʼoa tsa tableta (Prov. 13:20).

16. Jmé xi sʼín kʼa je xi xijchá ma, kʼoa jósʼin bichómani.

 ¹⁶ Nkjín mani je xijchá xi bʼénele yaole nga je ndsʼee xi nda choa̱ batío nga tjíosíxále Jeobá símiyo je ʼndíxtile. Kʼoakisʼin je ndsʼee xi Dani ʼmi kao chjoónle xi Bella ʼmi, xi Costa de Marfil tsʼe. Kʼoatsole je superintendente xi tsʼe circuito nga ya ndʼiale katabationi. Je Dani itso: “Nʼio tsakasenkao je tinajin. Precursor sʼin kisixá, kʼoa ndʼaibi jé fisíxatʼa je jtín kʼianga tsín kʼoamale je superintendente xi tsʼe circuito”. Jon xi xijchá mao, a koaan nga kʼoatisʼin kuinyakao je ʼndíxtino.

17, 18. Kʼiáni tjínnele kuitsoyale ʼndíxtile je xi xijchá ma.

¹⁷ Kʼia tʼinyalao nga sʼa ʼndí kjoan ʼndíxtino. Ngisaa nda nga kʼia ʼmiyale je ʼndíxti nga sʼa nʼio ʼndí kjoan (Prov. 22:6). Kʼoakisʼin je na̱le Timoteo xi Eunice tsakʼin kao majchále xi Loida tsakʼin. Kʼiaa saʼnda nga kitsin Timoteo tsakakóyale xi tʼatsʼe Jeobá (2 Tim. 1:5; 3:15). Kʼianga jeki nichxin, je Timoteo yaa tsakʼamjekao pastro Pablo nga kjin kikakóyason.

¹⁸ Kʼoa ijngo ndsʼee kao chjoónle xi Costa de Marfil tsʼe, xi John kao xi Paula ʼmi, tsakakóyale nga jaon ʼndíxtile nga tsjoake katama Jeobá kʼoa nga je katasíxále. Jméni xi tsakinyakao nga kitsoyale xtile. Kui kitjenngi je choa̱le Eunice kao Loida. Itso: “Kʼiaa nga sʼa kitsin je ʼndíxtinajin tsakʼinyalaijin je Énle Niná” (Deut. 6:6, 7).

19. Jmé xi tsoyanile nga sakóyale Énle Niná je ʼndíxti.

¹⁹ Jmé xi tsoyanile nga sakóyale Énle Niná je ʼndíxti. Kʼianga kʼoatso ya Deuteronomio 6:6, 7 nga tjínnele sa̱kóyale je ʼndíxti, kui nchja̱ni nga nkjín kʼa tikʼoa tikʼoa kʼuínnile tsa jmeni. Kuinga machjénsíni nga sikʼayale nichxin ʼndíxtile je xi xijchá ma. Tsakui nichxin koa̱nsino nga kjitʼa kjitʼa kʼuínyalao je ʼndíxtino. Tonga tsa kʼoasʼiaon, kuinyakaoño nga koa̱njinle je Énle Niná kʼoa nga sitjoson.

20. Tʼeyanajmí jósʼin basenkaoná Salmo 127:4 nga nijchá je ʼndíxti.

²⁰ Nda kataʼyaxkuin je ʼndíxtili. Je Salmo 127 kʼoatso nga je ʼndíxti yaa mangóson  joni flecha (tʼexkiai Salmo 127:4). * Joni je flecha nga tsín tongóson kjoan kʼoa nga kjaʼaí kjaʼaínile jme xi mandani, kʼoatisʼinni je ʼndíxti, alikui tongóson sʼín nga jngó jngó. Kuinga tjínnenile skoe̱ je xi xijchá ma josʼin sijchá nga jngó jngó je ʼndíxtile. Jngo ndsʼee kao chjoónle xi ya jñani Israel ʼmi tsʼe, bʼéyanajmí jme xi tsakinyakao nga je Jeobá síxále nga jao xtile, itso: “Tsen tsen tsakʼinyalaijin Biblia nga jngó jngó je ʼndíxtinajin”. Jé xi jko̱ sʼin tjío ya yaniʼya xi kuitsoni kʼiani nga machjén nga tsen tsen kuitsoyale je ʼndíxtile.

21. Jósʼin koasenkao Jeobá je xi xijchá ma.

²¹ Tsakui nichxin sakʼoa ñʼai koa̱nle je xi xijchá ma josʼin sijchá je ʼndíxtile. Tonga je xi kuenta sʼin kuinga tʼatsʼe Jeobá nroani kjoatjao jebi. Je Jeobá tíjnandaa nga koasenkao je xi xijchá ma. Je Jeobá nrʼoé nga bʼétsʼoale, kʼoa nga tsoyale kui síchjén je Biblia, xo̱n xi Énle Niná yʼangini, choa̱ xi batío kao kjoafaʼaitsjen xi tsjoále je xijchá xi jetjínle kjoafaʼaitsjen.

22. Jméni xi nʼio ndatjín tsjoále je ʼndíxtile xi xijchá ma.

²² Tjínkʼa je chjota xi kʼoatso nga 20 nó bichómani nga nijchá je ʼndíxti, tonga je xi xijchá ma ngantsjai nichxin nga makjáojinle je xtile. Je xi nʼio ndatjín tsjoále je ʼndíxtile xi xijchá ma kuinga tsjoake koa̱n, nga sikʼayale nichxin kʼoa nga kuitsoyale je Énle Niná. Kjaʼaí kjaʼaí sʼín je ʼndíxti nga jngó jngó. Tonga je ʼndíxti xi tsjoake Jeobá je xijchále, kʼoati satío kon jotso jngo tichjaa xi Asia tsʼe, xi Ana ʼmi, itso: “Kʼianga sikjaʼaitsjenjian josʼin kisijchána je xijchána, tsjoale kjoanda nga tsakatekjáyana kʼoa nga kitsoyana nga tsjoake̱ koan je Jeobá. Ali tsa tokuijin nga kitsjoana kjoabijnachon, kuinga je tsakinyakaona nga tsjoa tjín tokoan” (Prov. 23:24, 25). Millón mani je choʼndale Jeobá xi kʼoati tso.