KJOAʼMIYA XI CHOTʼAYA 50
KJOAJNDA 135 Je Jeobá itsoli: “Chjine katamai, ʼndítá”
Kuinyakoaa je ʼndíxtiná nga nʼio katasatío kjoamakjainle
“Jméni nga jchasínio jmeni xi Niná mele, jñale xi nda, xi sasénle” (ROM. 12:2).
XI TÍNCHJA̱NI
I̱ kjoaʼmiya jebi kui jchaa jósʼin xi xijchá ma nga koakoyale ʼndíxtile xi tʼatsʼe Niná nga nʼio katasatío kjoamakjainle.
1, 2. Jósʼin xi xijchá ma kʼiatsa kui skónangi je ʼndíxtile xi tʼatsʼe Biblia.
NKJÍN chjota xi kʼoatso nga tse xá tjenkao nga nijchá je xti, kuinga koa̱n kʼoakʼuínnilee xi xijchá ma nga nʼio nda tjíosʼín nga bakóyale xi tʼatsʼe Niná je ʼndíxtile (Deut. 6:6, 7). Kʼianga tosʼa majchínga je xti sakʼoa kui kjonangi ánni nga kʼoatsoniná Jeobá nga tjín jmeni xi tsín koa̱n kʼoasʼiaan, ánni nga kjoatéxoma tsjoániná kʼoa ánni kʼoatsoni Biblia nga tjín jmeni xi tsín sasénle Niná.
2 Kʼianga kʼoasʼin kjonangi je ʼndíxtiná tsakui nichxin kʼoasʼin si̱kjaʼaitsjeen nga tsínti makjainnile xi tʼatsʼe Niná. Tonga je xti toxá kjonangini nga̱ kui xi mele nga sʼe̱jngo kon (1 Cor. 13:11). Kuinga ndatjínni nga tosa kʼuínyalee jmeni xi kjonangi kʼoa nga jesoa katabe nga ñaki kʼoatjín kjoaixi jmeni xi tso Biblia.
3. Jmé xi chótʼayajiaan i̱ kjoaʼmiya jebi.
3 I̱ kjoaʼmiya jebi kui chótʼayajiaan jósʼin je xi xijchá ma nga kuinyakao ʼndíxtile nga koa̱nkjainle xi tʼatsʼe Niná kao jmeni xi tso Biblia. Ánni nga tjínnenile sitjoson ʼndíxti je kjoatéxoma xi faʼaitʼa Biblia kʼoa jméni xi sʼin nga koa̱nle kuitsoyale xi kjaʼaí josʼin makjainle. Kʼoati jchaa ánni ndatjínni nga kjonangi je xti kʼoa jméni xi koa̱n sʼin je xi xijchá ma nga kuitsoyale ʼndíxtile josʼin makjainná.
KUINYAKOAA ʼNDÍXTINÁ NGA KATAMAKJAINLE XI TʼATSʼE NINÁ KAO JMENI XI TSO BIBLIA
4. Jméni xi sakʼoa síkjaʼaitsjen je ʼndíxti, kʼoa ánni.
4 Xi xijchá maa ʼyañá nga tsín tsa to jemakjainná xi tʼatsʼe Niná kʼianga tsiaan. Kuinga machjénni nga kuisenkoaa je ʼndíxtiná nga katamakjainle xi tʼatsʼe Niná. Je xti sakʼoa i̱ tso xi síkjaʼaitsjen: “Jósʼin ʼbeña nga tíjna Niná. A koaan koa̱nkjainna jme xi tso Biblia”. Je Biblia kʼoatso nga ñá xi chjotale Cristo maa machjén nga si̱jinlee yaoná jmeni xi chotʼayá kʼoa ndakjoan kjoásjaiyaa jotjínni je Énle Niná (Rom. 12:1; 1 Tes. 5:21). Jósʼin kuinyakoaa ʼndíxtiná nga nʼio katasatío kjoamakjainle.
