KJOAʼMIYA XI CHOTʼAYA 51
KJOAJNDA 3 Ji bʼainganʼionái kʼoa ninʼiojinnái
Je Jeobá kuenta sʼín nga chjiʼndá
“Ya tʼeyai ndáxkoan je xjoa̱li. A tsí ya tjítʼa je libroli” (SAL. 56:8).
XI TÍNCHJA̱NI
Je Jeobá sínʼio tokoán kʼianga kjoañʼai tiyojiaan nga̱ majinle josʼe tokoán.
1, 2. Ánni nga chjiʼndáñá.
NGATSʼIÑÁ nga sakʼoa chjiʼndá. Tobʼelañá, ñaki nroajen ndáxkoaan jokji tsjoa sʼená kʼianga jngo ʼndílee tsin, kʼoati ma kʼiatsa jme xi kjoaʼaítsjenná kʼoa tsa kʼiaje̱ nga kajin ijngokʼá je miyoná xi jekjoatse kiskajinñá.
2 Tonga me tongantsjai nga kuinga chjiʼndáñá nga ba sʼe tokoán. Chjiʼndáñá kʼiatsa jngo xíngiaa kuiyá, kʼiatsa táo chʼin ska̱tʼaná kʼoa tsa kuije̱ nga kui kʼoasʼín chjota xi chʼao bʼé tokoán. Tsakui nichxin kʼoati sʼe tokoán jokisʼe kon Jeremías kʼianga kichosíkjeson chjota xi Babilonia tsʼe ya naxinandá Jerusalén. Je Jeremías i kitso: “Ñaki tífai ndáxkoan [ . . . ]. Alikui timaxa̱nni je ndáxkoan” (Lam. 3:48, 49).
3. Jósʼe kon Jeobá kʼianga kjoañʼai chjaʼá (Isaías 63:9).
3 Je Jeobá be jojetjín kʼa chjiʼndá jokjitse tiyochoán. Je Biblia kʼoatso nga kuenta sʼín je kjoañʼai xi chjaʼá kʼoa nrʼoéná kʼianga nganʼio nijélee (Sal. 34:15). Tonga tsín tsa tonrʼoéná kʼoa tsín tsa tokotsenná, nga tsjoakená kʼoa nga Nʼainá mani kʼoati ba sʼe kon nga chjiʼndá, kuinga básjainile josʼin basenkaoná (tʼexkiai Isaías 63:9). a
4. ʼYá tsʼe choa̱ xi chótʼayajiaan, kʼoa jmé xi bakóyaná xi tʼatsʼe Jeobá.
4 Je Biblia kʼoatso josʼin tsakasenkao Jeobá je choʼndale kʼianga kui kjoa jaʼatojin xi kisikjiʼndá. Jolani Ana, David kao rey Ezequías. Ánni nga kiskiʼndáni. Jósʼin tsakasenkao Jeobá. Kʼoa jósʼin basenkaoná ndʼaibi je choa̱le kʼianga ba sʼe tokoán, nga tjín xi bʼanachaná kʼoa tsa kʼiaje̱ nga kʼoasʼin nikjaʼaitsjeen nga tsín tikoa̱nndayañá kʼiatsa chʼin kakatʼaná.
CHJIʼNDÁÑÁ KʼIANGA BA TJÍN TOKOÁN
5. Jókisʼe kon je Ana.
5 Je Ana nʼio tse kjoa jaʼatojin xi ba tsakʼé kon kʼoa kiskiʼndá. Je xʼinle ijngo chjoón kisʼele, xi Peniná tsakʼin. Chjoón jebi jtike koan kʼoa totaon tsabe Ana. Je Ana ʼndi̱i koan, tonga je Peniná nkjín xti kisʼele (1 Sam. 1:1, 2). Kuinga tsabesinni je Ana nga tsín kisʼele xti. Jókisʼe tokuin tsa jilani xi kʼoakoantʼain. Je Ana chʼao kisʼe kon nga kʼoakoantʼain, kiskiʼndá kʼoa tsínti tsakjenni (1 Sam. 1:6, 7, 10).
