1, 2. Ánni nga kiskisíni Pablo je karta xi tsʼe Hebreos.

KʼIANGA nó 61, je chjotale Cristo xi tsakatio ya Israel nda tsakatio nga̱ tsín nanda jme kjoa kisʼe. Nga kui nichxin, je pastro Pablo ndoyá tíjnaʼya ya Roma, kʼoa kʼoasʼin kisikjaʼaitsjen nga jeme kʼoéjnandaí. Kʼoa je Timoteo xi ya tsakʼamjekao, to chriankʼiaa kitjo ndoyá. Je Pablo kao Timoteo kʼoasʼin tsakʼéndajin nga ñatjen koaisíxatʼa je ndsʼee xi tjío ya Judea (Hebreos 13:23). Tonga xi koanni aon nó, ñaki tsʼantjaiya jokoanchon ya Judea kao Jerusalén. Je Jesús tongini kʼoakitsole chjotale nga kjitʼanangi katabitjo kʼianga skoe̱ nga chjotakjoajchán romano jetjíondai ya Jerusalén (Lucas 21:20-24).

² Tokʼoa jekanjin nó tjínle nga kʼoakitso Jesús. Je nó xotjín, je chjotale Cristo xi tjío ya Israel tse kjoa jaʼatojin tonga kixi koan (Hebreos 10:32-34). Tonga je Pablo kui xi koanmele nga sikatíonda jmesa kjoa xi kjoaʼatojin nga̱ nʼio chótʼayakao kjoamakjainle (Mateo 24:20, 21; Hebreos 12:4). Kʼiatsa mele nga sitjoson jmeni xi kitso je Jesús kʼoa kuitjontjaile yaole, machjén nga sʼe̱le kjoamakjain kʼoa nga ska̱le (tʼexkiai Hebreos 10:36-39). Kao nganʼiotsjele Jeobá, je Pablo jngo xo̱n kiskile je ndsʼe̱, xo̱n jebi Hebreos sʼin ʼyale ndʼaibi. Kui xi kitsjoanganʼiole kʼoa kisikatíonda.

3. Ánni machjénsíni nga nʼio kuenta sʼiaan jmeni xi tso je xo̱n xi kichjile chjota hebreo.

 ³ Nichxin xi tiyoaa ndʼaibi, machjénní nga nʼio kuenta sʼiaan jmeni xi tso je xo̱n xi kichjile chjota hebreo. Nga̱ kʼoati mangóson je kjoa xi tiyojiaan joni tsa chjotale Cristo xi tsakatio ya Judea. Nʼio nkjín ndsʼee xi tjíofitjenngike chjota kʼoa xi tse kjoa tjíofaʼatojin tonga kixi kjima (2 Timoteo 3:1, 12). Tonga kʼoati nkjín mani xi nyʼán tjío kʼoa xi tsín ʼya xi tjíofitjenngike. Tojo koantʼain je chjotale Cristo xi tsakatio nichxinle Pablo, kʼoati jemachrianle nga nʼio chótʼayakao kjoamakjainná kʼoa machjénní nga tjenyatokon kuiyoaa (tʼexkiai Lucas 21:34-36).

4. 1) Jñánile testo xi tsʼe nó 2016. 2) Ánni nga kui testo jebi kitjoejinsíni.

⁴ Jméni xi koasenkaoná nga tongini kuiyondalee jmeni xi koa̱n. Je Pablo nkjín koya kjoafaʼaitsjen kitsjoale ndsʼe̱ je xi sitaja kjoamakjainle. Kʼoa je xi nʼio koasenkaoná kui xi faʼaitʼa Hebreos 13:1. Itso: “Katamatsjoachantsjao ndsʼao”. Kui testo jebi kitjoejin xi tsʼe nó 2016. Testo jebi koasenkaoná nga nʼiosa koa̱ntaja kjoamakjainná.

