1. Ánni nga tsín fiyani jko̱ chjota nga koa̱n kuiyoaa ngantsjai nichxin.

 NʼIO nkjín chjota xi kosonnile jmeni xi kjine kʼoa xi ejercicio sʼín nga síkuinda yaole, nga̱ kui xi mele nga tse koatio. Ninga kʼoalani sʼín, be nga koa̱njchínga kʼoa nga kuiyá. Alikui fiya jko̱ nga koa̱n kuiyoaa ngantsjai nichxin. Tonga je Jesús kʼoakitso ya Juan 3:16 kao Juan 5:24 nga koa̱n koatio ngantsjai nichxin je chjota.

 2. Jótso ya Juan capítulo 6 xi tʼatsʼe kjoabijnachon xi tsínkʼia fetʼa (Juan 6:​39, 40).

² Ñandia kʼianga jngo kjoaxkón tsakʼéjna Jesús. Tojngo jao jti̱ kao nioxtila kisinkjínya kʼoa jmi chjota kisikjen. a Jméni xi kitso nga koannyaonni. Je chjotankjín kitjenngile saʼnda nga kicho ya Capernaúm, ndainandá xi kijna Galilea. Nga jeya tjío kʼoakitsole nga kjoaʼáyanile xi jekʼien kʼoa koaan koatio ngantsjai nichxin (tʼexkiai Juan 6:​39, 40). b Si̱kjaʼaitsjenla xíngiaa kao miyoná  xi jekʼien. Jmeni xi kitso Jesús kui bakóyaná nga kjoaʼáyanile xi jekʼien kʼoa nga koa̱n koatio ngantsjai nichxin. Chótʼayajinla jmeni xi tso Juan capítulo 6. Tjínkʼa xi ñʼai male nga majinle jmeni xi kitso Jesús.

 3. Jmé xi kitso Jesús tojo tso Juan 6:51.

³ Je chjotankjín xi kicho ya Capernaúm yaa kisingósonkao je nioxtila xi kitsjoale Jesús kao maná xi kitsjoale Jeobá je chjotajchíngale kʼianga tsakʼetsoma ya ʼndekixí. Ya Biblia je maná nioxtilale ngʼajmi tsole (Sal. 105:40; Juan 6:31). Kui tʼatsʼe maná kinchja̱ni Jesús kʼianga tsakakóyale chjota. Ningalani ya tjen ngʼajmi kitsaoni je maná, alikui tsakatiokon ngantsjai je chjota xi kui kiskine (Juan 6:49). Tijéni yaole xokitsole Jesús nga i̱ kitso: “Nioxtila xi ngʼajmi jaʼaini”, “nioxtila xi tsʼe Niná”, “xi tsjoále kjoabijnachon chjotasonʼnde” (Juan 6:​32, 33, 35). Nga koanskanni, je Jesús kʼoakitso nga tsín mangóson kao je maná xi tsakʼaile chjota israelita. I kitso: “An nía nioxtila xi tíjnakon, xi jitjojennia ngʼajmi. Tsa jngo xi je nioxtila koa̱kjen, kʼoéjnakonní ngantsjai” (tʼexkiai Juan 6:51). c Alikui koanjinle je chjota judío jme xi kitso Jesús. Kuijin kisikjaʼaitsjen ánni nga kʼoakitsoni nga ya ngʼajmi jaʼaini kʼoa nga ngisa chjíle je Jesús tikʼoajinni je maná xi kiskine chjotajchíngale. Nga katamajinle, je Jesús i kitso: “Je yaona jé nioxtila xi an tsjoa”. Tsa koa̱njinná ánni nga kʼoakitsoni Jesús, kʼoati koa̱njinná nga koa̱n kuiyoaa ngantsjai nichxin ñá kʼoa kao xíngiaa. Kataʼyala jmé xi kinchja̱ni nga kʼoakitso.

JÓSʼIN TSOYANILE “NIOXTILA XI TÍJNAKON” KAO YAOLE JESÚS

 4. Ánni nga tsín kisasen kʼanile jmeni xi kitso Jesús.

⁴ Nkjín xi tsín kisasenle kʼianga kʼoakitso Jesús nga kui yaole tsjoá nga koa̱n koatiokon chjota. Tochajinle kʼoasʼin kisikjaʼaitsjen nga kui yaole Jesús xi tjínnele ski̱ne (Juan 6:52). Tonga i kitsosale Jesús: “Tsa tsín tsa chi̱nao yaole ʼndíle chjota, tsa tsín tsa sʼio njínleje̱, tsínno kjoabijnachonjin” (Juan 6:53).

