1. Jmé xi tjínnele sʼiaan nga kjuintjenngiaa choa̱le Jesús.

 ʼYAÑÁ nga ngotjo majchíngani je xtiʼndí. Toxá kʼoasʼin majchíngañá xi chjota, tonga alikui kʼoamaa xi kao Énle Niná. Machjén nga kʼoénelee yaoná nga chjénngiaa choa̱le Jesús (1 Cor. 13:11; Heb. 6:1). b Tsa mená nga chjénngiaa choa̱le Jesús, machjén nga tosi tonda si̱miyoaa je Jeobá. Kʼoati machjén nga kui nganʼiotsjele koandiaaná nga kui kʼoasʼiaan jmeni xi sasénle Niná, nga sa nda sa nda koa̱nná si̱xá kʼoa nga tongini kuiyondaa tsa jme xá sʼe̱nená nichxin xi sʼa nroa (Prov. 1:5).

2. Jmé xi bakóyaná Génesis 1:​27, kʼoa jmé xi chótʼayajiaan i̱ kjoaʼmiya jebi.

² Jé Jeobá kisinda chjota, jngo xʼin kʼoa jngo chjoón kisinda (tʼexkiai Génesis 1:27). c Je xʼin kao chjoón alikui mangóson josʼin koannda kʼoa josʼín. Tobʼelañá, je Jeobá kjaʼaí kjaʼaí xá kitsjoale je chjoón kao je xʼin. Kʼoa nga kuitjosonle je xá xi kjinele kjaʼaí kjaʼaísʼin síxá nga jngó jngó (Gén. 2:18). I̱ kjoaʼmiya jebi kui chótʼayá jmé xi tjínnele sʼin je tichjaa xi sʼa xti nga sʼe̱le kjoafaʼaitsjen, kʼoa ya kjoaʼmiya xi ijngo kui jchaa jmé xi tjínnele sʼin je ndsʼee xi sʼa xti.

3, 4. ʼYáni xi koa̱n skénngile je tichjaa xi sʼa xti (kʼoati chótsenlai sén xi faʼaitʼa).

³ Ya Biblia nkjín choa̱le yánchjín faʼaitʼa xi je Jeobá kisixále kʼoa xi tsjoake koan (tʼexkiai ya jw.org je artículo xi ʼmi: “¿Qué aprendemos de las mujeres de la Biblia?”).  Tojo tso texto xi yʼangini kjoaʼmiya jebi nda kisikjaʼaitsjen jokisʼin kʼoa nda kisitjoson je xá xi kisʼele. Kʼoajinti nkjín tichjaa tjío ya jinjtín xi tsjoake Jeobá kʼoa xi koa̱n chjénngilai.

⁴ Tsa sʼa xti koaan tikjaʼaitsjenjin josʼín je tichjaa xi nda choa̱ batío kʼoa koaan chjénngilai. Kuenta tʼiain jñani nda sʼín kʼoa koaan kʼoati sʼiain tsanda ji. Je párrafo xi fisani, jao koya tjínni xi si̱kʼaxkiaa jotjínnele sʼin ngatsʼi je tichjaa.

5. Ánni machjénni nga nangitokon koa̱n je tichjaa xi fitjenngi choa̱le Jesús.

⁵ Kjoanangitokon. Jngo chjoón xi nangitokon nda bʼejna ngixko̱n Jeobá kʼoa nda fikao xi ngikʼa (Sant. 4:6). Nga nangitokon kʼoa nga tsjoake Jeobá fitjenngi kjoafaʼaitsjen xi tsjoá je xi xá kitsjoale Jeobá nga koandiaale je jtín kʼoa kao yaniʼya (1 Cor. 11:3). d

6. Jméni xi sʼin je tichjaa xi sʼa xti nga skénngile je Rebeca nga nangitokon koan.

⁶ Kataʼyala je choa̱le Rebeca. Nʼio chjine koan kʼoa ñaki tjínjngo kon jmeni xi kisʼin (Gén. 24:58; 27:​5-17). Tonga kʼoati tsakakó kjoaxkóntokon kʼoa kisitjoson (Gén. 24:​17, 18, 65). Tsa nangitokon koai̱n joni Rebeca kʼoa tsa si̱tjosonlai je xi tsjoáxále Jeobá nga bándiaaná, nda choa̱ kʼoéjnalai yaniʼyali kao xi tjío jinjtín.