5. Jñánile kjoatsjoacha xi koakolee je ndsʼee.

⁵ Je kjoatsjoacha xi síkʼaxki̱ Biblia, xi koakolee je ndsʼee, kuinga kʼoasʼin tsjoacha katamaa josʼin tsjoachaa je familianá kʼoa kao miyoná (Juan 11:36) (chótsenlai je rekuadro “Jósʼin tsoyanile”). Ali tsa to énjin nga ndsʼe ʼmilee xíngiaa ñaki ndsʼee mañá (Mateo 23:8). Je Pablo i kitso: “Katamatsjoachao xíngio joni nga ndsʼao. Ngisa títjon jchaxkón xikʼa joni tsa tijonnio” (Romanos 12:10). Én jebi kui bakóyaná nga nʼio tsjoacha katamaa je ndsʼee. Kʼiatsa tsjoachaa je ndsʼee, miyoná koa̱nni kʼoa jtín sʼin kuiyoaa.

6. ʼYáni xi koakolee je kjoatsjoacha.

⁶ Me toya xo̱n xi bʼasje je chjotale Cristo jñani kʼoatso nga tsjoacha katamaa je ndsʼee. Nichxin kjoatse, je chjota judío tojéní xi “ndsʼe” kitsole je xi ñaki xínkjín mani kʼoa je xi nʼio miyole mani. Nikʼiajinla “ndsʼe” kitsole jngo xi tsín judío kitjenni. Tonga ngatsʼi je choʼndale Jeobá ndsʼee sʼin bekon xínkjín tojñani tsʼe (Romanos 10:12). Kuinga jo ndsʼe sʼin tsjoachasíñá xíngiaa nga̱ kui xi tíbakóyaná je Jeobá (1 Tesalonicenses 4:9). Tonga ánni nga nʼio chjísínile nga tosi tonda tsjoacha katamaa je ndsʼee.

7. Jñánile nga jao koya anni nga tsjoacha koa̱nsíñá je ndsʼee.

⁷ Xi títjon, kuinga tsjoachañá je ndsʼee nga̱ jé Jeobá xi kʼoasʼin bʼénená. Alikui koa̱n tsjoacha koaan je Jeobá kʼiatsa tsín tsjoacha koaan je ndsʼee (1 Juan 4:7, 20, 21). Xi majaoni, kuinga tsjoachañá je ndsʼee nga machjénngañáná xíngiaa kʼoa ngisa nga kjoa sʼená. Kʼianga kiskile Pablo je chjota hebreo bení nga kuitjo naxinandále kʼoa nga sikatío ngayeje xi tjínle. Je Jesús kʼoakitso nga nʼio ñʼai koa̱nchon nga kui nichxin (Marcos 13:14-18; Lucas 21:21-23). Tiʼani nga kjesa kʼoamajin, je chjotale Cristo tjínnele nga ngisa tsjoake koan xínkjín (Romanos 12:9).

8. Jméni xi sʼiaan ndʼaibi nga kjesa faʼaijin kjoañʼai xi nʼio tse.

⁸ Jemachrianle nga kjoaʼaí je kjoañʼai xi nʼio tse (Marcos 13:19; Apocalipsis 7:1-3). Kʼianga koaitsʼia kjoañʼai jebi, kui  kjoafaʼaitsjen kjuintjenngiaa xi tso Isaías 26:20, itso: “Titjásʼain ya kuartoli ya yaniʼya kʼoa tʼechjoai xo̱ntjoali. Tijnaʼma ngotjui saʼnda nga jekjoaʼato je kjoajti”. Kʼianga “kuartoli ya yaniʼya” tso tsakui nichxin kui xotsole je jtín xi tjío. Yaa ʼyaxkoán je Jeobá. Tonga ali tsa tokuijin xi machjén nga kuiyoxkoá nga xki̱ xomana. Je Pablo kʼoakitsole je chjota hebreo nga tsjoánganʼiongañále xínkjín kʼoa nga koakole kjoatsjoacha xínkjín kʼoa nga kui xi ndatjín katasíkao xínkjín (Hebreos 10:24, 25). Ngisa machjén ndʼaibi nga nʼiosa tsjoacha koaan xíngiaa, nga̱ kui xi koasenkaoná nga ska̱ná kʼianga chótʼayakaoná.

