Je Pablo i kitsole Timoteo, xi kʼoati chjotajchínga sʼin tíjna: “Bʼenele ngixko̱n Niná kao Nainá Jesucristo kao ánkje xi kitjoejin, nga tʼejintakuin ngayije kjoabi. Nijmejin kjoa xi tongini kʼoéndajin, kʼia nga kje tsín kjoakixi. Niʼyajin chjota xi chja̱ʼajin nga si̱sinlai” (1 Tim. 5:21).

Jela si̱kʼaxkiaa xi tsín je tínchja̱ni. Alikui je nchja̱ni xi 144,000 mani. Kʼianga kʼoakitsole Pablo je Timoteo kjesa ʼya chjotale Cristo faʼáyajinle ya ngʼajmi. Kjesa faʼáyajinle ya ngʼajmi je pastro kao chjotale Cristo xi ngikʼa. Kuinga kʼoabixónsíñá nga tsín je nchja̱ni “ánkje xi kitjoejin” xi bʼaxki̱ (1 Cor. 15:​50-54; 1 Tes. 4:​13-17; 1 Juan 3:2).

Kʼoati tsín je nchja̱ni ánkje xi yátsʼi̱n tsakinyále Niná kʼianga nichxinle Noé. Je ánkje jebi jé Na̱i kijtakao, kuinga sénnichxin xi chʼaokjoan tsakʼinni kʼoa kontra tsakatiole Jesús (Gén. 6:2; Luc. 8:​30, 31; 2 Ped. 2:4). Nichxin xi nroaján 1,000 nó nga ndi̱tja̱n sikatíoʼya Jesús. Xijekoa̱n, tondiaa ni̱kʼien kao Na̱i (Jud. 6; Apoc. 20:​1-3, 10).

Je “ánkje xi kitjoejin” xi kisikʼaxki̱ Pablo, jé nchja̱ni ánkje xi kixi fitʼale Niná nga̱ kʼoatso ya 1 Timoteo 5:21 nga ya tjíokao Niná kao Jesús.

Jmi mani ánkje xi kixi fitʼale Niná (Heb. 12:​22, 23). Kjaʼaí kjaʼaí xá bʼaile je ánkje (Apoc. 14:​17, 18). Tobʼelañá, ñandia nga 185,000 mani chjotakjoajchán asirio kisikjeson xi tojngo ánkje (2 Rey. 19:35). Kʼoa je Jesús kʼoakitso nga sikasén “ánkjele, kʼoa kʼoexkójin kjoatéxomale ngʼajmi ngayije xi bʼétsʼia kjoasi, kʼoa je xi kjoatsʼantjaikjoa sʼín” (Mat. 13:​39-41). Tsakui nichxin kjaʼaí ánkje sikasén nga “kʼoexkó” je xi kitjoéjin nga ya ngʼajmi koai (Mat. 24:31). Kʼoati tjío je ánkje xi kui xá tsjoále Niná nga ñá sikuindaná tojo tso Salmo 91:11 (Mat. 18:10; tingósonkoai Mateo 4:11 kao Lucas 22:43).

Tojosʼin tiʼyaa, je “ánkje xi kitjoejin” xi bʼaxki̱ ya 1 Timoteo 5:21 tsakui nichxin je nchja̱ni ánkje xi kui xá tjínle nga sikuinda jtín. Jmesani xi kitso Pablo nga kiski capítulo 5 xi tsʼe 1 Timoteo, kui kinchja̱ni tʼatsʼe xi chjotajchínga sʼin tjío kʼoa kʼoakitsole je chjotale Cristo nga katabakóle kjoaxkóntokon. Kʼoa je xi chjotajchínga sʼin tjío kʼoakitsole nga tsín koa̱n ʼya xi kjoaʼajin kʼoa nga tsín xitso xiská kʼoasʼin tsa jmeni. Nga̱ jé Niná xi kʼoasʼin koanmele nga kʼoakitso Pablo nga je xi chjotajchínga sʼin tjío yaa tjío “ngixko̱n Niná kao Nainá Jesucristo kao ánkje xi kitjoejin”. Kui xi tsonile nga je Jeobá kao Jesús kʼoa kao “ánkje xi kitjoejin” tjíobe josʼin tjíosíxá xi chjotajchínga sʼin tjío nga síkuinda je jtín. Kʼoasʼin ʼyañá nga tjío ánkje xi kuenta tjíosʼín jmeni xi ma nga jngó jngó jtín. Jolani nga síkuindaná, jé bándiaa nga sakóyason kʼoa kʼoatsole Jeobá jmeni xi be (Mat. 18:10; Apoc. 14:6).