7. Jméni xi sʼin je tichjaa xi sʼa xti nga skénngile je Ester nga nangitokon koan.

⁷ Machjén nga nangitokon koa̱n ngatsʼi chjotale Cristo. Je Biblia kʼoatso nga “je xi nangitokon, tjínle kjoachjine” (Prov. 11:2). Je Ester kixi kitʼale Niná kʼoa nangitokon koan. Tobʼelañá, kʼianga reina koan alikui ngʼakon koan. Kinrʼoé jme xi kitsole je Mardoqueo, xi primole koanni, kʼoa kisitjoson jme xi kitsole (Est. 2:​10, 20, 22). Kʼoati koa̱n chjénngilai nga nangitokon koan Ester. Koaan  si̱jái kjoafaʼaitsjen kʼoa titjosuin jokʼuínli (Tito 2:​3-5).

8. Jósʼin koaitjenngi jmeni xi tso 1 Timoteo 2:​9, 10 je tichjaa xi sʼa xti tʼatsʼe jokjoáyo kʼoa jokjoan najño xi kʼoakjá.

⁸ Ijngolasa koya kataʼyaa josʼin tsakakó Ester nga nangitokon ma. Je Ester nʼio naskánakisʼe, tonga alikui kui tsakʼasjengʼani yaole (Est. 2:​7, 15). Jósʼin koa̱n kʼuíntjenngi choa̱le. Jngo koya xi koa̱n sʼiain kuinga kʼuíntjenngi je kjoafaʼaitsjen xi tsjoá ya 1 Timoteo 2:​9, 10 e (tʼexkiai). Je pastro Pablo kui kjoafaʼaitsjen kitsjoale tichjaa nga nda katakosonnile jókjoan najño xi kʼoakjá. Je én griego xi kisichjén Pablo kui xi tsonile nga kui kʼoakjá je tichjaa najño xi nda matsen kʼoa nga kuenta katasʼín je kjoafaʼaitsjenle xi ngikʼa. Nʼio tsjoa maná nga fitjenngi tichjaa je kjoafaʼaitsjen xi tsjoá Énle Niná.

9. Jmé xi bakóyaná jokisʼin je Abigaíl.

⁹ Kʼianga ninkjínlee tokoán títjonkjoanla nikjaʼaitsjeen jmeni xi nʼia. Kui xi tsonile nga ʼyaa jméni xi ndatjín kʼoa jméni xi chʼaotjín, kʼoa kui kʼoanʼia xi ndatjín. Kataʼyala je choa̱le Abigaíl. Nga tsín nda kisʼin xʼinle koanjinle nga tse kjoa kuichomani, kuinga kjitʼanangi kisikjaʼaitsjenni jmeni xi sʼin. Nga kʼoakisʼin alikui ʼya xi kinikʼien (1 Sam. 25:​14-23, 32-35). Kʼianga ninkjínlee tokoán majinná kʼiáni machjén nga kuinókjoaa kʼoa kʼiáni nga jyó kuiyoaa. Kʼoa kʼianga kui chjonangilee je ndsʼee josʼin tjíoni alikui kui chjonangilee jmeni xi chʼao kʼoe kon (1 Tes. 4:11).

10, 11. Jmé kjoanda xi sʼe̱li tsa koa̱nli kʼoéxkiai kʼoa tsa koa̱nli chjí (kʼoati chótsenlai sén xi faʼaitʼa).

