Nga ya kisixákao Jesús je Nʼaile ya ngʼajmi nʼio tse xi koanle josʼin nixákoaa xíngiaa. Kʼianga jaʼai i̱ Sonʼnde, nʼio nda choa̱ tsakʼéjnale je xi ñatjen kisixá. Jósʼin basenkaoná je choa̱ xi tsakʼéjna Jesús. Kʼianga kui chótʼayajiaan, jan koya tjínni xi jchaa xi koasenkaoná nga nda si̱xákoaa xíngiaa, nga jtín sʼin kuiyoaa kʼoa nga kʼoainganʼiongañálee xíngiaa.

Je xi nda síxá kao xi ngikʼa nangitokonní, bechjí kao xi ñatjen síxá kʼoa alikui je bʼasjengʼa yaole. Je Jesús tsabe nga nangitokon je Nʼaile. Ningalani toje Jeobá xi bakinle nga kʼoakʼuínle nga je kisinda ngayeje xi tjín, kʼoati tsabechjí je xá xi kisʼin je ʼNdíle nga kisixákao. Yaa bakó jebi nga i̱ tso je Énle Niná: “Si̱ndaa je chjota kʼoa sénná si̱kʼaa” (Gén. 1:26). Kʼianga kʼoakitso je Jeobá kʼoasʼin tsabeni Jesús nga nʼio nangitokon je Nʼaile (Sal. 18:35).

Kʼianga jaʼai i̱ Sonʼnde je Jesús kʼoati nangitokon koan. Kʼianga tsakʼasjengʼa chjota xi totʼatsʼe jmeni xi kisʼin, jé Jeobá kitsjoale kjoajeya (Mar. 10:17, 18; Juan 7:15, 16). Nda kikao je chjotatjenngile, miyo kitsole kʼoa alijo choʼndajin sʼin tsabekon (Juan 15:15). Kʼoa saʼnda tsakanéjon ndso̱ko̱ nga tsakakóyale nga tjínnele nangitokon koa̱n (Juan 13:5, 12-14). Tojo kisʼin je Jesús, kʼoati koa̱n sʼiaan tsanda ñá nga chjí jchatokoán je xi ñatjen nixá kʼoa nga tsín to yaoná kjuinñá. Ndasʼin kuichomani tsa jchaxkoán xíngiaa kʼoa tsa tsínkui kjuinñá ʼyáni xi ngisa ngʼa kuitjo (Rom. 12:10).

 Je chjota xi nangitokon ma, majinle nga “ndasʼin bichótsjoá nga nkjín ma xi tsjoá kjoafaʼaitsjen” (Prov. 15:22). Ninga nkjín koya jmeni xi maná nʼia, kʼoa ninga nʼio tjínná kjoafaʼaitsjen alikui toñá ʼyayeje. Saʼnda Jesús kʼoakitso nga tjín jmeni xi tsín be (Mat. 24:36). Kʼoa kuenta kisʼin josʼin síkjaʼaitsjen je chjotatjenngile (Mat. 16:13-16). Kuinga nʼio tsjoa kisationi kon je xi ñatjen kisixá. Tikʼoasʼinni, nga nangitokon maa kʼoa nga kuenta nʼia jokji bichó nganʼioná kʼoa nga noʼyalee je kjoafaʼaitsjen xi tsjoá xi ngikʼa, ndasʼin biyoaa kao xi ñatjen nixá kʼoa “ndasʼin bichótsjoá” jmeni xi nʼia.

Nʼio machjén nga skénngi choa̱le Jesús je xi chjotajchínga sʼin tjío nga nangitokon koa̱n kʼianga ñatjen síxá. Kuenta sʼin nga je nganʼiotsjele Niná koaanle sichjén toʼyani xi chjotajchínga sʼin tíjna nga tsjoá kjoafaʼaitsjen xi kuinyakao ngatsʼi xi chjotajchínga sʼin tjío nga nda skoéjin jmeni xi sʼin. Kʼianga satíole kjoajtín machjén nga ngasin nganda kjaonajmí ánni nga kʼoati kuitsoni xi ngikʼa josʼin síkjaʼaitsjen, tsa kʼoasʼin ngisaa kuinyakao je ndsʼee ya jinjtín.

