KJOAʼMIYA XI CHOTʼAYA 48
KJOAJNDA 97 Kjoabijnachon tjenkao je Énle Niná
Jmé xi bakóyaná nga kisinkjínya Jesús je nioxtila
“Jesús kitsole: An nía je nioxtila xi tsjoá kjoabijnachon. Je xi faʼaikonna nga an, ali kʼia koa̱nbaole” (JUAN 6:35).
XI TÍNCHJA̱NI
Jmé xi bakóyaná nga kisinkjínya Jesús je nioxtila kao jti̱ kʼianga kisikjen chjotankjín tojo tso ya Juan capítulo 6.
1. Jótso Biblia xi tʼatsʼe nioxtila.
KʼOATI nioxtila tsakjen chjota nichxin kjoatse (Gén. 14:18; Luc. 4:4). Kʼoa ya Biblia sakʼoa nioxtila síkʼaxki̱ kʼianga kui nchja̱ni tsojmi xi chinee (Mat. 6:11). Kʼoati nioxtila kisichjén Jesús kʼianga jao kjoaxkón tsakatío (Mat. 16:9, 10). Jngola koya chótʼayajiaan jmeni xi kisʼin Jesús tojo tso ya Juan capítulo 6 kʼoa kui jchaa jmé xi bakóyaná.
2. Kʼiáni nga jmi koanni chjota xi koanchjénle tsojmi xi kiskine.
2 Kʼianga jejetʼale chjotatjenngile Jesús nga kitsoyason, yaa kikao Jesús jngo ʼnde xi kjintʼa tíjna, xi tiya chrianni jña Betsaida ʼmi. Chitso tsakatioya nga jaʼatojinndá ya Galilea nga koaisíkjáya tsakai (Mar. 6:7, 30-32; Luc. 9:10). Tonga kʼianga kicho ʼnde jebi, jmi mani chjota xi jeya tjíokoyale. Je Jesús tsakakóyale Énle Niná kʼoa kisindayaa xi tjíomʼe. Kʼoa nga jekjimaxon, je chjotatjenngile Jesús kui kisikjaʼaitsjen jókoa̱nni xi ski̱ne ngatsʼi chjota xi kicho, nga̱ mejin tongatsʼi nga tsín jme xi yʼa xi ski̱ne kʼoa kjintʼa jñani koa̱n koaikatse tsojmi (Mat. 14:15; Juan 6:4, 5). Tonga jméni xi kisʼin Jesús.
JE JESÚS KISINKJÍNYA NIOXTILA
3. Jókitsole Jesús je chjotatjenngile kʼianga tsabe nga tsínle xi ski̱ne je chjota (kʼoati chótsenlai sén xi faʼaitʼa ya portada).
3 Je Jesús i̱ kitsole chjotatjenngile: “Likui machjén nga koai. Tʼailao nga jon xi ski̱ne” (Mat. 14:16). Ñʼai koanle nga kʼoatsakʼinle nga̱ 5,000 mani chjota, tsa kʼoéxki̱koaa je xtiʼndí kao yánchjín tochajinle 15,000 koanni ngatsʼi (Mat. 14:21). Je Andrés i kitso: “Jngo ti tíjna ibi, aon mani nioxtila sebadale kʼoa jao mani jti̱ yʼa. Jó tjín koa̱nle xonatjínbi, nga̱ nkjín mani” chjota (Juan 6:9). Cebada tjínle nioxtila xi yʼa je ti, choaa chjíle kʼoa me tokui tsakjén chjota nga kʼia, kʼoa je jti̱ xi yʼa tochajinle kixí kʼoa jnra. Ninga kʼoalani alikuijin koansonni je chjota xi kicho nga̱ nʼio nkjín mani.
