1. Jmé xi machjén nga sʼin je ndsʼee xi sʼa xti nga nda kuichomani jmeni xi sʼin.

 JE PASTRO Pablo i kitsole je chjotale Cristo xi Éfeso tsʼe: “Saʼnda [ . . . ] nga kjoe̱ koa̱nnganá joni tsa jngo chjotajchínga, jo saʼnda kjuichoaa choa̱ nga kʼoa koa̱n kjoaan jo kjoan Cristo” (Efes. 4:13). Nʼio tjínle kjoandosin nga koaitjenngi kjoafaʼaitsjen jebi je ndsʼee xi sʼa xti. Nga nda kuichomani jmeni xi sʼin, machjén nga sitjoson kʼoa koaitjenngi je kjoafaʼaitsjen xi tsjoá Biblia (Luc. 2:52). Ánni tjínnile kjoandosin nga skénngi choa̱le Jesús je ndsʼee xi sʼa xti.

2, 3. Ánni machjénni nga skénngi choa̱le Jesús je ndsʼee xi sʼa xti.

² Je ndsʼee tsee xá kjinele ya yaniʼyale kao ya jinjtín. Kʼiatsa sʼa xti, tsakui nichxin kui nikjaʼaitsjain jme xá xi sʼiain nichxin xi fini. Jolani tsa precursor sʼin si̱xái, tsa siervo ministerial koai̱n kʼoa tsa chjotajchínga sʼin kuijnai nga koa̱nskanni. Kʼoa tsakui tinikjaʼaitsjainje̱ nga kuixain kʼoa nga ʼndíxti sʼe̱li (Efes. 6:4; 1 Tim. 3:1). Kʼianga kuichotjenngi jebi kʼoa nda si̱tjosuin je xá xi sʼe̱neli machjén nga chjénngi choa̱le Jesús. b

³ Jmé xi sʼiain nga chjénngi choa̱le Jesús. Jmé xá xi koa̱n sʼiain. Jmé xi tongini sʼiain nga nda kuitjosonli je xá xi sʼiain nga koa̱nskanni. Kataʼyala.

4. ʼYá tsʼe choa̱ xi koa̱n kʼuíntjenngi (kʼoati chótsenlai sén xi faʼaitʼa).

⁴ Je chjénngilai xi nda sʼín. Chjénngilai je choʼndale Niná xi tsakatio nichxin kjoatse xi tsjoake koan Jeobá kʼoa xi kitsjoanganʼiole naxinandále. Koaan kʼuíntjenngi choa̱le xíngi kʼoa tsa je choa̱le ndsʼee xi tjío ya jinjtín (Heb. 13:7). Kʼoati koa̱n kʼuíntjenngi je choa̱le Jesús (1 Ped. 2:21). Kʼianga chótʼayajin choa̱ jebi kuenta tʼiain jñánile xi tsjoachai jokoankjoan nga jngó jngó (Heb. 12:​1, 2). Tikjaʼaitsjenjin jméni xi koa̱n sʼiain nga kʼuíntjenngi choa̱ jebi.

5. Jmé xi tjínnele sʼiain nga nda si̱kjaʼaitsjain, kʼoa ánni nga nʼio chjínile (Salmo 119:9).

⁵ Chjine katamai kʼoa nda tikjaʼaitsjain (Prov. 3:21). Je chjota xi male síkjaʼaitsjen títjonkjoanla kosonnile jmeni xi sʼín. Tsa nda si̱kjaʼaitsjain alikui kui kʼoasʼiain josʼín je xti xi to yaole fini kʼoa xi totsʼe kjoafaʼaitsjen síchjén (Prov. 7:7; 29:11). Yaa kjoafaʼaitsjenná faʼasʼenjin jmeni xi chotsenlee ya televisión, película xi chotsenlee, Internet kʼoa jmeni xi tjín ya redes sociales. Jméni xi sʼiain nga koa̱nli nda si̱kjaʼaitsjain. Machjén nga chótʼayajin je kjoafaʼaitsjen xi tsjoá Biblia kʼoa kuenta tʼiain nga kjoanda tsini jmeni xi tsoli Jeobá. Xijekoa̱n, tikjaʼaitsjenjin jósʼin koa̱n si̱chjain kjoafaʼaitsjen jebi nga chjoéjin jmeni xi sʼiain (tʼexkiai Salmo 119:9). c Kʼiatsa nda si̱kjaʼaitsjain kʼoasʼin tichjenngini je choa̱le Jesús (Prov. 2:​11, 12; Heb. 5:14). Kataʼyala jósʼin koasenkaoli nga nda si̱kjaʼaitsjain. Xi títjon, josʼin jchatokuin je tichjaa. Kʼoa xi majaoni, nga koa̱nli chjoéjin jokjoan najño xi chʼa̱kjái kʼoa josuí.

