1. Ningalani nʼio tjínle nganʼio je Jeobá, jméni xi tsjoáʼndele nga kʼoasʼín xi kjaʼaí.

JÉ Jeobá kisinda ngayeje tsojmi. Jésa xi nʼio chjine kʼoa nʼio tjínle nganʼio tikʼoajinni toʼyani. Kʼoakitso ñandia je Job nga koanjinle nga Niná koaanle kʼoasʼin tojmeni xi mele (Job 42:2). Alikui machjénle nga tjín xi koasenkao. Ninga kʼoalani, tsjoáʼndele nga síxákao xi kjaʼaí. Kʼoasʼin bakónile nga tsjoake.

2. Jmé xáni xi nʼio chjíle kitsjoale Jeobá je Jesús.

² Je xi títjon kisinda Niná jé Jesús, je ʼNdíle. Xijekoan, kitsjoaʼnde nga tsakasenkao nga koannda ngayeje tsojmi xi ngikʼa (Juan 1:1-3, 18). Je Pablo kʼoakitso nga tʼatsʼe Jesús kisʼendani “ngayije xi tjín ngʼajmi, kao xi tjín i̱ sonʼnde, kao xi matsen, kʼoa kao xi tsín matsen, tsa ngʼajko̱le, tsa xi batéxoma, tsa xi tjío títjon, tsa xi xá tjínle. Ñaki jé tsakʼénda ngayije, kʼoati ngayije kisʼenda xi tʼatsʼe” (Colosenses 1:15-17). Je Jeobá nʼio  chjíle je xá xi kitsjoale je Jesús kʼoa bʼéyanajmí nga katasʼejinle xi kjaʼaí.

3. 1) Jmé xá xi kitsjoale Jeobá je Adán. 2) Ánni nga kitsjoaxánile Jeobá je Adán.

³ Je Jeobá kʼoati títsjoáná kjoanda nga tinixákoaa. Tobʼelañá, jé Adán tsakʼéxále nga kitsjoajaʼaínle je cho̱ (Génesis 2:19, 20). Nʼiojin tsjoa kisʼele je Adán nga kui xá kisʼin. Nga koan kitsjoajaʼaínle je cho̱, títjonjin kiskotʼayason josʼín nga jngó jngó cho̱. Koanjin nga je Jeobá kitsjoajaʼaínle nga̱ jé kisinda cho̱. Tonga nga tsjoake je Adán kuinga je kitsjoanile xá jebi. Kʼoati je kitsjoale xá nga ʼndenaxó sikao ngakjijngo Sonʼnde (Génesis 1:27, 28). Tonga xi jeki nichxin, je Adán likui tije Jeobá kisixákaoni. Kʼoa nga kʼoakisʼin tse kjoañʼai tsakjaʼá jé kʼoa kao ñá xi ntje̱le maa (Génesis 3:17-19, 23).

4. ʼYáni xi tsakasenkao je Jeobá nga kitjoson jmeni xi tjínndajinle.

⁴ Nga koanskanni, je Jeobá kʼoati kʼoakitsole chjota xi kjaʼaí nga katasíxákao. Tobʼelañá, kʼoakitsole Noé nga jngo arca katabʼénda ánni nga kuinje̱nginile yaole je kʼoa kao familiale nga kjoaʼaí jtsínʼio. Jé Moisés tsakʼéxále nga tsakʼaonsje je chjota israelita ya Egipto. Kʼoa jé Josué tsakʼéxále nga jaʼasʼenkao chjota israelita ya ʼNde jña tsakʼinle nga kʼoaile. Jé Salomón tsakʼénda je yo̱ngo̱ xi kisʼejna ya Jerusalén. Kʼoa je María nale koanni je Jesús. Ngatsʼi chjota jebi kʼoa kao xi kjaʼaísa yaa kisixákao Niná nga kitjoson jme xi tsakʼéndajin.

5. 1) Jméni xi koa̱n kʼoasʼiaan ngatsʼiaa. 2) A machjénle je Jeobá nga kuisenkoaa (chótsenlai sén xi fitsʼiani kjoaʼmiya jebi).

