1, 2. 1) Ánni nga kʼoakitsoni je Jesús nga choa ñʼai sʼin si̱kjaʼaitsjenyá je kjoabiyale. 2) Jméni xi chótʼayajiaan xi tʼatsʼe Jesús.

A KOAAN kʼoasí jmeni xi ma nga xki̱ nó kʼianga faʼaitsjenya je Kjoabiyale Cristo. Faʼaitsjenjinná nga̱ tsín ñʼai sʼin tíjna jmeni xi nʼia nga nikjaʼaitsjenyá je Kjoabiyale Cristo. Tsakui nichxin tjínkʼa je xi i̱ kuitso: “Tsa nʼio chjíle je kjoajtín jebi, ánni nga tsín nʼio síxkón mani kʼianga sʼejna”.

² Kʼianga tsakʼejna je Jesús i̱ Sonʼnde nʼio choa ñʼai sʼin kitsoya jmeni xi nʼio tjínle kjoandosin (Mat. 7:28, 29). Tikʼoasʼinni, je kjoabiyale Jesús nʼio chjíle, kʼoa jesoaa tsakʼéjnaná je choa̱ nga choa ñʼai sʼin tíjna josʼin si̱kjaʼaitsjenyá je kjoabiyale. * Chótʼayajinla jmeni xi kisʼin kʼoa jmeni xi kitso je Jesús kʼianga tsakjenkao je chjotatjenngile. Kui xi koasenkaoná nga ngisa nda koa̱njinná je kjoanangitokon xi kisʼele, nga tsakakó kjoanʼiojin kʼoa kao kjoatsjoacha. Kʼoati jchaa jósʼiaan nga ngisa nda chjénngiaa je choa̱le.

3. Tojo tso ya Mateo 26:26-28, ánni kʼoabixónsíñá nga choa ñʼai sʼin tsakʼéjnachoa̱ je Jesús josʼin kjoaʼaítsjenya je kjoabiyale, kʼoa jmé xi tsoyanile je nioxtila xi tsínle naʼyo̱san kao je vino.

³ Je Jesús kao xi 11 pastrole xi kixi kitʼale tsakʼéjnachoa̱ josʼin kjoaʼaítsjenya je kjoabiyale. Kui kisichjén je nioxtila xi tsínle naʼyo̱san kao je vino xi kinjengi nga kisʼejna je sʼuí  Paxko (tʼexkiai Mateo 26:26-28). * Kʼoakitsole je chjotatjenngile nga je nioxtila kao je vino kui tsoyanile je njínle kao yaole xi tsín jme jée tjínle xi tsjoántjai nga koa̱nskanni. Alikuijin tokʼoakoanle je pastrole kʼianga choa ñʼai sʼin tsakʼéndajin je Jesús kʼianga tsakʼéjna je Kjoabichile Nainá.

4. Jmé kjoafaʼaitsjen xi kitsjoale Jesús je Marta xi basenkaoná nga choa ñʼai sʼin kjoaʼaítsjenya je kjoabiyale.

⁴ Si̱kjaʼaitsjenjinla jmeni xi koan nga tongini, nga jejan nó títsoyason je Jesús. Kʼianga ya tíjna ya ndʼiale je Lázaro, Marta kao María, xi miyole koanni, kitsoyale xi tʼatsʼe Niná. Kʼoa je Marta kuila ngisa nʼio kitsjoale kjoandosin kʼianga tsakʼénda jmeni xi sikjenni je Jesús. Tonga je Jesús ngasin nganda kʼoakitsole nga tsínkjoan machjén nga nʼio tse tsojmi kʼoenda (Luc. 10:40-42). Kʼoa nga jekoanskanni, kʼianga tojeme ni̱kʼien, tijé kʼoakisʼinni jmeni xi kitsole je Marta, alikui nʼio tse jmeni xi tsakʼénda nga tsakjenkao je chjotatjenngile. Jméni xi bakóyaná jebi xi tʼatsʼe Jesús.