Je Jesús kitsoyale Énle Niná chjota kʼoa kitsjoale jmeni xi koanchjénle (Chótsenlai párrafo 3)
4. Jméni xi bakóyaná Juan 6:11-13 (kʼoati chótsenlai sén xi faʼaitʼa).
4 Je Jesús kʼoakitsole chjota nga tsen tsen katabatio ya jinli̱ji̱ (Mar. 6:39, 40; tʼexkiai Juan 6:11-13 a). Ya Biblia kʼoatso nga je Jesús tsakʼétsʼoale Nʼaile nga kitsjoale kjoanda, nga̱ jé xokisʼin nga koannkjínya nioxtila kao jti̱. Koaan chjénngilee jokisʼin Jesús, títjonkjoanla kʼoétsʼoaa kʼianga kjesa bichijián, tsa toñá tiyoaa kʼoa tsa nkjín mañá. Kʼianga jetsakʼétsʼoa Jesús kʼoakitsole chjotatjenngile nga katasíkʼabíle ngatsʼi chjota je nioxtila kao jti̱ josaʼnda nga koanski. Kʼoati kitsole nga katabʼéxkó xi tsʼangi ánni nga tsín jme xi kuitsónni. Jebi kui bakóyaná nga tjínnele nda si̱chjén jme xi tjínná kʼoa nga lijme xi si̱kitsoán. Je xi xijchá ma koaan kui kjoakaonajmíni ʼndíxtile jmeni xi kisʼin Jesús, nga tjínnele kʼoetsʼoa, nga nda chjota koa̱n kʼoa nga tjotʼa jmeni xi tjínle.
Tikjaʼaitsjenjin jebi: “A fitjenngiña choa̱le Jesús, a bʼetsʼoaña nga kjesa kjenjian” (Chótsenlai párrafo 4)
5. Jókitso chjota kʼianga tsabe je kjoaxkón xi tsakatío Jesús, kʼoa jmé xi kisʼin Jesús.
5 Kʼianga tsabe chjota josʼin kitsoya Jesús kʼoa nga kjoaxkón tsakatío, kuijin kisikjaʼaitsjen tsa je profeta xi kisikasén Niná xi kinchja̱ni Moisés (Deut. 18:15-18). Kʼoasʼin kisikjaʼaitsjen nga nʼio nda koatexoma Jesús kʼoa nga tsjoále xi koa̱nchjénle naxinandá. Kuinga koanmenile rey kisikao (Juan 6:14, 15). Tsa kisijyolani Jesús nga rey koan, yajin tsakjajin tʼatsʼe política. Nga kui nichxin jé chjota romano kjinentsja chjota judío. Ningalani kʼoakitsole chjota, je Jesús alikui kisijyo nga rey kinikao, tosaa toxin ki kʼianga kʼoatsakʼinle. Jmé xi bakóyaná jokisʼin Jesús.
6. Jósʼin chjénngiaa choa̱le Jesús (kʼoati chótsenlai sén xi faʼaitʼa).
6 Ningalani tsín ʼya xi kʼoakuitsoná nga nioxtila si̱nkjínyaa, nga si̱ndayaa xi tjíomʼe kʼoa nga ñá koatexomalee, tonga tsakui nichxin kʼoakuitsoná chjota nga je kʼoainganʼiolee jngo chjotaxá xi bele kon nga nda koatexoma. Je Jesús nʼio nda choa̱ tsakʼéjnaná, alikui política tsakjajin kʼoa i kitso: “Je kjoatéxomana likui tsʼe i̱ sonʼndebi” (Juan 17:14; 18:36). Xi chjotale Cristo maa kʼoasʼin nikjaʼaitsjeen josʼin síkjaʼaitsjen Jesús kʼoa chjenngilee jokisʼin. Jé Chjotaxále Niná bʼainganʼiolee kʼoa ʼmiyalee chjota tʼatsʼe Chjotaxá jebi, kʼoa nijéñá nga katabatéxoma i̱ Sonʼnde (Mat. 6:10). Kataʼyalasa jméni xi bakóyaná kʼianga kisinkjínya nioxtila je Jesús.
