NKJÍN kjoatjao tsjoáná Jeobá kʼoa kui kjoanda tsjoáná nga ñá chjoéjiaan josʼin nichjén kjoatjao jebi. Tobʼelañá, je Biblia kʼoatso nga jngo kjoatjaole Niná je vino. Ya Biblia itso: “Kui xá mandani je nioxtila nga tsjoa sʼe̱ná kʼoa je vino nda bʼé tokoán” (Ecl. 10:19; Sal. 104:15). Tonga tjín chjota xi síkʼatone choa̱le jokji ʼbi kʼoa kjaʼaí kjaʼaísʼin síkjaʼaitsjen nga jngó jngó ʼnde. Jósʼin nikjaʼaitsjeen xi chjotatjenngile Cristo maa.

Kui ngisa kuenta nʼia josʼin síkjaʼaitsjen Jeobá xi tʼatsʼe xán tikʼoajinni jotso chjota ya ʼnde jñani tsaan. Tsa kʼoasʼiaan, tsjoa sa̱tío tokoán.

Nkjín chjota xi tsín je Jeobá síxále xi toxkia ʼbi. Kuinga kʼoasʼínni nga mele síchajin je kjoa xi tjínle kʼoa tjínkʼa xi tokao kjoatsjoa ʼbi. Kʼoati tjínkʼa xi ya fikʼi jñani saténa xán, nga̱ kʼoasʼin síkjaʼaitsjen nga nʼio taja kʼoa nga tse kale.

Tonga xi chjotatjenngile Cristo maa jé Jeobá bándiaaná. Je Jeobá tsjoáná kjoafaʼaitsjen josʼiaan kʼoa kʼoatsoná nga sikiʼaonná kʼoa nga tse kjoa kuiyojiaan tsa kuitjátoné choa̱le jokji sʼioaa. Tobʼelañá, ya Proverbios 23:​29-35 síkʼaxki joma jngo chjota xi tse ʼbi kʼoa jme kjoa xi kajin. a Jngo ndsʼee xi Daniel ʼmi, xi chjotajchínga sʼin tíjna ya Europa, kʼoatso jokisʼin ngasʼa nga kjesa testigole Jeobá majin. Itso: “Nga tse tsakʼia̱, chʼao kisʼian, tsee kjoa jaʼatojian kʼoa nʼio kisikiʼaonna”.

Jmé xi koasenkaoná nga nda si̱kjaʼaitsjeen kʼoa nga tsín toxkia tse sʼioaa. Kuinga kjuintjenngiaa je kjoafaʼaitsjen xi tsjoáná Jeobá xi tʼatsʼe xán.

Kataʼyala jotso Biblia xi tʼatsʼe jebi, kʼoa ánni nga sakʼoa nʼio ʼbini je chjota.

Je Énle Niná alikui bʼéchjoaná tsa sʼio choaa, tosaa kʼoatso nga ʼnda bʼé tokoán nga ʼyo i̱natjián. Ya Eclesiastés 9:7 itso: “Kao kjoatsjoa chi̱nai tsojmili kʼoa kao kjoatsjoa tʼui vinoli”. Ya Biblia kʼoatso nga kʼoati tsakʼi choa vino je Jesús, kʼoa kʼoati síkʼaxki̱ kʼa je choʼndale Niná xi kʼoati kisʼin (Mat. 26:​27-29; Luc. 7:34; 1 Tim. 5:23).

Alikui mangóson kʼianga to i̱natjín ʼyoá kʼoa tsa toxkia si̱chʼi̱aa yaoná. Ya Biblia itso: “Ali yaonojin nichʼi̱nio vino” (Efes. 5:18). Kʼoati tso nga tsín “sʼe̱kjoatjaole kjoatéxomale Niná” je xi chʼi̱ (1 Cor. 6:10). Tojo tso texto jebi, je Jeobá bʼéchjoa kʼianga tse ʼyoá kʼoa kʼianga machʼiaa. Ngisaa ndatjín nga nitjosoán jotsoná Jeobá, kʼoa alikui kui kjoafaʼaitsjen nichjén jotso je chjota xi tʼatsʼe xán.

Tjínkʼa xi kʼoatso nga tse kale kʼianga ʼbi kʼoa nga tsín machʼi̱. Tonga alikui ndatjín tsa kʼoasʼin si̱kjaʼaitsjeen, ya Biblia kʼoatso nga bajngijée je chjota xi tse ʼbi, tsa xʼin kʼoa tsa chjoón, kʼoa alikui tinda bationi ngixko̱n Jeobá (Tito 2:3; Prov. 20:1). Je Jesús kʼoakitso nga tsín ya ʼndenaxó koatio je chjotachʼi̱ (Luc. 21:​34- 36). Jmé xi koa̱n sʼiaan nga tsínkui kjoa jebi ska̱jiaan.