 5. Jómani ʼyaa nga tsín tsa ñaki njínle xi kinchja̱ni Jesús kʼianga kʼoakitsole je chjota nga njínle kataʼbi.

⁵ Nga tsakʼejna je Noé, je Jeobá kʼoakitsole chjota nga tsín koa̱n ski̱ne njín (Gén. 9:​3, 4). Nga jeki nichxin tojo kui kjoatéxoma tsakʼaile je chjota israelita. Kʼoatsakʼinle nga ni̱kʼien je xi njín ski̱ne (Lev. 7:27). Je Jesús kʼoakitsole chjota judío nga tjínnele sitjoson kjoatéxoma xi tsakʼaile Moisés (Mat. 5:​17-19). Ali jokjini Jesús nga kʼoakuitsole nga ñaki yaole xi ski̱ne kʼoa nga ñaki njínle xi skʼuí. Nga kʼoakitso Jesús tokui xi koanmele nga katamajinle chjota jméni xi tjínnele sʼin nga sʼe̱le kjoabijnachon ngantsjai (Juan 6:54).

 6. Jósʼin ʼyañá nga tojngo choa̱ kisichjén Jesús nga kʼoakitso nga chi̱ne yaole kʼoa nga sʼio njínle.

⁶ Tjín xi kitsoyanile nga kʼoakitso Jesús. Sa jejngo choa̱ kisichjén xi kisingósonkao yaole kʼianga tsakjákao je chjoón samaritana kʼianga i̱ kitsole: “Je xi skʼuí je nandá xi an tsjoale, nikʼiajin tikoa̱nfatinile. Je nandá xi an tsjoale, toyaa sʼejnajinle joni nandá xi  kjingʼajinle, xi tsjoá kjoabijnachon ngantsjai” (Juan 4:​7, 14). d Je Jesús ali tsakuijin xi kitsonile nga nandá tsjoále chjoón samaritana kʼoa jetondiaa kʼoéjnakon. Kʼoati tsínkui xi kitsonile nga ñaki njínle kʼoa nga ñaki yaole xi ski̱ne chjota xi Capernaúm tsʼe kʼoa jetondiaa koatio.

XI TSÍN MANGÓSON

 7. Jósʼin majin kʼale chjota jokitso Jesús ya Juan 6:53.

⁷ Jmeni xi kitso Jesús ya Juan 6:53 tʼatsʼe nga chi̱ne yaole kʼoa nga sʼio njínle, tjínkʼa religión xi kʼoasʼin makjainle nga kui xi kitso Jesús jmeni xi tjínnele sʼin je chjota kʼianga faʼaitsjenya Kjoabiyale Cristo. Kuijin kʼoasʼin síkjaʼaitsjenni nga̱ me kʼoati kitso Jesús kʼianga tsakjenkao pastrole (Mat. 26:​26-28). Chjota jebi kʼoatso nga tjínnele koakjen je nioxtila kʼoa skʼuí je vino ngatsʼi xi bichó kʼianga faʼaitsjenya Kjoabiyale Cristo. Tonga a kʼoatjín josʼin makjainle. Nʼio chjíle nga jchaa jokjoantjínni nga̱ millón mani chjota xi bichó nga xki̱ nó kʼianga faʼaitsjenya Kjoabiyale Cristo. Kataʼyala kʼa choa̱ xi tsín mangóson jotso ya Juan 6:53 kao jmeni xi kitso Jesús kʼianga tsakjenkao pastrole.

 8. Ánni nga tsín mangósonni nga jao choa̱ xi kanikʼaxkiaa (kʼoati chótsenlai sén xi faʼaitʼa).