⁵ Nichxin xi tiyoaa ndʼai, je Jeobá kʼoatsoná nga kʼoainganʼiolee je Chjotaxále jokji tjen kʼoakoa̱nná. Nkjín koya josʼin koa̱n kʼoainganʼiolee. Ningalani likui ngóson kji kʼoakoa̱nná nga jngó jngoá, koaan kʼuínyasoán je Énle Niná. A machjénle Jeobá nga ñá kuisenkoaa. Mai. Nga̱ tsa jelani xi mele, koa̱njin ya tjen ngʼajmi kuinchja̱ni nga kjoakao je chjota. Kʼoa je Jesús kʼoakitso nga koa̱nle Jeobá sikinchja̱ je la̱jao̱ nga kuitsoya tʼatsʼe Chjotaxále (Lucas 19:37-40). Tonga je Niná tsjoáná kjoanda nga nixákoaa (1 Corintios 3:9). Je pastro Pablo kʼoakitso nga je Niná nixákoaa (2 Corintios 6:1, TNM). Nʼio tse kjoanda tjínná nga je Jeobá nixákoaa. Kataʼyala ánni nga nʼio tsjoa sʼeni tokoán.

6. Jókisʼe kon je Jesús nga ya kisixákao je Nʼaile.

⁶ Ñá xi choʼndale Jeobá maa tsjoa tjíoná ngantsjai nga je Jeobá nixákoaa. Nga kjesa faʼaijin i̱ Sonʼnde je Jesús yaa kisixákao je Jeobá “joni jngo choʼnda xi nʼio nda síxá”. Je Jesús be nga nʼio tsjoake koan je Niná kʼoa i kitso: “Nʼio tsjoa kisʼena ngantsjai nichxin nga ya tsakatejna ngixko̱n” (Proverbios 8:22, 30). Nga ya kisixákao Nʼaile nʼio nda kisʼe kon nga̱ nʼio nkjín koya jmeni xi kisʼin kʼoa nga̱ be nga tsjoake koan Niná. Kʼoa ñá, a kʼoati nda sʼe tokoán.

7. Ánni kʼoabixónsíñá nga nda sʼe tokoán kʼoa tsjoa sʼená nga ʼmiyasoán Énle Niná.

⁷ Je Jesús kʼoakitso nga tsjoa sʼe tokoán kʼianga tjín xi bʼe kʼoa tsa kʼiaje̱ nga tjín xi bʼainá (Hechos 20:35). Kʼianga tsakʼinyaná je Énle Niná nʼio tsjoa kisatio tokoán. Tonga nga ʼmiyalee xi kjaʼaí je Énle Niná, kʼoati tsjoa satío tokoán. Ánni. Kuinga ʼyaa nga tsjoa satío kon je chjota nga majinle jme xi bakóya je Biblia kʼoa nga bexkon je Niná. Nʼio tsjoa satío tokoán nga ʼyaa nga síkʼantjaiya yaole je chjota, jokjoan kʼoa josʼin fikao yaole. ʼYañá nga je xi miyole Niná ma koaan koatio ngantsjai nichxin (2 Corintios 5:20). Nga ʼmiyasoán je Énle Niná kui  xi ngisasa nʼio chjíle kʼoa xi ngisasa tsjoa fáya tokoán.

8. Jótso kʼa je testigole Jeobá.

⁸ Kʼianga bisenkoaa xi kjaʼaí nga bexkon Niná, ʼyañá nga tsjoa sʼele je Jeobá xi tʼatsaan kʼoa nga bechjí nga kʼoanʼia. Kui jebi xi kʼoati tsjoa bʼé tokoán (tʼexkiai 1 Corintios 15:58). Jngo testigole Jeobá xi Italia tsʼe xi Marco ʼmi itso: “Tsínna én nga kʼoaxián jokji tsjoa tjín tokoan nga je Jeobá tisixále, nga tsín je tisixále je xi tosichajin jmeni xi tisʼian”. Ijngo testigole Jeobá xi Italia tsʼe xi Franco ʼmi itso: “Nga nyaon nyaon, je Jeobá kui Biblia síchjén kao xo̱n xi síkasénná naxinandále kʼoa kao je kjoajtín xi satíoná nga síkjaʼaitsjenjinná nga nʼio tsjoakená. Ninga kʼoasʼin nikjaʼaitsjeen ñá nga tochoa jmeni xi nʼia, je Jeobá nʼio chjí be. Kuinga nʼio tsjoa sʼeni tokoan nga je Jeobá sixákoa”.