5. Jméni xi bakóyaná nga kʼoakitso je Jesús nga choa ñʼai sʼin kjoaʼaítsjenya je kjoabiyale, kʼoa jótso Filipenses 2:5-8 xi tʼatsʼe Jesús.

⁵ Jmeni xi kisʼin kʼoa jmeni xi kitso je Jesús tsakakó kʼianga nangitokon koan. Kʼoati tsakakó kjoanangitokon nitje̱n nga kjesa nikʼienjin (Mat. 11:29). Nga kui nichxin be nga tojeme tsjoá je kjoabijnachonle kʼoa nga je Jeobá sikjaʼáyanile kʼoa nga Rey sʼin sikʼéjna ya ngʼajmi. Ninga kʼoalani alikui nʼio síxkón kisʼin nga tsakʼéjnachoa̱ josʼin kjoaʼaítsjenya je kjoabiyale. Kʼoakitsole je chjotatjenngile nga xki̱ nó kʼoakatasʼín kʼoa nga choa ñʼai sʼin sikjaʼaitsjenya (Juan 13:15; 1 Cor. 11:23-25). Je Jesús alikui ngʼakon koan. Nʼio tsjoa satío tokoán nga nangitokon je Jesús, xi Rey sʼin tíjnaná (tʼexkiai Filipenses 2:5-8, TNM). *

6. Jósʼin koa̱n chjénngilee je kjoanangitokon xi kisʼele je Jesús kʼianga kjoa kuitjátojiaan.

 ⁶ Jngo koya josʼin chjénngilee je Jesús kʼiaa nga tsín to yaoná kjuinñá, nga kʼoati kuenta sʼiaan xi ngikʼa (Filip. 2:3, 4). Si̱kjaʼaitsjenla jmeni xi kisʼin je Jesús nitje̱n nga kjesa nikʼienjin. Ningalani be nga tse kjoañʼai ni̱kjaʼá nga ni̱kʼien, ngisaa kui koankjáojinle je kjoaʼaon xi koatiojin je chjotatjenngile xi kixi kitʼale. Nga kui nitje̱n kitsoyale, kitsjoanganʼiole kʼoa kisinʼio kon (Juan 14:25-31). Tsakakó nga tsín to yaole kini, nga ngisa koanndosinle josʼin tsakatio xi ngikʼa. Nʼio nda choa̱ tsakʼéjnaná nga nangitokon koan.

7. Kʼianga jetsakʼéjnachoa̱ je Jesús josʼin kjoaʼaítsjenya je kjoabiyale, jósʼin tsakakó nga nʼiojin koan.

⁷ Kʼianga jetsakʼéjnachoa̱ je Jesús josʼin kjoaʼaítsjenya je kjoabiyale, nʼio tsakakó kjoanʼiojin. Ánni kʼoabixónsíñá. Kuinga kisitjosonle Niná ninga kjoasoa tsakʼejnajin nga kʼoatsakʼinle nga Niná kinchja̱ʼaonle kʼoa ninga kinikʼien (Mat. 26:65, 66; Luc. 22:41, 42). Tsakʼasjengʼaa je jaʼaínle Niná kʼoa kixi kitʼale ngantsjai, kʼoakitso nga toje Niná xi tjínle ʼnde nga batéxoma. Kʼoa xi totʼatsʼe Jesús koaan sʼe̱le kjoabijnachon xi tsínkʼia fetʼa je chjota xi kʼoamanile je jéele. Xi ijngosani, tongini kisikatíonda je chjotatjenngile tʼatsʼe kjoa xi kjoaʼatojin.

8. 1) Jméni xi kitsole Jesús je pastrole xi kixi kitʼale. 2) Kʼianga jenkjín nó jaʼato nga kʼien je Jesús, jósʼin tsakakó je chjotatjenngile nga nʼiojin koan.

