1, 2. Jósʼin síchjén Jeobá je tsojmichjí xi tjínle.

JE Jeobá jngoo Niná xi nʼio nda chjota. Tʼatsʼe tínroani ngayeje jmeni xi tjínná. Tsʼee ngayeje je tao̱nsine, tao̱nchxoa kʼoa kao ngayeje jmesani xi tjín i̱ Sonʼnde. Kʼoa jé títsjoáná kjoabijnachon (Sal. 104:13-15; Ageo 2:8). Je Biblia kʼoatso nga nkjín kʼa kisichjén jmeni xi saje kanikʼaxkiaa kʼianga tsakasenkao je choʼndale nga kitsjoale jmeni xi koanchjénle.

² Tobʼelañá, je Jeobá kitsjoale je chjota israelita maná kao nandá je xi 40 nó tsakʼetsoma ya ʼndekixí (Éx. 16:35). Kʼoa nga kʼoakisʼin je Jeobá “alijme xi kichale” je chjota israelita (Neh. 9:20, 21). Xi ijngosani, jé Jeobá kitsjoale nganʼio je Eliseo kʼianga koanle kisitseya je siti̱le jngo ʼndíchjoónkʼan. Kʼianga kʼoakoan, je ʼndíchjoónkʼan jebi koaan tsakʼéchjí xi kitjenle kʼoa saʼnda kinjengisale nga tsakajngiʼa yaole kʼoa kao ʼndíxtile (2 Rey. 4:1-7). Kʼoati je Jeobá tsakasenkao je Jesús nga kjoaxkón tsakʼéjna nga kisinkjínya je tsojmi xi ma chine, kʼoa saʼnda kʼoati kisikao je tao̱n (Mat. 15:35-38; 17:27).

3. Jméni xi chótʼayajiaan i̱ kjoaʼmiya jebi.

³ Je Jeobá koaanle sichjén tojmeni xi mele nga koasenkao je choʼndale. Ninga kʼoalani, kʼoatsole je choʼndale nga katasíchjén  jmeni xi tjínle nga tsjoánganʼiole je naxinandále (Éx. 36:3-7; tʼexkiai Proverbios 3:9 *). Ánni nga kui xi menile je Jeobá nga si̱chjén je tsojmichjíná xi tije títsjoániná. Jósʼin kitsjoanganʼio je choʼndale Niná xi tsakatio nichxin kjoatse. Jósʼin síchjén je naxinandále Niná je tao̱n xi maxkó. Kui tʼatsʼe jebi chótʼayajiaan i̱ kjoaʼmiya jebi.

4. Jméni xi bakolee je Jeobá kʼianga bʼainganʼiolee je xá xi tsʼe.

⁴ Ánni nga kui bʼainilee je Jeobá jmeni xi tjínná. Kuinga tsjoachaa kʼoa bʼailee kjoanda tʼatsʼe jmeni xi tsjoáná. Kʼianga nikjaʼaitsjenjiaan jmeni xi títsjoáná je Jeobá, kʼoati satío tokoán jokisʼe kon je rey David kʼianga kʼoakitso jmeni xi koanchjénle nga kisʼenda je yo̱ngo̱. Kʼoakitso nga tʼatsʼe Jeobá nroani ngayeje jmeni xi tjínná, kʼoa ngayeje jmeni xi bʼailee tijé tsjoániná (tʼexkiai 1 Crónicas 29:11-14). *

5. Jósʼin tsoyaná je Biblia nga kʼoatisʼin ʼyaxkónñá je Jeobá kʼianga bʼailee jmeni xi tjínná.

⁵ Kʼoati kuinga bʼainilee je Jeobá jmeni xi tjínná nga̱ kʼoasʼin ʼyaxkónñá. Ñandia kʼianga jngo sén tsabe je pastro Juan, jñani kisakole nga je choʼndale Niná xi tjío ya ngʼajmi nga itso: “Señor [Jeobá], bakinli nga ji katjitjojeyai, kʼoa nga xkón kataʼyatakonli, kʼoa katasʼeli nganʼio, nga ji kinindai ngayije tsojmi, nga ji koanmetakuin nga kisʼe, kʼoa kʼoasʼin koan” (Apoc. 4:11). Alikui jao tjínná nga bakinle je Jeobá nga jchaxkón kʼoa kuitjojeya, kuinga machjénsíni nga kui xi ngisa nda xi tjínná kʼoailee. Nichxin kjoatse, je Jeobá kʼoakitsole je chjota israelita nga jan sʼuí katabʼasje nga xki̱ nó. Je kjoatéxoma xi tsakʼaile itso: “Nijngojin xi tokjitia ntsja nga kuichokasen ngixko̱n Jeobá” (Deut. 16:16). Tojosʼin tiʼyaa, je chjota israelita alikui tokjitia ntsja nga tsabexkón je Jeobá, Tikʼoasʼinni ndʼaibi, kʼoatisʼin bakoñá nga ʼyaxkoán je Jeobá kʼianga bʼailee jmeni xi tjínná. Kʼianga kʼoanʼia, bakoñá nga chjí ʼyaa kʼoa bʼainganʼiolee je naxinandále Jeobá.