6. Jósʼin bakó jngo ndsʼee xi sʼa xti nga bexkón je tichjaa.

⁶ Nga koa̱nli si̱kjaʼaitsjain koasenkaoli nga jchaxkuín je tichjaa. Tobʼelañá, tsa jngo ndsʼee xi jngo tichjaa kjimatsjoake  kʼoa mele je kʼoámjekao, alikui chʼaotjín nga kʼoasʼin síkjaʼaitsjen. Kʼianga jngo ndsʼee kjile je tichjaa kʼoa nʼio fákaonajmí, je tichjaa sakʼoa kʼoasʼin síkjaʼaitsjen nga je ndsʼee jebi kjimatsjoake. Je ndsʼee xi nda síkjaʼaitsjen alikui kʼoasʼín tsa tsínni kʼoatjín kon nga je kuixankao tichjaa (1 Tim. 5:​1, 2). Kʼoa tsa jejngo tichjaa tsoʼbakao alikui koa̱n nga toje nga jao koatio, tjínnele nga tjínsa xi koatiokao (1 Cor. 6:18).

7. Jókjoan najño xi bʼakjá kʼoa jófa jngo ndsʼee xi sʼa xti xi nda síkjaʼaitsjen.

⁷ Ijngo koya xi kʼoati bakó je ndsʼee nga kʼoasʼin síkjaʼaitsjen josʼin síkjaʼaitsjen Jeobá kʼiaa nga síkuinda jokjoan najño xi bʼakjá kʼoa jobatío je ntsja̱jko̱. Me tongatsʼi chjota xi najño sínda xi tsín je Jeobá bexkón kʼoa kui kʼoasʼín xi kjoajndí tjenkao. Kuinga kui najño síndani xi sʼeyoyanʼio je chjotaxʼin kʼoa jo yánchjín sʼin matsen. Jngo ndsʼee xi sʼa xti xi kui choa̱le Jesús fitjenngi kuenta sʼín je kjoafaʼaitsjen xi tsjoá je Biblia kʼoa jofayo je ndsʼee xi nda choa̱ batío. Koaan i̱ tso xi si̱kjaʼaitsjenjin: “A kosonnile jokjoan najño xi bʼakja kʼoa a kuenta sʼian josʼin síkjaʼaitsjen xi ngikʼa. A bakó jokjoan najño xi bʼakja nga Niná tisixále” (1 Cor. 10:​31-33; Tito 2:6). Kʼianga nda síkjaʼaitsjen je xi sʼa xti, tsjoa sʼe kon Jeobá kao je ndsʼee.

