1, 2. Ñá xi choʼndale Niná maa, ánni nga nʼio nda si̱kuindasíñá yaoná (chótsenlai sén xi faʼaitʼa ibi).

NʼIO nkjín chjinexki, xi xʼin kao xi yánchjín, xi je síxkile chjota xi chʼinʼbi tjínle. Kui kʼoasʼínni nga mele kuinyakao. Tonga tsa tsín mele nga kui chʼin koakinle, machjén nga sikuinda yaole. Kʼoatisʼinni tsanda ñá, xi choʼndale Jeobá maa, yaa tiyojinlee kʼoa yaa ñatjen nixá kao chjota xi tsín kʼoasʼin fikao yaole josʼin mele Niná. Tsa tsín mená nga kui koakinná jmeni xi sʼín chjota jebi, machjén nga si̱kuindaa yaoná.

² Nichxin fetʼa xi tiyoaa ndʼaibi, je chjota alikui bexkón jotso je kjoatéxomale Niná tʼatsʼe xi ndatjín kao xi chʼaotjín. Kʼianga kiskile Pablo je Timoteo, kʼoakitsole jokoa̱nkjoan chjota xi kjin tjíole je Niná. Sa kjaʼaí sa kjaʼaísʼin koaikao yaole nga toje tífikjetʼa jmeni xi chon sonʼnde (tʼexkiai 2 Timoteo 3:2-5). * Ninga tsín sasénná kjoa jebi, tochajinle tochan kʼoasʼin si̱kjaʼaitsjeen,  kuinókjoaa kʼoa kʼoasʼiaan josʼín je chjota (Prov. 13:20). Kuinga i̱ kjoaʼmiya jebi kui jchasíñá jmeni xi tsín mangóson jokjoan je chjota nichxin xi tiyoaa ndʼaibi kʼoa kao jokjoan je choʼndale Niná. Kʼoati jchaa jméni xi koa̱n sʼiaan nga tsín ya chjénngilee jokjoan je chjota, tonga nga kʼoati kuinyakoaa nga katabe je Niná.

3. ʼYá xi tínchja̱ni jmeni xi tso 2 Timoteo 3:2-5.

³ Tojosʼin jetsaʼyaa, je pastro Pablo kʼoakitso nga “je nichxin xi kjoetʼa kjoaʼaíná kjoañʼai xi tse”. Xijekoan 19 koya kisikʼaxki̱ jokoa̱nkjoan je chjota. Kʼoa jekʼoakjimakjoan nichxin xi tiyoaa ndʼaibi. Ya Romanos 1:29-31 kʼoati me tso xi faʼaitʼa, tonga tjínkʼa jmeni xi tso ya 2 Timoteo xi tsín tijña síkʼaxki̱ni Escrituras Griegas Cristianas. Kʼianga i̱ kitso je Pablo: “Sʼee chjota xi”. Kui xi kitsonile nga sʼe̱ xi yánchjín kao xi xʼin, xi kui kʼoasʼin xi tsín ndatjín. Tonga ali tsa tongatsʼi chjota nga kʼoakoa̱nkjoan. Je xi ñaki chjotale Cristo ma alikui kʼoakoa̱nkjoan (tʼexkiai Malaquías 3:18). *

4. Jókjoan je chjota xi ngʼakon, jósingái ji.

⁴ Kʼianga jekʼoakitso Pablo nga sʼe̱ chjota xi to yaole tsjoake koa̱n kʼoa xi to tao̱n koa̱ntsjoake, kʼoati kitsosa nga sʼe̱ xi ngʼakon koa̱n kʼoa kao xi tosíxkón male. Je chjota xi kʼoakjoan tokui bʼasjengʼani yaole jmeni xi male sʼín, jokjoan yaole, tsa tjínle tao̱n, kʼoa kui xi mele nga ngʼa kuitjo kʼoa xkón kataʼya. Jngo chjotachjine xi kʼoakitso nga je chjota xi ngʼakon tijé bʼétsʼoanile yaole ya jinni̱ma̱le. Tjínkʼa xi kʼoatso kʼianga je kjoangʼatokon nʼio chʼaosʼin tíjna, saʼnda je chjota xi ngʼakon alikui sasénle nga ngʼakon ma je chjota xi kjaʼaí.