Jngo chjota xi ndʼé nda síxákao xi ngikʼa kʼoa alikui toje bitjosonyejele. Je Jesús nkjín kʼa tsabe nga nʼio nda kosonnile jmeni xi sʼín je Nʼaile. Tobʼelañá, je Jeobá kui xá kisikasénni je ʼNdíle i̱ Sonʼnde nga kʼoasjentjai je chjota (Juan 3:16).

Je Jesús sakʼoa kisikʼantjaiya josʼin kisikjaʼaitsjen kʼianga tjen ndiaale. Si̱kjaʼaitsjenla josʼin tsakasenkao Jesús jngo chjoón kananita ninga toya naxinandá Israel kinikasén (Mat. 15:22-28). Kʼoati kiskosonnile jokji tjen kʼoakoanle je chjotatjenngile. Kʼianga kʼoakitso Pedro nga tsín bexkon, je Jesús kisichatʼale kʼoa xijekoanni tsesa xá tsakánele xi nʼio chjíle (Luc. 22:32; Juan 21:17; Hech. 2:14; 8:14-17; 10:44, 45). Je choa̱le Jesús kui bakóná nga sakʼoa machjén nga si̱kʼantjaiyaa josʼin nikjaʼaitsjeen ánni nga skoe̱ni xi ngikʼa nga nda chosonnilee jmeni xi nʼia (Filip. 4:5).

Tsa nda chosonnilee jmeni xi nʼia kʼoa tsa ndʼé, kʼoati koa̱nná nda si̱xákoaa toʼya chjotani. Je Jesús nʼio nda kikao toʼya chjotani kʼoa saʼnda je chjotakontrale koanchi̱ni̱ke kʼoa kʼoakitso nga tsín nda kisʼin nga je  kisimiyo chjota xi tsojmi síkʼéchjíson kao chjotajée xi kinrʼoé nga kitsoya Jesús (Mat. 11:19). A koaan chjénngilee jokisʼin je Jesús kʼoa nga kao kjoatsjoa si̱xá kao xi kjaʼaí ninga tsín mangósoán. Jngo ndsʼee xi Louis ʼmi, xi superintendente xi tsʼe circuito koan kʼoa xi ya Betel kisixá kʼoatso nga nʼio nkjín ndsʼee kisixákao xi xinxin tsʼe kʼoa xi kjaʼaí kjaʼaí sʼín. Itso: “Ningalani chjotajée maa ngatsʼiaa kʼoa kjaʼaí kjaʼaí nʼia koaan nga ndasʼin si̱xákoaa xíngiaa. Nga nixákoaa xíngiaa yaa mangóson jngo xjáo xi kjaʼaí kjaʼaí kjoan la̱jao̱ kisʼendani. Ningalani kjaʼaí kjaʼaí kjoan la̱jao̱ sʼendani jngo xjáo tonga tsa koa̱nná josʼin sikatíonda je la̱jao̱ nʼio sʼe̱jna je xjáo. Tosi tonda tisindaya yaona ánni nga nda kjuíkaoña xi ngikʼa kʼoa nda kuitjoni je xá”. Je ndsʼee jebi nʼio ndasʼin síkjaʼaitsjen.

Jósʼiaan nga nda si̱xákoaa je ndsʼee ya jinjtín. Tobʼelañá, ya grupo xi tiyojiaan nga ʼmiyasoán kjaʼaí kjaʼaí tjín nóle je ndsʼee kʼoa tsakui nichxin ngisa tse xá kjinele ya yaniʼyale tikʼoajinni ñá. Kʼianga ñatjen kʼuínyasoán, a koaan kʼoasʼin kʼuínyasoán josʼin nga ngisa skénndiaale je ndsʼee, ánni nga ngisa tsjoa sa̱tíoni kon nga kuitsoyason.

