1, 2. Jméni xi jtín sʼin sikatío je chjota kʼianga nó 2018, kʼoa ánni nga nʼio tjínsínile kjoandosin jebi (chótsenlai sén xi faʼaitʼa ibi).

KʼIANGA 31 sá marzo xi tsʼe nó jebi nga jeska̱ntjai je Tsʼuí, miyón chjota sikjaʼaitsjenya je Kjoabiyale Cristo jngo tjíjtsa Sonʼnde. Je Kjoabiyale Cristo toñandia faʼaitsjenya nga xki̱ nó, kʼoa tsínsa jmeni xi mangóson jokji jtín sʼin síkatío je chjota.

² Je Jeobá kao Jesús nʼio tsjoa satío kon kʼianga be nga miyón chjota batiojtín nga síkjaʼaitsjenya je Kjoabiyale Cristo. Je Biblia tongini kʼoakitso nga nʼio nkjín chjota xi kjoaʼaíni ngakjijnda ʼnde, “kao ntje̱, kao naxinandá, kao én”, xi i̱ kuitso: “Kjoabitjontjai tjínle je Nináná, xi ya tíjnane je yáxilebe, kʼoa je Barré” (Apoc. 7:9, 10). Kʼianga faʼaitsjenya je Kjoabiyale Cristo nga xki̱ nó, nʼio nkjín chjota xi je Jeobá kao Jesús bexkón.

3. Jméni xi chótʼayajiaan i̱ kjoaʼmiya jebi.

³ I̱ kjoaʼmiya jebi, ño koya tjínni xi chótʼayajiaan. Xi títjon, jósʼin kuiyondalee nga kjoaʼaítsjenya je Kjoabiyale Cristo kʼoa jósʼin koasenkaoná. Xi majaoni, jósʼin basenkaoná nga faʼaitsjenya je Kjoabiyale  Cristo nga jtín sʼin biyoaa. Xi majanni, jósʼin kʼoainganʼioá nga jtín sʼin kuiyoaa. Kʼoa xi mañoni, a kjoaʼaí nichxin nga tongiñandiasa si̱kjaʼaitsjenyá je Kjoabiyale Cristo. Tsa jaon, kʼiáni.

4. Ánni nga nʼio tjínnile kjoandosin nga koanngián nga faʼaitsjenya je Kjoabiyale Cristo.

⁴ Ánni nga nʼio tjínsínile kjoandosin nga koanngían nga faʼaitsjenya je Kjoabiyale Cristo. Kuenta sʼiaan nga je kjoajtínná yaa tíjnajin nga bʼetsʼoalee je Niná. Je Jeobá kao Jesús alikui chajinle jokji nganʼio chʼasjee kʼianga mangián nga faʼaitsjenya je Kjoabiyale Cristo. Je Jeobá kao Jesús kui xi mele nga koanngián kjoajtín jebi, tokʼiajin nga ñʼai koa̱nná kʼiatsa nʼio timʼee kʼoa tsa jmesani xi kjimaná. Kʼianga bakoá nga chjí ʼyaa je kjoajtínná, kʼoasʼin bakonilee Jeobá nga mená ya katasʼetʼa jaʼaínná je libro xi tíkijnale. Libro jebi, kʼoati “xo̱n xi tsʼe kjoabijnachon” ʼmile, yaa tjíotʼa jaʼaínle chjota xi kʼoaile kjoabijnachon xi tsínkʼia fetʼa (Mal. 3:16; Apoc. 20:15).

5. Kʼianga kjesa faʼaitsjenyajin je Kjoabiyale Cristo, jósʼiaan nga chótʼayakoaa yaoná tsa tjínná kjoamakjain.

⁵ Kʼianga kjesa faʼaitsjenyajin je Kjoabiyale Cristo, koaan si̱kʼayaa nichxin nga kʼoétsʼoaa kʼoa si̱kjaʼaitsjenjiaan je kjoamiyo xi tjínná kao Jeobá (tʼexkiai 2 Corintios 13:5). * Jósʼiaan. Je Pablo kʼoakitso nga tjínnele chótayakoaa yaoná tsa tjínná kjoamakjain. Kuinga ndatjínsíni nga chjónangilee yaoná jebi: “A makjainna nga toje naxinandále Jeobá xi kui kʼoatjíosʼín josʼin mele Niná. A bʼenele yaona nga xinyasoan kʼoa bakoya je énnda chjotse. Jmeni xi sʼian, a bakoña nga nichxin fetʼa tiyoaa kʼoa nga jeme tjóxin je Na̱i. A tojo kʼoasʼin sinʼiotʼa Jeobá kao Jesús jokisʼian nga sʼa kitsjoatʼale yaona je Niná” (Mat. 24:14; 2 Tim. 3:1; Heb. 3:14). Kʼianga si̱kjaʼaitsjenjiaan jebi koasenkaoná nga jchaa tsa jñani tjínnele si̱ndayaa yaoná.