 ⁸ Chótʼayajinla jméni xi tsín mangóson jokitso Jesús. Xi títjon, kʼiáni kʼoa jñáni kinchja̱ Jesús je én xi faʼaitʼa ya Juan 6:​53-56. Kʼiaa kʼoakitso ya Galilea nga nó 32, jngo nó tongini nga kjesa kjenkaojin pastrole ya Jerusalén. Xi majaoni, ʼyáni xokitsole. Jé xokitsole chjota xi Galilea tsʼe. Chjota jebi tokui koanndosinle nga koakjen, alikui koanndosinle xi tʼatsʼe Niná (Juan 6:26). Kʼianga tsín koanjinle jmeni xi kitso Jesús alikui tikoankjainnile xi tʼatsʼe, saʼnda tjínkʼa je chjotatjenngile xi kitsjionkon (Juan 6:​14, 36, 42, 60, 64, 66). Tonga alikui kʼoakoan jngo nó koanskanni nga nó 33 kʼianga tsakjenkao pastrole Jesús, je pastro alikui kitsjionkon ninga tsín koanjinle jmeni xi kitso Jesús. Alikui kʼoakisʼin jokisʼin chjota xi Galilea tsʼe. Je xi 11 pastro alikui jao kisatio kon nga ʼNdíle Niná je Jesús kʼoa nga ya ngʼajmi jaʼaini (Mat. 16:16). Kuinga i̱ kitsonile: “Jon nío xi tsakiyokaontsjaináo, kʼia nga chʼao kichotʼana” (Luc. 22:28). Nga jao choa̱ xi kaʼyaa kui bakóná nga tsínkui xi kitsonile Jesús ya Juan 6:53 nga tjínnele koakjen nioxtila kʼoa skʼuí je vino ngatsʼi xi kuicho nga faʼaitsjenya kjoabiyale. Tonga tjínsa choa̱ xi koasenkaoná nga ngisa nda koa̱njinná.

JÓSʼIN BASENKAONÁ JME XI KITSO JESÚS

 9. ʼYá tʼatsʼe kinchja̱ni jmeni xi kitso Jesús kʼianga tsakjenkao pastrole.

⁹ Kʼianga tsakjenkao pastrole Jesús kui kitsjoale nioxtila xi tsínle naʼyo̱san kʼoa kʼoakitsole nga yaole tsoyanile. Xijekoan, kitsjoale vino kʼoa i kitsole: “Jebi njínna ní xi tsʼe kjoachjotse xi kisʼenʼio” (Mar. 14:​22-25; Luc. 22:20; 1 Cor. 11:24). Ali tsa ngatsʼijin chjota xi ya tjíojin je kjoachjotse xi kisʼenʼio, tojé xi ya tjíojin je xi ya ngʼajmi koatexomakao Jesús (Heb. 8:​6, 10; 9:15). Nga kʼia alikui koanjinyejele jmeni xi kitsole Jesús. Tonga nga koanskanni, kao nganʼiotsje kitjoéjinni nga ya koatexomakao ya ngʼajmi (Juan 14:​2, 3).

10. Ánni nga tsín mangósonni jmeni xi kitsole Jesús je pastrole kʼianga tsakjenkao kʼoa jmeni xi kitsole chjotankjín ya Galilea (kʼoati chótsenlai sén xi faʼaitʼa).

¹⁰ Kʼianga tsakjenkao pastrole Jesús jngo jtín chjota kinchja̱ni, tonga nga kʼia kjesa majngojin jtín jebi, tojé pastrole xi tjíokao nga kui nichxin (Luc. 12:32). Tojé xi koan tsakjen nioxtila kʼoa koan tsakʼi vino je pastrole kao chjota xi skan kitjoéjin, xi tiya maxki̱kaoni jtín xi kinchja̱ni Jesús. Ngatsʼi chjota jebi yaa koatiokao Jesús ya ngʼajmi. Jmeni xi kitsole je pastrole kʼianga tsakjenkao alikui mangóson kao jmeni xi kitsole je chjotankjín ya Galilea. Nga kʼia nʼio nkjín chjota kinchja̱ni.

11. Jómani ʼyaa nga tsín totjíchoa̱ chjota kinchja̱ni Jesús ya Galilea.

¹¹ Jmeni xi kitsole Jesús je chjotankjín ya Galilea nga nó 32 jé xokitsole chjota judío xi koanmele nga nioxtila tsjoále. Tonga kui kʼoakitsole jmeni xi ngisa koasenkao tikʼoajinni je tsojmi xi chinee. Kui tsakjákaoni jmeni xi koa̱n sʼin nga koatio ngantsjai nichxin. Kʼoati kitsole nga kjoaʼáyanile je xi kuiyá kʼoa nga koa̱n koatio ngantsjai, kʼoa nkjín chjota xi kinchja̱ni nga kʼia.  Tonga jmeni xi kitso kʼianga tsakjenkao je pastrole totjíchoaa chjota kinchja̱ni. Je kjoanichikontʼain xi kinchja̱ni Jesús ya Galilea koaan tjoéle toʼya chjotani. I kitso: “Tsa jngo xi je nioxtila koa̱kjen, kʼoéjnakonní ngantsjai. Je yaona jé nioxtila xi an tsjoa [ . . . ] jméni nga koatiokonsíni chjotasonʼnde” (Juan 6:51). e

