“NGA nʼio tsjoa tjíole miyona nga ya tjíotsjoánganʼio jña ngisa machjén precursor, kʼoati koanmena tsjoa sʼe̱ tokoan”, tso je Sylviana, jngo precursora xi kanʼaonla nóle. I tsosa: “Tonga kʼoasʼin kisikjaʼaitsjen nga tsín kʼoakoa̱nna ya kjuía jña ngisa tse nganʼio machjén”.

A saje kʼoasʼin kinikjaʼaitsjain. A meli nga ya kʼuínkʼinyasuin jñani ngisa tse nganʼio machjén, tonga a kʼoasʼin nikjaʼaitsjain nga tsín kʼoakoa̱nli. Tsa jaon, ali nikʼajenjin tokuin. Nʼio nkjín ndsʼee xi tjíochókjoajinle jmeni xi ñʼai kjimale nga ngisasa tse tjíotsoyason, nga̱ jé Jeobá tjíobinyakao. Jótísʼín je Jeobá. Kataʼyala josʼin kjimaxá ya Madagascar, ʼnde xi mañoni xi ngisasa je kji xi tíjnajin nandá.

Je xi te nó tífaʼato, tsʼato 70 precursor kao publicador xi 11 naxinandá kinroani, * xi ya kitsoyason ya África. Nkjín chjota xi ya tsʼe xi bexkón je Biblia. Kʼoati nʼio nkjín xi jetsoyason xi tiyani tsʼe, xi tjíotsjoánganʼio nga katabʼabíson je Énle Niná, nga̱ nʼio je kji naxinandá jebi. Kataʼyala kʼaa.

Je Louis kao Perrine xi jechixan, jetsʼato 30 nóle, Francia tsʼe kʼoa yaa Madagascar kikatio. Nkjín nó nga kʼoasʼin kisikjaʼaitsjen nga xin naxinandá koaitsoyason, tonga je Perrine to jao kisʼe kon. Itso: “Kitsokjonña nga̱ likui ʼbe josʼin kuichomani. Kui koankjáojinna nga sikatíoa je familiana, je jtín, niʼyanajin, jochon jña tiyuijin kʼoa jme xi nʼiaijin. Je xi ngisa ñʼai koanna kuiní josʼin kisikjaʼaitsjen”. Tonga nga nó 2012, je Perrine chaan tsakʼasje nganʼio, kuinga xin kikatiosíni kao je Louis. Jótjín kon ndʼaibi nga kʼoakisʼin. Itso je Perrine: “Kʼianga kui sikjaʼaitsjenjian jmeni xi kitjatojinjin, kjimatajasa je kjoamakjainna nga tiʼbe josʼin tíbasenkaonajin je Jeobá”. Kʼoa je Louis itso: “Kʼianga tosʼa títjon tsangínjin ya Madagascar nga jaʼaitsjenya je Kjoabiyale Cristo, te koanni xi ʼmiyalaijin Biblia xi kʼoati kicho”.

 Jmé xi tsakinyakao nga tosi tonda ya tsakatio jñani tjíotsjoánganʼio ningalani kui kjoa jebi jaʼatojin. Jé Jeobá tsakʼétsʼoale kʼoa kisijéle nga katatsjoále nganʼio nga ska̱le (Filip. 4:13, TNM). Je Louis itso: “Tsaʼyaníjin nga je Jeobá kinrʼoénajin kʼoa kitsjoanajin je kjoanyʼántokonle. Tosa kui kuenta kinʼiaijin jme kjoanda xi tísokónajin nga je Niná tinixálaijin. Xi ijngosani, je miyonajin xi ya Francia tjío kisikasénnajin je correo electrónico kao karta nga kitsjoanganʼionajin” (Filip. 4:6, 7; 2 Cor. 4:7).