6. 1) Jméni xi sʼiaan nga so̱koná je kjoabijnachon xi tsínkʼia fetʼa. 2) Jósʼin bʼejnandale nga xki̱ nó jngo xi chjotajchínga sʼin tíjna kʼianga faʼaitsjenya je Kjoabiyale Cristo. 3) Jósʼin koa̱n chjénngilee je ndsʼee jebi.

⁶ Jngo koya xi koa̱n sʼiaan nga kuiyondalee nga faʼaitsjenya je Kjoabiyale Cristo kʼiaa nga kʼoéxkiaa je xo̱n xi kui tínchja̱ni jokji chjíle je kjoajtín jebi kʼoa nga si̱kjaʼaitsjenjiaan jme xi kʼoéxkiaa (tʼexkiai Juan 3:16; * 17:3 *). Kʼianga koa̱n so̱koná kjoabijnachon xi tsínkʼia fetʼa tjínnele nga koa̱nná xi tʼatsʼe Jeobá kʼoa nga sʼe̱ná kjoamakjain xi tʼatsʼe Jesús. Nga tongini kuiyondaa koaan kjoásjaiyaa xi kui tínchja̱ni kʼianga chótʼayá ánni nga ngisa nda jchasíñá xi tʼatsʼe Kjoabiyale Cristo. Kataʼyala josʼín jngo xi chjotajchínga sʼin tíjna. Je ndsʼee jebi, jekjoan nkjín nó nga báyotjao Xo̱n xi Bájinkonná xi kui nchja̱ni tʼatsʼe Kjoabiyale Cristo kʼoa jokji kjoatsjoacha tíbakóná je Jeobá. Nga xki̱ nó, tongini bʼéxkia ijngokʼa je xo̱n xi kjiole kʼoa síkjaʼaitsjenjin jokji chjíle je kjoajtín jebi. Kʼoa je rebista xi sʼa bitjo chjotse xi kui tínchja̱ni, yaa báyojinle je rebista xi tokʼoa jekjiole. Nga kʼoasʼin kotʼayajin ndsʼee jebi, nga bʼéxkia Biblia kʼoa nga síkjaʼaitsjenjin, tíbasenkao nga ngisasa kjimajinle jotjínni xi tʼatsʼe Jeobá kʼoa ngisaa tsjoake kjima. Kʼiatsa kʼoasʼin chótʼayajiaan tsanda ñá, kʼoati koasenkaoná nga tsjoacha koaan je Jeobá kao Jesús, kʼoa ngisaa koasenkaoná nga kjoaʼaítsjenya je Kjoabiyale Cristo.

7. 1) Jméni xi kitsole Jesús je Nʼaile kʼianga tsakʼétsʼoale. 2) Jómani ʼyaa nga kinrʼoé Jeobá je kjoabʼetsʼoa xi tsakʼéjna je Jesús.

⁷ Kʼianga tosʼa tsakʼéjnatítjon Jesús je Kjoabichile Nainá, kʼoakitsole je Nʼaile nga tsakʼétsʼoale nga kʼoatisʼin jtín katabatio je chjotale josʼin jtín tjío je (tʼexkiai Juan 17:20, 21). * Alikui jao tjínná nga je Jeobá kinrʼoé jmeni xi kitso Jesús. Kʼianga faʼaitsjenya je Kjoabiyale Cristo bakoñá nga jtín sʼin tiyoaa xi testigole Jeobá maa. Miyón mani chjota xi xinxin naxinandále kʼoa xi kjaʼaí kjaʼaísʼin tsen yaole batiojtín nga kui nichxin, kʼoa bakó nga makjainle nga je Jeobá kisikasén je Jesús nga kʼienntjainá. Tjín ʼnde jñani tsín ndasʼin be je chjota nga kʼoasʼin batiojtín je chjota xi kjaʼaí kjaʼaísʼin tsen yaole kʼoa xi xinxin tsʼe. Tonga je Jeobá kao Jesús nʼio naskásʼin be nga kʼoasʼin batiojtín je chjota.