5. Jmé xi kjima kʼale je choʼndale Niná.

⁵ Likui jao tjínná nga jtike Jeobá je kjoangʼakon. Ya Biblia kʼoatso nga jtike “xi ngʼakon xko̱n” (Prov. 6:16, 17). Je kjoangʼakon kjin sikʼéjnaná xi kao Niná (Sal. 10:4). Kʼoa je xi kʼoakjoan jéní Na̱i (1 Tim. 3:6). Saʼnda tjínkʼa choʼndale Niná xi kjoangʼakon tjíosíkinjele. Tobʼelañá je Uzías, xi rey sʼin tsakʼejnale naxinandá Judá, nkjín nó nga kixi kitʼale Jeobá, tonga je Biblia itso xi tʼatsʼe Uzías: “Nga jekisʼele nganʼio, je ni̱ma̱le ngʼakon koan kʼoa tijé tsakajnginile kjoa yaole, likui kixi jokisʼin xi kao Jeobá je Ninále nga ya jaʼasʼen ya yo̱ngo̱le Jeobá nga tsakaká je xongó ya sonxta jñani saká xongó”. Xijekoanni, je rey Ezequías kʼoati ngʼakon koan, tonga tochoatse nga kʼoakisʼin (2 Crón. 26:16; 32:25, 26).

6. 1) Ánni nga tsín ngʼakon koansíni je David. 2) Jmé xi tsakasenkao je David nga tsín kisicha je kjoanangitokon xi kisʼele.

⁶ Tjínkʼa chjota xi ngʼakon ma xi totʼatsʼe nga nda matsen yaole, nga nʼio bʼaxki̱, tsa nda síkjane, nga tjínle nganʼio kʼoa tsakuije̱ nga nʼio bexkón je chjota. Je rey David kisʼele ngayeje jebi, tonga nangitokon koan. Tobʼelañá, kʼianga kisikʼien je Goliat, je rey Saúl kʼoakitsole nga koa̱n kuixankao je tsotile. Tonga je David i kitsole je Saúl: “ʼYáni an kʼoa ʼyáni je xíngia, je xínkjín nʼaina ya Israel, nga xkaʼndale rey koa̱nña” (1 Sam. 18:18). Jmé xi tsakasenkao je David nga nangitokon koan. Kuinga koanjinle nga nangitokon koan Niná xi kao je kʼoa nga kuenta kisʼin nga kitsjoale xá kʼoa nga nkjín koya jmeni xi koanle kisʼin (Sal. 113:5-8). Je David koanjinle nga tʼatsʼe Jeobá kinroani jmeni xi ndatjín tsakʼaile (tingósonkoai 1 Corintios 4:7).

7. Jméni xi koasenkaoná nga nangitokon koaan.

⁷ Ndʼaibi ñá xi choʼndale Jeobá maa, bʼénele yaoná nga nangitokon katamaa, joni je David. Tokʼoamaná nga ʼyaa nga nangitokon  je Jeobá ninga je tíbatéxomale ngʼajmi kao Sonʼnde (Sal. 18:35). Nʼio kuenta nʼia nga itso je kjoafaʼaitsjen xi tsjoáná je Jeobá: “Kʼoasʼin tikʼantjaiyao yaono, katasʼeno kjoamatakon, kao kjoanda, kao kjoayo̱ma̱ kjiatakon, kao kjoandʼé, kao kjoatsetakon” (Col. 3:12). Kʼoa xi ijngosani, ʼyañá nga je chjota xi bakó kjoatsjoacha “likui bʼasjejeya yaole, likui mangʼakon” (1 Cor. 13:4). Tsa nangitokon koaan, kui xosikao je chjota nga sichriantʼale je Jeobá, tojo ma jngo chjota xi síchriantʼale je Jeobá xi totʼatsʼe nga “nda fikao yaole” je chjoónle (1 Ped. 3:1).

8. 1) Jósʼin bekon kʼa ndʼaibi chjota je xi tsín sítjosonle xijchále. 2) Jméni xi tsole je Énle Niná nga sʼin je xi xti ma.