8. Jméni xi koa̱n sʼin je ndsʼee xi sʼa xti nga nda sitjoson je xá xi sʼe̱nele.

⁸ Nda titjosuin xá xi sʼe̱neli. Kʼianga nda nitjosoán je xá xi sʼenená ndasʼin síkʼaxki̱ná xi ngikʼa (Luc. 16:10). Tikjaʼaitsjenjin je choa̱le Jesús, nda kisitjoson jme xá xi kisʼenele, kʼoakisʼin ngayeje jmeni xi kitsole Jeobá ninga sakʼoa ñʼai koanle. Tsjoake koan je chjota kao chjotatjenngile, kʼoa kitsjoantjai je kjoabijnachonle (Juan 13:1). Tojo kisʼin Jesús, titjosuin je xá xi sʼe̱neli. Tsa tsín ʼyai josʼiain, nangitokon katamai kʼoa tijélai nganʼio je ndsʼee xi jetjínle kjoafaʼaitsjen nga katabasenkaoli. Ali tokuijin majngoni tokuin jmeni xi sʼenele, koaan kjoásjaisalai jmeni xi sʼiain (Rom. 12:11). Titjosuin ngayeje xá xi sʼe̱neli, nga̱ tʼatsʼe Jeobá nga si̱xái “ali tʼatsʼe chjotajin” (Col. 3:23). Nga chjotajée maa sakʼoa tsínkjoan kʼoasʼin kuitjosonná jmeni xi sʼe̱nená, kuinga machjénni nga nangitokon koaan kʼoa kʼoakuixoán jñani tsín nda kanʼia (Prov. 11:2).

9. Ánni ndatjínni nga koa̱nle xá je ndsʼee xi sʼa xti.

⁹ Ijngosa koya xi machjén nga sʼiain kui nga koa̱nli xá. Nga̱ kui xi koasenkaoli nga kuitjosonli je xá xi sʼe̱neli ya jinjtín kʼoa koasenkaoli nga kuijnyíʼai yaoli kʼoa tsa je familiali. Kʼoati koasenkaoli nga nda kʼuínkoai xi ngikʼa. Kataʼyala jmé xi koa̱n sʼiain.

10, 11. Jósʼin kuinyakao je ndsʼee xi sʼa xti tsa male bʼéxkia kʼoa tsa male kji, kʼoa jósʼin kuinyakao je jtín (Salmo 1:​1-3; kʼoati chótsenlai sén xi faʼaitʼa).

 ¹⁰ Katamali josʼin sʼexkia kʼoa josʼin chji. Ya Biblia kʼoatso nga nyaon nyaon bʼéxkia Énle Niná kʼoa síkjaʼaitsjenjin jmeni xi tso je chjota xi tsjoa tjínle kʼoa xi nda bitjosonle je xá xi sʼenele (tʼexkiai Salmo 1:​1-3). d Kʼianga kʼoasʼín majinle josʼin síkjaʼaitsjen Jeobá, kʼoa kui xi basenkao nga nda síkjaʼaitsjen (Prov. 1:​3, 4). Nda tsjoánganʼio ya jinjtín je ndsʼee xi kʼoasʼín.

¹¹ Je ndsʼee kao tichjaa machjénle ʼyani xi kuitsoyale jmeni xi tso je Biblia kʼoa xi nda kjoafaʼaitsjen tsjoále (Tito 1:9). Tsa mali bʼexkiai kʼoa tsa mali chji koaanli koationdai kjoanokjoaya, koaanli koationdai comentario xi tsjoánganʼiole je ndsʼee. Kʼianga chótʼayai kʼoa nga kuinóʼyalai je kjoanokjoaya xi faʼa nga satíoná kjoajtín kao kjoajtíntse, koaan kʼoétʼaxuin xi koasenkaoli nga nʼio sʼe̱jna kjoamakjainli kʼoa xi kuinyakao xi kjaʼaí.

12. Jmé xi koasenkaoli nga ngasin nganda chja̱kaonajmí chjota kʼoa nga nda kuinóʼyalai.

¹² Ngasin nganda chja̱kaonajmí chjota kʼoa nda tinóʼyalai. Nʼio machjén nga koa̱nle nda kuinyaño je ndsʼee kʼianga ʼya xi fákaonajmí kʼoa nga sijinle yaole jótjín kon je chjota (Prov. 20:5). Nga jchai josʼin síkjaʼaitsjen chjota, kuenta tʼiain jotítso nga tínchja̱, josʼín kʼoa joba nkjaín. Tsa to correo kʼoa tsa to mensaje nikasáin ngisajin ñʼai koa̱nli nga jchai josʼín nga nchja̱ je chjota. Tongisa nda nga ñaki tiʼyaa je chjota nga tichjakaonajmiá (2 Juan 12).