8. Jméni xi kitsole Jeobá je Ezequiel tʼatsʼe nga jtín sʼin kʼoéjna je naxinandále.

⁸ Ñá xi choʼndale Jeobá maa, alikui tomaxkónná nga jtín sʼin tiyoaa. Je Jeobá tongini kʼoakitsole profeta Ezequiel nga jtín sʼin koatio naxinandále. Kʼoakitsole nga je yá xi tsʼe Judá kao xi tsʼe José nga tojngo koa̱nni (tʼexkiai Ezequiel 37:15-17). * Je rebista La Atalaya xi tsʼe sá julio de 2016, jñani “Preguntas de los lectores” tso, i kitso: “Je én xi kitsjoale Jeobá je Ezequiel kjoachoya tínchja̱ni, kʼoakitso nga tojngo koa̱nni je naxinandá Israel kʼianga jekuicho ijngokʼani ya ʼNde jña tsakʼinle nga kʼoaile. Je én jebi kʼoati kui xi tsonile nga jtín sʼin koatio je naxinandále Niná kʼianga jetífikjetʼa nichxin”.

9. Jósʼin tíbitjoson je én xi tongini kinchja̱ Ezequiel kʼianga faʼaitsjenya je Kjoabiyale Cristo.

⁹ Kʼianga nó 1919, je Jeobá kisikatíondaa kʼoa kisikatíojtín ijngokʼa je chjotale Cristo xi ya ngʼajmi koai, xi yá “xi tsʼe Judá” sʼin kitsoyanile. Nga koanskanni, sa nkjín sa nkjín chjota koanñatʼale xi i̱ Sonʼnde koatio xi kui mangóson je yá “xi tsʼe José”. Je Jeobá tongini kʼoakitso nga sʼe̱yokjao nga jao yá jebi kʼoa nga tojngo koa̱nni (Ezeq. 37:19). Je Jeobá jtín sʼin kisikatío je chjotale Cristo xi ya ngʼajmi koai kʼoa kao xi i̱ Sonʼnde koatio (Juan 10:16; Zac. 8:23). Nichxin xi tiyoaa ndʼaibi, nga jao jtín jebi jé Chjotaxále Niná tjíosíxále, xi je Jesucristo séjnatítjonle (Ezeq. 37:24, 25). Nga xki̱ nó, kʼianga síkjaʼaitsjenya je Kjoabiyale Cristo je xi ya ngʼajmi koai kao xi i̱ Sonʼnde koatio, nʼio naskásʼin matsen nga jtín tjío tojo kitso Ezequiel. Tonga jméni xi sʼiaan nga jngó jngoá nga kʼoainganʼioá nga tosi tonda jtín sʼin kuiyoaa.

10. Jméni xi koa̱n sʼiaan nga jtín sʼin katabʼejna je naxinandále Niná.

¹⁰ Jngo koya jokoa̱n sʼiaan nga jtín sʼin kuiyoaa ya jinnaxinandále Niná, kuinga nangitokon koaan. Kʼianga tsakʼejna Jesús i̱ Sonʼnde kʼoakitsole je chjotale nga nangitokon katama (Mat. 23:12). Je chjota xi tjín jngo tjíjtsa Sonʼnde me tongatsʼi nga kʼoasʼin síkjaʼaitsjen nga ngisa ngʼa tjío tikʼoajinni xi ngikʼa. Tonga ñá, kʼiatsa nangitokon maa jchaxkónjián je ndsʼee xi bándiaale je jtín. Kʼiatsa mená nga jtín sʼin kuiyoaa ya jinjtín, tjínnele si̱tjosoán jmeni xi kʼuínná. Tonga je xi ngisa chjíle kuinga sa̱sénle je Jeobá nga nangitokon koaan, nga̱ tsín sasénle xi  ngʼakon tonga bakóle kjoanda xi nangitokon (1 Ped. 5:5).

11. Ánni nga basenkaoniná nga jtín sʼin biyoaa nga nikjaʼaitsjenjiaan josʼin tsoyanile je nioxtila kao je bino xi machjén nga faʼaitsjenya je Kjoabiyale Cristo.

