A koaanli kʼoasí jme xi kjonangi i̱bi xi ya yʼangini je Xo̱n xi Bájinkonná xi tsʼe nó 2020.

Jósʼin tjínnele jchatokoán je xi ya ngʼajmi tjínle kjoachoya.

Chjenngilee josʼin makjainle, tonga alikui chʼasjengʼaa kʼoa tsín síxkón nikoaa. Alikuikʼia nga chjota mangíntjenngilee (Jud. 16). Alikui koa̱n kui chjónangilee tʼatsʼe kjoachoya xi tjínle (w20.01, página 29).

Jméni xi bʼéjngo tokoán nga kuenta sʼínná nga jngó jngoá je Jeobá.

Je Biblia kʼoatso nga kuenta kisʼinná saʼnda nga kje tsinjián. Nrʼoé kʼianga bʼetsʼoalee. Be jotjín ni̱ma̱ná kʼoa josʼin nikjaʼaitsjeen. Kʼoa kuenta sʼín jmeni xi nʼia (1 Crón. 28:9; Prov. 27:11). Jé Jeobá xi kʼoasʼin koanmele nga kinichriantʼalee (w20.02, página 12).

Kʼiáni machjén nga kuinókjoaa kʼoa kʼiáni nga jyó kuiyoaa.

Kao kjoatsjoa nokjoañá xi tʼatsʼe Jeobá. Nokjoakaoñá tsa ʼyani xi kui kʼoatísʼín jmeni xi sikiʼaon kʼoa xi tse kjoa sikʼéjnajin. Kʼianga ʼya xi kjoafaʼaitsjen machjénle, je xi chjotajchínga sʼin tjío ngasin nganda fákaonajmí. Tonga alikui koa̱n kui kʼoéyanajmiá jótjíosʼín je ndsʼee nga tsoyason ya ʼnde jñani tíchjoale xále Niná. Kʼoa tsín koa̱n kui kʼoéyanajmiá jmeni xi tsín koa̱n nga kjaʼaí xi sʼe̱jinle (w20.03, página 20, 21).

Jméni xi tsín mangóson je chjo̱ba̱ xi nchja̱ni Joel capítulo 2 kao xi nchja̱ni Apocalipsis capítulo 9.

Ya Joel 2:20-29 kʼoatso nga kjin fikao Jeobá je chjo̱ba̱ jebi kʼoa nga tsjoángajaoni jmeni xi kisikjeson. Xijema, je Niná kʼiaa tsjoá nganʼiotsjele. Jé tsoyanile chjotakjoajchán babilonio xi kichosíkje Jerusalén. Kʼoa je chjo̱ba̱ xi nchja̱ni ya Apocalipsis 9:1-11 jé tsoyanile choʼndale Niná xi ya ngʼajmi koai, nga̱ kao kjoanʼiojin tsoyason nga sikjeson Niná jmeni xi chon sonʼnde, kʼoa alikui sasénle jebi je chjota xi tsín Niná síxále (w20.04, página 3-6).

ʼYáni je rey xi norte tsʼe ndʼaibi.

Jé Rusia kao xi ya tsjoánganʼiole. Tíbʼetʼale je naxinandále Niná nga tíbatéchjoa nga tíʼmiyason, tíbakó nga jtike je ndsʼee. Je rey xi norte tsʼe tíbʼetʼale je rey xi sur tsʼe (w20.05, página 12, 13).

A tokui xi faʼaitʼa ya Gálatas 5:22, 23 je “kjoanda xi tsjoájin ni̱ma̱ná je Espíritu Santo”.

Mai. Je nganʼiotsjele Niná kʼoati basenkaoná nga bakoá kjoanda xi kjaʼaísanile, jolani je kjoatéxomakixi (Efes. 5:8, 9) (w20.06, página 17).

Jósʼin kuichomani tsa tsín chósonnilee jmeni xi ni̱kiaan ya redes sociales.

Tochale kui koako nga toñá mená nʼio kʼoaxkiaa kʼoa nga tsín nangitokon maa (w20.07, página 6, 7).

Jméni xi bakóyaná xi chjotale Cristo maa josʼín je xi nda male bʼasjengindá jti̱.

Kʼiaa básjai jochon bitjo je jti̱ kʼoa jñani bele kon nga so̱kole. Male síchjén je xi bʼasjengindáni jti̱. Kʼoa alikui fini ninga jtsí bʼa. Koaan kʼoati sʼiaan tsanda ñá nga kʼuínyasoán (w20.09, página 5).

Jósʼin kuisenkoaa xi tiʼmiyalee nga ngisa tsjoake koa̱n Niná.

Koaan kʼoakʼuínlee nga nyaon nyaon katabʼéxkia Biblia, kuisenkoaa nga katasíkjaʼaitsjenjin jmeni xi kʼoexkia kʼoa koakoyalee josʼin kʼoetsʼoa (w20.11, página 4).

ʼYáni xi kʼoati kinchja̱ni je Pablo nga “tʼatsʼe Cristo ngatsʼi si̱kʼéyokonni” kitso (1 Cor. 15:22).

Ali tsakuijin xi kitsonile Pablo nga ngatsʼi chjota kjoaʼáyanile. Nga “ngatsʼi” kitso, kʼoati je kinchja̱ni chjotale Cristo xi ya ngʼajmi koai, xi i̱ ʼmile: “Xi koantsjao nga tiyokao Cristo Jesús” (1 Cor. 1:2; 15:18) (w20.12, página 5, 6).

Jméni xi sʼin je chjotale Cristo “xi tojngo nikʼajtsoaa xkoaan” kjoaʼáyanile ya ngʼajmi kʼianga kjoane “je xjao xi fetʼani” (1 Cor. 15:51-53).

Yaa kuinyakao je Jesús kʼianga koatexomale je naxinandá kao yánise ki̱cha̱ (Apoc. 2:26, 27) (w20.12, página 12, 13).