Je Jeobá kʼoakitsole je chjota israelita nga tjínnele tsje koa̱n. Kʼianga tsje sʼin koatio, kui kjoatéxoma jebi kitsjoale Jeobá: “Ali énndisojin nikʼabísuin ya jinnaxinandáli. Ali kontrajin bijnalai je kjoabijnachonle xíngi. Anña Jeobá” (Lev. 19:2, 16).

Je én xi “ali kontrajin bijnalai” sʼin faʼatoya kʼoasʼin tínchja̱ni nga én hebreo. Tonga jmé xi tsoyanile. Jngo libro judío xi tʼatsʼe Levítico nchja̱ni itso: “Ñʼai tíjna kʼianga kʼoakuixoán jókjoansʼin tsoyanile versículo jebi nga̱ ñʼai maná nga ñaki kʼoakjoansʼin nikʼatoyaa josʼin tínchja̱ni nga én hebreo. Kʼiatsa xki̱ én si̱kʼatoyaa itso: Tsín ya chrian tisenjnaa kʼoa tsa maije̱ tsín ya tisenjnatʼalee”.

Tjínkʼa chjota xi tʼatsʼe Biblia kotʼayason xi kʼoatso nga kʼoati kui tínchja̱ni jme xi tso versículo xi tíjna nga tongini, nga tso: “Tjínnele kixi koa̱on nga kʼoéndajion je kjoa. Alikui koa̱n je kʼuíntʼalai xi ma̱, kʼoa alikui koa̱n je kʼuíntʼalai xi nyiná. Kao kjoatéxomakixi kʼoéndajinlai kjoa je xíngi” (Lev. 19:15). Tsa kʼoalani, je kjoatéxoma xi faʼaitʼa ya versículo 16 nga kʼoatso nga tsín kontra koatiole xínkjín je chjota israelita, kuijin tínchja̱ni nga tsín koa̱n kʼoanachale xínkjín nga sʼe̱ndajinle kjoa, tsín koa̱n kʼoanacha nga negosio sʼin kʼoa tsín koa̱n kʼoanachale je familiale. Kʼoa tsín koa̱n kʼoanacha nga toje nda koatio. Alikui koa̱n nga kui kʼoasʼiaan jebi. Tonga tsesa xi bakóyaná jmeni xi tso ya versículo 16.

Kataʼyala jmeni xi tso nga sʼa fitsʼiani versículo jebi. Je Niná kʼoakitsole je chjota israelita nga tsín énndiso katakaníbason. Tonga ali tsakuijin xi kitsonile nga tonikʼaxkiaa xíngiaa, ningalani kʼoati kjoa bichóma sakʼoani nga kʼoanʼia (Prov. 10:19; Ecl. 10:12-14; 1 Tim. 5:11-15; Sant. 3:6). Kʼianga énndiso kaníbason tsa ʼyani, kui xi mele nga chʼaosʼin sikʼéjna je xi síkʼaxki̱. Je xi kʼoasʼín tsakui nichxin énndiso koane jngo chjota ninga xkón kʼoéjna chjota xi énndiso sʼe̱ne. Kui jebi xi koan kao Nabot, tjínkʼa chjota xi énndiso tsakáne. La̱jao̱ kinikʼienni ningalani tsín kʼoatjín jme xi tsakʼinle (1 Rey. 21:8-13). Tojo tso Levítico 19:16, je xi énndiso báne xi kjaʼaí alikui nda sʼín nga̱ xkón síkʼéjna xi énndiso sʼene.

Xi ijngosani, tsakuije̱ nga jtike nga énndiso koaneni. Ya 1 Juan 3:15 itso: “Toʼyanibe xi chʼaoke ndsʼe̱, je joni tsa xi kʼen síkʼen. ʼYanío nga je xi kʼen síkʼen, [alikui sʼe̱le kjoabijnachon xi tsínkʼia fetʼa]”. Kʼianga kitsjoa kjoatéxoma xi faʼaitʼa ya Levítico 19:16, je Niná i kitso: “Ali majtichajin ndsʼai ya jinni̱ma̱li” (Lev. 19:17).

Je kjoatéxoma xi faʼaitʼa ya Levítico 19:16 nʼio chjíle jmeni xi bájinkonná ñá xi chjotale Cristo maa. Alikui koa̱n nga chʼaotjín xi si̱kjaʼaitsjeen kʼoa tsínkʼia nga énndiso kjoáne xíngiaa. Tsa ʼyani xi kontra tibijnalee, xi tsonile, tsa tokui nga tsín nda mangínkoaa nga énndiso kjoáneñá jngo chjota kʼoa tsakuije̱ nga maxinkonchaa, kʼoasʼin tibakoñá nga jtichaa kʼoa ʼyañá nga tsín koa̱n kʼoakoa̱nkjoan je xi chjotale Cristo ma (Mat. 12:36, 37).