13. Jmésani xi machjén nga sʼin je ndsʼee xi sʼa xti (1 Timoteo 5:8; kʼoati chótsenlai sén xi faʼaitʼa).

¹³ Katamali josʼin kuijnyíʼai yaoli. Jngo xi jetjínle kjoafaʼaitsjen básjaile jme xá xi sʼín nga bajngiʼa yaole kʼoa nga bajngiʼa familiale (tʼexkiai 1 Timoteo 5:8). e Tjín ʼnde jñani kʼoati kui xá sʼín je xti je xá xi male xijchále, kʼoa tjín ʼnde jñani toxá kotʼayani jme xá xi sʼín. Ndatjín nga koa̱nli si̱xái nga̱ kui xi koasenkaoli nga kuijnyíʼai yaoli (Hech. 18:​2, 3; 20:34; Efes. 4:28). Tʼenelai yaoli nga nda tixái. Tsa  kʼoasʼiain, so̱koxáli kʼoa nda kʼoaxki̱. Tsa kʼoasʼiain jmeni xi kachotʼayajiaan koasenkaoli nga kuitjosonli je xá xi sʼe̱neli nga koa̱nskanni. Kataʼyala kʼa jmé xáni.

14. Jméni xi koasenkao je ndsʼee xi sʼa xti nga ñaki to xále Niná sʼin.

¹⁴ Koaan nga ñaki to xále Niná sʼiain. Nkjín ndsʼee xi nda tjíosíxále Niná ndʼaibi xi precursor sʼin kisixá nga sʼa xti. Kʼiatsa precursor sʼin si̱xái ñatjen si̱xání kao ndsʼee xi ngikʼa kʼoa koaanli chja̱ʼa̱ si̱koai je tao̱n (Filip. 4:​11-13). Koaan títjon precursor auxiliar sʼin si̱xái, kʼoa nga koa̱nskanni koaan precursor regular sʼin si̱xái. Tsa kʼoasʼiain, ngisasa tse si̱xálai Jeobá nga koa̱nskanni, jolani tsa ya kʼoainganʼiui nga sʼenda ndʼia jña ʼyaxkón Niná kʼoa tsa ya Betel si̱xái.

15, 16. Jmé xi machjén nga sʼin je ndsʼee xi sʼa xti xi mele nga siervo ministerial sʼin sixá kʼoa tsa chjotajchínga sʼin kʼoéjna.

¹⁵ Koaan siervo ministerial sʼin si̱xái kʼoa tsa chjotajchínga sʼin kuijnai. Machjén nga kʼoenele yaole ngatsʼi ndsʼee nga chjotajchínga sʼin koatio. Je Biblia kʼoatso nga “kjaínga nda xá xi mele” je ndsʼee xi kʼoatjío kon nga kʼoasʼin sixá (1 Tim. 3:1). Kʼianga koa̱n chjotajchínga sʼin kʼoéjna jngo ndsʼee tjínnele nga títjonkjoanla siervo ministerial sʼin sixá. Je ndsʼee jebi nkjín koya josʼin tsjoánganʼiole je xi chjotajchínga sʼin tjío. Je siervo ministerial kao xi chjotajchínga sʼin tjío nda binyakao je ndsʼee kʼoa kao kjoatsjoa tsoyason. Ninga tosʼa xjaʼaonjao nóle kʼoa tsa xjaʼaonño nóle jngo ndsʼee jekoa̱n siervo ministerial sʼin sixá. Kʼoa tsa nʼio ndasʼin tísíxá ndsʼee jebi koaan nga chjotajchínga sʼin kʼoéjna nga jekʼoa̱ 20 nó.

¹⁶ Yaa Biblia faʼaitʼa jmeni xi tjínnele sʼiain tsa meli nga siervo ministerial sʼin si̱xái kʼoa tsa chjotajchínga sʼin meli kuijnai. Kʼoa machjén nga tsjoacha koai̱n Jeobá, je familiali kao je jtín (1 Tim. 3:​1-13; Tito 1:​6-9; 1 Ped. 5:​2, 3). Ningalani tsín kʼoatsokixi je Biblia jósʼin si̱tjosuin nga jngó jngó koya xi jekanikʼaxkiaa, machjén nga si̱jinlai yaoli jmé xi tínchja̱ni kʼoa tijélai Jeobá nga katabasenkaoli ánni nga kuitjosonnili. f

17. Jmé xi koasenkao je ndsʼee xi sʼa xti tsa mele kuixan nga nda kuitjosonle je xá xi sʼe̱nele nga jko̱ kʼoéjnale familiale (kʼoati chótsenlai sén xi faʼaitʼa).