⁸ Je Jesús kʼoati nʼiojin koan kʼianga tsín to yaole kini. Kui ngisa kuenta kisʼin jmeni xi koanchjénle je pastrole xi kixi kitʼale. Kʼianga jekʼoakitsole je Judas nga katafi, kʼiaa tsakʼéjnachoa̱ josʼin kjoaʼaítsjenya je kjoabiyale, kʼoa kui xi sikjaʼaitsjenjinle  je chjotale xi ya ngʼajmi koai, josʼin koasenkao je njín tsjele xi kʼoejten je Jesús kʼoa nga ya kjoaʼasʼenjin je kjoasʼendajin chjotse (1 Cor. 10:16, 17). Nga kixi koa̱n kʼoa nga koa̱n ya ngʼajmi koai, kʼoakitsole jmeni xi tjínnele sʼin nga nda koatio ngixko̱n je kʼoa kao ngixko̱n Nʼaile (Juan 15:12-15). Kʼoati kitsole nga kjoa kjoaʼatojin. Kʼoa xijekoan, kʼoakitsole nga nʼiojin katama joni je (Juan 16:1-4a, 33). Kʼoa nga jenkjín nó jaʼato, je chjotatjenngile tojo tsakakó kjoanʼiojin kʼoa tsakinyakaongañá xínkjín (Heb. 10:33, 34).

9. Jósʼin koa̱n chjénngiaa je kjoanʼiojin xi kisʼele je Jesús.

⁹ Nichxin xi tiyoaa ndʼaibi, kʼoati tichjenngia je kjoanʼiojin xi kisʼele je Jesús. Jolani kʼianga binyakoaa je ndsʼee xi chjota fitjenngike xi totʼatsʼe kjoamakjainle. Tjínkʼa xi tokjoatjao nga ndoyá nikatíoʼya. Nga kʼoama, tjínnele nga kuinyakoaa nga kʼoetsʼoantje kʼoa nga si̱toánntjé ngixko̱n chjotaxá (Filip. 1:14; Heb. 13:19). Ijngo koya josʼin koakoá nga tjínná kjoanʼiojin kʼiaa nga tosi tonda kʼuínyasoán (Hech. 14:3). Joni je Jesús, ñaki kʼoatjío tokoán nga kʼuínyasoán je Énle Niná ninga koatiochjoaná kʼoa koaitjenngikená je chjota. Tonga jméni xi sʼiaan tsa sakʼoa kʼoasʼe tokoán nga tsínná je kjoanʼiojin.

10. Jmé xi machjén nga sʼiaan tongini nga kjesa faʼaitsjenyajin je Kjoabiyale Cristo, kʼoa ánni.

¹⁰ Je xi koasenkaoná nga nʼiojin koaan kuinga si̱kjaʼaitsjenjiaan je kjoachoya xi tjínná xi totʼatsʼe nga kitsjoa kjoabijnachonle je Jesús (Juan 3:16; Efes. 1:7). Je xomana tongini nga kjoaʼaítsjenya je Kjoabiyale Cristo, koaan si̱kjaʼaitsjenjiaan jmeni xi kisʼin je Jesús xi tʼatsaan. Nga kui nichxin, kʼoéxkiaa je Biblia jñani bʼakaole nga koa̱nxkia xi tʼatsʼe nga faʼaitsjenya je Kjoabiyale Cristo kʼoa si̱kjaʼaitsjenjiaan jmeni xi koan nga kinikʼien je Jesús. Tsa kʼoasʼiaan, nichxin nga kjoaʼaítsjenya je Kjoabiyale Cristo, ngisajin nda koa̱njinná josʼin tsoyanile je nioxtila kao vino, kʼoa jokji chjíle nga kitsjoa kjoabijnachonle xi totʼatsaan. Kʼianga majinná jmeni xi kisʼin je Jeobá kao Jesús xi tʼatsaan, kao jme kjoanda xi sokóná ñá kʼoa  kao xíngiaa, ngisaa tisʼengániná je kjoachoya kʼoa ngisaa sʼená je kjoanʼiojin xi koasenkaoná nga chókjoaná saʼnda nga kjoetʼa jme xi chon sonʼnde (Heb. 12:3).