5. Xi xijchá mao, jósʼin kuinyakao je ʼndíxtino nga koa̱nkjainle jme xi tso Biblia (Romanos 12:2).
5 Tinyakao nga katabe nga ñaki kʼoatjín jme xi tso Biblia (tʼexkiai Romanos 12:2). a Kʼiatsa jme xi skónangi je ʼndíxtino tʼinyalao nga jesoa katabásjaiya kʼoa kui katasíchjén je Índice de las publicaciones Watch Tower kao Xo̱n xi síchjén je testigole Jeobá nga jme xi básjaiya. Kʼianga kui xo̱n jebi sichjén koaan ya koasjai jñani “Je Biblia” tso, xijekoa̱n, ya jñani “Tʼatsʼe Niná kinroani Biblia” tso, yaa tsoya nga tʼatsʼe Niná jaʼaini je Biblia ningalani chjota kiski (1 Tes. 2:13). Kʼoati koa̱n koasjaiya xi tʼatsʼe naxinandá Nínive. Tjínkʼa chjota xi kʼoakitso nichxin kjoatse nga tsínkʼia kisʼejna naxinandá xi kʼoatsakʼin. Tonga kʼiala nga nó 1850 koansjai xkoa̱le naxinandá jebi kʼoa kʼiaa tsaʼyale jñani kisʼejna. Jebi kui bakó nga ñaki kʼoatjín jmeni xi tso Biblia (Sof. 2:13-15). Kʼoati koa̱n kjoásjaiyao ya Xo̱n xi Bájinkonná xi tsʼe sá noviembre nó 2021 ya jñani “A ʼyaní” tso, kui tsoya josʼin kitjoson je én xi tongini kinokjoa nga kinikjeson naxinandá Nínive. Kʼianga skoe̱ ʼndíxtino jotso je xo̱n xi bʼasje naxinandále Niná kʼoa jotso je xo̱n xi kjio ngisaa koa̱nkjainle jme xi tso Biblia.
6. Jósʼin kuinyakao xi xijchá ma je ʼndíxtile nga skoe̱ nga ñaki kʼoatjín jme xi tso Biblia. Jngo choa̱ tʼejnai (kʼoati chótsenlai sén xi faʼaitʼa).
6 Tinyakao nga katabe je choa̱ xi bakó nga ñaki kʼoatjín jme xi tso Biblia. Tjasjailao kʼiani nga chja̱kaonajmíño xi tʼatsʼe Niná. Tobʼelañá, kʼiatsa ya titsomao jñani kjintje naxó, tsa jngo video tichotsenlao kʼoa tsa ya koanngín chotsaon ya museo xi tíjna Betel. Koaan kui chja̱kaonajmíño nga ñaki kʼoatjín jmeni xi bakóya Biblia. Tobʼelañá, koaan kʼuínyalao tʼatsʼe la̱jao̱ xi moabita ʼmi. La̱jao̱ jebi jejan jmi nó tjínle kʼoa kui faʼaitʼa jaʼaínle Jeobá, yaa tíjna ya París (Francia) jñani Museo del Louvre ʼmi. Jngo copiale la̱jao̱ jebi tíjna jña tjen sʼendiaanile xále Niná ya Warwick (Nueva York), jñani tsoya tʼatsʼe Biblia kao jaʼaínle Niná. Yaa la̱jao̱ jebi faʼaitʼa nga kontra tsakʼejnale naxinandá Israel je rey xi Moab tsʼe, xi Mesá tsakʼin, kʼoa mangóson jmeni xi tso Biblia kao jmeni xi faʼaitʼa la̱jao̱ jebi (2 Rey. 3:4, 5). Nʼio sa̱tío kjoamakjainle ʼndíxtino nga jesoa skoe̱ nga ñaki kʼoatjín jmeni xi tso Biblia (tingósonkoai 2 Crónicas 9:6).
Tinyakao ʼndíxtino nga katamakjainle xi tʼatsʼe Niná kʼoa tjasjaiyao je choa̱ xi bakó nga ñaki kʼoatjín jmeni xi tso Biblia (Chótsenlai párrafo 6)
7, 8. 1) Jméni xi bakóyaná jokjoan jmeni xi tjín. Jngo choa̱ tʼejnai (kʼoati chótsenlai sén xi faʼaitʼa). 2) Jméni xi koa̱n sikjaʼaitsjenjin je ʼndíxti nga sʼe̱jngo kon nga Niná kisinda jmeni xi tjín.