6. Ánni basenkaoniná nga bʼé jmeni xi tjínná (chótsenlai sén xi fitsʼiani kjoaʼmiya jebi).

⁶ Kʼianga tjotʼaa jmeni xi tjínná kʼoati basenkaoná (tʼexkiai Hechos 20:35). * Tobʼelañá, kʼiatsa jngo tiʼndí xi jngo kjoatjao tsjoále xijchále tonga tsa tikui koatseni je kjoatjao jebi kao tao̱n xi tije xijchále tsjoánile, tsjoajin sa̱tío kon je xijchále. Kʼoa tsa jngoje̱ ti xi precursor sʼin tísíxá tao̱n tsjoále je xijchále nga koasenkao tʼatsʼe gasto xi tjín ya yaniʼya. Jósʼin je xijchá jebi. Tsakui nichxin tsínkui koyale nga kʼoakatasʼín je tile, tonga kjoé je tao̱n xi tsjoále, nga̱ kʼoasʼin bakóni je tile nga tsín chajinle je kjoanda bakóle xijchále. Tikʼoasʼinni xi kao je Jeobá, bení nga ndatjín nga kʼoailee je tsojmichjí xi tjínná.

7, 8. 1) Jósʼin kitsjoanganʼio je naxinandále Jeobá nichxin kjoatse kʼianga kitjoson je xá xi kisʼe. 2) Jósasʼin kitsjoanganʼio je choʼndale Jeobá nichxin kjoatse.

⁷ Ya Biblia faʼaitʼa choa̱ xi bakóná nga kitsjoa jmeni xi kisʼele je choʼndale Jeobá. Tobʼelañá, je Moisés kʼoakitsole je chjota israelita nga katatsjoánganʼio nga sʼe̱nda je ndʼianajño, kʼoa je David kʼoati kisʼin kʼianga  kisʼenda je yo̱ngo̱ (Éx. 35:5; 1 Crón. 29:5-9). Kʼianga nichxinle je rey Jehoás, je xi naʼmi sʼin tjío, kui tao̱n xi kitsjoa je naxinandá tsakʼéndayani je ndʼiale Jeobá (2 Rey. 12:4, 5). Kʼianga kisʼejinle je chjotale Cristo xi tsakatio kʼianga siglo 1 nga kjinrá kisʼe ya naxinandá Judea, je Biblia kʼoatso nga kitsjoanganʼio nga jngó jngó jokji tjen kicho nganʼiole (Hech. 11:27-30).

⁸ Xi ijngosani, je choʼndale Niná xi tsakatio ngasʼa tsakinyakao je xi tsakinyatítjon ya jinnaxinandále Jeobá. Tobʼelañá, je Kjoatéxomale Moisés kʼoatso nga je chjota levita alikui jme kjoatjao tsakʼaile joni je xi ngikʼa ntje̱. Kuinga je chjota israelita xi ngikʼa te ya kitsjoanile je tsojmi xi kisʼele. Kʼoa kui xi tsakinyakao je chjota levita nga ñaki to xále Niná kisʼin (Núm. 18:21). Kʼoati kisʼin kʼa je yánchjín kʼianga tsakinyakao je Jesús kao chjotale (Luc. 8:1-3).