6. Jmé xi kisʼin Ana nga ba tjín kon.
6 Nga ba tjín kon Ana yaa ki ya ndʼianajño jñani tsaʼyaxkón Jeobá. Tsakui nichxin ya kichokasejna ya nditsinle ndʼianajño, tíkjiʼndá kaoni nga tsakʼétsʼoale Jeobá. Kʼianga tsakʼétsʼoa kʼoakitsole Niná nga katafaʼaitsjenle xi tʼatsʼe. I kitsole: “Nʼio tse kjoañʼai tifaʼa” (1 Sam. 1:10b, 11). Tsakʼéyanajmíle Jeobá jotjín kon. Nʼiojin ba kisʼe kon Jeobá nga tsabe nga tíkjiʼndá je Ana.
7. Jókisʼe kon Ana nga jetsakʼéyanajmíle Jeobá jme kjoa xi tífaʼatojin.
7 Je Ana ndani kisʼe kon kʼianga jetsakʼéyanajmíle Jeobá jme kjoa xi tífaʼatojin kʼoa nga kinrʼoé jmeni xi kitso je naʼmi Elí. Je Biblia itso: “Ki kʼoa tsakjen, kʼoa alikui tiba kisʼenile” (1 Sam. 1:17, 18). Ninga tsínlani tokjoán ndasʼin tsakʼejna, nda kisʼe kon nga je Jeobá kisinʼiotʼa. Je Jeobá koanjinle jokji ba kisʼe kon Ana, kinrʼoéle nga tsakʼétsʼoa kʼoa kisichikontʼain nga koan kisʼele xti (1 Sam. 1:19, 20; 2:21).
8, 9. Tojo tso Hebreos 10:24, 25, ánni machjénni nga koanngián je kjoajtín xi satíoná (kʼoati chótsenlai sén xi faʼaitʼa).
8 Xi bakóyaná. Kʼiatsa jngo xíngi kʼoa tsa jngo miyoli kʼien, tsakui nichxin ba tjín tokuin kʼoa tsa nroajen ndáxkuin. Kʼianga kjoaba tiyojiaan alikui titsoni tokoán nga ʼya xi chjakaonajmiá. Tikjaʼaitsjenjin jokisʼin je Ana kʼianga ba tjín kon. Yaa ndʼianajño ki kʼoa je Jeobá kisinʼio kon. Kʼoatisʼin koasenkaoli Jeobá kʼiatsa kʼuín kjoajtín ninga ba tjínli kʼoa ninga tsín titsoni tokuin nga jme xi sʼiain (tʼexkiai Hebreos 10:24, 25). b Kʼianga mangián kjoajtín noʼyañá je texto xi sínʼio tokoán, basenkaoná nga tsín tokui nʼio nikjáojiaan je kjoa xi tibitjatojiaan kʼoa bijbini nda sʼe tokoán ninga tsín tokjoán chajinná je kjoaba xi tiyojiaan.
9 Nda sʼe tokoán nga mangián kjoajtín nga̱ je ndsʼee sínʼiojinná kʼoa bakó jokji tsjoakená (1 Tes. 5:11, 14). Kataʼyala jotso jngo ndsʼee xi precursor especial sʼin tísíxá, xi kʼien chjoónle. Itso: “Nga nʼio sikjoa je chjoónna kjiʼndá ʼndeʼndeña. Tonga nga fia kjoajtín ndani sʼe tokoan. Basenkaona je comentario xi tsjoá je ndsʼee kʼoa jotso nga fákaonajmína. Ninga ba tjín tokoan nga fia ya Ndʼia jña chotʼayá, ndani sʼe tokoan nga jeya tijna”. Kuinga machjénni nga koanngián je kjoajtín xi satíoná, nga̱ jé ndsʼee síchjén Jeobá nga basenkaoná.
Sínʼio tokoán je ndsʼee kʼianga fákaonajmíná (Chótsenlai párrafo 8, 9)