7 Kʼoatʼinlao nga kuenta katasʼín jme xi kisinda Jeobá. Kʼiatsa jinjñá titsomao kʼoa tsa ya tinixáo jñani jñá kji, takolao ʼndíxtino jmeni xi tjín kʼoa kʼoatʼinlao nga kuinga kʼoakjoanni nga nʼio chjine je xi kisinda. Tobʼelañá, je chjota científico jenkjín nó nga kui tjíokotʼayason nga totsen tjínle jokjoan nga jngó jngó xi koannda kʼoa nga tjínkʼa xi tjíotsʼótji kjoan. Jolani josʼin tjío niño, jokjoan xjoa̱le xkoá, jokjoan kʼa xka̱le yá kʼoa josʼin nya tochole girasol. Je chjota científico xi Nicola Fameli ʼmi kʼoatso nga sa nkjín sa nkjín ma josʼin bʼétji kʼianga maxki̱ je xi tjíotsʼótji kjoan. b
8 Yaa ndʼiaskuela sakóyale xti josʼin tjío kʼoa josʼin síxá jmeni xi tjín. Tobʼelañá, joma je xkótsʼi̱nle yá, kʼianga bʼéjtsʼén kjaʼaí jtsʼén nroatʼangáni je xka̱ntsja kʼoa kʼoasʼin mankjínyani xka̱ntsja josaʼnda nga sʼejna tsejnga tsejnga je yá. Nkjínsa jmeni xi tjín xi kʼoati ma. Kʼiatsa sikjaʼaitsjenjin ʼndíxti ʼyáni xi kisinda nga kʼoamani, sʼe̱jngo kon nga je Niná kisinda ngayeje jmeni xi tjín (Heb. 3:4). Kʼianga sʼa kjimajchínga ʼndíxtino, koaan kʼuínyalao ánni nga nʼio chjínile nga nitjosoán kjoatéxomale Niná. Koaan i̱ kʼuínlao: “Kʼiatsa je Niná kisindaná, a tsí ngisa be jmeni xi tjínnele sʼiaan nga ndasʼin kuiyoaa”. Koaan kʼuínyalao nga kui xá kijnani Biblia nga kuitsoyaná jme xi sʼiaan nga tsjoa sa̱tío tokoán.
NASA, ESA, and the Hubble Heritage (STScl/AURA)-ESA/Hubble Collaboration
ʼYáni xi kisinda jmeni xi tjín (Chótsenlai párrafo 7, 8)
TʼINYALAO ÁNNI NGA NʼIO CHJÍNILE NGA NITJOSOÁN KJOATÉXOMALE NINÁ
9. Ánni nga sakʼoa kui kjonangini je xti tsa ndatjín nga si̱tjosoán jotso Biblia.
9 Kʼiatsa kʼoakuitso ʼndíxtino ánni nga kui si̱tjosonñá jotso Biblia, tikjaʼaitsjenjion ánni nga kui kjonangini. A kuinga tsín makjainle jmeni xi tso Biblia axo kuinga tsín be josʼin kuitsoyale xi kjaʼaí kʼianga kui chjonangile xi tʼatsʼe Biblia. Xi kuinyakao ʼndíxtino nga koa̱njinle ánni nga nʼio chjínile nga si̱tjosoán jotso Biblia kuinga skótʼaya je libro Koaan nda kuiyoaa ngantsjai nichxin. c
10. Jósʼin kuinyakao xi xijchá ma je ʼndíxtile nga katasímiyo Jeobá.
10 Tinyakao nga katasímiyo je Jeobá. Kʼianga kʼuínyalao ʼndíxtino, tichjaon je kjoachjonangi kao choa̱ xi faʼaitʼa je libro Koaan nda kuiyoaa ngantsjai nichxin ánni nga jchaño josʼin síkjaʼaitsjen kʼoa jotjío kon (Prov. 20:5). Tobʼelañá, ya kjoaʼmiya 8 yaa síngósonkao Jeobá jngo miyo xi kʼoatsoná nga kui xi ndatjín kʼoasʼiaan ánni nga tsínkui xi chʼaotjín ska̱jinñá. Kʼianga jekʼoéxkiao jmeni xi tso 1 Juan 5:3, koaan i̱ tʼinlao je ʼndíxtino: “Nga miyoná mani Jeobá, jósʼin tjínnele jchatokoán jmeni xi tsoná”. Kʼiatsa kʼoasʼin kuinyakao ʼndíxtino, koa̱njinle nga kuinga tsjoakená Jeobá nga tsjoániná kjoatéxoma (Is. 48:17, 18).