9. Jókisʼin je choʼndale Niná nichxin kjoatse nga kitsjoanganʼio tʼatsʼe xále Niná.

⁹ Kjaʼaí kjaʼaísʼin kitsjoanganʼio je choʼndale Niná. Tobʼelañá, je chjota israelita kitsjoanganʼio kʼianga kisʼenda je ndʼianajño ya ʼndekixí, tsakui nichxin kui kitsjoa je tsojmichjí xi kinroakaoni ya Egipto (Éx. 3:21, 22; 35:22-24). Kʼianga siglo 1, tjínkʼa je chjotale Cristo xi tsakaténa jmeni xi tjínle. Tobʼelañá, tsa nangi kʼoa tsa ndʼia. Kʼoa je tao̱n xi koanchjínile jé pastro kitsjoale. Kʼoa je pastro jé kitsjoale xi ma̱ tjío (Hech. 4:34, 35). Tjínkʼa je chjotale Cristo xi tsen tsakatíotʼaxin je tao̱n nga ntsjaintsjai kitsjoanganʼio tʼatsʼe xále Niná (1 Cor. 16:2). Ninga je xi nyiná koan kʼoa ninga je xi ma̱ koan, kitsjoanganʼio ngatsʼi (Luc. 21:1-4).

10, 11. 1) Jósʼin koa̱n chjénngilee je choʼndale Niná xi tsakatio nichxin kjoatse nga kitsjoa jmeni xi kisʼele. 2) Jósʼe tokuin kʼianga tibʼainganʼiolai je xále Niná.

¹⁰ Nichxin xi tiyoaa ndʼaibi, sakʼoaa machjén nganʼio kʼianga jme xá xi sʼe jinnaxinandále Niná. Tobʼelañá, tsakui nichxin kʼoasʼin tísʼendajin nga sʼe̱ndaya kʼoa tsa sʼe̱nda chjotse je Ndʼia jña chotʼayá. Kʼoa tsa machjénje̱ nga sʼe̱ndaya chjotse je sucursal, tsa tao̱n machjén nga sʼe̱jna je kjoajtíntse kʼoa tsakuije̱ nga kuinyakoaa je ndsʼee xi kjoaxkón bichóne. Je nganʼio xi bʼé kʼoati binyakao je misionero, je precursor especial, superintendente xi tsʼe circuito, je ndsʼee xi ya síxá ya oficina xi tíjnatítjon kʼoa kao xi tjíosíxá ya sucursal xi tjío jngo tjíjtsa Sonʼnde. Kʼoa xi ijngosani, tsakui nichxin kʼoasʼin tjínndajin ya jtín jñani mangián nga síkasén ntsjaintsjai nga xki̱ sá je tao̱n xi machjén nga sʼenda je Ndʼia jña chotʼayá kʼoa jñani satío je kjoajtíntse. Nga kʼoasʼin sʼendajin, binyakao je ndsʼee xi tjío jngo tjíjtsa Sonʼnde.

¹¹ Ngatsʼiñá nga koa̱n kʼoainganʼioá je xále Niná nichxin fetʼa xi tiyoaa ndʼaibi. Alikui ʼya xi be jotjín tao̱n bʼé nga jngó jngoá, nga̱ yaa nikatíoyá ya kaxa̱ xi tjío ya Ndʼia jña chotʼayá kʼoa tsa maije̱ ya tjen jw.org nikasénñá. Tsakui nichxin kʼoasʼin nikjaʼaitsjeen nga tsín nʼio tse bʼainganʼioá. Tonga je tao̱n xi kjimachjén nga tíbitjoson je xále Niná ndʼaibi, alikuijin nga tochoa mani xi nʼio tse tsjoá, kuiní nga nʼio nkjín mani xi tsjoá ninga tochoa. Je ndsʼee kui fitjenngi choa̱le choʼndale Niná xi tsakatio ya Macedonia kʼianga siglo 1. Kʼoakitso nga katatjoʼndele nga tsjoánganʼio tʼatsʼe xále Niná, kʼoa ñaki kao kjoatsjoa kʼoakisʼin ningalani nʼio ma̱ tsakatio (2 Cor. 8:1-4).