10. Jósʼin koa̱n chjénngiaa je choa̱le Ana kʼiatsa kjoaba tiyojiaan.
10 Je Ana ndani kisʼe kon nga tsakʼéyanajmíle Jeobá jme kjoa xi tífaʼatojin. Kʼoati koa̱n sʼiain tsanda ji jotso ya 1 Pedro 5:7, nga kʼoakʼuínlai Jeobá jme xi makjáojinli, kʼoa je kjuinrʼoéli. Jngo tichjaa xi kʼoatso jokisʼe kon nga kinikʼien xʼinle. Itso: “Nʼio ba koanna nga kinikʼien xʼinna, kʼoa kʼoasʼin kisikjaʼaitsjen nga tsín tikʼia nda sʼe̱ni tokoan”. Je tichjaa kʼoatso jme xi tsakasenkao. Itsosa: “Jé Jeobá tsakʼetsʼoale, kʼoa nga ñandia ñandia tsakʼetsʼoa ndani kisʼe tokoan. Ninga sakʼoa tsín tsaʼbe jokixinle, koanjinle jotjín tokoan. Kʼianga ba tjínna kʼoa nga tisikjáojian kʼoakixinle Jeobá nga katabasenkaona nga nda katasʼe ngindiani tokoan. Kʼoa je tsakasenkaona nga kichokjoajinna je kjoa xi tifaʼatojian”. Kʼiatsa kʼoéyanajmílai Jeobá jotjín tokuin koa̱njinle je kjoa xi tibitjatojin. Ninga tsínlani kjoaʼaxin je kjoa xi tjínli, koasenkaoli nga nda sʼe̱ tokuin (Sal. 94:19; Filip. 4:6, 7). Kʼoa tosi tonda tsjoáli nganʼio nga chókjoajinli (Heb. 11:6).
CHJIʼNDÁÑÁ KʼIANGA ʼYA XI TOTAON BENÁ
11. Jókisʼe kon David nga totaon tsaʼya.
11 Je David tsee kjoa jaʼatojin xi ba tsakʼé kon kʼoa kiskiʼndá. Nkjín chjota xi jtike koan, tijéni xínkjín kao miyole kitjenngike kʼoa koanmele kisikʼien (1 Sam. 19:10, 11; 2 Sam. 15:10-14, 30). Je David i kitso: “Jekichobena nga tikjiʼndá; je ndáxkoan ñaki síkaʼnyi nachanna nga kjiʼndá nga njio”. Je David kʼoakitso ánni nga kiskiʼndáni. I kitso: “Totʼatsʼe je chjota xi totaon bena” (Sal. 6:6, 7). Nga totaon tsaʼya je David nʼio ba kisʼe kon kʼoa kiskiʼndá.
12. Tojo tso Salmo 56:8, jméni xi ñaki tsakʼéjngole kon je David.
12 Ningalani tse kjoa jaʼatojin David ñaki tsakʼéjngo kon nga tsjoake je Jeobá. Itso xi kiski: “Je Jeobá kjuinrʼoé nga tikjiʼndá” (Sal. 6:8). Xijekoan, kui kiski jmeni xi tso Salmo 56:8 c (tʼexkiai). Jmeni xi tso texto jebi bʼéjngoo tokoán nga tsjoakená Jeobá kʼoa nga mandosinle josʼe tokoán. Je David kʼoakitso nga je Jeobá yaa bʼéya jngo xjoa̱ je ndáxkoaan kʼoa jngoo libro bʼétʼa. Ñaki tsakʼéjngo kon nga kuenta kisʼin Jeobá je kjoa xi jaʼatojin kʼoa nga koanjinle jokisʼe kon kʼianga kjoañʼai tíjnajin.
13. Jmé xi koasenkaoná nga nda sʼe̱ ijngokʼani tokoán kʼiatsa ʼya xi tsakʼanachaná kʼoa tsa ʼya xi chʼao tsakʼé tokoán (kʼoati chótsenlai sén xi faʼaitʼa).
13 Xi bakóyaná. Bajin tjín tokuin tsa je chjota xi nʼio tsjoachai kui kʼoakisʼin xi chʼao tsakʼé tokuin kʼoa tsa tsakʼanachali. Tobʼelañá, tsa tsakʼanachali je chjoónli kʼoa tsa xʼinli, kʼoa tsa jeje̱ xi kuixankoai tsakai. Kʼoajin tiba tjín tokuin tsa tsín tije Jeobá tísíxánile miyoli kʼoa tsa je xíngi. Kataʼyala jokisʼe kon jngo ndsʼee nga kjaʼaí chjota kikao chjoónle. Itso: “Ñaki tokʼoakoanna nga kʼoakisʼin je chjoónna, kʼoasʼin kisikjaʼaitsjen nga tsín jme chjína, ba kisʼe tokoan kʼoa jti koanna”. Tsa ʼya xi tsakʼanachaná kʼoa tsa ʼya xi chʼao tsakʼé tokoán, je xi koasenkaoná nga nda sʼe̱ ijngokʼani tokoán kuinga si̱kjaʼaitsjenjiaan nga tsínkʼia tsjionkonná Jeobá. Je ndsʼee itsosa: “Je Jeobá alikui kʼoasʼín jonʼia xi chjota nga sakʼoa chʼanachalee xíngiaa. Je yaa tjen tíjnakaoná ngantsjai tojme kjoa xi kuitjátojiaan kʼoa tsínkʼia tsjiónkonná” (Sal. 37:28). Kuenta tʼiain nga nʼio tsjoakeli Jeobá. Ningalani ba tjín tokuin tʼatsʼe kjoa xi tibitjatojin, tikjaʼaitsjenjin nga mandosinle Jeobá xi tʼatsi (Rom. 8:38, 39). Ningalani ʼya xi totaon skoe̱li, tʼejngui tokuin nga nʼio tsjoakeli Jeobá.