Je Jeobá kisichikontʼain je Louis kao Perrine nga kʼoasʼin kichokjoajinle. Je Louis itso: “Nga sá octubre nó 2014, kʼiaa tsangínjin je Skuela xi síchjine xi jechixan ya Francia. * Alikui cha̱jinnajin skuela jebi, nga̱ jngoo kjoatjao xi je Jeobá kitsjoanajin”. Je ndsʼee kao chjoónle nʼio tsjoa koanle nga ya kinikasén ijngokʼa ya Madagascar kʼianga jejetʼa skuela jebi.

Je Didier kao Nadine xi ya Francia tsʼe, jetsʼato 50 nóle kʼoa yaa Madagascar kikatio nga nó 2010. Je Didier itso: “Nga sʼa xtijin precursor koainjin, kʼoa xi koanskanni, jan xti kinijcháijin. Kʼianga jekoanjchínga xtinajin, kinikjaʼaitsjenníjin tsa koa̱n nga xin naxinandá kʼoainganʼiuijin”. Je Nadine itso: “Alikui kitso tokoan nga sikatíoa je xtina, tonga je i kitsonajin: Kʼiatsa xin naxinandá koanngínkʼinyason, nʼio tsjoa koa̱nnajin xi tʼatsaon. Nga kʼoakitsonajin kui xi tsakinyakaonajin nga kʼoakinʼiaijin. Ninga jekjin tiyuijin ndʼaibi, tsjoa manajin nga kjitʼa chjakaonajmíjin”.

Alikui choa ñʼai koanle je Didier kao Nadine nga kui én xi malgache ʼmi kiskotʼaya. Je Nadine kʼoatso nga tsín tisʼa xtini nga kui én koa̱nle. Jméni xi kisʼin. Títjon ya ki jngo jtín xi én francés nokjoa. Kʼianga jekitso kon, kʼiaa ki ya jtín jñani én malgache nokjoa. Je Nadine itso: “Kʼianga ʼmiyasuinjin, nkjín chjota kajinjin xi mele skótʼaya Biblia kʼoa sasénle nga mangínchon ijngokʼalaijin. Nga títjon, tokʼoakoanna. Nʼio tsjoa tjínna nga precursor sʼin tisixá ya ʼnde jebi. Kʼianga bisotje̱n nga tanjio, i xian: Jótondani nga tifixinyasoan ndʼaibi”.

Je Didier ñaki tsjoa male kʼianga faʼaitsjenle nga tosʼa koanle je én malgache. Itso: “Ñandia kʼianga an tibandiaale je kjoajtín kʼoa alikui koanjinna jmeni xi kitso je ndsʼee nga kitsjoa comentariole. Niná xi katʼéchjíli, tokixinle. Kʼianga jekitsjoa comentariole jngo tichjaa, je xi ya tjío jto̱n yátsʼi̱n, tseen kisʼin nga tsín kʼoatjín jokitso je tichjaa. Kʼoa kuinga ijngo ndsʼee kitsjoanile je comentario kʼoa ndasʼin kitsjoa je comentariole, kʼoaxianñe an nga ndatjín jokitso”.

Kʼianga kisʼejna je kjoajtíntse nga nó 2005, je  Thierry kao Nadia kui tsabe je drama xi Kui koanngíntjenngiaa xá xi Niná kʼoasjengʼa tsakʼin, xi kui kinchja̱ni tʼatsʼe Timoteo. Je drama jebi tsakinyakao nga koanmele xin koaikakóyason. Je Thierry itso: “Kʼianga jetʼa je drama kʼoa nga tinijtsinyaijin ndsaijin, i kixinle je chjoónna: Jñáni koanngían. Kʼoa je kʼoakitsona nga kʼoani tisʼin tísíkjaʼaitsjen”. Tochoatsee jaʼato nga kʼoakisʼin jmeni xi tsakʼéndajin. Je Nadia itso: “Choa choaa kinichoayaijin jmeni xi tjínnajin. Kʼoa tochaan to ñosa maleta koan”.