Je Jesús nda choa̱ tsakʼéjnale chjotatjenngile nga tsín política kitsjonjin yaole, nijejinla chjota judío kʼoa nijejinla chjota romano tsakájta (Chótsenlai párrafo 6)
JÓSʼIN TSOYANILE NGA KISINKJÍNYA NIOXTILA
7. Jméni xi kisʼin Jesús kʼoa jókitso chjotatjenngile (Juan 6:16-20).
7 Kʼianga jekisikjen Jesús je chjota kʼoakitsole chjotatjenngile nga ya Capernaúm katafi, kʼoa yaa jñani tíjna nindo ki ánni nga tsín rey sikaoni je chjota judío (tʼexkiai Juan 6:16-20). b Kʼianga tjíoya chitso jngo jtsíntjao̱nʼio jaʼa. Je Jesús kijin nandá nga kikonle chjotatjenngile kʼoa kʼoakitsole Pedro nga kʼoati katafijin nandá (Mat. 14:22-31). Kʼianga jekicho Jesús ya chitso jña tjíoya chjotatjenngile koanxaan je jtsíntjao̱nʼio. Tokʼoakoanle chjotatjenngile kʼoa i kitso: “Xi ñaki kjoakixi, ji ní ʼndíle Niná” (Mat. 14:33). c Kʼianga tsabe nga kijin nandá Jesús, je chjotatjenngile kʼoakitso nga ʼNdíle Niná, tonga alikui kʼoakitso kʼianga kisinkjínya Jesús je nioxtila. Ánni. Je Marcos kʼoakitso nga tokoanxkónle chjotale Jesús kʼianga tsabe nga kijin nandá “nga̱ likui koanchoyale je kjoale nioxtila” kʼoa “xíjin ni̱ma̱le” (Mar. 6:50-52). Alikui koanjinle nga nʼio tse nganʼio kitsjoale Jeobá je Jesús nga koanle tsakatío kjoaxkón. Xijekoan, je Jesús kitsoya ijngokʼa tʼatsʼe nga kisinkjínya nioxtila, kʼoa nʼio tjínle kjoandosin jmeni xi bakóyaná.
8, 9. Ánni nga je Jesús kikásjaini chjotankjín (Juan 6:26, 27).
8 Je chjotankjín xi kisikjen Jesús tokui koanndosinle nga so̱kole jmeni xi ski̱ne. Kʼianga koannyaonni, je chjotankjín xi kisikjen Jesús kichokásjai ijngokʼa ya ʼnde jñani kisikjén. Kʼianga tsabe nga tsín tiya tjíoni Jesús kao chjotatjenngile, kui chitso xi ya Tiberíades nroani kikao nga ki ya Capernaúm nga kikásjai Jesús (Juan 6:22-24). Tonga alikui kui xá kikásjaini nga mele kjuinrʼoé jmeni xi kitsoya Jesús, tokui xi mele nga kʼoaile xi ski̱ne.
9 Kʼianga kiskajin chjotankjín je Jesús ya chrian Capernaúm, kʼoakitsokixile nga tokui mandosinle jmeni xi ski̱ne. Kʼoakitsole nga koanskini je nioxtila xi tsakjen, tonga jebi tokui xi “fitson”. Kʼoakitsole nga tosa kui katabásjai “je xi bichaa xi tíjnantsjai xi tsjoá kjoabijnachon ngantsjai” (tʼexkiai Juan 6:26, 27). d Kʼoati kitsole nga je Nʼaile tsjoá xi bichaa “xi tsjoá kjoabijnachon ngantsjai”. Kʼianga kʼoakitsole Jesús, kuijin kisikjaʼaitsjenjin jmé tsojmini xi bichaa xi koa̱n sikatíokon ngantsjai nichxin. Jmé xi kinchja̱ni Jesús nga kʼoakitso kʼoa jmé xi tjínnele kisʼin kʼianga tsakʼaile.
