1, 2. 1) Jmésa xi tjenkao je kjoatjao xi kitsjoaná Niná. 2) Jmé kjoachjonangi xi chótʼayá i̱ kjoaʼmiya jebi.

JE Jeobá nʼio tsjoakená nga kisikasén i̱ Sonʼnde je Jesucristo nga kʼienntjainá (Juan 3:16; 1 Juan 4:9, 10). Kui kjoatjao jebi xi ngisasa nʼio chjíle xi kitsjoaná Niná. Je pastro Pablo kʼoakitso nga tsín ʼya xi majinle (2 Corintios 9:15). Ánni kʼoakitsosíni je Pablo.

² Je Pablo be nga kuinga kʼien je Jesús nga kuitjosonni ngayeje jmeni xi tso Niná (tʼexkiai 2 Corintios 1:20). Kui xi tsonile nga “je kjoatjaole xi tsín tsa ʼya xi majinle” kui tínchja̱ni je kjoabʼechjíntjaile Jesús. Kʼoa kʼoati kui nchja̱ni je kjoanda kao kjoatsjoacha xi bakóná je Niná. Alikui ʼya xi majinle jokji kjoanda tjenkao kjoatjao jebi. Jótjínnele sʼe̱ tokoán nga kitsjoaná Niná kjoatjao jebi. Jméni xi tjínnele sʼiaan nga jemachrianle nga kjoaʼaítsjenya je Kjoabiyale Cristo. Nó jebi kʼiaa kʼoakaole nga 23 sá marzo.

3, 4. 1) Jósʼe tokoán kʼianga ʼya xi tjín xi tsjoákjoatjaoná. 2) Jósʼiaan tsa ʼya xi tsjoántjai yaole xi tʼatsaan.

³ Nʼio tsjoa sʼe tokoán kʼianga jme xi bʼaikjoatjaoná. Tonga tjín je kjoatjao xi nʼio chjíle xi saʼnda síkʼantjaiyaná. Tobʼelañá, tsa jngo jée kabijnyi kʼoa tsa kʼoakʼuínli nga kao kjoabiya kʼoéchjíni jmeni xi kanʼiai. Tonga tsa jngo chjota xi saʼnda tsín ʼyaxkuin tsjoántjai yaole xi tʼatsi. Jósʼe̱ tokuin.

⁴ Tsakui nichxin koa̱nmeli si̱kʼantjaiyai yaoli. Tsakui nichxin ngisasa koakolai kjoanda kao kjoatsjoacha xi kjaʼaí kʼoa tochale kʼoati si̱chatʼalai je xi totaon tsabeli. Kʼoa jokji tse kuijnai koakojin nga ʼyachjí nga jngo chjota kitsjoantjai yaole xi tʼatsi.

5. Ánni nga nʼio chjísínile je kjoatjao xi kitsjoaná Niná.

⁵ Je kjoatjao xi kitsjoaná Niná ngisa nʼio tse kjoanda tjenkao tikʼoajinni je choa̱ xi kanikʼaxkiaa (1 Pedro 3:18). Nga chjotajée maa ngatsʼiaa kjoabiya tichoʼndá (Romanos 5:12). Tonga je Niná nʼio tsjoakená kʼoa kuinga kisikasénni je ʼNdíle nga kʼienntjainá (Hebreos 2:9). Kʼoa nga kʼoasʼin kʼienntjainá je Jesús, tjóxin je kjoabiya, likui tikʼia sʼe̱ni (Isaías 25:7, 8; 1 Corintios 15:22, 26). Ngatsʼi xi sʼe̱le kjoamakjain tʼatsʼe Jesús tsjoa sa̱tío kon kʼoa nyʼán sʼin koatio ngantsjai nichxin, tjínkʼa xi ya koai ngʼajmi kʼoa tjínkʼa xi i̱ Sonʼnde koatio (Romanos 6:23; Apocalipsis 5:9, 10). Tonga je kjoatjao xi kitsjoaná Niná tsesa kjoanda tjenkao.