Je libro xi tsʼe Salmo kʼoatso nga je Jeobá chrian tíjnale je xi nʼio aon tjío ni̱ma̱le (Chótsenlai párrafo 13)
14. Jméni xi tso Salmo 34:18 xi bʼéjngo tokoán.
14 Kʼiatsa ba tjín tokuin koasenkaoli jmeni xi kitso David ya Salmo 34:18 d (tʼexkiai). Kʼiatsa ʼya xi tsakʼanachali kʼoa tsa ʼya xi kui kʼoakisʼin xi chʼao tsakʼé tokuin, kuenta tʼiain nga kʼoatso texto jebi nga “je Jeobá chrian tíjnale je xi nʼio aon tjío ni̱ma̱le”. Je Jeobá kʼoati sʼín josʼín jngo nʼai, kʼianga be je ʼndíle nga tíkjiʼndá bʼangʼa kʼoa síkʼéjnajyo. Je Jeobá majinle josʼe tokoán nga kjoa tiyojiaan kʼoa kjitʼanangi basenkaoná nga nda katasʼe ngindiani tokoán. Kʼoa jmeni xi tso nga sʼin nichxin xi sʼa nroa kʼoati basenkaoná nga chókjoajinná je kjoa xi bitjatojiaan ndʼaibi (Is. 65:17).
CHJIʼNDÁÑÁ NGA NʼIO NIKJÁOJIAAN NGA CHʼIN KATʼANÁ
15. Ánni nga kiskiʼndáni Ezequías.
15 Kʼianga 39 nóle je rey Ezequías nʼio táo chʼin kiskatʼale. Jé profeta Isaías kisikasén Jeobá nga kʼoakitsole nga kuiyá (2 Rey. 20:1). Kʼianga kisʼejinle Ezequías nga tsín tikoa̱nndayani, kiskiʼndá kʼoa kʼoakitsole Jeobá nga katabasenkao (2 Rey. 20:2, 3).
16. Jósʼin tsakasenkao Jeobá je Ezequías.
16 Kʼianga tsakʼétsʼoa Ezequías tíkjiʼndá kaoni, je Jeobá kinrʼoéle kʼoa koanmake. Jé Isaías kisikasén ijngokʼa nga i̱ kitsole: “Tinrʼoele nga tibʼetsʼoanái, tiʼbeña nga tichjiʼndái, sindayale”. Je Jeobá kʼoakitsole Ezequías nga tsesa kʼoéjnakon kʼoa kʼoati kitsole nga kʼoasjentjai je naxinandá Jerusalén nga tsín je chjota asirio kuichosíkjeson (2 Rey. 20:4-6).
17. Jósʼin basenkaoná Jeobá kʼianga táo chʼin katʼaná (Salmo 41:3; kʼoati chótsenlai sén xi faʼaitʼa).
17 Xi bakóyaná. Kʼiatsa táo chʼin tjínná kʼoa tsa kʼoasʼin nikjaʼaitsjeen nga tsín tikoa̱nndayañá, kʼoéyanajmílee Jeobá jotjín tokoán ninga tínroajen kaoni ndáxkoaan nga kʼoakuixoán. Ya Biblia kʼoatso nga bakóná kjoamatokon je Jeobá kʼoa sínʼio tokoán nga kjoa bitjatojiaan (2 Cor. 1:3, 4). Ningalani tsín kjoaʼaxin Jeobá je kjoa xi tjínná ndʼaibi, koasenkaoná nga chókjoajinná (tʼexkiai Salmo 41:3). e Kui nganʼiotsjele síchjén nga tsjoáná nganʼio, nga tsjoáná kjoachjine kʼoa basenkaoná nga nda sʼe tokoán (Prov. 18:14; Filip. 4:13). Kʼoati basenkaoná nga kʼoatso nga kuicho nichxin nga tondiaa kjoaʼaxin je chʼin (Is. 33:24).