10. Jmé xi tjínnele sʼin chjota nga sʼe̱le kjoabijnachon xi tsínkʼia fetʼa.
10 Je chjota judío koanjinle nga tjínnele tjín xi sʼin nga kʼoaile je tsojmi xi bichaa xi tsjoá kjoabijnachon. Tochajinle kui kisikjaʼaitsjen nga tjínnele sitjoson kjoatéxomale Moisés. Tonga je Jesús i kitsole: “Jébi xá xi mele Niná, nga kʼoasʼin koa̱nkjainno xi tʼatsʼe je Cristo xi Niná kisikasén” (Juan 6:28, 29). Jé Niná kisikasén Jesús. Kʼoa nga koa̱n sʼe̱ná kjoabijnachon xi tsínkʼia fetʼa machjén nga koa̱nkjainná xi tʼatsʼe. Jesa kui kinchja̱ni Jesús xi tʼatsʼe jebi (Juan 3:16-18, 36). Nga koanskanni, kui kitsoya ijngokʼa jméni xi tjínnele sʼiaan nga sʼe̱ná kjoabijnachon xi tsínkʼia fetʼa (Juan 17:3).
11. Jósʼin tsakakó chjota judío nga tokui kisikjaʼaitsjen jmeni xi ski̱ne (Salmo 78:24, 25).
11 Je chjota judío alikui koankjainle jmeni xi kitsoya Jesús kʼoa nga je Niná kisikasén. I kitso: “Jméni choa̱ xi kʼoainajin, jméni nga kʼoasʼin jchasínijin, kʼoa koa̱nkjainnajin xi tʼatsi” (Juan 6:30). Kʼoakitso nga “maná” tsakʼaile chjotajchíngale kʼianga tsakʼejna Moisés, xi ya mangóson nioxtila (Neh. 9:15; tʼexkiai Salmo 78:24, 25 e). Kʼianga kʼoakitso tokui koanndosinle jmeni xi ski̱ne. Kuinga tsín kiskonanginile Jesús jmé xi kinchja̱ni kʼianga kui kisikʼaxki̱ “je nioxtila xi ngʼajmi” nroani xi ya mangóson “maná” xi tsjoá kjoabijnachon (Juan 6:32). Nga tokui kisikjaʼaitsjen jme xi ski̱ne alikui koanchoyale jmeni xi kitsoya Jesús. Jmé xi bakóyaná ñá jme xi kitso Jesús.
JMÉNI XI TÍTJON NIKʼÉJNAA
12. Jméni xi ngisa kitsjoale kjoandosin Jesús.
12 Ya Juan capítulo 6 kui bakóyaná nga je xi ngisa tjínle kjoandosin kuinga si̱tjosoán jmeni xi tsoná Jeobá kʼoa nga nda kuiyoaa ngixko̱n. Kui jebi xi ngisa kitsjoale kjoandosin Jesús kʼianga tsínkui kʼoakisʼin jmeni xi kitsole Na̱i (Mat. 4:3, 4). Kʼoati kui kinchja̱ni nga nʼio chjíle nga nda kuiyoaa ngixko̱n Niná kʼianga tsakakóya ya jngo jko̱nindo (Mat. 5:3). Kuinga machjénni nga si̱kjaʼaitsjenjiaan jótinʼia. Koaan i̱ kuixoán: “A kui ngisa mandosinna nga nda koatejna ngixko̱n Niná tikʼoajinni jme xi toʼan mena kʼoasʼian”.
13. 1) Ánni nga tsín chʼaotjínni nga bichaa. 2) Jméni xi kuenta sʼiaan tojo kitso Pablo (1 Corintios 10:6, 7, 11; kʼoati chótsenlai sén xi faʼaitʼa).