6. 1) Jmé kjoanda xi choyalai nichxin xi nroaján. 2) Jósʼin koakoá nga ʼyachjiá je kjoatjao xi kitsjoaná Niná.

⁶ Jmésa kjoanda xi tjenkao je kjoatjao xi kitsjoaná Niná. Kuinga je Sonʼnde ʼndenaxó koa̱n, koa̱nndayaa je xi chʼin tjínle kʼoa kjoaʼáyanile xi jekʼien (Isaías 33:24; 35:5, 6; Juan 5:28, 29). Nʼio tsjoachaa je Jeobá kao Jesús nga kʼoakisʼin xi tʼatsaan. Jósʼin koakoá nga ʼyachjiá je kjoatjao xi kitsjoaná Niná. Xi títjon, kjuintjenngiaa choa̱le Jesús. Xi majaoni, tsjoacha katamaa je ndsʼee. Kʼoa xi majanni, ñaki ni̱ma̱ná katanroajinni nga si̱chatʼalee xíngiaa.

7, 8. 1) Tsa ʼyachjiá je kjoatsjoacha xi tsakakó je Jesús, jméni xi sʼiaan. 2) Jósʼin bakoá nga ʼyachjiá je kjoatsjoacha xi tsakakó je Jesús.

⁷ Nga tsjoakená je Niná, tjínnele kʼoasʼin si̱chjén kjoabijnachonná nga jchaxkoán je Jesús. Je pastro Pablo i kitso: “Je kjoatjaochale Cristo kjoanʼio sʼínnajin” (tʼexkiai 2 Corintios 5:14, 15). Je Pablo be kʼiatsa ʼyachjiá je kjoatsjoacha xi tsakakó je Jesús, kuijin xosikaoná nga tsjoacha koaan kʼoa nga jchaxkoán. Kʼianga nda majinná jmeni xi kisʼin xi tʼatsaan je Jeobá, kʼoajinsʼin kjuinkoaa yaoná josʼin mele Jesús. Jósʼiaan.

⁸ Tjínnele nga chjénngiaa choa̱le je Jesús (1 Pedro 2:21; 1 Juan 2:6). Kʼianga nitjosonlee je Niná kao Jesús, kʼoasʼin bakoñá nga tsjoachaa. Je Jesús i kitso: “Je xi tjínle kjoatéxomana, xi síkitjoson kui kjoatéxomabi, jébi xi tsjoakena. Je xi tsjoakena nga an, kʼoasʼin Nʼaina tsjoake nga je, kʼoa an tsjoake̱ nga je. Kʼoati koakosontsenle yaona” (Juan 14:21; 1 Juan 5:3).

9. Jméni xi koa̱n kʼiatsa tsín si̱kuindaa yaoná.

⁹ Nga jemachrianle nichxin nga kjoaʼaítsjenya je Kjoabiyale Jesús,  machjén nga si̱kjaʼaitsjenjiaan jósʼin timangínkoaa yaoná (chótsenlai je rekuadro “Jósʼin tsoyanile”). Chjónangilee yaoná jebi: “Jósʼin jetikjenngile je Jesús. Jmésani xi sʼian nga sindaya yaona”. Nʼio koasenkaoná nga kui chjónangilee yaoná jebi, nga̱ koaanle kui skénʼndóbʼakjáná jmeni xi chon sonʼnde, nga kʼoasʼiaan josʼín je chjota (Romanos 12:2). Tsa tsín si̱kuindaa yaoná, tochale je chjénngilee je chjota xi tjínle kjoachjine i̱ sonʼnde, chjota xi faʼa ya telebisión kʼoa kao je xi síská (Colosenses 2:8; 1 Juan 2:15-17). Jméni xi koasenkaoná nga tsín kʼoakatamaa.