Tsa mená nda si̱xá kao xi ngikʼa machjén nga kuinyakoaa jñani nʼai male (1 Tim. 6:18). Nga ya kisixákao je Nʼaile, je Jesús tsabejin nga tsín jme xi tsakʼéʼmale je Jeobá. Kʼianga kisinda Jeobá je ngʼajmi, je Jesús yaa tíjna nga kʼia kʼoa nʼio tse jmeni xi koanle (Prov. 8:27). Xijekoanni, je Jesús kao kjoatsjoa tsakʼéyanajmíle je chjotatjenngile jmeni xi kitsole je Nʼaile (Juan 15:15). Nga kui choa̱le Jeobá kjuintjenngiaa, machjén nga kao kjoatsjoa kʼoéyanajmílee je ndsʼee jmeni xi ʼyaa kʼoa kao kjoafaʼaitsjen xi jetjínná. Jngo chjota xi nda sixákao xi ngikʼa alikui toje bʼéjinkon jmeni xi koa̱n kuitsoyale xi ngikʼa kʼoa alikui toje kʼoasʼínyeje. Tosa kui xi sʼín nga kao kjoatsjoa bʼéyanajmíle xi ngikʼa jmeni xi jebe kʼoa xi male kʼoasʼín.

Xi ijngosani, kʼoati koa̱n kui én xi tsjoánganʼiole je ndsʼee kʼoakʼuínlee. A tsí kjoaixi nga nda sʼe tokoán nga ʼya xi bechjí jmeni xi nʼia kʼoa nga ñaki kʼoatjín kon jmeni xi tsoná. Je Jesús kisikʼaya nichxin kʼoa kʼoakitsole je chjotatjenngile jmeni xi ndatjín kisʼin (tingósonkoai Mateo 25:19-23; Luc. 10:17-20). Kʼoakitsole nga ngisasa tse xá xi sʼin je chjotale tikʼoajinni je (Juan 14:12). Kʼoa je nitje̱n nga tojeme ni̱kʼien, je Jesús kʼoakitsole je pastrole nga nʼio nda kisʼin nga kixi kitʼale. I kitsole: “Jon nío xi tsakiyokaontsjaináo, kʼia nga chʼao kichotʼana” (Luc. 22:28). Jmeni xi kitso Jesús nʼiojin kitsjoanganʼiole je chjotatjenngile kʼoa kui xi tsakinyakao nga tosi tonda nda kisixále Niná. Tsa kʼoati sʼiaan tsanda ñá, tsa si̱kʼayalee nichxin je ndsʼee, tsa kʼoakʼuínlee jñani nda tjíosʼín ngisajin tsjoa sa̱tío kon kʼoa ngisajin nda si̱xále Niná.

Jngo ndsʼee xi Kayode ʼmi, itso: “Alikuikjoan machjén nga chjotatsje koaan kʼianga nda si̱xákoaa xíngiaa. Tonga koaan kuinyakoaa xi ngikʼa nga tsjoa katasatío kon kʼoa nga ngisa choa ñʼai katamale nga katasíxá”. A kʼoatinʼiai ji. Koaan chjónangilai je ndsʼee xi ngikʼa tsa kʼoasʼin bekonli nga nda nixákoai. A tsjoa sʼele nga ñatjen nixáo, tojosʼin tsjoa kisatio kon je chjotatjenngile Jesús nga ñatjen kisixá. Tsa kʼoalani, kʼoati koa̱n i̱sí tojo kitso je pastro Pablo: “Jin xi binyakaolaijin xi tʼatsʼe kjoatsjoano” (2 Cor. 1:24).