12. Jósʼín je naxinandále Niná nga nda koa̱nchjén je tao̱n xi maxkó.

¹² Je Cuerpo Gobernante nda kosonnile jósʼin koa̱nchjén je tao̱n xi maxkó ya jinnaxinandále Niná (Mat. 24:45). Je ndsʼee jebi, jé Jeobá bʼétsʼoale nga nda bʼéndajin josʼin koa̱nchjén je tao̱n xi maxkó (Luc. 14:28). Nichxin kjoatse, jé choʼndale Niná xi kixi kisʼenele nga tsakʼéndajin josʼin koanchjén je  tao̱n xi koanxkó kʼianga tsaʼyaxkón je Jeobá. Tobʼelañá, je Esdras kʼianga kichoni ya Jerusalén, yʼaa je tao̱nsine, tao̱nchxoa kʼoa xi kjaʼaísanile xi kitsjoa je rey xi tsʼe Persia, tsa ndʼaibi, tsʼatola 1,700 miyón (100 miyón dólar) tjínni. Je Esdras kʼoasʼin tsabekon je tao̱n jebi nga jngo kjoatjao xi tsʼe Jeobá, kuinga nʼio nda kisikuindani nga kinroakao yandʼia (Esd. 8:24-34). Kʼoa nʼio nkjín nó koanskanni, je pastro Pablo tsakʼéndajin nga katasʼexkó je tao̱n nga kʼoainganʼiole je chjotale Cristo xi Judea tsʼe, kʼoa jé tsakánele chjota xi kixi nga nda katasíkʼabíle je chjotale Cristo xi nganʼio machjénle, kʼoa nga kʼoasʼin, ali tokuijin nga nda koatio ngixko̱n chjota, kuinga ndasʼin koatio ngixko̱n Jeobá (tʼexkiai 2 Corintios 8:18-21). * Nichxin xi tiyoaa ndʼaibi, je naxinandále Jeobá kui choa̱le Esdras kao Pablo fitjenngi. Kuinga nda kosonnile jósʼin koa̱nchjén je tao̱n xi maxkó.

13. Ánni nga kjibʼantjaiyajinni josʼin tísíxá je naxinandále Niná.

¹³ Tjínkʼa je familia xi bʼéndajin josʼin nga tsín tsʼe tao̱n síkjeya. Kʼoa tjínkʼa xi kʼoati bʼéndajin josʼin nga ngisa nda sixále je Jeobá. Tikʼoasʼinni je naxinandále Niná. Tobʼelañá, je nó xi tífaʼato, nkjín xá tísʼe ya jinnaxinandále Niná, kʼoa sakʼoaa ngisa tse tao̱n jeya tikʼoajinni jotjín koanxkó. Kuinga básjainile je naxinandále Niná jósʼin nga ngisa choa tao̱n sikjeya. Kʼoa kʼoasʼin nʼio nda kjimachjén je tao̱n xi bʼé.

14-16. 1) Jmé xá kjimachjénni je tao̱n xi bʼé. 2) Jósʼin tíbasenkaoli je kjoatjao xi títsjoáná je naxinandále Niná.

¹⁴ Nʼio nkjín ndsʼee xi jenkjín nó tjíosíxále je Jeobá xi kʼoatso nga kjesa kʼoasikji kjoatjao tsjoájinle je naxinandále Niná joni ndʼaibi. Tobʼelañá, tíjnaná je pájina jw.org kao JW Broadcasting. Xi ijngosani, je Traducción del Nuevo Mundo de las Santas Escrituras ngisaa jenkjín én tjío ndʼaibi. Kʼoa kʼianga nó 2014 kao 2015, kisatio je kjoajtíntse jñani nkjín naxinandá faʼaini xi bichó je xi “Sigamos buscando primero el Reino de Dios” tsakʼin. Kʼoa yaa kisatio je kjoajtíntse jebi ya estadio jñani ngisasa yʼai kjoan xi tjío xi 14 naxinandá  tjínni. Ngatsʼi xi kicho nʼio tsjoa kisatio kon.

¹⁵ Nʼio nkjín ndsʼee xi tsjoá kjoanda tʼatsʼe jmeni xi títsjoáná je naxinandále Jeobá. Tobʼelañá, jngo ndsʼee kao chjoónle i kitso tʼatsʼe jmeni xi faʼa ya canal xi tsʼe telebisión xi tíjnaná: “Sakʼoaa kʼoasʼe tokuijin nga nʼio kjin tiyolaijin je naxinandále Jeobá kʼoa nichajinñá josʼin kjimaxá jinnaxinandále. Tonga nga chotsenlaijin jmeni xi faʼa ya JW Broadcasting, kui xi basenkaonajin nga nikjaʼaitsjenjinjin nga ya tiyojinlaijin je naxinandále Niná xi tíjna jngo tjíjtsa Sonʼnde. Nʼio tsjoa tjíole je ndsʼee nga tíjna JW Broadcasting. Me kjitʼa noʼyalaijin nga kʼoatso nga ngisa chrian tjíole je Cuerpo Gobernante. Kʼoa nʼio tsjoa satío kon nga ya tjíojinle je naxinandále Niná”.