Tojosʼin kaʼyaa, alikui ndatjín tsa si̱kʼatoné jokji sʼioaa tojo sʼín kʼa chjota. Xi chjotatjenngile Cristo maa, kui kʼoanʼia jmeni xi sasénle Jeobá kʼiatsa tibichaa kʼoa tsa tiʼyoá. Itso kjoafaʼaitsjen xi tsjoáná Biblia: “Tsa bicho, kʼoa tsa ʼyo, tsa tojmenibe xi nʼiao, kʼoatʼiaon ngayije xi tʼatsʼe kjoajeyale Niná” (1 Cor. 10:31). Kataʼyala kʼa je kjoafaʼaitsjen xi tsjoá Biblia xi koa̱n kjuintjenngiaa.

A kuinga ʼbiña nga nda sikʼaxki̱na xi ngikʼa. Ya Éxodo 23:2 itso: “Ali yajin ʼmitjenngilai chjotankjín”. Tojo tso texto jebi, je Jeobá kʼoakitsole chjota israelita nga tsín ya katakjenngile je chjota xi chʼao sʼín. Kʼoa je kjoafaʼaitsjen jebi tojo machjénná ñá xi chjotatjenngile Cristo maa. Tsa kʼoati sʼiaan josʼín xi ngikʼa kuitjátonéjián je kjoatéxomale Jeobá, kʼoa alikuijin tinda kuiyoñá ngixko̱n (Rom. 12:2).

A kuinga ʼbiña nga koakoa nga nʼio taja kʼoa nga tse kana. Tjín ʼnde jñani nʼio ʼbi chjota, jetokʼoasʼin koanngale kʼoa alikui tichʼaosʼin beni (1 Ped. 4:3). Tonga itso kjoafaʼaitsjen xi tsjoáná ya 1 Corintios 16:13: “Tiyochonʼndao, nʼio tiyokao xi makjainno, kʼoa nʼio taja tiyo, kʼoa chjóao nganʼio”. Kʼianga tse ʼyoá sínjio̱ná kʼoa alikui tinda nikjaʼaitsjenñá, xi tsonile, kʼianga tse ʼyoá síkiʼaonná kʼoa alikui sítajaná tojo tso kʼa je chjota. Ya Isaías 28:7 kʼoatso nga síchangale yaole je xi tse ʼbi kʼoa tosaténgisa.

Tsa mená nga kui kʼoasʼiaan xi ndatjín, je Jeobá si̱nʼiotʼaa kʼoa kʼoénelee yaoná nga nʼio katasʼejna kjoamakjainná (Sal. 18:32). Kuinga machjénni nga nda chjoéjiaan jmeni xi sʼiaan, kʼoa alikui kui kʼoasʼiaan jmeni xi chʼaosʼin sikʼéjnaná ngixko̱n Jeobá. Kʼoakisʼin je Jesús nga  tsakʼejna i̱ Sonʼnde kʼoa kʼoasʼin tsaʼyale nga kisʼele nganʼio kʼoa nga nʼiojin koan.

A kuinga ʼbiña nga cha̱jinna je kjoa xi tjínna. Jngo xi kiski salmo i kitsole Jeobá: “Kʼianga nʼio kisikjáojian, ji kininʼiojin tokoan kʼoa kinikinjenyʼánjin ni̱ma̱na” (Sal. 94:19). Tsa nʼio tinikjáojin nga kjoa tjínli, je Jeobá tinʼiotʼai, ali ʼyojin. Xi koasenkaoli kuinga ntsjaintsjai kʼoétsʼoai. Kʼoati nkjín xi binyakao nga síjéle kjoafaʼaitsjen xi chjotajchínga sʼin tjío ya jinjtín. ʼYani xi ʼbi kʼianga kjoa tjínle, ngisaa tse kjoa bajngile yaole kʼoa alikui nda síkjaʼaitsjen jmeni xi sʼín (Os. 4:11). Je Daniel, xi sa jekabʼaxki̱, itso: “Tsee kjoa kisʼena kʼoa nʼio kisikjáojian kʼianga tsakʼia̱. Nga kʼoakisʼian ngisaa tse kjoa kichomani, kisikjin miyona kʼoa alikui tinda kisʼeni tokoan”. Jmé xi tsakasenkao Daniel. Itsosa: “Koanjinna nga tsín josʼin koasenkaona tsa tosi tonda skʼuia̱, tojé Jeobá xi koa̱nle koasenkaona. Nga je kisinʼiotʼa tsakasenkaona, nda kisʼe tokoan kʼoa kisʼendajin kjoa xi tijnajian”. Kuenta sʼiaan nga toje Jeobá xi koa̱nle koasenkaoná, ningalani kʼoasʼin si̱kjaʼaitsjeen nga tsínkʼia sʼe̱ndajin kjoa xi tibitjatojiaan (Filip. 4:​6, 7; 1 Ped. 5:7).