9. 1) Jósʼin tsakatiokao xínkjín je Jeobá kao Jesús. 2) Ánni nga ñaki ndasʼin tsakatiokaoni xínkjín.

⁹ Kʼianga ya nixákoaa je chjota xi tsjoachaa ngisasa machriantʼalee. Ngisasa nda ʼyaxkoaan jokjoan. ʼYañá jmeni xi mele kuichotjenngi kʼoa jmeni xi sʼín nga kuichotjenngi. Je Jesús, jmi miyón nó nga ya kisixákao je Jeobá nga kjesa faʼaijin i̱ Sonʼnde. Nʼio tsjoake koan xínkjín. Kuinga i̱ kitsosíni je Jesús: “An kao Nʼainá tojngoníjin” (Juan 10:30). Ñaki ndasʼin tsakatiokao xínkjín nga̱ ñatjen kisixá kʼoa tsakinyakao xínkjín.

10. Ánni nga ngisa machriantʼanilee je Jeobá kʼoa kao je ndsʼee nga ʼmiyasoán.

¹⁰ Je Jesús kui kisijéle je Jeobá nga sikuinda je chjotale. Ánni nga kui kisijénile. Je Jesús i kitso: “Jméni nga tojngo koa̱nsíni ngatsʼi, joni nga ji, Nʼai, tijnakaonái, kʼoa an tijnakaole” (Juan 17:21). Kʼianga nitjosoán jmeni xi tso je Niná kʼoa ʼmiyasoán, ngisa nda majinná jokjoan je Jeobá. Majinná nga ngisa nda nga je si̱nʼiotʼa kʼoa kʼoasʼiaan ngantsjai jmeni xi tsoná. Kʼoa tsa kʼoénelee yaoná nga miyole koaan, je kʼoati simiyoná (tʼexkiai Santiago 4:8). Kʼianga ʼmiyasoán kʼoati machriantʼalee je ndsʼee, nga̱ ngisasa nda ʼyaxkoaan jokjoan. Kʼoati ʼyaa nga kʼoati kjoa faʼatojin joni ñá, nga kʼoati tsjoa satío kon kʼoa nga kʼoati kui mele kuichotjenngi jmeni xi mená ñá. Ñatjen tinixáñá, tsjoa tjíoná kʼoa tjíokaná jme kjoa xi tibitjatojiaan. Jngo testigole Jeobá xi Gran Bretaña tsʼe xi Octavia ʼmi itso: “Nga je Jeobá sixákoa ngisa machriantʼale kʼoa kʼoati machriantʼale je ndsʼee”. Je tichjaa kʼoatso nga kuinga kʼoasʼeni kon nga je miyole kʼoati kui tjíofitjenngi jmeni xi tífitjenngi je. A tsí kjoaixi nga kʼoati sʼe tokoán tsanda ñá.

11. Ánni nga sa nda sa nda koa̱nchriantʼanilee je ndsʼee kʼoa kao je Jeobá ya sonʼnde chjotse.

¹¹ Nʼio tsjoachaa je Jeobá kʼoa kao ndsʼee. Tonga ya ʼNdenaxó ngisasa nʼio tsjoacha  koaan. Si̱kjaʼaitsjenla jokji tsjoa satío tokoán nga ñatjen si̱xá kao ndsʼee. Ñá chjoéyaa je xi kjoaʼáyanile kʼoa kʼuínyalee xi tʼatsʼe Jeobá. ʼNdenaxó si̱koaa ngakjijnda Sonʼnde. Nʼiojin tsjoa satío tokoán nga ñatjen si̱xá kʼoa nga tobijbi chjotatsje koaan kʼianga jekoatexoma je Chjotaxále Niná. Nga jngó jngó nichxin kjoaʼato sa nda sa ndajin koa̱nchriantʼale je ndsʼee kʼoa kao je Jeobá. Alikui jao tjínná nga je Jeobá tsjoáná ngayeje jmeni xi koa̱nmená (Salmo 145:16).

12. Ánni nga basenkaoniná nga ʼmiyasoán.