11. Jósʼin kuinyakao xi xijchá ma je ʼndíxtile nga sitjoson je kjoafaʼaitsjen xi tsjoá Biblia (Proverbios 2:10, 11).
11 Tʼinyalao josʼin basenkaoná nga nitjosoán je kjoafaʼaitsjen xi tsjoá Biblia. Kʼianga kʼoéxkiao Biblia kʼoa tsakuije̱ folleto Nyaon nyaon chótʼayajiaan je Biblia, tʼinyalao ʼndíxtino josʼin tjíobinyakaono nga tinitjoson je kjoafaʼaitsjen xi tsjoá Biblia. Kʼoatʼinlao jokji kjoanda tjenkao kʼianga nda nixá kʼoa nga tsín chʼanachaa (Heb. 13:18). Kʼoati tʼinyalao nga tsín nanda tjochʼinná kʼoa nga nda satío tokoán nga mangíntjenngiaa je kjoafaʼaitsjen xi tsjoá Biblia (Prov. 14:29, 30). Tsa kʼuínyalee ʼndíxtiná je kjoanda xi tjenkao nga nitjosoán jme xi tso Biblia kʼoati koa̱nmele sitjoson tsanda je (tʼexkiai Proverbios 2:10, 11). d
12. Jósʼin tjíobinyakao ndsʼee Steve je tile nga katamajinle jokji chjíle nga nitjosoán je kjoatéxoma xi tsjoá Jeobá.
12 Jngo ndsʼee xi Steve ʼmi, xi Francia tsʼe, kʼoatso josʼin tjíobinyakao tile xi Ethan ʼmi nga katamajinle nga kuinga tsjoakená Jeobá nga tsjoániná kjoatéxoma. Itso: “I ʼmilaijin tinajin: Ánni nga kui xi menile Jeobá nga si̱tjosoán je kjoatéxomale. Jósʼin bakó kjoatéxomale nga tsjoakená. Kʼoa jósʼin kuiyoaa tsa tsínlani si̱tjosoán kjoatéxomale”. Nga kʼoasʼín je ndsʼee, tísítjoson tile jotso kjoatéxomale Jeobá. Itsosa je ndsʼee: “Kui xi menajin nga katamajinle tinajin nga ngisa chjíle je kjoachjine xi tsjoáná Niná tikʼoajinni je kjoachjine xi tjín sonʼnde”.
13. Jósʼin kuinyakao xi xijchá ma je ʼndíxtile nga sitjoson jotso Biblia. Jngo choa̱ tʼejnai.
13 Tʼinyalao nga katasítjoson jotso Biblia. Jósʼin kʼuínyalao ʼndíxtino tsa kʼoakʼuínle ya ndʼiaskuela nga jngo libro katabʼéxkia kʼoa skan katatsoya ijngokʼa jmeni xi tso. Tonga tsakui síkʼaxki̱ libro jebi je chjota xi kui kʼoasʼín jmeni xi jtike Jeobá, jolani kjoachajngi kao kjoatsʼen. Kʼoa tsa kʼoatso ya libro nga tsín chʼaotjín nga kʼoanʼia. Tsa kʼoalani, koaan kʼoakʼuínlao ʼndíxtino jósʼin síkjaʼaitsjen Jeobá nga kʼoasʼín chjota (Prov. 22:24, 25; 1 Cor. 15:33; Filip. 4:8). Kʼianga koa̱njinle nga nʼio chjíle nga nitjosoán jotso Biblia, koaanle kuitsoyale maestrole kao xti xi ñatjen tjíotsoma skuela xi tʼatsʼe Jeobá.