13 Alikui chʼaotjín nga nijélee Niná jmeni xi machjénná (Luc. 11:3). Ya Biblia kʼoatso nga tʼatsʼe Niná nroani nga tsjoa satío tokoán kʼianga nixá nga̱ yaa nroani nga sokóná xi chinee kao xi ʼyoá (Ecl. 2:24; 8:15; Sant. 1:17). Ninga kʼoalani, je Pablo kʼoakitsole chjotale Cristo nga tsín koa̱n kui ngisa kʼoailee kjoandosin. Kʼoakitsole jmeni xi koan kʼianga tsakatio chjota israelita ya nindo Sinaí. Kʼoakitsole nga tsín kʼoati katasʼín jokisʼin chjota israelita nga kui kisimekon “xi chʼao tjín” (tʼexkiai 1 Corintios 10:6, 7, 11). f Je Jeobá kitsjoale jmeni xi kiskine chjota israelita, tonga ya Biblia kʼoatso nga kui kisimekon “xi chʼao tjín” nga̱ tokui kini nga tsakjen (Núm. 11:4-6, 31-34). Kʼoati to yaole kini nga tsakjen, nga kite kʼoa nga kise kʼianga tsakʼétsʼoale je nra̱ja̱ʼndí xi tao̱nsine koanndani (Éx. 32:4-6). Kui choa̱ kisichjén Pablo kʼianga tsakájinkon chjotale Cristo xi kʼia tsakatio tongini nga kjesa nikjesonjin Jerusalén. Kʼoa kʼiaa nga nó 70 kinikjeson Jerusalén. Kʼoati to jetífetʼa nichxin xi tiyoaa ndʼaibi, kuinga machjénni nga kuenta sʼiaan jmeni xi kitso Pablo.
14. Tojo tso Biblia, jókoa̱nchon kʼianga jekʼoakoa̱n i̱ Sonʼnde josʼin mele Niná.
14 Kʼianga kʼoakitso Jesús nga si̱jélee Niná “nioxtila xi nichxin nga nyaon” machjénná, kʼoati kui kinchja̱ni jokoa̱nchon Sonʼnde kʼianga jekʼoakoa̱n josʼin mele Niná (Mat. 6:9-11). Jókoa̱nchon nga kui nichxin. Ya Biblia kʼoatso nga kui xi mele Niná nga nkjín koya tsojmi xi ma chine sʼe̱. Ya Isaías 25:6-8 kʼoatso nga nʼio ndakjoan tsojmi xi sʼe̱. Kʼoa ya Salmo 72:16 itso: “Nʼio sʼe̱ tsojmintje i̱ sonʼnde; toxkia sʼee ya jko̱nindo”. Tikjaʼaitsjenlai tsakui tibʼendai tsojmi xi nʼio tsjoachai, kʼoa tsakui tichinai tole yá xi kʼoéntjai (Is. 65:21, 22). Tonga ali toñájián xi kui kjoanda jebi sʼe̱ná.
15. Jméni xi tjínnele kʼuínyale je xi kjoaʼáyale (Juan 6:35).
15 (Tʼexkiai Juan 6:35). g Ninga tsín kisʼele kjoamakjain xi tʼatsʼe Jesús je chjota xi tsakjén nioxtila kʼoa xi kiskine jti̱ xi kisinkjínya Jesús, tsakui nichxin tjínkʼa xi jchaxkoaan kʼianga kjoaʼáyanile (Juan 5:28, 29). Tonga machjén nga koa̱njinle josʼin tsoyanile nga i̱ kitso Jesús: “An nía je nioxtila xi tsjoá kjoabijnachon. Je xi faʼaikonna nga an, ali kʼia koa̱nbaole”. Machjén nga sʼe̱le kjoamakjain nga kʼienntjainá Jesús. Nga kui nichxin kʼuínyale Énle Niná ngatsʼi chjota xi kjoaʼáyale kʼoa kao xtiʼndí xi kʼia jtsín ya sonʼnde chjotse. Ngisajin tsjoa sa̱tío tokoán nga kʼuínyalee Énle Niná chjota tikʼoajinni josʼe tokoán nga nioxtila bichaa, nga̱ kui xi ngisa chjíle nga nda kuiyoaa ngixko̱n Niná.
