Jmeni xi tso Deuteronomio 22:25-27 ali tsakuijin nʼio nchja̱ni tsa je tjínle jée chjota xokasʼín kʼoa tsa mai, nga̱ jeʼyale nga jée kabajngi. Je kjoatéxoma jebi kui nchja̱ni tʼatsʼe je tsoti xokamatʼain, tsa tjínle jée kʼoa tsa mai. Kataʼyala jmesani xi tso texto jebi.

Je versículo xi tjíotítjon, kui nchja̱ni tʼatsʼe jngo chjota xi jngo chjoón xi jetjínndajinle kjoa nga kuixan bajnakao ya naxinandá. Nga jetjínndajinle kjoa chjoón jebi, kʼoasʼin ʼyale joni tsa jekabixan. Kuinga kjoachajngi sʼeneni je chjota xi bajnakao. Kʼoa tsa kiskiʼndáxá je chjoón, nkjínjin chjota kinrʼoéle ya naxinandá kʼoa tsakʼasjentjaijin. Tonga tsa tsín kiskiʼndáxá, nga jao kui jée sʼene nga síchajngi (Deut. 22:23, 24).

Je kjoatéxomale Niná kʼoati nchja̱ni jmesani xi ma sakʼoa. Itso: “Tonga tsa chjota jebi ya jinjñá kisatejin je tsoti xi jetjínndajinle kjoa nga kuixan kʼoa tsa kjoanʼio tsakʼénele nga tsakajnakao, tojé chjota xokisʼin xi tjínnele kuiyá; alijojin nikoai je tsoti. Alikui je tjínle jée xi kjoabiya bakinle. Jebi ya mangóson je chjota xi xínkjín síkiʼaon kʼoa síkʼien. Nga̱ je chjota jebi yaa jinjñá kisatejin je tsoti xi jetjínndajinle kjoa nga kuixan kʼoa je tsoti jebi kiskiʼndáxá, tonga tsín ʼya xi kinrʼoéle xi koan tsakasenkao” (Deut. 22:25-27).

Kʼianga kʼoama, je juez jé chjoón bʼaʼénle. Nga̱ kʼoasʼin síkjaʼaitsjen nga kiskiʼndáxá tonga tsín ʼya xi kinrʼoéle xi tsakasenkao. Alikui je xi kisichajngi. Tonga je chjota xokisʼin, jao koya jée sʼene nga̱ tsabetaon kʼoa kisichajngi kao chjoón jebi.

Ninga je chjoón kisitoánntjai kjoatéxoma jebi, kʼoati kitso nga je chjota xi kjoanʼio kisʼinle nga tsakajnakao, kui jée sʼene nga tsabetaon kʼoa kisichajngi. Alikui jao sʼená nga nʼio nda tsakatiotsʼinya je juez tʼatsʼe kjoa jebi nga̱ yaa tsakʼangini je kjoatéxoma xi kitsjoale Niná (Éx. 20:14; Deut. 13:14; 17:4).