10. 1) Jméni xi ndatjín nga chjónangilee yaoná nichxin nga kjoaʼaítsjenya je Kjoabiyale Jesús. 2) Jméni xi tjínnele nga kʼoasʼiaan (chótsenlai sén xi fitsʼiani kjoaʼmiya jebi).

¹⁰ Nichxin nga kjoaʼaítsjenya je Kjoabiyale Jesús, ndajin tsa si̱kjaʼaitsjenjiaan jókjoan najño xi chʼakjá, jótso músika xi noʼyalee, jñánile pelíkula xi chotsenlee, jmé xi tjíoya celularná, computadoraná kʼoa tsa tabletaná. Chjónangilee yaoná: “A soa koa̱nna tsa jelani Jesús skoe̱na jokjoan najño xi bʼakja” (tʼexkiai 1 Timoteo 2:9, 10). “Je najño xi bʼakja, a bakó nga choa̱le Cristo tifitjenngia. A skótsenle tsa jelani Jesús je pelíkula xi kotsenle kʼoa a kjuinrʼoéle je músika xi nrʼoele. A kuitso koan nga sikinyale Jesús je celularna kʼoa tsa tabletana. A kuitso koan nga koakole Jesús je videojuego xi siskákoa kʼoa a koaan kʼoaxínle ánni nga kui tsjoake̱ña”. Kʼiatsa tsjoachaa je Jeobá, chja̱ʼaxinjián ngayeje jmeni xi tsín ndatjín ninga ñʼai koa̱nná (Hechos 19:19, 20). Kʼianga tsakʼaitʼalee yaoná je Jeobá, kʼoatsakixoán nga jchaxkoán Cristo. Kuinga tjínnenile chja̱ʼaxinlee yaoná jmeni xi kʼoechjoaná nga kjuintjenngiaa choa̱le Jesús (Mateo 5:29, 30; Filipenses 4:8).

11. 1) Jmésani xi sʼiaan tsa tsjoachaa je Jeobá kao Jesús. 2) Jósʼin koa̱n kuinyakoaa je ndsʼee.

¹¹ Tsa tsjoachaa je Jeobá kʼoa kao Jesús kʼoajinti ñaki kao kjoatsjoa kʼuínyasoán kʼoa koakoyalee Énle Niná je chjota (Mateo 28:19, 20; Lucas 4:43). Nichxin nga kjoaʼaítsjenya je Kjoabiyale Jesús, a koaan kʼoéndajiaan nga precursor auxiliar sʼin si̱xá, tsa 30 kʼoa tsa 50 ora si̱xá nga kʼuínyasoán. Si̱kjaʼaitsjenla jokisʼin jngo ndsʼee xi 84 nóle xi jekʼien chjoónle. Kʼoasʼin kisikjaʼaitsjen nga tsín kʼoakoa̱nle nga precursor auxiliar sʼin sixá nga̱ jejchínga kʼoa nga̱ chʼin tjínle. Tonga je precursor xi ya chrian tjío jñani tsʼe tsakinyakao, jé kikao kʼoa jé tsakásjaile ʼnde jñani koan kitsoyason. Kʼoa nga kʼoakisʼin precursor jebi, koan 30 ora kisixá je ndsʼee. A koaan kuisenkoaa tsa ʼyani nga precursor auxiliar katama nga sá marzo kʼoa tsa sá abril. Tsandalani likui kʼoakoa̱nná ngatsʼiaa nga precursor sʼin si̱xá, koaan chʼa̱sjeʼaa nichxinná nga ngisasa tse si̱xálee je Jeobá. Tsa kʼoasʼiaan, kʼoasʼin koakoñá nga ʼyachjiá je kjoatsjoacha xi tsakakóná je Jesús, tojo kisʼin je pastro Pablo. Jmésani xi sʼiaan tsa ʼyachjiá je kjoatsjoacha xi tsakakóná Niná.