TINYAKAO ʼNDÍXTINO NGA KOA̱NLE KUITSOYA JOSʼIN MAKJAINLE
14. Kʼiáni nga ñʼai male je xti nga tsoya josʼin makjainle, kʼoa ánni.
14 Tjínkʼa xti xi tsokjón kʼoa tsín tsoya josʼin makjainle ya ndʼiaskuela. Tobʼelañá, alikui tso kon nga tsoya jotjínni xi tʼatsʼe evolución kʼianga kui sakóyale. Nga̱ je maestro kʼoasʼin bakóya nga ñaki kʼoatjín xi tʼatsʼe evolución. Jósʼin kuinyakao xi xijchá ma je ʼndíxtile nga koa̱nle kuitsoya josʼin makjainle.
15. Jméni xi kuinyakao je xti nga sʼe̱jngo kon nga ñaki kʼoatjín jme xi makjainle.
15 Tinyakao nga katasʼejngo kon nga ñaki kʼoatjín jme xi makjainle. Je xti alikui tjínnele soa koa̱nle nga tʼatsʼe Niná makjainle (2 Tim. 1:8). Tjínkʼa chjota científico xi tsín makjainle nga tojbi tsʼatsen jme xi tjín. Nga be josʼin síxá kʼoa jokjoan jmeni xi tjín, majinle nga Niná kisinda kʼoa tsín makjainle xi tʼatsʼe evolución ningalani kui sakóya ya ndʼiaskuela. Ngisaa sʼe̱jngo kon je xti kʼiatsa koasjaiya jméni xi tjíobinyakao je ndsʼee kao tichjaa nga makjainle nga Niná kisinda jmeni xi tjín. e
16. Jósʼin koa̱n kuinyakoaa je ʼndíxti nga koa̱nle kuitsoya nga Niná kisinda jme xi tjín (1 Pedro 3:15; kʼoati chótsenlai sén xi faʼaitʼa).
16 Tinyakao nga koa̱nle kuitsoya nga Niná kisinda jme xi tjín (tʼexkiai 1 Pedro 3:15). f Kʼianga kʼuínyalao ʼndíxtino tjasjaijion ya jw.org jñani “Los jóvenes preguntan” tso, kʼoa xijekoa̱n, tjasjao jñani “¿Creación o evolución?” tso. Kʼoatʼinlao nga katakjoéjin jñánile xi mele kuitsoya nga tíjna jngo Niná xi kisinda jmeni xi tjín kʼoa nkjín kʼa chótʼayao jokoa̱n kuitso. Kʼoatʼinlao nga tsínkui katafáotiyani kao xti xi ñatjen tjíoma skuela. Tonga tsa nrʼoé je xti kʼoa tsa mele kuinchja̱najmí kʼoatʼinlao nga kui choa̱ xi choa ñʼai katasíchjén. Tobʼelañá, tsa i̱ kuitso je xti: “Kje ʼbejian Niná, tokʼiala koa̱nkjainna tsa xkoan skoeña”. Koaan i̱ kuitsole: “Tikjaʼaitsjenlai tsa ya jinjñájchá titomjai kʼoa tsa jngo ndʼia jchai xi ya tíkijna, kʼoajinsʼin si̱kjaʼaitsjain nga tjín xi tsakʼénda. Jmeni xi tjín ngʼajmi kao Sonʼnde tjín xi kisinda”.
Kʼianga kʼuínyalee xi tʼatsʼe Niná je xti xi ñatjen mangián skuela kui chja̱kaonajmíñá xi ngotjo koa̱njinnile (Chótsenlai párrafo 16, 17) g
17. Jósʼin kuinyakao xi xijchá ma je ʼndíxtile nga koa̱n kuitsoyale xi kjaʼaí jmeni xi bakóya Biblia. Jngo choa̱ tʼejnai.
17 Tinyakao nga katatsoyale xi kjaʼaí jme xi tsoya Biblia (Rom. 10:10). Kʼianga ʼmiyalee Biblia chjota yaa mangóson tsa jme xi mená si̱kjanee. Ñʼai maná nga tosʼa títjon nikjanee tsa jmeni, tonga nga jefi nichxin bijbini maná kʼoa nda noʼyale jme xi nikjanee. Kʼoati ma kʼianga sʼa chjakaonajmí títjoán chjota xi tʼatsʼe Niná, kui títjon kʼoaʼmilee jmeni xi choa ñʼai tíjna. Je xti koaan i̱ kuitsole je xti xi ñatjen tjíoma skuela: “A ʼyaní nga je ingeniero kui kjenngile jokjoan je cho̱ kʼianga jme xi sínda. Koakolale video xi kui tsoya”. Kʼoa koaan kui sichjén video xi ʼmi “A tjín xi kisinda”. Kʼoa xijekoa̱n, i̱ kuitsole: “Tsa chʼasjengʼa je chjota científico nga toya kjenngile jokjoan tsojmi xi tjín kʼianga jme xi sínda, ʼyá xi bʼasjengʼa je xi kisindakjoanni tsojmi jebi”. Kʼiatsa kʼoasʼin koakoyale je xti xi ñatjen fi skuela tsakui nichxin koa̱nmesale skoe̱ jókjoantjínni xi tʼatsʼe Niná.