12. Jméni xi tjínnele sʼiaan nga so̱koná kjoabijnachon ngantsjai xi kinchja̱ni Jesús ya Galilea.

¹² Je Jesús alikui kʼoakitsole je chjota judío xi tsakatio ya Galilea nga tjoéle kjoabijnachon ngantsjai ngatsʼi chjota xi jekʼien kʼoa tsa jeje̱ xi sʼa jtsín. Tojé xi tjoéle kjoanichikontʼain jebi je xi koakjen je nioxtila, xi tsonile, je xi sʼe̱le kjoamakjain tʼatsʼe Jesús. Tjínkʼa chjota xi kʼoasʼin síkjaʼaitsjen nga tokui xi machjén nga koa̱nkjainle tʼatsʼe Jesús kʼoa jekuitjontjaile yaole (Juan 6:29). Ningalani nkjín koanni je chjota xi koankjainle tʼatsʼe Jesús ya Galilea, nga koanskanni alikui tichjotatjenngile koanni. Ánni kʼoakisʼinni.

13. Jméni xi tjínnele kisʼin je chjota tsa mele nga chjotatjenngile Jesús koan.

¹³ Me tongatsʼi chjotankjín xi kisikjén Jesús xi tokui xá kitjennginile nga tokjoatjao tsakjen kʼoa nga kisindaya Jesús je xi tjíomʼe kʼoa tokui koanmele kinrʼoé jmeni xi kisasenle. Tonga je Jesús kʼoakitsole nga tsín tokuijin xi machjén nga sʼin tsa mele nga chjotatjenngile koa̱n. Nga̱ tsín tokuijin xá jaʼaini Jesús  i̱ Sonʼnde nga tsjoále je chjota jmeni xi machjénle, tjínnele sitjoson chjota jmeni xi tsakakóya Jesús (Juan 5:40; 6:44).

14. Jméni xi tjínnele sʼiaan nga so̱koná kjoanda xi tjenkao nga kʼoasʼin kitsjoa yaole Jesús kʼoa tsakʼéjten njínle.

¹⁴ Je Jesús kʼoakitsole je chjotankjín nga tjínnele koako nga makjainle xi tʼatsʼe. Nga koa̱nkjainle nga totʼatsʼe Jesús nga koa̱n koatio ngantsjai, nga̱ totʼatsaanñá nga kitsjoa yaole kʼoa tsakʼéjten njínle. Tjínnele kisʼele kjoamakjain chjota judío kʼoa kʼoati machjén nga sʼe̱ná kjoamakjain tsanda ñá (Juan 6:40). Tojo tso ya Juan 6:53 tjínnele koa̱nkjainná nga je Jesús tsakʼéchjíntjainá ánni nga sʼe̱niná kjoabijnachon xi tsínkʼia fetʼa. Je kjoanda jebi koaan tjoéle toʼya chjotani (Efes. 1:7).

15, 16. Jósʼin basenkaoná jmeni xi tso Juan capítulo 6.

¹⁵ Jmeni xi tso ya Juan capítulo 6 binyakaoná ngatsʼiaa, nga̱ yaa tsoya jokji tsjoakená Jesús. Ya Galilea kisindayaa chjota xi chʼin tjínle, kitsoyale tʼatsʼe Chjotaxále Niná kʼoa kisikjen chjota (Luc. 9:11; Juan 6:​2, 11, 12). Je Jesús i kitsole: “An nía je nioxtila xi tsjoá kjoabijnachon” (Juan 6:​35, 48).

¹⁶ Je xi kjaʼaí barré kitsole Jesús alikui koa̱n koakjen je nioxtila kʼoa alikui koa̱n skʼuí je vino kʼianga faʼaitsjenya Kjoabiyale Cristo (Juan 10:16). Tonga tojo so̱kole je kjoanda xi tjenkao nga kitsjoa yaole Jesús kʼoa nga tsakʼéjten njínle tsa koa̱nkjainle nga ñá kʼienntjainá Jesús (Juan 6:53). Kʼoa je xi kjen nioxtila kʼoa ʼbi vino, kʼoasʼin bakóni nga ya tjíojin je kjoasʼendajin chjotse xi kitsole Jesús je pastrole kʼoa yaa koatexomakao Jesús ya ngʼajmi. Basenkaoná ngatsʼiaa jmeni xi tso ya Juan capítulo 6, ni ya ngʼajmi tjínná kjoachoya kʼoa ni i̱ Sonʼnde kuiyoaa. Kui tsoya nga tjínnele sʼe̱ná kjoamakjain tsa mená kuiyoaa ngantsjai nichxin.