11, 12. Jméni xi kjimajinná tojosʼin jetichotʼayá.

¹¹ Tojosʼin tiʼyaa, nga faʼaitsjenya je Kjoabiyale Cristo ali tokuijin síkjaʼaitsjenjinná jokji chjíle nga kitsjoa kjoabijnachonle je Jesús, kʼoati kui nga nangitokon koan kʼoa nga nʼiojin koan. Bʼaiñá kjoanda nga tosi tonda tíbasenkaoná je Jesús nga Naʼmitítjon sʼin tíjna ya ngʼajmi (Heb. 7:24, 25). Nga si̱kjaʼaitsjenyá je Kjoabiyale Cristo kʼoasʼin koakoñá nga bʼailee kjoanda jmeni xi kisʼin xi tʼatsaan (Luc. 22:19, 20). Kʼoanʼia nga xki̱ nó kʼianga bʼakaole nga 14 sá nisán, kui nichxin jebi xi ngisasa nʼio chjíle.

¹² Nga choa ñʼai sʼin tíjna josʼin nikjaʼaitsjenya je Kjoabiyale Cristo, bakóná jmeni xokisikao je Jesús nga kʼienntjainá. Kʼoati kui xi nʼio tsakakó nga tsakʼejna i̱ Sonʼnde. Kataʼyala jméni.

13. Jméni xi bakóyaná ya Juan 15:9 kao 1 Juan 4:8-10 tʼatsʼe je kjoatsjoacha xi bakó je Jeobá kao Jesús, kʼoa ʼyáni xi binyakao.

¹³ Ngayeje jmeni xi kisʼin je Jesús, kao kui tsakakóni nga nʼio tsjoakená je Jeobá (tʼexkiai Juan 15:9; * 1 Juan 4:8-10 *). Kui kjoatsjoacha xokisikao nga kitsjoani je kjoabijnachonle xi totʼatsaan. Ni ya ngʼajmi tjínná kjoachoya kʼoa ni i̱ Sonʼnde, basenkaoná je kjoatsjoacha xi bakóná je Jeobá kao Jesús nga tsakʼéchjíntjainá (Juan 10:16; 1 Juan 2:2). Kʼoati jchaa nga tsakakó kjoatsjoacha kʼoa nga kuenta kisʼin je chjotatjenngile Jesús kʼianga kisʼejna je Kjoabichile Nainá.

14. Jósʼin tsakakó je Jesús nga tsjoake koan je chjotatjenngile.

¹⁴ Tojosʼin tiʼyaa, je Jesús kʼoakitsole je chjotatjenngile xi ya ngʼajmi koai nga choa ñʼai sʼin sikjaʼaitsjenya je kjoabiyale. Jokji tífaʼato je nichxin, tojñani tjío je chjotale Cristo síkjaʼaitsjenyá nga xki̱ nó je Kjoabichile Nainá, ninga ndoyá tjíoʼya (Apoc. 2:10). Tjíosítjoson jmeni xi kitso je Jesús.

15, 16. Jósʼín kʼa je ndsʼee nga síkjaʼaitsjenya je Kjoabiyale Cristo ninga kjoañʼai tjíojin.

¹⁵ Je chjotale Cristo síkjaʼaitsjenyá nga xki̱ nó je Kjoabiyale Cristo. Kʼoasʼin fitjenngi josʼin tsakʼéne je Jesús, ninga kjoa tjíofaʼatojin. Kataʼyala xi tʼatsʼe je ndsʼee Harold King. Kʼianga ndoyá tsakʼejnaʼya ya China, tsín tikitjoʼndenile nga ʼya xi tsakjákaonajmí, ninga kʼoalani, tojo kisikjaʼaitsjenyá je Kjoabiyale Cristo. Kʼoa toʼma kisikatíonda jmeni xi kisokole nga koan kisikjaʼaitsjenyá je Kjoabiyale Cristo. Kʼoa nʼio ndasʼin kiskosonnile nga tsabe jmé nichxin xi bʼakaole. Kʼianga jebichó nichxin, ya yandoyá tojé se, bʼétsʼoaa kʼoa tsjoá je kjoanokjoaya.