¹¹ Xi majaoni koya xi koa̱n sʼiaan nga jtín sʼin kuiyoaa, kuinga si̱kjaʼaitsjenjiaan jósʼin tsoyanile je nioxtila kao je bino xi machjén nga faʼaitsjenya je Kjoabiyale Cristo. Machjén nga kui si̱kjaʼaitsjenjiaan nga tongini kʼoa nga kʼiakjoán nichxin (1 Cor. 11:23-25). Je nioxtila xi tsínle naʼyo̱san kui tsoyanile je yaole Jesús xi tsín jme jée tjínle xi kitsjoantjainá, kʼoa je bino kui tsoyanile je njínle xi tsakʼéjten xi totʼatsaan. Tonga ali tsa tokuijin xi machjén nga koa̱njinná josʼin tsoyanile jebi. Machjén nga si̱kjaʼaitsjenjiaan nga kjoatsjoacha tsakakóná je Jeobá kʼianga kitsjoa je ʼNdíle nga koa̱n kuitjo̱ntje, kʼoa xi ijngosani, je Jesús kʼoati tsakakó kjoatsjoacha nga kitsjoa je kjoabijnachonle xi totʼatsaan. Kʼianga si̱kjaʼaitsjenjiaan je kjoatsjoacha xi tsakakóná je Jeobá kao Jesús kui xosikaoná nga kʼoati tsjoacha koaan tsanda ñá. Nga tsjoachaa je Jeobá kao je ndsʼee kui xi ngisa jtín síkatíoná.

12. Je choa̱ xi tsakʼéyanajmí Jesús xi tʼatsʼe rey kao choʼndale, jósʼin bakó nga kui xi mele Jeobá nga si̱chatʼalee je ndsʼee.

¹² Xi majanni koya xi koa̱n sʼiaan nga jtín sʼin kuiyoaa, kʼiaa nga kao kjoatsjoa si̱chatʼalee xíngiaa. Kʼianga nichatʼalee tsa ʼyani xi chʼao kasíkaoná bakoñá nga ʼyachjiá je kjoanda xi bakóná je Jeobá nga síchatʼaná xi totʼatsʼe je kjoabʼechjíntjaile Jesús. Si̱kjaʼaitsjenla je choa̱ xi tsakʼéyanajmí je Jesús xi faʼaitʼa ya Mateo 18:23-34. Kʼoa chjónangilee yaoná jebi: “A basenkaona choa̱ jebi nga kʼoasʼian jmeni xi kitso Jesús. A tsejtaña kʼoa a tsí tokjoán majtina xi kao ndsʼee. A tijnandaña nga sichatʼale tsa ʼyani xi chʼao síkaona”. Tonga kʼoati tjín jée xi ngisasa ai tjío. Xi ijngosani, nga chjotajée maa, ñʼai maná nga nichatʼalee xíngiaa. Tonga jmeni xi tsakʼéyanajmí je Jesús kui tsoyaná jmeni xi mele Jeobá nga sʼiaan (tʼexkiai Mateo 18:35). * Je Jesús kʼoakitso nga tsín sichatʼaná je Jeobá kʼiatsa tsín si̱chatʼalee je ndsʼee tsa jmeni xi kasíkaoná. Kuinga nʼio machjénni nga kuenta sʼiaan jebi nga tsín tokjoaská  katamaná. Kʼianga nitjosoán jmeni xi kitso Jesús kʼoa nga nichatʼalee xíngiaa, ngisaa jtín sʼin biyoaa.

13. Jósʼin bʼainganʼioá kʼianga nyʼán sʼin biyoaa kao je ndsʼee.

¹³ Kʼianga nichatʼalee je ndsʼee nyʼán sʼin biyoaa. Si̱kjaʼaitsjeen nga kʼoakitso je pastro Pablo nga kʼoénelee yaoná nga jtín sʼin kuiyoaa ánni nga nyʼán sʼin kuiyoñá kao xíngiaa (Efes. 4:3). Kʼianga kjoaʼaítsjenya je Kjoabiyale Cristo, nga tongini kʼoa kʼianga kuikjoan nichxin, machjén nga si̱kjaʼaitsjenjiaan jósʼin ʼyatokoán xíngiaa. Chjónangilee yaoná jebi: “A bakó jmeni xi sʼian nga tsín bʼengijtia tokoan. A be xi ngikʼa nga kui xi mena nga jtín sʼin kuiyoaa kʼoa nyʼán sʼin kuiyoaa kao ndsʼee”. Kʼianga kjoaʼaítsjenya je Kjoabiyale Cristo, si̱kjaʼaitsjenjiaan kjoachjonangi jebi.

