KJOAʼMIYA XI CHOTʼAYA 3
Jósʼin si̱kuindaa je ni̱ma̱ná
“Je xi ngisasa nda tikuindai jé ni̱ma̱li” (PROV. 4:23).
KJOAJNDA 36 Si̱kuindaa je ni̱ma̱ná
XI TÍNCHJA̱NI *
1-3. 1) Ánni nga nʼio tsjoake koanni Jeobá je Salomón, kʼoa jmé kjoanichikontʼain xi kitsjoale. 2) Jméni xi chótʼayajiaan i̱ kjoaʼmiya jebi.
SʼAA xti je Salomón kʼianga rey koan ya naxinandá Israel. Kʼianga tosʼa tsakʼétsʼiakao nga tsakatéxoma, je Jeobá kʼoakitsole nga katasíjéle jmeni xi mele. Kʼoa je Salomón kʼoakitso nga kje tjínjinle kjoafaʼaitsjen nga sʼa xti, kuinga jngo ni̱ma̱ xi ndʼé kisijésíni (1 Rey. 3:5-10). Nga kʼoakitso tsakakó nga nangitokon koan. Kuinga nʼio tsjoake koanni je Jeobá (2 Sam. 12:24). Kisasenle je Jeobá jmeni xi kisijé je Salomón, kuinga jngo ni̱ma̱ xi chjine kitsjoanile (1 Rey. 3:12).
2 Nʼio tse kjoanichikontʼain kisʼele je Salomón kʼianga kixi kitʼale Niná. Kui kjoanda tsakʼaile nga je tsakʼénda je yo̱ngo̱ jñani tsaʼyaxkón je Jeobá, je Ninále Israel (1 Rey. 8:20). Nʼio tsaʼyale xi totʼatsʼe je kjoachjine xi kitsjoale Niná. Kʼoa kui kjoanda kisʼele nga jan librole Biblia kiski, jolani je libro xi tsʼe Proverbios.
3 Ya libro xi tsʼe Proverbios tsʼato 100 kʼa síkʼaxki̱ je xi ni̱ma̱ tso. Tobʼelañá, ya Proverbios 4:23 itso: “Je xi ngisasa nda tikuindai jé ni̱ma̱li”. Jmé xi tsoyanile nga “ni̱ma̱li” tso je versículo jebi. Kui chótʼayajiaan i̱ kjoaʼmiya jebi. Kʼoati ngi jao koya xi nʼio tjínle kjoandosin chótʼayajiaan: Jósʼín je Na̱i kʼianga mele sikitsón je ni̱ma̱ná. Kʼoa jméni xi sʼiaan nga si̱kuindaa. Nga jchaa xi tʼatsʼe jebi kui xi kuinyakaoná nga tosi tonda kixi kjuintʼalee Niná.
JMÉ XI NCHJA̱NI NGA NI̱MA̱NÁ SÍKʼAXKI̱ JE BIBLIA
4, 5. 1) Jósʼin basenkaoná jmeni xi tso Salmo 51:6 nga majinná jme xi tínchja̱ni je én xi “ni̱ma̱li” tso. 2) Jósʼin mangóson nga nikuindaa je yaoná kʼoa nga nikuindaa je ni̱ma̱ná.
4 Ya Proverbios 4:23, nga “ni̱ma̱li” tso, kui nchja̱ni je kjoafaʼaitsjenná, jotjío tokoán kʼoa jmeni xi nimetokoán. Ali tsakuijin josʼin matseen xi tosonngʼa, kui nchja̱ni jme xi sʼejnajin je ni̱ma̱ná.
5 Nga nikuindaa josʼin nikjaʼaitsjeen yaa mangóson nga nda nikuindaa yaoná. Tobʼelañá, tsa mená nga tsín chʼin sʼe̱ná, tjínnele nga nda kuichaa kʼoa nga kjitʼa sʼiaan ejercicio. Tikʼoasʼinni, tsa mená nga nda kuiyoaa ngixko̱n Niná tjínnele nga kjitʼa kʼoéxkiaa je Biblia kao xo̱n xi ya yʼangini kʼoa koakoá nga tjínná kjoamakjain xi kao Jeobá (Rom. 10:8-10; Sant. 2:26). Xi ijngosani, tsa nda matseen xi tosonngʼa, tsakui nichxin kʼoasʼin nikjaʼaitsjeen nga nda tiyoaa ninga chʼinni tjínná. Kʼoatisʼinni, koa̱njinle kʼoasʼin si̱kjaʼaitsjeen nga taja tíjna je kjoamakjainná kʼiatsa nda tinixálee Niná, ninga kuini xi chʼaotjín tinikjaʼaitsjeen (1 Cor. 10:12; Sant. 1:14, 15). Je Na̱i kui xi mele nga kʼoasʼin si̱kjaʼaitsjeen joni je. Jósʼín je Na̱i nga mele kʼoanachaná, kʼoa jméni xi sʼiaan nga tsín ya jtsaoyaa je che̱n xi batío.