¹² Jé Na̱i tíbatéxoma sonʼnde kʼoa chjotajée maa. Tsa tsín si̱kuindaa yaoná, kʼoajinti sʼin si̱kjaʼaitsjeen kʼoa kʼoasʼiaan josʼín je chjota. Machjén nga si̱kuindaa je kjoamiyo xi tjínná kao Jeobá. Machjén nga chʼa̱sjee nganʼio. Yaa mangóson joni tsa nandá timangínjiaan, tsa tífi je nandá kʼoa tinroa ñá. Tsa tsín mená nga je nandá koaikaoná tjínnele nga nʼio tse nganʼio chʼa̱sjee. Kʼianga ʼmiyasoán basenkaoná nga tosi tonda miyoná mani je Jeobá. Ánni. Kuinga kui sʼeya kjoafaʼaitsjenná je xi nʼio chjíle kʼoa jmeni xi ndatjín kʼianga kui nokjoañá tʼatsʼe Niná kao jmeni xi tso je Biblia. Likui kui nikjaʼaitsjeen xi sikʼajen kjoamakjainná (Filipenses 4:8). Kʼianga ʼmiyasoán ngisasa nʼio sʼejna kjoamakjainná nga̱ kui nikjaʼaitsjeen kjoatéxomale Niná kao kjoachoya xi tsjoáná. Kʼoati basenkaoná nga tosi tonda kʼoanʼia josʼin mele Niná kʼoa síkuindaná nga tsín ya jtsaoyaa che̱nle Na̱i (tʼexkiai Efesios 6:14-17).

13. Ánni nga chjí beni nga tsoyason jngo ndsʼee xi Australia tsʼe.

¹³ Nga ʼmiyasoán, nga chotʼayá kʼoa nga bisenkoaa je ndsʼee kʼoati basenkaoná nga tsínkui nʼio nikjaʼaitsjeen je kjoa xi tjínná. Jngo testigole Jeobá xi Australia tsʼe xi Joel ʼmi kʼoatso ánni nga nʼio chjí beni nga tsoyason. Kuinga basenkao nga tsín síchajin nga nʼio tse kjoa tjínle je chjota. Kʼoati tso nga basenkao kjoafaʼaitsjen xi tsjoá je Biblia. Kʼoa itsosa: “Nga xinyasoan basenkaona nga nangitokon ma kʼoa nga sinʼiotʼa je Jeobá kao ndsʼee”.

14. Jósʼin ʼyañá nga je Jeobá basenkaoná kao nganʼiotsjele.

¹⁴ Nga ʼmiyasoán kʼoati kui bakóná nga je Jeobá basenkaoná kao nganʼiotsjele. Nga koa̱njinná xi tʼatsʼe jebi, jngola choa̱ si̱kʼéjnaa. Tsa tjínlani xi kʼoakuitsoli nga kui tsojmi xi ski̱ne kʼuínkaolai je chjota xi ya chrian tsʼe jñani tsi. Tonga tsa tsín ʼya xi kʼoechjíli nga kʼoasʼiain kʼoa toji jchai ngayeje gastoli. Kʼoa tsa ʼyai nga je chjota likui mele nga kui kʼuínkaolai kʼoa tsa saʼnda koa̱njtikeli nga kʼoasʼiain. Jókji tse chókjoali. Ngotjojin si̱kʼajennilai tokuin kʼoa alikuijin tikʼoasʼianni. Tikʼoasʼinni tsanda ñá, kui Énle Niná mangínkaolee je chjota. Nichxin sʼenginá kʼoa feyaná tao̱n, kʼoa je chjota besinná kʼoa saʼnda majtikená. Tonga tosi tonda ʼmiyasoán. A tsí kui xi bakóná nga je Jeobá tíbasenkaoná kao nganʼiotsjele.

15. Ánni nga nʼio chjínile nga kʼuínyasoán.