12. Jméni xi tjínnele sʼiaan tsa mená nga tsjoake koa̱nná je Niná.

¹² Nga tsjoakená je Niná tjínnele nga tsjoacha koaan je ndsʼee. Je pastro Juan i kitso: “Tsa Niná kʼoasʼin koantsjoakená, kʼoati machjénná nga ñá  nga tjaocha koaan xíngiaa” (1 Juan 4:7-11). Tsa mená nga tsjoake koa̱nná je Niná, tjínnele nga kʼoati tsjoacha koaan je ndsʼee (1 Juan 3:16). Jósʼin koakolee nga tsjoachaa.

13. Jmé choa̱ tsakʼéjnaná je Jesús.

¹³ Je Jesús tsakʼéjnaná choa̱ josʼiaan nga tsjoacha koaan xíngiaa. Kʼianga tsakʼejna i̱ Sonʼnde, tsakasenkao je chjota. Kisindayaa je xi tjíomʼe, xi chjiʼngé, xi xka̱, xi jtaya kao xi tsín ma nchja̱ (Mateo 11:4, 5). Je Jesús alikui kʼoakoankjoan joni je chjotatítjonle relijión. Je Jesús nʼio tsjoake koan nga kitsoyale chjota tʼatsʼe Niná (Juan 7:49). Tsjoake koan je chjota xi nangitokon koan kʼoa tsakasenkao (Mateo 20:28).

14. Jméni xi sʼiaan nga koakolee kjoatsjoacha je ndsʼee.

¹⁴ Xi kʼoati ndatjín nga kʼoasʼiaan nichxin nga kjoaʼaítsjenya je Kjoabiyale Jesús, kuinga si̱kjaʼaitsjenjiaan jósʼin koa̱n kuinyakoaa je ndsʼee ya jinjtín, ngisa je ndsʼee xi jejchínga. A koaan tsa kjuinchónlee, tsa kjuinkaolee xi bichiñá, tsa kuisenkoaa jme xá xi tjínle ya niʼyale, tsa kjuinkoaa ya kjoajtín kʼoa tsa maije̱ kʼoakʼuínlee nga katafikaoná nga kjuinkʼinyasoán (tʼexkiai Lucas 14:12-14). Nga tsjoakená je Niná kʼoati tjínnele tsjoacha koaan je ndsʼee.

15. Jméni xi tjínnele nga koa̱njinná ngatsʼiaa.

¹⁵ Nga tsjoakená je Niná tjínnele si̱chatʼalee ndsʼee. Nga ya kinroañá ngatsʼiaa je Adán, chjotajée maa kʼoa kjoabiya choʼndá, kuinga machjénniná ngatsʼiaa je kjoabʼechjíntjaile Jesús. Kʼoati machjénle kjoabʼechjíntjai jebi ninga je choʼndale Niná xi ñaki kixi tjíofitʼale. Tjínnele katamajinná nga nʼio tse xi kisichatʼaná je Niná. Ánni nga nʼio chjínile nga katamajinná jebi. Yaa kuitsoyaná je choa̱ xi tsakʼéjna je Jesús.

16, 17. Jméni xi kitsoya je Jesús nga kui choa̱ tsakʼéjna tʼatsʼe jngo rey xi kisichatʼale ninga nʼio tse tao̱n kitjenle je choʼndale.

¹⁶ Je Jesús kui tsakʼéyanajmí jokoan jngo choʼnda xi te jmi tao̱nle jngo rey kitjenle. Tonga je rey kisichatʼale ninga nʼio tse kitjenle. Tonga xijekoan, je choʼnda xi kinichatʼale alikui kisichatʼale je choʼndaxínkjín xi tosʼa jngo siento bixo kitjenle. Tsa kitsjoalani kjoanda je choʼnda xi kinichatʼale kʼoajinti kisichatʼale je choʼndaxínkjín. Kʼianga kisʼejinle je rey jokisʼin je choʼnda jebi, nʼio koanjtile. Kuinga kinchja̱nile kʼoa i kitsole: “Ji choʼnda xi tsʼain. Ngayije xi kitjenli, an kisichatʼale nga tsakʼetsʼoanái. A tsí kʼoati machjén nga koanmachai choʼndaxíngi, josʼin nga an koanmakele” (Mateo 18:23-35). Kʼoatisʼinni, nga síchatʼaná  Jeobá je jéená, nʼio tse xi síchatʼaná. Tsa bʼailee kjoanda nga síchatʼaná, jméni xi tjínnele sʼiaan.