Je Jeobá nrʼoéná kʼianga bʼetsʼoalee, basenkaoná nga nda sʼe tokoán kʼoa tsjoáná nganʼio kao kjoachjine (Chótsenlai párrafo 17)
18. Jñánile texto xi basenkaoli kʼianga kjoa bitjatojin (chótʼai je recuadro “ Texto xi basenkaoná kʼianga ba sʼe tokoán”).
18 Tsakasenkao Ezequías jmeni xi kitsole Jeobá, kʼoati koasenkaoná tsanda ñá jmeni tso Biblia. Je Jeobá kui xá kitsjoaniná Biblia nga sinʼio tokoán kʼianga kjoa bitjatojiaan (Rom. 15:4). Jngo tichjaa xi África Occidental tsʼe me tokjitʼa kiskiʼndá kʼianga kisʼejinle nga cáncer tjínle. Itso: “Je texto xi nʼio tsakasenkaona kui Isaías 26:3. Ninga tsín kʼoakoa̱nná kʼoéndajiaan je kjoa xi bitjatojiaan, tojo tso texto jebi jé Jeobá basenkaoná nga nda sʼe tokoán kʼoa nga tsín tokui nʼio nikjáojiaan je kjoa xi bitjatojiaan”. A faʼaitsjen kʼali texto xi tsakasenkaoli kʼiatsa jme kjoa jesa kitjatojin.
19. Jósʼin kuiyoaa nichxin xi nroaján.
19 Nga nichxin fetʼa tiyoaa, sa tse sa tsee kjoa bitjatojiaan xi síkjiʼndáná. Tojosʼin kaʼyaa je choa̱le Ana, David kao rey Ezequías, je Jeobá kuenta sʼín nga chjiʼndá kʼoa majinle josʼe tokoán nga kjoaba tiyojiaan. Kuinga kʼoéyanajmínilee Jeobá jme kjoa xi tibitjatojiaan kʼoa jotjín tokoán. Tosi tonda si̱miyoaa je ndsʼee xi tjío ya jinjtín kʼoa tosi tonda kʼoéxkiaa Biblia nga̱ kui síchjén Jeobá nga basenkaoná. Tjínjngoo tokoán nga je Jeobá sichikontʼainná kʼiatsa chókjoajinná je kjoa xi bitjatojiaan, kʼoa jeme kjoaʼaxin ngayeje jmeni xi síkjiʼndáná (Apoc. 21:4). Kʼianga jeʼndenaxó koa̱n Sonʼnde, ñaki kjuinroajeen ndáxkoan jokji tsjoa sa̱tío tokoán.
KJOAJNDA 4 Jéní Jeobá xi koʼndana
a Isaías 63:9: “Jokjitse nga kjoaʼaon tsakatiojin kʼoati aon koanle tsanda je. Kʼoa je xi síkasén nga fikao énle kʼoasʼin tsakʼasjentjai. Kʼoa nga kʼoasikji kjoatsjoacha kao kjoamatokon tjínle, kʼoasʼin tsakatseyani, tsakʼasjentjai kʼoa kisikuindaa jokji nichxin jaʼato”.
b Hebreos 10:24, 25: “Kʼoa si̱kjaʼaitsjenjinnía xíngiaa nga jngójngoá, nga si̱nʼiojiaan xíngiaa, nga sʼe̱ná kjoatjaocha, kʼoa nga kʼoasʼiaan xá xi nda. 25 Likui si̱kʼéjnaa nga koa̱nñaa, josʼin nga tjín kʼa xi kʼoasʼin mangale, tonga kʼoénelee xíngiaa, tongisa kʼoasʼiaon josʼin nga jchao nga je nichxinbe nroachrian”.
c Salmo 56:8: “Kuenta tinʼiai nga to tsoʼbachjinga. Ya tʼeyai ndáxkoan je xjoa̱li. A tsí ya tjítʼa je libroli”.
d Salmo 34:18: “Je Jeobá chrian tíjnale je xi nʼio aon tjío ni̱ma̱le; bʼasjentjai xi jekisikinroajen kon”.
e Salmo 41:3: “Jé Jeobá tsjoánganʼiole nga chʼin tíjnasonkao nachanle; ji si̱kʼantjaiyai nachanle nga chʼin tjínle”.