9. 1) Jósʼin koa̱n koakolee kjoatsjoacha ndʼaibi je ndsʼee. 2) A koaan kʼoéyanajmí josʼin tsakakóle kjoatsjoacha xínkjín je ndsʼee ya ʼndeli kʼoa tsa ya jña xin.

⁹ Nkjín koya josʼin koa̱n koakolee ndʼaibi kjoatsjoacha je ndsʼee nga kjesa faʼaijin kjoañʼai xi nʼio tse. Nkjín ndsʼee xi kjoaxkón tjíobichóne. Tobʼelañá, cháonnʼio, huracán, tsunami kʼoa xi tjíotsendá ya ʼndele. Kʼoa kʼoati tjín xi chjota tjíofitjenngike (Mateo 24:6-9). Kʼoa kʼoati tjín xi ñʼai chonle tao̱n nga kʼoasikji kjoachʼanacha tjín (Apocalipsis 6:5, 6). Kʼianga kʼoasʼin tse kjoa tjínle je ndsʼee, ngisa koa̱n josʼin koakolee nga tsjoachaa. Ninga tsín tibakóni kjoatsjoacha je chjota, ñá tosi tonda tsjoacha koaan je ndsʼee (Mateo 24:12). ^[1]

10. Jméni xi jchaa xi fisani.

¹⁰ Jméni xi sʼiaan nga ñaki ndsʼe sʼin jchatokoán xíngiaa ninga kʼoasikji kjoa tjín i̱ Sonʼnde. Kʼoa jósʼin koakoá nga ñaki tsjoacha je xíngiaa. Kʼianga “katamatsjoachantsjao ndsʼao” kitso je pastro Pablo kʼiaa kisikʼaxki̱ kʼa ya kapítulo 13 xi tsʼe Hebreos josʼin koakoá kjoatsjoacha. Jaonla koya kataʼyaa.

11, 12. Jósʼin tínchja̱ni Hebreos 13:2 (chótsenlai sén xi fitsʼiani kjoaʼmiya jebi).

¹¹ “Ali nichajinjion nga kʼoaiʼndelao je xi fichókonno” (tʼexkiai Hebreos 13:2). Jósʼin tsoyanile én jebi. Kui tsoyanile nga nda nikoaa je chjota xi tsín ʼyaxkoaan. Kʼoa kui síkjaʼaitsjenjinná jokisʼin je Abrahán kao Lot. Je chjota xi kiskoeya saʼnda tsín bexkon kʼoa xijekoan kʼiaani kisʼejinle nga ánkjeni (Génesis 18:2-5; 19:1-3). Je Pablo kui choa̱ jebi kisikʼaxki̱le je chjota hebreo kʼianga kʼoakitsole nga katakjoeya xínkjín.

¹² Jósʼin chjoéyaa je xíngiaa. Koaan kʼoakʼuínlee je ndsʼee nga katafikjenkaoná ya niʼyaná kʼoa tsa kʼiaje̱ nga si̱kʼayalee nichxinná xíngiaa. Kʼoa nga kuichosíxatʼaná je superintendente viajante kao chjoónle, koaan kʼoakʼuínlee nga katafikonná niʼyaná ninga tsín nanda ʼyaxkoaan (3 Juan 5-8). Ali tsakuijin machjén nga jngo sʼuí kʼoéjnaa kʼoa tsa tse tao̱n si̱kjeyaa. Xi mená kuinga si̱nʼioá kon je ndsʼee, ali tsakuijin nga nda katasíkʼaxki̱ná. Xi ijngosani, alikui toje kuinókjoalee je xi kʼoasikaongajaoniná nga jekoa̱nni (Lucas 10:42; 14:12-14). Ninga tsín maʼaná, kjoásjailee josʼin chjoéyaa xíngiaa.