¹⁶ Ijngolasa choa̱ kataʼyaa. Kʼianga kisʼejna je Kjoajchántse xi majaoni, jngo jtín mani je tichjaa xi ya kinikatíonʼio ya ʼnde jñani kjoañʼai kinikjaʼá, ninga xkón tsakatio kisikjaʼaitsjenyá je Kjoabiyale Cristo. Nga choa ñʼai tíjna josʼin nikjaʼaitsjenya je Kjoabiyale Cristo, koan kʼoakisʼin. Itso: “Jngoo yá banca kinichjainjin kʼoa jngoo najñochxoa tsakjandasuinjin jñani kinikatíosuinjin  je xi machjén nga faʼaitsjenya je Kjoabiyale Cristo, kʼoa yaa tsakinyandailaijin. Kʼoa tolʼí cera kinichjainjin nga tsín kataʼyanajin. [...] Kʼoasʼin tsakakonilaijin je Jeobá nga tosi tonda menajin chʼa̱sjengʼaijin je jaʼaínle”. Nʼio kisʼele kjoamakjain je tichjaa jebi. Kʼoa nga ma nikjaʼaitsjenyá je Kjoabiyale Cristo ninga kjoa tiyojiaan kui bakóná nga tsjoakená je Jesús.

17. Jméni xi machjén nga chjónangilee yaoná.

¹⁷ Nga jemachrianle nga kjoaʼaítsjenya je Kjoabiyale Cristo, machjén nga chjónangilee yaoná jebi: “Jósʼin nga ngisa nda skenngile je kjoatsjoachale Jesús. A kui ngisa kuenta sʼian jmeni xi machjénle je ndsʼee tikʼoajinni jmeni xi machjénna an. A kui koyale nga ngisa tse jmeni xi sʼin je ndsʼee, axo kuenta sʼian jokji tjen kʼoamale”. Chjénngiaa ngantsjai je choa̱le Jesús kʼoa ni̱jinlee yaoná jotjío kon je ndsʼee (1 Ped. 3:8).

18, 19. 1) Jmé tʼatsʼeni xi tsín jao sʼe̱ tokoán. 2) Jméni xi machjén nga sʼiain.

¹⁸ Jeme kjoaʼaí je nichxin nga tsín tisi̱kjaʼaitsjenyañá je Kjoabiyale Cristo. Kʼianga tíjna je kjoañʼai xi nʼio tse kʼiaa “kjoaʼaí” je Jesús kʼoa koaikao ya ngʼajmi je chjotale xi ya tjínle kjoachoya xi tjíosa i̱ Sonʼnde. Kʼianga jekʼoakoa̱n alikui tisi̱kjaʼaitsjenyañá je Kjoabiyale Cristo (1 Cor. 11:26; Mat. 24:31).

¹⁹ Ningalani tsín tisi̱kjaʼaitsjenyañá je Kjoabiyale Cristo, alikuijin jchajinná nga kui tsoyanile nga nangitokon koan je Jesús, nga nʼiojin koan kʼoa nga tsakakó kjoatsjoacha. Kʼoéyanajmíjinlee je xi koatio nga kʼia josʼin kinikjaʼaitsjenyá je Kjoabiyale Cristo. Nʼiojin koasenkao nga sʼe̱jinle. Nga koasenkaoná ndʼaibi nga faʼaitsjenya je Kjoabiyale Cristo, machjén nga chjénngilee je Jesús nga nangitokon koan, nga nʼiojin koan, kʼoa nga tsakakó kjoatsjoacha. Tsa kʼoasʼiaan, tsee kjoanichikontʼain tsjoáná je Jeobá (2 Ped. 1:10,11).