Tsa sakʼoa ʼyui koaan si̱kjaʼaitsjenjin jebi: “A sa jekʼoakitsona je miyona kʼoa tsa xíngia nga makjáojinle jokji ʼbia”. Tsa jekʼoakitsoli kui xi tsonile nga jetibitjatonai choa̱le jokji ʼyui kʼoa tochale jekui títsjentʼalai. “A ngisaa tse ʼbia ndʼaibi”. Alikui xi tsonile nga kui títsjentʼalai, tonga chaan kʼoakoa̱n tsa tosi tonda tse sʼui̱. “A nʼio símekon ni̱ma̱na nga skʼuia̱”. A ñʼai mali tsa jngo jao nichxin tsín sʼui̱. Tsa kʼoakjimai, kui xi tsonile nga jenʼio tjentʼalai nga ʼyui kʼoa nga jekʼoasʼin kjimangali. Machjén nga si̱jélai nganʼio je xi kui xá sʼín nga koasenkaoli nga tsínti sʼioni.

 Nga tsín ndasʼin bichómani nga ʼyoá, tjínkʼa ndsʼee xi tosa tsín ʼbi kʼoa tjínkʼa xi toxá tsín tsjoakeni nga kui ʼbi xi xán tjínle. Tsa kʼoasʼín kʼa xi ʼyaxkoaan, alikui koa̱n chʼaosʼin si̱kʼaxkiaa, tjínnele jchaxkoán josʼin síkjaʼaitsjen.

Tjínkʼa xi kʼoasʼin bʼéndajin kʼiáni skʼuí kʼoa jókji skʼuí. Tobʼelañá, tjínkʼa xi kʼia ʼbi choa xi xán tjínle kʼianga kjien kʼoa tsa maije̱ tojngokʼa ʼbi nga jngo xomana. Tjínkʼa xi kjoéjin jokjoan xi skʼuí, tsa vino kʼoa tsa cerveza, tonga alikui ʼbi je xi ngotjo síchʼi̱niná kʼoa tsa jmesani xi xán tjínjin. Kʼianga ʼyaa jokji tjen choa̱le, alikui nikʼatoné jokji ʼyoá. Je xi tjínle kjoafaʼaitsjen nda bʼéndajin jme xi sʼín kʼoa alikui kjoasoa bʼejnajin.

Kʼoati machjén nga kuenta sʼiaan xi ngikʼa. Ya Romanos 14:21 itso: “Nda tjín nga tsín tsa yao chinai, ni ʼyojin xán, kʼoa nijmejin xi nʼiai xi sa̱téngi ndsʼai”. Kui xi tsonile texto jebi nga tjínnele kuenta sʼiaan xi ngikʼa kʼoa koakolee kjoatsjoacha. Kʼiatsa ʼyaa nga jngo ndsʼee sa̱téngi nga sʼioaa, ngisaa nda nga tsín kʼoasʼiaan, nga̱ kʼoasʼin koakonilee kjoaxkóntokon kʼoa alikui to yaoná kjuinñá (1 Cor. 10:24).

Xi chjotatjenngile Cristo maa nitjosonñá je kjoatéxoma xi tsjoá chjotaxá xi tʼatsʼe xán. Tobʼelañá, nitjosonñá tsa tsín tjoʼndele xi sʼa xtiʼndí nga ʼbi, xi carro síxákao kʼoa tsa xi kjaʼaísa ki̱cha̱ sixákao (Rom. 13:​1-5).

Kui kjoanda tsjoáná Jeobá nga ñá chjoéjiaan jmeni xi mená sʼiaan. Ndasʼin si̱chjén kjoanda jebi kʼianga jme xi ʼyoá kʼoa jme xi chinee. Tsa kʼoasʼiaan, kʼoasʼin koakoñá nga tsjoachaa je Jeobá kʼoa nda kuiyoaa ngixko̱n.