14. Jósʼin bakoá nga tsjoachaa xíngiaa.

¹⁴ Xi mañoni koya xi koa̱n sʼiaan nga jtín sʼin kuiyoaa, kuinga koakoá kjoatsjoacha josʼín je Jeobá, je Niná xi tsʼe kjoatsjoacha (1 Juan 4:8). Alikui koa̱n i̱ kuixoán: “ʼBeña nga tjínnele ska̱na josʼin je ndsʼee, tonga alikui xi tsonile nga miyona koa̱n”. Kʼiatsa kʼoasʼin nikjaʼaitsjeen, alikuijin timangíntjenngiaa je kjoafaʼaitsjen xi kitsjoa Pablo nga kʼoakitso nga tjínnele ska̱ná josʼin xíngiaa kʼoa nga koakolee kjoatsjoacha (Efes. 4:2). Je Pablo ali tsa tokuijin xi kitso nga si̱chatʼalee xíngiaa, kʼoakitso nga tjínnele tsjoacha koaan. Je Jeobá tífaʼaikao ya jinnaxinandále tojokji chjotani (Juan 6:44). Je Jeobá be ánni nga tsjoakeni je chjota. Kuinga tsín koa̱n kʼoakuixónsíñá nga tsín bakinle je ndsʼee nga tsjoacha koaan. Tjínnele koakoá je kjoatsjoacha, nga̱ jé Jeobá xi kʼoasʼin bʼénená nga kʼoasʼiaan (1 Juan 4:20, 21).

15. Jómani ʼyaa nga kjoaʼaí nichxin nga tongiñandiasa si̱kjaʼaitsjenyá je Kjoabiyale Cristo.

¹⁵ Kjoaʼaí nichxin nga tongiñandiasa si̱kjaʼaitsjenyá je Kjoabiyale Cristo. Jósʼin ʼyañá. Je Pablo kʼoakitsole je chjotale Cristo xi ya koai ngʼajmi kʼianga kʼoasʼin faʼaitsjenya je Kjoabiyale Cristo nga xki̱ nó, kui síkjaʼaitsjenya je “kjoabiyale Nainá saʼnda nga kjoaʼaí nga je” (1 Cor. 11:26). Kʼoa kʼianga kisikʼaxki̱ tʼatsʼe nichxin fetʼa, je Jesús kʼoati kitso nga kjoaʼaí. Kʼoa xi tʼatsʼe kjoañʼai xi nʼio tse, i̱ kitso: “Kʼiaa koa̱ntsen choa̱le ʼndíle chjota ya ngʼajmi. Kʼiaa skíʼndíaba ngatsʼi ngayije ntje̱le sonʼnde, kʼoa skoe̱ je ʼndíle chjota xi kjoaʼaíjinni yojbi ya ngʼajmi kao tse nganʼio, kʼoa kao tse kjoajeya. Kʼia nga sikasén ánkjele nʼio skíʼndía xjao, kʼoa ánkjele kʼoexkó je xi kitjojin. Kʼoexkóni nga ño xi̱ngi̱le sonʼnde, kʼoa saʼnda jngo ngoa ngʼajmi, saʼnda xi ngijngo ngoa” (Mat. 24:29-31). Je Jesús sikatíoxkó je xi kiskoejin kʼoa koaikao ya ngʼajmi je xi i̱ Sonʼnde tjíosa nga kʼia. Jebi kʼiaa kʼoakoa̱n kʼianga jekoaitsʼia kjoañʼai xi nʼio tse, tonga nga kjesa fitsʼiajin je Armagedón. Kʼianga sʼe̱jna je Armagedón, je Jesús kao xi 144,000 mani, sikjeson je chjotaxá sonʼnde (Apoc. 17:12-14). Kʼianga tokʼoatjínsa kjoaʼaítsjenya je Kjoabiyale Cristo, kʼiaa nga kjesa fikaojin ya ngʼajmi je chjotale xi ya tjínle kjoachoya.

16. Ánni nga tsín si̱chasíni nga kjoaʼaítsjenya je Kjoabiyale Cristo nó jebi.

¹⁶ Kʼoénelee yaoná nga tsín si̱chaa nga kjoaʼaítsjenya je Kjoabiyale Cristo nga 31 sá marzo. Si̱jélee Jeobá nga katabasenkaoná nga tosi tonda jtín sʼin kuiyoaa ya jinnaxinandále (tʼexkiai Salmo 133:1). * Alikui si̱chajiaan nga kjoaʼaí nichxin nga tongiñandiasa si̱kjaʼaitsjenyá je Kjoabiyale Cristo. Kʼianga kjesa kʼoamajin, koakoá nga ʼyachjiá nga jtín sʼin síkatíoná nga faʼaitsjenya je Kjoabiyale Cristo.