Kʼiaa kicho ya Madagascar nga nó 2006, kʼoa nʼio tsjoa kisatio kon nga kitsoyason. Je Nadia itso: “Josʼin nrʼoénajin Énle Niná je chjota nʼio tsjoa báya tokuijin”.

Kʼianga jaon nó jejaʼato, je ndsʼee jebi kao chjoónle jngo kjoa xi ñʼai tjín jaʼatojin. Je male Nadia xi Marie-Madeleine ʼmi, xi ya Francia tíjna, kiska kʼoa kitsiʼaon jko̱ kʼoa kitjotʼáo xjale. Kʼianga jetsakjákao Thierry kao Nadia je chjinexki xi kisisinle Marie-Madeleine, kʼoakitsole je male tsa mele nga ya koaikʼejnakao ya Madagascar. Ninga jeñokan nóle, ñaki tsjoa tjínle nga ki. Jótjín kon nga xin naxinandá ki. Je Marie-Madeleine itso: “Ñʼai kjimangana i̱bi, ninga tsín tinanda chókjoanina, ma tsjoanganʼioa i̱ jinjtín. Je xi ngisa tsjoa báya tokoan kuinga tosi tonda i̱ tjíotsoyason je tsotina kao xʼinle jñani nʼio nda nrʼoé chjota”.

Jngo ndsʼee xi Riana ʼmi xi jetsʼato 20 nóle. Yaa Alaotra Mangoro koanjchínga, jngo ʼnde jña nʼio nda ma tsojmintje, xi ya Madagascar tíjna. Ti jebi nda tsakʼasje je xo̱nle ya ndʼiaskuela kʼoa kui xi koanmele nga jngo carrera skótʼaya. Kʼianga jekiskotʼaya Biblia, likui tikʼoasʼin kisikjaʼaitsjenni. Itso: “Kʼoasʼin tsakʼendajian nga ndi̱to̱n sikjetʼa je xo̱nna kʼoa i kixinle je Jeobá: Tsa kjoaʼatoa je examen xi fetʼani, precursor koa̱n”. Kʼianga jetʼale je skuelale, kisitjoson jmeni xi kitso je Riana. Yaa ñatjen kikʼejna kao jngo precursor, tsakajngixá xi tobasenya nichxin maxá kʼoa precursor koan. Itso: “Kui jebi xi ngisa ndatjín xi kiskoejian”.

Tonga je xínkjín Riana alikui koanjinle ánni nga tsín tikiskotʼayani. Itso: “Je pana, tsinina kao nyokjoanna kui xi koanmele nga ya universidad skotʼaya. Tonga nitséjinla sikʼéjna je xá xi tsʼe precursor”. Tochoa tsee jaʼato kʼoa je Riana koanmele ya ki jngo ʼnde jñani ngisa machjén xi tsoyason. Ánni nga kʼoakisʼinni. Itso: “Ché jaʼasʼen niʼyana kʼoa nkjín tsojmi kikao. Nga kʼoakoan kui kisikjaʼaitsjenjian jmeni xi kitso Jesús tʼatsʼe nga ya kuinyatjoá kjoanyináná ya ngʼajmi. Kʼoa kuinga tsakʼenenile yaona nga tosi tonda je Niná kisixále” (Mat. 6:19, 20). Je Riana yaa ki ya ʼndele chjota xi antandroy kitjenni, xi 1,300 kilómetro kjin tíjnale ya jñani tíjna tsakai. Ánni nga kʼoasʼin kjin kini.

Jngo sá tongini nga kje machéjinle, je Riana jao chjota xi antandroy kitjenni kitsoyale Biblia. Koan kʼale je én xi nchja̱ chjota jebi kʼoa kui kisikjaʼaitsjen nga kjejin ʼmiyajinle je Énle Niná ngatsʼi chjota xi ya tsʼe. Je Riana itso: “Kisijéle Jeobá nga katabasenkaona nga ya kjuía jñani nga én tandroy nokjoa”.