¹⁶ Jngo tjíjtsa Sonʼnde, tsʼato 2,500 tjínni je Ndʼia jña chotʼayá xi tjíosʼenda kʼoa tsa tjíosʼendaya. Ya Honduras, i kitso je ndsʼee kʼianga jekoanjngole je Ndʼia jña chotʼayá: “Nʼio tsjoa tjínnajin nga ya tiyojinjin je naxinandále Jeobá kʼoa nga ya tiyojinlaijin je ndsʼee xi tjío jngo tjíjtsa Sonʼnde. Xi totʼatsʼe jebi, kitjoson jmeni xi nʼio kichoyalaijin nga kisʼenda je Ndʼia jña chotʼayá i̱ ʼndenajin”. Nʼio nkjín xi kʼoati satío kon kʼianga jebichóle je Biblia kao xo̱n xi Énle Niná yʼangini xi énle faʼaitʼa, kʼoa tsa kʼiaje̱ nga bʼainganʼiole nga kjoaxkón bichóne, kʼoa tsakuije̱ nga tjíobe ya naxinandále nga ndasʼin tíbichómani nga tíʼmiyason je Énle Niná ya jña nʼio tjín chjota kao ya jñani ciudadyʼai.

17. Jósʼin ʼyañá nga tíbasenkao Niná je naxinandále nichxin xi tiyoaa ndʼaibi.

¹⁷ Nʼio nkjín chjota xi tsín testigole Jeobá ma xi tokʼoamale nga kʼoasikji xá kjima ya jinnaxinandále Niná kʼoa nga tokui kjimachjén je tao̱n xi bʼe. Jngo chjota xi xángʼa tjínle kicho ya sucursal jñani manda je xo̱n xi Énle Niná yʼangini. Tokʼoakoanle nga kisʼejinle nga tsín machjíle je xi ya síxá, nga tokui kjimachjén je tao̱n xi batioá kʼoa nga tsínkʼia jme xi sʼendajin nga tao̱n sʼe̱ña. Kʼoakitso nga tsín jokoa̱nnile nga kuitjoson ngayeje je xá xi kjima. Kʼoa kʼoatjín kjoaixi jokitso chjota jebi. Kuinga tíbitjoson je xá xi kjima nga̱ jé Jeobá tíbasenkaoná (Job 42:2).

18. 1) Jmé kjoanichikontʼain xi sokóná kʼianga bʼainganʼiolee je Chjotaxále Niná. 2) Jósʼin kuisenkoaa je xti kʼoa kao je xi sʼa tjíokotʼaya Énle Niná nga kʼoati katasʼín.

¹⁸ Nichxin xi tiyoaa ndʼaibi, je Jeobá kui kjoanda títsjoáná nga tibʼainganʼioá je xá xi kjima xi totʼatsʼe Chjotaxále. Kʼoatso nga tse kjoanichikontʼain so̱koná tsa kʼoasʼiaan (Mal. 3:10). Kʼoa kʼoatso nga je chjota xi tjotʼa nda koatio (tʼexkiai Proverbios 11:24, 25). * Xi ijngosani, tsjoa satío tokoán, nga̱ ngisa nda “nga kʼoee kaoni tsa nga chjoé” (Hech. 20:35). Kʼoa kui kjoanda tjínná nga kao énná kʼoa kao jmeni xi sʼiaan kʼuínyanilee je xtiná kʼoa kao je chjota xi sʼa tjíokotʼaya je Énle Niná nga kʼoati tsjoánganʼio kʼoa sʼe̱le kjoanichikontʼain.

19. Jósʼin kabasenkaoli je kjoaʼmiya jebi.

¹⁹ Ngayeje jmeni xi tjínná tʼatsʼe Jeobá tínroani. Kʼianga bʼailee jmeni xi tjínná kʼoasʼin bakoñá nga tsjoachaa kʼoa nga chjí ʼyaa jmeni xi tísʼín xi tʼatsaan (1 Crón. 29:17). Kʼianga kitsjoanganʼio je chjota israelita nga kisʼenda je yo̱ngo̱, “je naxinandá ñaki tsjoa koanle nga kitsjoatʼa cho̱, nga̱ ñaki ni̱ma̱le kinroajinni nga kʼoasʼin kitsjoatʼale cho̱ je Jeobá; kʼoa saʼnda je rey David nʼio tsjoa kisʼele” (1 Crón. 29:9). Kʼoati tsjoa kʼoé tokoán nga kʼoailee je Jeobá jmeni xi tije títsjoániná.