⁸ Pablo kʼoati kitso josikao xínkjín je chjota nga toje nichxin fetʼa tiyoaa. Tobʼelañá, kʼoakitso nga je xti tsín sitjosonle xijchále. Nichxin xi tiyoaa ndʼaibi, je xi faʼaitʼa libro, xi faʼa ya pelíkula kao ya telebisión alikui tichʼaosʼin bekonni chjota. Tonga alikui tinda bationi je familia kʼianga tsín ʼya xi sítjoson, nga̱ yaa nroani nga jtín sʼin biyoaa xi chjota ʼminá. Kʼoa majinle chjota xi tʼatsʼe jebi saʼnda ngasʼa. Tobʼelañá, nichxin kjoatse ya naxinandá Grecia, tsa jngo chjota xi xijchále kʼoele, síchaa ngayeje kjoanda xi tsjoá je chjotaxá. Kʼoa je kjoatéxoma xi kisʼe ya Roma kʼoatso kʼiatsa jngo xi kʼoasʼin kui mangósonkao joni tsa kʼien kasíkʼien. Ya Escrituras Hebreas kao Escrituras Griegas Cristianas kʼoatsole je xi xti ma nga katabexkón xijchále (Éx. 20:12; Efes. 6:1-3).

9. Jméni xi koasenkao je xi sʼa xti nga sitjosonle je xijchále.

⁹ Jméni xi tjínnele sʼin je xti nga tsín kʼoati sʼin josʼín je xti xi tsín sítjoson. Kʼianga síkjaʼaitsjenjin je xti ngayeje jmeni xi sʼín je xijchále xi totʼatsʼe, kui xi binyakao nga tsjoále kjoanda kʼoa sítjosonle je xijchále. Xi ijngosani, tsa majinle nga je Niná xi kʼoasʼin mele nga si̱tjosoán, tosajin tsjoá kjoanda. Kʼianga je xti nda nchja̱ni xi tʼatsʼe xijchále, kʼoati binyakao xi kjaʼaí xti nga kʼoati katabexkón xijchále. Kʼiatsa je xi xijchá ma, alikui bakóle kjoatjaocha je xtile, kʼoati ñʼai koa̱nle je xti nga kao ni̱ma̱le sitjosonnile. Tonga tsa je xti xi tísakó kjoaixile kjoatsjoacha, tojo sitjosonle je xijchále ninga ñʼai koa̱n sakʼoale. Jngo ti, xi testigole Jeobá ma, xi Austin ʼmi itso: “Me tongantsjai nga kui koanmena kʼoakisʼian xi chʼaotjín, tonga je xijchána kʼoati tjen ndiaale jmeni xi tsakʼéchjoana, kʼoakitso ánni nga tsakʼéchjoanina kʼoa kichjakaonajmínijin xíngijin ngantsjai. Kui xi tsakasenkaona nga kisitjosoan. Tsaʼbeña ngantsjai nga koankjáojinle xi tʼatsʼan, kʼoa kuinga kui kʼoakisʼinsíña xi kisasenle”.

10, 11. 1) Jósʼín je chjota nga tsín bakó kjoatsjoacha. 2) Jókji tjen koa̱ntsjoake xínkjín je xi ñaki chjotale Cristo ma.

¹⁰ Je Pablo kisikʼaxki̱sa kʼa jokoa̱nkjoan je chjota nga tsín bakóle kjoatsjoacha xi ngikʼa. Kʼianga jekʼoakitso nga je xti “tsʼantjaikjoake” koa̱n je xijchále, kʼoati kitso nga tsín tsjoá kjoanda, kʼoa kʼoasʼín je xi tsín tsjoá kjoanda kʼianga jme kjoanda sakóle. Kʼoati nʼio nkjín xi tsín kixi koa̱n kʼoa tsín koasjai kjoanyʼán kao xi ngikʼa. Kʼoati chʼao kuitsole xínkjín kʼoa jaonkjaín koa̱n nga sikiʼaon xi kjaʼaí, saʼnda kʼoakoa̱nkjoan xi kao Niná. Kʼoati koangi kjoandiso xi ngikʼa nga mele chʼaosʼin sikatío. *

¹¹ Ninga tjín chjota xi tsín tibakóni kjoatsjoacha, je xi Jeobá bʼétsʼoale bakóle kjoatsjoacha je chjota. Kʼoa ali tsa to ndʼaijin nga kʼoatjíosʼín. Je Jesús kʼoakitso nga je kjoatéxoma xi ngisa títjon tíjna xi tsakʼaile  Moisés kuinga tsjoacha koaan je Niná, kʼoa xi majaoni, nga tsjoacha koaan je xíngiaa. Kʼoa kjoatsjoacha jebi kui xi agápe sʼin ʼyale (Mat. 22:38, 39). Kʼoati kitso nga je xi ñaki chjotale Cristo ma kao kui jchanile je kjoatsjoacha xi bakóle xínkjín (tʼexkiai Juan 13:34, 35). * Kʼoa saʼnda tsjoake koa̱n je chjotakontrale (Mat. 5:43, 44).

