JAON koanchjén sakʼoa, jngola choa̱ kataʼyaa xi kuitsoyaná. Ya Deuteronomio 24:14, 15 itso: “Alikui koa̱n chʼa̱nachalai jngo chjota xi tísíxá xi ma̱ kʼoa xi nganʼio machjénle, ni ndsʼai mani kʼoa ni xin tsʼe xi ya tíjna ya ʼndeli [...]. Nga̱ tsa mai, jé Jeobá kjoájétʼale kʼoa kui jée sʼe̱nai”.

Ya chrian naxinandá Asdod, jngo chxʼoále tii koansjai xi kʼia saʼnda tíjnani nga siglo 7 tongini nga nó 1. Jebi kui nroatʼa jme xi nchja̱ni Deuteronomio 24. Tochale je xotsakʼinle jngo chjota xi tsojmi bántje, xi tsakui nichxin tsín kitsjoa jotjín tsojmi bʼakaole nga tsjoá tsakai. Itso xi tjítʼa je xi koansjai: “Kʼianga jetsakʼéxkó tsojmintje je choʼndali [je xi tifajée] je Hoshayahu, tile Shobay, jaʼai kʼoa kikao je najñole choʼndali. [...] Ngatsʼi chjota xi ñatjen tibʼexkuíjin je tsojmintje kʼoakuitso [...] nga ñaki kʼoatjín jmeni xi tixian. Alikui jme jée tjínná. [...] Tsa kʼoakuitso je gobernador nga tsín je bʼakaole nga kʼoai ijngokʼanile najñole je choʼndali, katasʼele kjoamatokon. Ali tsa to jyójin bijnai kʼianga jetsínle najño je choʼndali”.

Je xi Simon Schama ʼmi, xi kui kotʼayason tʼatsʼe jme xi koan nichxin kjoatse, kʼoatso nga je én xi tjítʼa jmeni xi koansjai “kui nchja̱ni je kjoa xi jaʼatojin jngo chjota xi tsojmi bántje nga koanmele kitjoé ngindianile [je najñole]”. Kʼoa itsosa: “Kʼoati kui xi tsoyaná nga je chjota jebi kʼoati be jotso je kjoatéxoma xi nroatʼa ya Biblia, jolani je kjoatéxoma xi faʼaitʼa ya Levítico kao Deuteronomio, jñani kʼoatso nga tsín kixi tíjna nga totaon ʼya jngo chjota xi ma̱ tísíjchá yaole”.