¹⁰ Kʼianga nkjín xá maná binyakaoná. Je xá xi koa̱nle sʼin tichjaa nga sʼa ʼndí kjoan koa̱nchjénle ngantsjai. Kataʼyala kʼa.

¹¹ Katamali josʼin sʼexkia kʼoa josʼin chji. Tjín ʼnde jñani kʼoasʼin síkjaʼaitsjen chjota nga tsínkjoan machjén nga koa̱nle skí kʼoa koa̱nle kʼoexkia je xi yánchjín. Tonga xi chjotale Cristo maa machjén nga koa̱nná kʼoéxkiaa kʼoa koa̱nná chjiá (1 Tim. 4:13). f Ali bʼaiʼndejin nga jme xi kʼoechjoali nga koa̱nli kʼoéxkiai kʼoa koa̱nli chjí. Nda kuichomani tsa kʼoasʼiain. Tsakui nichxin ngisa choa ñʼai koa̱nli nga so̱koxáli, ngisaa nda chótʼayai Biblia kʼoa ngisaa nda koakoyalai xi kjaʼaí. Tonga xi ngisa chjíle kuinga miyole  Jeobá koai̱n kʼianga kʼoéxkiai Biblia kʼoa nga si̱kjaʼaitsjenjin jme xi tso (Jos. 1:8; 1 Tim. 4:15).

12. Jmé xi bakóyali Proverbios 31:26.

¹² Ngasin nganda chja̱kaonajmí chjota kʼoa nda tinóʼyalai. Xi chjotale Cristo maa machjén nga kʼoasʼiaan. Je Santiago i kitso: “Ngatsʼi chjota ndi̱to̱nndi̱to̱n katanrʼoé, tonga katakjenjta nga nchja̱” (Sant. 1:19). Kʼianga binyañolee xi ngikʼa nga nchja̱ kʼoasʼin bakonilee nga kuenta nʼia jmeni xi tso (1 Ped. 3:8). Tsa tsín kjimajinli jmeni xi tíbʼéyanajmíli kʼoa jmeni xi títso, ngasin nganda chjónangilai kʼoa títjonkjoanla tikjaʼaitsjain jmeni xi kʼuínlai (Prov. 15:28). Tikjaʼaitsjain jebi: “A kʼoatjín jmeni xi xínle. A sinʼio kon. A tibakole kjoaxkóntokon. A nda tso én tisichjén nga kʼoatixinle”. Kuenta tʼiain jotso je tichjaa xi jetjínle kjoafaʼaitsjen nga nchja̱najmí kʼoa chjénngilai (tʼexkiai Proverbios 31:26). g Kuenta tʼiain jósʼin fákaonajmí xi ngikʼa kʼoa jótso én xi síchjén. Tsa kʼoasʼiain, ngisaa koa̱nli josʼin chja̱kaonajmí xi ngikʼa.

13. Jméni xi koa̱n sʼiain nga koa̱nli xá xi tjín ya yaniʼya (kʼoati chótsenlai sén xi faʼaitʼa).

¹³ Katamali je xá xi tjín ya yaniʼya. Tjín ʼnde jñani me toje xi yánchjín kʼoasʼín je xá xi tjín ya yaniʼya. Koaan tsa mali kʼoa tsa jngo tichjaa kuitsoyali jme xá xi tjín ya yaniʼya. Jngo tichjaa xi Cindy ʼmi, itso: “Xi ngisa faʼaitsjenna kuinga tsakakóyana mana jme xá xi tjín ya yaniʼya, kʼoa nga tsjoa sʼe tokoán kʼianga nda nixá. Nga mana bʼenda tsojmi, nga sitsje ndʼiana, nga mana kjonya kʼoa nga mana batse tsojmi ngisaa choa ñʼai kjimana nga tisixále Jeobá. Kʼoati tsakakóyana je mana nga ndatjín nga tjotʼaa. Nga kʼoasʼian, nkjín ndsʼee kao tichjaa ʼbexkoan kʼoa kʼoati kjimana jmeni xi male sʼín” (Prov. 31:​15, 21, 22). Je tichjaa xi male síxá, xi tjotʼa kʼoa xi male síkuinda ndʼiale, nda batio ya yaniʼyale kʼoa binyakao je jtín (Prov. 31:​13, 17, 27; Hech. 16:15).