13, 14. Jósʼin koa̱n kuinyakoaa je ndsʼee xi ndoyá tjíoʼya.

¹³ “Tikjaʼaitsjenjion je xi kjoañʼai tjío” (tʼexkiai Hebreos 13:3). Kʼianga kiski én jebi je Pablo, jé tísíkjaʼaitsjen je ndsʼee xi ndoyá tjíoʼya xi totʼatsʼe nga kixi kitʼale Jeobá. Je pastro Pablo kʼoakitsole je chjota hebreo nga nda kisʼin nga kʼoasʼin koanmake “je xi tjío kjoañʼai”  ya ndoyá (Hebreos 10:34). Je xi ño nó tsakʼejnaʼya ndoyá je Pablo, je ndsʼee xi ya chrian tjío tsakinyakao. Kʼoa je xi kjin tjío kʼoati tsakʼétsʼoantjai je Pablo (Filipenses 1:12-14; Hebreos 13:18, 19).

¹⁴ Nichxin xi tiyoaa ndʼaibi, nʼio nkjín ndsʼee xi ndoyá tjíoʼya nga tsín yátsʼi̱n tjíobinyále Jeobá. Je ndsʼee xi ya chrian tjío nkjín koya josʼin binyakao. Tonga xi kjin tiyolee, jósʼin kuinyakoaa kʼianga tsín si̱chajiaan. Koaan kʼoétsʼoantjé ngantsjai. Tobʼelañá, koaan kʼoétsʼoantjé je ndsʼee, je tichjaa kao xtiʼndí xi ndoyá tjíoʼya ya naxinandá Eritrea. Jolani tsa ndsʼee Paulos Eyassu, Isaac Mogos kao Negede Teklemariam. Ndsʼee jebi jetsʼato 20 nó nga tjíoʼya ndoyá.

15. Jósʼin koakoá nga ʼyaxkoán je kjoabixan.

¹⁵ “Ngatsʼi katabexkón je kjoabixan” (tʼexkiai Hebreos 13:4). Josasʼin nga koakolee je ndsʼee nga tsjoachaa kuinga jchaxkoán je kjoabixan kʼoa nga tsín si̱chajngiaa (1 Timoteo 5:1, 2). Tobʼelañá, kʼiatsa kjoachajngi sʼiaan kao jngo ndsʼee kʼoa tsa kao jngo tichjaa, ali tsa tojejin xi si̱kiʼoaan kʼoati si̱kiʼoaan je familiale. Xi ijngosani, alikuijin tisinʼiotʼaniná je ndsʼee (1 Tesalonicenses 4:3-8). Kʼoa tsa jngola tichjaa sʼe̱jinle nga pornografía kotsenle je xʼinle, jósʼe̱ kon. Kʼoajinsʼin sikjaʼaitsjen nga je xʼinle likui titsjoakeni kʼoa nga tsín tibexkónni kjoabixanle (Mateo 5:28).

16. Kʼiatsa tomajngoni tokoán jmeni xi tjínná, jósʼin koasenkaoná nga koakolee kjoatsjoacha je ndsʼee.

¹⁶ “Tʼejngo takon kao xi jetjínno” (tʼexkiai Hebreos 13:5). Kʼiatsa je Jeobá tininʼiotʼaa, tokoa̱njngojinni tokoán jmeni xi tjínná. Jósʼin koasenkaoná jebi nga koakolee kjoatsjoacha je ndsʼee. Kʼiatsa kjimajngoni tokoán jmeni xi tjínná, ngisajin jchachjiá ndsʼee tikʼoajinni je tsojmi xi tjín sonʼnde kʼoa kao je tao̱n (1 Timoteo 6:6-8). Alikuijin je ndsʼee si̱kʼaxkiaa kʼoa  alikuijin tokʼoakuixónʼndee nga tsín jme xi tjínná. Kʼoajin titsín xíngiaa koa̱nxinkonchaa kʼoa alikuijin kui si̱metokoán nga sa tse sa tse tsojmi katasʼená. Tosajin tjótʼaa tsa jme xi tjínná (1 Timoteo 6:17-19).