¹⁷ Kʼianga jetibiyondalee nga kjoaʼaítsjenya je Kjoabiyale Jesús, chjónangilee yaoná: “A tjín xi kisikaona jngo ndsʼee. A ñʼai mana nga sichatʼale”. Chjénngilee josʼín je Jeobá nga tíjnanda nga síchatʼa (Nehemías 9:17; Salmo 86:5). Tsa bʼailee kjoanda nga síchatʼaná je Jeobá, ñaki yajin ni̱ma̱ná kjuinroajinni nga si̱chatʼalee xíngiaa. Tsa mená nga tsjoake koa̱nná kʼoa sichatʼaná je Jeobá, tjínnele nga tsjoacha koaan kʼoa si̱chatʼalee je ndsʼee (Mateo 6:14, 15). Tsandalani likui tikoa̱n si̱kʼantjaiyañá jmeni xi koan nichxin xi jejaʼato, koasenkaoná nga tsjoa sʼe̱ tokoán nichxin xi sʼa nroa.

18. Jméni xi tsakasenkao jngo tichjaa nga kiskale jokjoan je tichjaa xi tsakasenkao.

¹⁸ Sakʼoaa likui choa ñʼai maná nga kaná jmeni xi sʼín je ndsʼee kʼoa tsa tichjaa (tʼexkiai Efesios 4:2, 32). Kataʼyala jotso jngo tichjaa xi Lily ʼmi. ^[1] Koanmele nga tsakasenkao jngo tichjaa xi Carol tsakʼin. Je Lily kikao tojñani, kʼoa jé kikatsele tsojmi xi koanchjénle kʼoa nkjínsa koya josʼin tsakasenkao. Tsandalani nʼio tsakasenkao, je Carol totsín kisasenyejele. Sakʼoaa likui choa ñʼai koanle je Lily, tonga kui kisikjaʼaitsjen jñani nda sʼín je Carol. Nga kʼoasʼin kisikjaʼaitsjen koan tsakasenkao, nʼio nkjín nó nga kʼoakisʼin saʼnda nga kitjochʼinle kʼoa kʼien je Carol. Je Lily kʼoatso nga nʼio tsjoa tjínle nga skoe̱ ijngokʼa je Carol nga kjoaʼáyale nga jechjotatsje koa̱n. Kʼiatsa bʼe kjoanda nga bakóna kjoatsjoacha je Niná, skaaná tsa jñani sa̱téngi xíngiaa. Kʼoati basenkaoná nga choyalee je nichxin nga chjotatsje koaan kʼoa nga tsín tijña saténgiñá.

19. Jméni xi sʼiaan tsa bʼailee kjoanda je Niná jmeni xi kisʼin xi tʼatsaan.

¹⁹ Je kjoatjao xi kitsjoaná je Jeobá nʼio chjíle. Nichxin nga kjoaʼaítsjenya je Kjoabiyale Cristo, si̱kjaʼaitsjenjiaan ngayeje jmeni xi kisʼin je Jeobá kao Jesús xi tʼatsaan. Koakoá nga nyaon nyaon nga bʼailee kjoanda. Kjuintjenngiaa choa̱le Jesús, tsjoacha katamaa je ndsʼee kʼoa ñaki ni̱ma̱ná katanroajinni nga si̱chatʼalee xíngiaa.