16. Jmé xi chótʼayajiaan ya kjoaʼmiya xi ijngo.
16 Tochoala xi kachotʼayajiaan jmeni xi tso ya capítulo 6 xi tsʼe Juan, tonga tsesa xi kitsoya Jesús kʼianga kui kinchja̱ni kjoabijnachon xi tsínkʼia fetʼa. Je chjota judío nʼio koanndosinle xi tʼatsʼe jebi, kʼoa kʼoati nʼio mandosinná tsanda ñá. Ya kjoaʼmiya xi ijngo tojo kui chótʼayajiaan capítulo 6 xi tsʼe Juan.
KJOAJNDA 20 Kinikasénní je ʼNdíli xi tsjoachai
a Juan 6:11-13: “Jesús kiskoé je nioxtila be. Kʼia nga jekitsjoale kjoanda Niná, kisikʼabíle chjotale. Kʼoa je chjotalebe kisikʼabíle je chjota xikʼa xi ya tjío. Tikʼoasʼinni kitsjoa jti̱, jo tjín koanmele. 12 Kʼia nga nda koanski chjotabe, Jesús kʼuikitsole chjotale: Tʼexkó xkoa̱le xi kabʼangi, jméni nga tsín kjuitsónsíni. 13 Tsakʼéxkó, tejaola ni̱si̱nyá koan je xkoa̱le je aon nioxtila sebada xi tsʼangi nga jetsakjen chjota”.
b Juan 6:16-20: “Kʼia nga jekoanxon, jitjojen chjotale, jicho ya ndai ndáchikon. 17 Jaʼasʼen jngo chitso, ki ya Capernaum, nroani xingoandá. Jekoannjio, tonga Jesús kje faʼaikonjinle. 18 Jo kitsinngʼa nandá nga je ntjao̱ xi nʼio jaʼa. 19 Kʼia nga jeki joni tsa jngo ora, chjotale tsabe Jesús nga tsoʼbason ndáchikon, tínroachrianle ya chitso. Jo nga kitsakjónle chjotale. 20 Tonga Jesús kʼuikitsole: An nía, ali jkonjion”.
c Tsa mesali jchai xi tʼatsʼe jebi, chótʼayajin je libro Jesús: el camino, la verdad y la vida, página 131 kao libro Ejemplos de fe, página 185.
d Juan 6:26, 27: “Jesús kʼuikitsole: Ñaki kjoakixi ñaki kjoakixi xi xinno, nga jon tibijnyisjaináo, alikuijin nga je choa̱ kiʼyao, tokui nga tsakicho nioxtila, kʼoa koanskio. 27 Tixáo ali totʼatsʼe je xi bichaa xi fitson, tonga tʼatsʼe je xi bichaa xi tíjnantsjai xi tsjoá kjoabijnachon ngantsjai, xi je ʼndíle Niná tsjoáno. Je ʼndíle xi Nʼainá Niná tsakʼéchoa̱”.
e Salmo 78:24, 25: “Nkjín kʼa kisitjon maná nga koan tsakjen; yaa tjen ngʼajmi kisitjonni. Nioxtilale ánkje tsakjen je chjota; kʼoakji kitsjoale jokji tjen koanskini”.
f 1 Corintios 10:6, 7, 11: “Je kjoabi xi kʼoakoan nga kisichoyaná, jméni nga tsín koa̱nxintakonsínilee tsojmi xi chʼao tjín, josʼin nga je koanxinkonle. 7 Ali kʼoajinsʼin ʼyaxkón xkóson, josʼin kisʼin kʼa nga je, josʼin nga tjítʼa: Tsakatio je naxinandábe nga tsakjen tsakʼi, kʼoa tsakasenndo nga kite. 11 Kʼoa je kjoabi kʼoakoanle nga kisichoyale, tonga kʼoasʼin kichjitʼa nga bakóyaná nga ñá xi jejaʼainená je nichxin xi fetʼani”.