TOSI TONDA TINYAKAO ʼNDÍXTINO NGA NʼIO KATASATÍO KJOAMAKJAINLE
18. Jósʼin kuinyakao xi xijchá ma je ʼndíxtile nga tosi tonda nʼio sa̱tío kjoamakjainle.
18 Nichxin xi tiyoaa ndʼaibi nʼio nkjín chjota xi tsín makjainle xi tʼatsʼe Jeobá (2 Ped. 3:3). Xi xijchá mao, kʼianga chótʼayao Biblia kao ʼndíxtino, kʼoatʼinlao nga jesoa katakotʼaya ánni nga koa̱nkjainnile jme xi tso Biblia kʼoa sitjosonni je kjoatéxomale Niná. Tinyakao nga katasíkjaʼaitsjenjin kʼoa nga kuenta katasʼín jmeni xi kisinda Jeobá. Tinyakao nga katamajinle josʼin tíbitjoson je én xi tongini kinokjoa xi faʼaitʼa Biblia. Ñatjen tʼetsʼoao kʼoa tʼetsʼoantjao ʼndíxtino. Jé Jeobá sichikontʼainno nga kuinyakao nga nʼio sa̱tío kjoamakjainle (2 Crón. 15:7).
KJOAJNDA 133 Je Jeobá si̱xálee kʼianga sʼa xtiaa
a Romanos 12:2: “Ali kʼoajinsʼin mangínkao yaono jo tjín kjoa sonʼndebi. Katabʼantjaiyao yaono nga koa̱nchjotseyanda ngijngokʼani kjoafaʼaitsjenno, jméni nga jchasínio jmeni xi Niná mele, jñale xi nda, xi sasénle, xi ñaki tjíjngo”.
b Kʼiatsa mesali jchai xi tʼatsʼe jebi, tjasjai ya jw.org je video xi ʼmi Las maravillas de la creación revelan la gloria de Dios: Patrones de la naturaleza.
c Kʼiatsa jejetʼale nga tjíokotʼaya ʼndíxtino je libro Koaan nda kuiyoaa ngantsjai nichxin, koaan ijngokʼa chótʼayajin kʼao je kjoaʼmiya xi faʼaitʼa ya sección 3 kao 4, xi kui nchja̱ni je kjoatéxoma xi faʼaitʼa Biblia.
d Proverbios 2:10, 11: “Kʼianga tsjoacha koai̱n je kjoachjine kʼoa tsjoachai koai̱n je kjoankjíntokon, 11 koasenkaoli nga nda si̱kjaʼaitsjain kʼoa sʼeeli kjoamajintokon”.
e Chótʼai je ¡Despertad! xi tsʼe sá septiembre nó 2006, jñani tso: “Por qué creemos que hay un Creador”. Kao folleto El origen de la vida. Cinco cuestiones dignas de análisis. Kʼoati tjasjai ya jw.org je video xi nkjín mani, xi faʼaitʼa jñani tso: Josʼin síkjaʼaitsjen chjota jña jaʼaini kjoabijnachon.
f 1 Pedro 3:15: “Tonga jajin ni̱ma̱no jchaxkón Niná xi Nainá. Kao kjoandʼé kao kjoaxkóntakon tiyondao ngantsjai, nga koa̱n kuixónyalao nga jngójngó xi skónangiyano xi tʼatsʼe kjoa xi tichoyalao”.
g XI TÍNCHJA̱NI SÉN XI FAʼAITʼA: Jngo ti xi kui tíbakóle je ti xi ñatjen fi skuela je video xi ʼmi: “A tjín xi kisinda”.