12. Jósʼin tsakakó Jesús nga tsjoake koan je chjota.

¹² Je Jesús nʼio tsakakóle kjoatsjoacha je chjota. Xki̱ naxinandá kikakóyason je énnda chjotse xi tʼatsʼe Chjotaxále Niná. Kisindayaa je xi xka̱, xi chjiʼngé, xi jtsé kjoan kao xi jtaya kʼoa saʼnda kisikjaʼáyale kʼien (Luc. 7:22). Kitsjoantjai kjoabijnachonle xi totʼatsaan, ninga nʼio nkjín koanni xi jtike koan. Nʼio nda tsakakó je kjoatsjoacha xi tjínle Nʼaile. Nichxin xi tiyoaa ndʼaibi, jngo tjíjtsa Sonʼnde, je testigole Jeobá kui choa̱le Jesús tjíofitjenngi kʼoa tsjoake je chjota.

13. Jósʼin kuichomani kʼiatsa koakoá kjoatsjoacha.

¹³ Kʼianga koakoá kjoatsjoacha tsakui nichxin kui xosikao je chjota nga koa̱nmele skoe̱xkon je Jeobá. Tobʼelañá, jngo chjota xi ya tsʼe Tailandia ki je kjoajtíntse xi ján nichxin satíoná kʼoa tokʼoakoanle nga tsabe jokji kjoatsjoacha tjínná xi kao ndsʼee. Kʼianga jekichoni ya niʼyale kʼoakitso nga jao kʼa kataʼmiyale Biblia nga jngo xomana. Kitsoyale ngatsʼi xi xínkjín mani, kʼoa xi koanni jaon sá, kʼiaa jaʼa títjon nga tsakʼéxkia je Biblia ya Ndʼia jña chotʼayá. Kʼiatsa mená jchaa tsa tibakolee kjoatsjoacha je xi ngikʼa, chjónangilee yaoná jebi: “A bʼenele yaona nga basenkoa je xi ya tjío yaniʼyana, ya jinjtín kʼoa nga xinyasoan. A kʼoatisʼin ʼbekoan je xi ngikʼa josʼin bekon je Jeobá”.

14, 15. 1) Jméni xi bakó nga nʼio chʼao sʼín je chjota. 2) Jósʼin tjíosíkʼantjaiya kʼa yaole je chjota.

¹⁴ Nichxin fetʼa xi tiyoaa ndʼaibi, je chjota kui kʼoasʼin jmeni xi tsín kixi tjín kʼoa kui xi tjínnele kuinyaxinlee. Tobʼelañá, me ngatsʼi xi tsín bexkon Niná xi tsín sʼe̱le kjoatsjoacha.  Kʼoa tjínkʼa Biblia xi kʼoatso nga “jtike koa̱n xi ndatjín” kʼoa tsa maije̱ “kontra koatiole ngayeje xi ndatjín”. Chjota jebi kʼoati tokjaʼaíngá sʼin kʼoa toán koa̱n. Kʼoa tjínkʼa xi toxkia sʼin. Kʼianga én griego, je én jebi jé nchja̱ni chjota xi tsín male kjoéxkó yaole kʼoa xi tokjoa male jmeni xi sʼín.

¹⁵ Je én xi tongini kinokjoa ngasʼa tíbitjoson ndʼaibi, je én xi tso nga sikʼantjaiya je yaole chjota xi jo cho̱ sʼín tsakai (tʼexkiai Isaías 11:6, 7). * Je én xi tongini kinokjoa kʼoatso nga je cho̱toán joni tsa je tse̱en kao xa nga nyʼán sʼin koatiokao je tindsoʼndí kao nra̱ja̱ʼndí. Kʼoa sʼee kjoanyʼán ngakjijnda, “nga̱ ñaki kui kjoankjíntokonle Jeobá sʼe̱ ngakjijnda sonʼnde” (Is. 11:9). Tonga je cho̱ alikui koa̱nle nga skoe̱ xi tʼatsʼe Jeobá, kuinga je én jebi kui tsoyanile nga sikʼantjaiya yaole je chjota.