¹⁷ Tsa meli kuixain ji jko̱ kuijnalai familiali.  Tojo kitso je Jesús, tjínkʼa ndsʼee xi toxá tsín bixanni (Mat. 19:12). Kʼiatsa meli kuixain, tjínneli nga jko̱ kuijnalai je chjoónli kʼoa nga si̱kuindai (1 Cor. 11:3). Kui xi mele Jeobá nga tsjoake katama chjoónle je xi xʼin, nga katatsjoále jmeni xi machjénle kʼoa nga kuitsoyale xi tʼatsʼe Niná (Efes. 5:​28, 29). Tojosʼin kaʼyaa i̱ kjoaʼmiya jebi, nga koa̱nli nda si̱kjaʼaitsjain, nga jchaxkuín je yánchjín kʼoa nga si̱tjosuin je xá xi sʼe̱neli, kui xi koasenkaoli nga kuitjosonli je xá xi sʼe̱neli nga jekuixain kʼoa nga jko̱ kuijnalai familiali.

18. Jméni xi koa̱n sʼin jngo ndsʼee xi sʼa xti nga nda sijchá je xtile nga jekuixan.

¹⁸ Tsa xti sʼe̱li. Tsakui nichxin xti sʼe̱li nga jekuixain. Nʼio koasenkaoli je choa̱ xi bʼéjna Jeobá kʼiatsa nʼai koai̱n (Efes. 6:4). Je Jeobá kʼoakitsole Jesús nga nʼio tsjoake kʼoa nga ndasʼin tíjna ngixko̱n (Mat. 3:17). Kʼiatsa xti sʼe̱li kʼoatʼinlai nga tsjoachai kʼoa kʼoatʼinlai jñani nda sʼín. Je xijchá xi choa̱le Jeobá fitjenngi, kui xi binyakao nga je Jeobá síxále je xtile nga jemajchínga. Jmé xi tjínnele sʼiain nga nda si̱jchái je xtili. Tsjoacha katamai je familiali kao je ndsʼee xi tjío ya jinjtín, kʼoatʼinlai nga tsjoachai kʼoa nga ʼyachjí jme xi sʼín (Juan 15:9). Tsa kʼoasʼiain, ali tsa tokʼiajin koasenkaoli nga jekuixain kʼoa nga sʼe̱li xti, kʼoati koasenkaoli ndʼai nga chjí skoe̱konli Jeobá, je familiali kʼoa kao je jtín.

19, 20. Jmé xi tjínnele sʼin je ndsʼee xi sʼa xti nga skénngi choa̱le Jesús (chótsenlai sén xi faʼaitʼa ya portada).

¹⁹ Kʼiatsa sʼa xti, kuenta tʼiain nga nichxin tjenkao nga sa nda sa nda chjénngiaa je choa̱le Jesús. Je chjénngilai xi nda choa̱ batío, nda tikjaʼaitsjain, nda titjosuin xá xi sʼe̱neli, katamali xá kʼoa tongini tijnandalai josʼin kuijnai nga koa̱nskanni.

²⁰ Tsakui nichxin kʼoasʼin nikjaʼaitsjain nga nʼio tse jmeni xi sʼiain. Ali nikʼajenjinlai tokuin. Jé Jeobá koasenkaoli nga kuitjosonli (Is. 41:​10, 13). Kʼoati koasenkaoli je ndsʼee kao tichjaa xi tjío ya jinjtín. Nʼio tsjoa sʼe̱ tokuin kʼiatsa kʼoasʼin kuitjosonli josʼin mele Jeobá. Nʼio chjí ʼyatokonlaijin kʼoa jé Jeobá koasenkaoli nga sa nda sa nda kʼuíntjenngi je choa̱le Jesús (Prov. 22:4).