14. Jmé xi bakóyali jotso Crystal, kʼoa jméni xi machjén nga sʼiain.

¹⁴ Katamali josʼin kuijnyíʼai yaoli. Ngatsʼi chjotale Cristo machjén nga koa̱nle koa̱njngíʼa yaole kʼoa nga tokoa̱nnile jmeni xi tjínle (Filip. 4:11). Jngo tichjaa xi Crystal ʼmi, itso: “Kʼianga sʼa tsoʼba̱ skuela kʼoatsakʼinna nga koa̱n skoéjian jmeni xi skotʼaya. Je xijchána kʼoakitsona nga kui skotʼaya jmeni xi koasenkaona nga so̱koxána. Tobʼelañá, je pana kʼoakitsona nga contabilidad skotʼaya. Nga kui jebi kiskotʼaya ndasʼin kichomani”. Ndatjín nga kui chótʼayai jmeni xi koasenkaoli nga so̱koxáli kʼoa katamali nga chja̱ʼa̱ si̱koai je tao̱n (Prov. 31:​16, 18). Kʼianga tsín tao̱n nijékinyaa kʼoa nga tomaniná  josʼin tiyoaa, ngisaa choa ñʼai maná nga je Jeobá nixálee (1 Tim. 6:8).

15, 16. Jósʼin tsjoánganʼio je tichjaa xi tjíotoje (Marcos 10:​29, 30).

¹⁵ Tsakui kʼoasʼiain jmeni xi sasénle Jeobá kʼoa tsa koa̱nli xá, jetongini tibijnandalai josʼin kuijnai nga koa̱nskanni. Kataʼyala kʼa jméni xi koa̱n sʼiain.

¹⁶ Tsa kje bixanjin koaan tojila kuijna choatsai tsa meli. Tojo kitso Jesús, tjín tichjaa xi toje batio ninga kʼoalani tsole chjota xi ya tsʼe ʼndele nga katabixan (Mat. 19:​10-12). Nkjín koya tjínni anni nga tsín bixanni tichjaa. Tsa tijnatoji, tʼejngui tokuin nga chjí beli je Jeobá kao Jesús. Je tichjaa xi tjíotoje nʼio nda tsjoánganʼio ya jinjtín. Nga nda chjota je tichjaa kʼoa nga tsjoánganʼio, nkjín xi jo ndichja kʼoa xi jo na̱le sʼin bekon (tʼexkiai Marcos 10:​29, 30; h 1 Tim. 5:2).

17. Jméni xi kuinyakao je tichjaa xi sʼa xti nga ñaki to xále Niná sʼin.

¹⁷ Koaan nga ñaki to xále Niná sʼiain. Nʼio nkjín mani je tichjaa xi tsoyason jngo tjíjtsa Sonʼnde (Sal. 68:11). Tsa kʼoakoa̱nli, koaan nga ñaki to xále Niná sʼiain. Koaan precursora sʼin si̱xái, koaan ya kʼuínkʼainganʼiui jñani sʼenda Ndʼia jña chotʼayá kʼoa tsa ya Betel si̱xái. Jmé xi koasenkaoli nga kʼoasʼiain jmeni xi kʼoéndajin. Tʼetsʼoalai Jeobá kʼoa chja̱kaonajmí je ndsʼee xi ñaki to xále Niná tjíosʼín, kʼoa chjónangi jméni xi koa̱n sʼiain. Tʼetʼaxuin jméni xi koa̱n sʼiain nga kuitjosonli jme xi kʼoéndajin. Tsa ñaki to xále Niná sʼiain, nkjín koya josʼin koa̱n si̱xálai Niná.