¹⁵ Nga ʼmiyasoán nʼio chjíle nga̱ kʼoasʼin kuitjosonni jmeni xi tjínndajinle Niná xi tʼatsʼe chjota. Je Jeobá kui xi koanmele nga koatio ngantsjai nichxin je chjota, kʼoa alikui tsʼantjaiya kjoafaʼaitsjenle nga tsakajngijée je Adán (Isaías 55:11). Nga koa̱n ndaí kuiyolee je jée kao kjoabiya, je Jeobá jé Jesús kisikasén i̱ Sonʼnde nga  kitsjoantjai yaole xi totʼatsaan. Tonga tsa mená nga sʼe̱ná kjoanda xi tjenkao nga kʼoakisʼin kʼoa kuiyoaa ngantsjai nichxin, tjínnele nga si̱tjosonlee Niná. Je Jesús kitsoyale je chjota jmeni xi mele Niná nga kʼoasʼin kʼoa kʼoati kitsole je chjotale nga kʼoati kui katatsoya. Kuinga ʼmiyasonñá kʼoa binyakaoñá xi kjaʼaí nga miyole Niná katama. Nga kʼoanʼia, jé Jeobá tinixákoaa kʼoa binyakaoñá je chjota nga ndaí katabatiole je jée kao kjoabiya.

16. Jméni xi bakoá nga ʼmiyasoán.

¹⁶ Kʼianga jngo chjotatítjonle relijión kui kiskonangile je Jesús jñánile je kjoatéxoma xi ngisasa chjíle, je Jesús i kitsole: “Tsjoacha katamai Jeobá Nináli kao ngayeje ni̱ma̱li, kao ngayeje kjoabijnachonli kʼoa kao ngayeje kjoafaʼaitsjenli. Jébi kjoatéxoma xi ngisa ngʼa tíjna kʼoa xi tíjnatítjon. Je xi majaoni, mangósonní kʼoa kui jebi: Tsjoacha katamai je xíngi josʼin nga tsjoachai je yaoli” (Mateo 22:37-39, TNM). Kʼianga ʼmiyasoán kʼoa bakoyalee je chjota jósʼin nga koa̱n koatio ngantsjai nichxin, kʼoasʼin bakoñá nga tinitjosoán je kjoatéxomale Niná nga kʼoatso nga tsjoacha koaan je chjota kao Jeobá (tʼexkiai Hechos 10:42). ʼYañá nga je Jeobá “mele nga ngatsʼi chjota kuitjontjai, kʼoa nga kuichonrʼoe xi kjoakixi” (1 Timoteo 2:4).

17. Jósʼin nikjaʼaitsjain ji tʼatsʼe je kjoanda xi tjínná nga je Jeobá tinixákoaa.

¹⁷ Je Jeobá nʼio tse kjoanda títsjoáná nga tinixákoaa. Nga je tinixákoaa, tsjoa sʼená kʼoa nda sʼe tokoán, ngisa machriantʼalee je Jeobá kʼoa kao ndsʼee, kʼoa basenkaoná. kʼoati bakoá nga tsjoachaa je Jeobá kao ndsʼee. Ngakjijnda Sonʼnde miyón mañá xi choʼndale Niná maa kʼoa kjaʼaí kjaʼaísʼin tiyoaa nga jngó jngoá. Tonga ʼmiyasonñá je Énle Niná jokji tjen bichó nganʼioná, ni sʼa xtiaa kʼoa ninga jejchíngaa, ni nyiná kʼoa ni ma̱ tinijchá yaoná, ni tjínná nganʼio kʼoa ninga mai. Kʼoati tjín tokoán tojo kitso jngo tichjaa xi Francia tsʼe, i kitso: “Je xi ngisasa nʼio ngʼa tíjnale je Sonʼnde kao ngʼajmi, je xi kisinda ngayeje jmeni xi tjín, je Niná xi nʼio tsjoa tjínle, itsona: Tʼin kʼoa tinókjoani xi tʼatsʼan. Ñaki ni̱ma̱li katanroajinni nga kʼuínyasuin. An tsjoanganʼiole, tsjoale Énna, koasenkaoli je ánkje kʼoa kao je ndsʼai xi ñatjen ʼmiyasuin. Xínyale jósʼin kʼuínyasuin kʼoa tsjoale kjoafaʼaitsjen kʼianga koa̱nchjénli. Je Jeobá kui kjoanda tsjoáná nga si̱tjosoán josʼin mele kʼoa nga si̱xákoaa. Nʼio tse kjoanda tjínná”.