16. Jósʼin tjíobinyakao kʼa chjota je Biblia nga tjíosíkʼantjaiya yaole.

¹⁶ Nʼio nkjín chjota xi toán koan ngasʼa joni tsa tse̱en, tonga ndʼaibi jenyʼán sʼin tjíokao xi ngikʼa. Koaan ya kʼoéxkia xi tʼatsʼe chjota jebi jñani “La Biblia les cambió la vida” tso, xi faʼaitʼa ya jw.org. Je xi tjíobe Jeobá kʼoa xi je tjíosíxále alikui ya mangóson je chjota xi joxi bexkón Niná sʼin matsen, tonga tjíotʼaxinle nganʼiole Niná. Chjota jebi kʼoatso nga Niná tjíobʼétsʼoale, tonga ya ʼyale nga tsínni nda tjíofikao yaole. Tjínkʼa choʼndale Jeobá xi tsʼen koan ngasʼa tonga xi kui tjíokjoé jngo ni̱ma̱ “xi chjotse, xi ngoyale Niná kisʼendani kao xi tjínle kjoakixi kʼoa kao xi ñaki tsje” (Efes. 4:23, 24). Kʼianga sa tse sa tse male xi tʼatsʼe Niná je chjota, machoyale nga tjínnele sitjoson je kjoatéxomale Niná. Kʼoa kui xi binyakao nga síkʼantjaiya yaole, josʼin makjainle, josʼin síkjaʼaitsjen kʼoa jmeni xi sʼín. Ali tsa choa ñʼai male, tonga je xi ñaki ni̱ma̱le nroajinni nga kʼoasʼín josʼin mele Niná, jé nganʼiotsjele Niná binyakao.

17. Jméni xi koa̱n sʼiaan nga tsín ya katabakinná jmeni xi chʼao sʼín je chjota.

¹⁷ Sa tíʼya sa tíʼyale ʼyani xi Niná síxále kʼoa xi mai. Ñá xi Niná nixálee tjínnele si̱kuindalee yaoná nga tsín kʼoati sʼiaan jmeni xi chʼao tjíosʼín je chjota. Mená si̱tjosoán jmeni xi tso Jeobá nga kuinyaxinlee je chjota xi kʼoasʼín jotso ya 2 Timoteo 3:2-5. Ninga tsínkjoan koa̱n kjin kuiyolee chjota xi kʼoasʼín, nga̱ tsakui nichxin ya ñatjen nixá, ñatjen mangián skuela kʼoa tsa ya tiyokaoñáje̱. Koaan kʼoéchjoalee yaoná nga tsín kʼoasʼin síkjaʼaitsjeen kʼoa tsa kʼoati sʼiaan josʼín chjota jebi. Jméni xi koa̱n sʼiaan. Tosi tonda si̱miyoaa je Jeobá kʼianga chótʼayá je Biblia kʼoa je si̱miyoaa chjota xi Niná tjíosíxále.

18. Jmeni xi bixoán kʼoa jmeni xi nʼia, jósʼin kuinyakao je chjota nga koa̱nmele skoe̱ xi tʼatsʼe Jeobá.

¹⁸ Kʼoati machjén nga kuinyakoaa je chjota nga katabe xi tʼatsʼe Niná. Kʼuínyalee je chjota tojñani nga tjío kʼoa si̱jélee je Jeobá nga katabasenkaoná nga kui én xi nda tso kuinókjoakoaa je chjota. Kʼoakʼuínlee nga testigole Jeobá maa. Tsa kʼoasʼiaan, jé Jeobá kuitjongʼa kʼoa ali tsa ñá chʼa̱sjengʼaa yaoná. Kʼoasʼin ʼmiyaná nga chja̱ʼaxinlee yaoná “ngayije kjoa xi tsín bexkón Niná” kao “ngayije kjoachi̱nga̱le sonʼnde”, nga nda kjuinkoaa yaoná, “nga chjotakjoakixi” katamaa nichxin xi tiyoaa ndʼaibi (Tito 2:11-14). Tsa chjénngilee Jeobá kʼoa si̱tjosonlee, skoe̱ní je chjota kʼoa tsakui nichxin i̱ kuitso kʼaná: “Koanngínkaolaijin, nga̱ kinoʼyaníjin nga Niná tíjnakaono” (Zac. 8:23).