18. Ánni tjínnenile nda skoéjin je tichjaa ʼyani xi kuixankao (kʼoati chótsenlai sén xi faʼaitʼa).

¹⁸ Tsa meli kuixain. Tsa kʼoasʼiain jmeni xi jekachotʼayá, koasenkaoli kʼianga jekuixain. Ali tokjoaskájin tjenkao je kjoabixan, kuinga tjínnenile nda chjoéjin ʼyáni xi kuixankoai, nga̱ je ndsʼee xi xʼinli koa̱n jé xi jko̱ kʼoéjnali ya yaniʼya (Rom. 7:2; Efes. 5:​23, 33). Koaan si̱kjaʼaitsjain jebi: “A fitjenngi choa̱le Jesús. A kui xále Niná ngisa tsjoále kjoandosin. A nda  kjoéjin jmeni xi sʼín. A nangitokon. A bakóle kjoaxkóntokon xi yánchjín. A koasenkaona nga sa nʼio sa nʼio sʼe̱jna kjoamakjainna. A nda chjota kʼoa a koasjaile josʼin kuijnyíʼaijin yaonajin. A sítjoson je xá xi kjinele, jolani xá xi kjinele ya jinjtín” (Luc. 16:10; 1 Tim. 5:8). Tsa meli je kuixankoai jngo ndsʼee xi nda sítjoson je xá xi kjinele kʼoati machjén nga nda si̱tjosuin je xá xi kjineli.

19. Ánni nga jngoni kjoanda nga basenkao chjoón je xʼinle.

¹⁹ Je Biblia kʼoatso nga basenkao xʼinle je chjoón xi nda sʼín (Gén. 2:18). Kʼianga kʼoatso Biblia, ali tsakuijin xi tsonile nga nangi nikʼéjna je chjoón. Jngoo kjoanda tjínle nga kʼoasʼín, nga̱ ya Biblia kʼoatso nga je Jeobá kʼoati basenkao xi kjaʼaí (Sal. 54:4; Heb. 13:6). Jngo chjoón xi basenkao xʼinle, kʼoasʼin basenkaoni nga kui kjoéjin jmeni xi nda sikatío ya yaniʼya. Kʼoa nga tsjoake Jeobá nda síkʼaxki̱ xʼinle (Prov. 31:​11, 12; 1 Tim. 3:11). Tsa kʼoasʼin tinikjaʼaitsjain nga kuixain, tosi tonda tsjoacha katamai Jeobá, tʼainganʼiui ya yaniʼyali kao ya jinjtín.

20. Jósʼin kuichomani tsa nda sʼin je xi na̱ ma.

²⁰ Tsa xti sʼe̱li. Kʼiatsa kuixain tsakui nichxin xti sʼe̱li (Sal. 127:3). Tongini tikjaʼaitsjain jósʼin si̱jchái tsa ʼndíxti sʼe̱li. Koasenkaoli jmeni xi kachotʼayá. Nda kuiyo ya yaniʼya nga koakolai kjoatsjoacha, kjoanda kao kjoatsejta je familiali, kʼoa je ʼndíxtili kʼoati nda sa̱tío kon (Prov. 24:3).

21. Jókji chjí ʼyatokuin je tichjaa, kʼoa ánni (chótsenlai sén xi faʼaitʼa ya portada).

²¹ Tichjaa xi sʼa xtio nʼio chjí ʼyatokonlaijin nga je Jeobá tinixálao kʼoa nga tibʼainganʼiolao naxinandále (Heb. 6:10). Bʼenelao yaono nga kʼoasʼin mangínkao yaono jotso Énle Niná. Nkjín koya xá mano xi kʼoati binyakao xi kjaʼaí. Kʼoa tongini tibiyondalao josʼin kuiyo nga koa̱nskanni. Nʼio chjí bekonno je naxinandále Niná.