17. Kʼiatsa nʼiotakoán, jósʼin basenkaoná nga bakolee kjoatsjoacha je ndsʼee.

¹⁷ “Kʼoasʼin [...] nʼiotakoán” (tʼexkiai Hebreos 13:6). Kʼiatsa je Jeobá tininʼiotʼaa, ndajin sʼe̱ tokoán kʼoa ska̱jinná je kjoa xi kuitjátojiaan. Kʼiatsa nʼiotakoán, kui xi koasenkaoná nga si̱nʼioá kon je ndsʼee kʼoa kʼoasʼin koakonilee nga tsjoachaa (1 Tesalonicenses 5:14, 15). Kʼiatsa je Jeobá tininʼiotʼaa, kʼoati tajajin koaan nga kjoaʼaí kjoañʼai xi nʼio tse, nga̱ ʼyañá nga je Jeobá kʼoasjentjainá (Lucas 21:25-28).

18. Jméni xi koasenkaoná nga nʼiosa koa̱ntsjoachaa je xi chjotajchínga sʼin tjío.

¹⁸ “Tikjaʼaitsjenjinnío je xi bándiaano” (tʼexkiai Hebreos 13:7, 17). Je xi chjotajchínga sʼin tjío kʼoati nʼio síxá ya jinjtín kʼoa bʼasjeʼa nichxinle kʼianga ya sísin. Kʼoa kuinga jchaxkónsíñá nga tsjoacha katamasíñá “xi totʼatsʼe xále” (1 Tesalonicenses 5:13). Si̱kjaʼaitsjeen josʼin binyakaoná. Kʼiatsa kʼoasʼiaan, kʼoaijinlee kjoanda kʼoa ngisajin tsjoacha koaan. Alikui mená nga sicha je kjoatsjoa xi tjínle kʼoa kʼoati tsín mená nga chʼao katasatíole tsa jme xi sʼiaan. Tosa kui xi mená nga kʼoainganʼiolee kʼoa nga si̱tjosonlee.

19, 20. Jméni xi koasenkaoná nga sa tsjoacha sa tsjoacha koaan je ndsʼee.

¹⁹ Ñá xi choʼndale Jeobá maa, bená je chjota nga tsjoachaa je xíngiaa. Kʼoati koan nga tsakʼejna je Pablo. Ninga kʼoalani, je Pablo kʼoakitsole je chjotale Cristo nga ngisasa nʼio katamatsjoake xínkjín. Kitsole: “Ngisasa tsjoacha [katamao] xíngio” (1 Tesalonicenses 4:9, 10). Je én jebi kui bakóyaná nga sa tsjoacha sa tsjoacha katamaa je ndsʼee.

²⁰ Kʼianga ñandia ñandia jchaa je testo xi tsʼe nó 2016 je xi sʼe̱tʼa ya Ndʼia jña chotʼayá koaan i̱ kuixoán: “A koaan ngisasa nda skoéya je ndsʼee. Jósʼin koa̱n koasenkoa je ndsʼee xi ndoyá tjíoʼya. A ʼbexkónña je kjoabixan. A tokjimajngoni tokoan jmeni xi tjínna. Jméni xi koasenkaona nga ngisasa nda sinʼiotʼa je Jeobá. Jókoa̱n sʼian nga ngisasa nda sitjosonle je xi chjotajchínga sʼin tjío”. Koaan si̱ndayasaa yaoná nga si̱tjosoán nga jaon koya jebi. Je testo xi tsʼe nó jebi ali tsa tokjoatjaojin nga kui tjítʼa Ndʼia jña chotʼayá. Kui xi sikjaʼaitsjenjinná nga kʼoasʼiaan jmeni xi kitso je Pablo: “Katamatsjoachantsjao ndsʼao” (Hebreos 13:1).