Kʼianga jeya kikʼejna jña én tandroy nokjoa, alikui ndi̱to̱n kisokoxále. Jngo chjota xi i̱ kitsole: “Ánni nga i̱ jaʼaini. Je chjota xi i̱ tsʼe yaa fikajngixá jña kinroani”. Nga jejao xomana jaʼato, je Riana kʼiaa ki je kjoajtíntse xi jan nichxin kisʼejna. Nga tochoasa mani je tao̱nle kui kisikjaʼaitsjen jméni xi sʼin. Kʼianga jetífetʼa je kjoajtíntse, jngo ndsʼee xi tao̱n tsakʼéjnaya xijtsale. Tao̱n xi kitsʼaile koansonnile nga kinroani ya antandroy kʼoa xijekoan yogur tsakaténa. Itso: “Kʼiakjoán tsakasenkaona je Jeobá nga nganʼio koanchjénna. Kʼoa tosi tonda koan tsakasenkoa je chjota nga tsabesa xi tʼatsʼe Niná”. Kʼoati nʼio tse xá tjín ya jinjtín. Itsosa: “Xki̱ jao xomana kitsjoaña je kjoanokjoaya. Jé naxinandále Jeobá kisichjén nga tsakasenkaona”. Ndʼaibi, je Riana tosi tonda tíbakóyale Énle Niná je chjota xi én tandroy nchja̱ kʼoa xi mele skoe̱ xi tʼatsʼe Jeobá.

Je Jeobá kʼoatso nga sichikontʼain je xi bʼénele yaole nga síxále (Is. 65:16). Kʼianga kʼoanʼia jokji tjen kʼoamaná ninga jme xi bʼéchjoaná kʼoa nga tsesa nixálee je Niná, síchikontʼainná. Tobʼelañá, je Sylviana, xi kanikʼaxki̱ná jña fitsʼiani kjoaʼmiya jebi, kʼoasʼin kisikjaʼaitsjen nga tsínkʼia kʼoakoa̱nle nga xin koaitsjoánganʼio. Ánni nga kʼoasʼin kisikjaʼaitsjenni. Itso: “Je ndso̱koa ngʼaskón, ñajan centímetro ngisa ʼndítʼa kji tikʼoajinni xi ijngo, ndi̱toon bijtana nga̱ chjiʼngé sʼian nga fia”.

Ninga kʼoalani, kʼianga nó 2014, je Sylviana ñatjen ki kao jngo precursora xi sʼa xti xi Sylvie Ann ʼmi ya jngo ʼnde xi 85 kilómetro kjin tíjnale ya niʼyale. Ninga ñʼailani koanle, je Sylviana kichotjenngi jmeni xi tsakʼéndajin. Xi ijngosani, nʼio tse kjoanda kisokole, itso: “Nga tosʼa kicho ñanó nga ya tijna, jngo chjoón kixinyale Biblia xi Doratine ʼmi, kʼiaa kisʼenngindá nga kisʼejna je kjoajtíntse xi jngo nichxin”.

Jmeni xi bʼéyanajmí je ndsʼee kui bakóyaná kʼiatsa kʼoénelee yaoná nga tsesa kʼuínyasoán ninga ñʼai koa̱nná, jchañá nga ñaki kʼoatjín je én jebi: “An tsjoanganʼiole, an koasenkaole” (Is. 41:10). Én jebi basenkaoná nga ngisa mamiyosaa je Jeobá. Xi ijngosani, kʼianga bʼainganʼioá tsa tiyani naxinandáná kʼoa tsa ya jñani xin, síkatíondaná je xá xi sʼiaan kʼianga jeʼndenaxó koa̱n i̱ Sonʼnde. Je Didier xi jenása kanikʼaxkiaa, itso: “Kʼianga ya bʼainganʼioá jñani nʼio tse xá tjín síkatíondaná tʼatsʼe nichxin xi sʼa nroa”. Choyalee nga ngisasa nkjín ndsʼee katatsjoánganʼio xá jebi, nga̱ kʼoasʼin ni̱katíondani.