JMÉNI XI SʼÍN JE NA̱I KʼIANGA MELE SIKITSÓN JE NI̱MA̱NÁ
6. Jméni xi mele sikaoná je Na̱i, kʼoa jmé che̱n xi bʼéjnaná.
6 Je Na̱i to yaole fini kʼoa alikui sítjoson je kjoatéxomale Jeobá, kʼoa kui xi mele nga kʼoati sʼiaan tsanda ñá. Nga tsín male kjoanʼio sʼínná, básjaile josʼin kʼoanachaná. Tobʼelañá, kui xi mele nga ya kjoájtaa je chjota xi tsín nda sʼín, xi jetsakʼanachale (1 Juan 5:19). Ninga ʼyaa nga “síkitsón” je kjoafaʼaitsjenná kʼoa kao jonʼia (1 Cor. 15:33). Kʼoakoan je rey Salomón, kʼianga je chixankao yánchjín xi tsín je Jeobá tsabexkón. Jé xokisikao nga tobijbi kisikjinle je Jeobá (1 Rey. 11:3).
Jósʼin si̱kuindaa je ni̱ma̱ná nga tsín kʼoaiʼndee nga je Na̱i sikitsón je kjoafaʼaitsjenná (Chótsenlai párrafo 7) *
7. 1) Jmésani xi sʼín je Na̱i kʼianga kaníbason josʼin síkjaʼaitsjen. 2) Ánni machjénsíni nga nda si̱kuindalee yaoná.
7 Je Na̱i kui síchjén je película kao jmeni xi faʼa ya televisión nga síkʼabíson josʼin síkjaʼaitsjen. Nʼio nda be josʼin bichómani kʼianga tjín xi sʼeyanajmíná, ali tsa tokuijin nga bʼétsaojinná, kʼoati síkʼantjaiya josʼin nikjaʼaitsjeen kʼoa jonʼia. Je Jesús kʼoati kisichjén je choa̱ xi tsakʼéyanajmíle je chjota kʼianga kitsoya. Tobʼelañá, je choa̱ xi tsʼe chjota samaritano kʼoa tsʼe ti xi ki (Mat. 13:34; Luc. 10:29-37; 15:11-32). Kʼoa je xi kui kjoafaʼaitsjenle Na̱i fitjenngi koaanle sikiʼaon je kjoafaʼaitsjenná. Kuinga machjénsíni nga nʼio nda si̱kuindaa je yaoná. Tjín je película kao jmeni xi faʼa ya televisión xi tsín chʼao tjío. Kuinga tjínnenile nga nda chósonnilee jmeni xi chotsenlee. Kʼianga tjín xi chótsenlee ya televisión chjónangilee yaoná jebi: “A kui títsoyana programa jebi kʼoa tsa película jebi nga kixi tíjna nga tsjoaʼndele yaona nga kui kʼoasʼian xi chʼaotjín” (Gál. 5:19-21; Efes. 2:1-3). Tsa ʼyaa nga kui kjoafaʼaitsjenle Na̱i yʼangini, machjén nga si̱kjinlee joni jngo chʼinʼbi.
8. Jósʼin koa̱n kuinyakao xi xijchá ma je ʼndíxtile nga sikuinda je ni̱ma̱le.
8 Jon xi xijchá mao, jon kjineno nga si̱kuindao je ʼndíxtino ánni nga tsín je Na̱i sikitsónni je ni̱ma̱le. Nʼiojin bʼenelao yaono nga nda nikuindao je ʼndíxtino nga tsín chʼin katatsaotʼale. Tobʼelañá, tsje nichon je ndʼiano kʼoa chjaʼaxinño jmeni xi tsjoáchʼinno. Tikʼoasʼinni, tjínnele si̱kuindao je ʼndíxtino nga tsínkui katakotsenle je película, programa xi faʼa ya televisión, videojuego kʼoa kao página xi tjío ya Internet ánni nga tsínkui kjoafaʼaitsjenle Na̱i kjoaʼasʼenjinni je ni̱ma̱le. Je Jeobá kui xá títsjoáno nga kjoándiaalao je ʼndíxtino nga miyole Jeobá katama (Prov. 1:8; Efes. 6:1, 4). Kuinga ndatjínsíni nga kuichákjáyalao je ʼndíxtino tojo tso je Biblia. Kʼoatʼinlao jmeni xi koa̱n skótsenle kʼoa jmeni xi mai, kʼoa tʼinyalao ánni nga tsín koa̱n tjóʼndenile kʼoasʼin tsa jmeni (Mat. 5:37). Kʼianga jekjimajchínga, takoyalao nga katamajinle jmeni xi ndatjín kʼoa jmeni xi chʼaotjín tojo tso je kjoatéxomale Niná (Heb. 5:14). Kui koa̱nle je ʼndíxtino jmeni xi kuixón, tonga xi ngisa koa̱nle kui jmeni xi sʼiaon (Deut. 6:6, 7; Rom. 2:21).
9. Jmé kjoafaʼaitsjen kaníbason je Na̱i, kʼoa ánni nga xkón tíjnasíni.
9 Nga sikitsón ni̱ma̱ná je Na̱i, kui xi mele nga ngisa si̱nʼiotʼaa je kjoachjine xi tjín sonʼnde tikʼoajinni tsʼe Niná (Col. 2:8). Tobʼelañá, kui kjoafaʼaitsjen kaníbason nga kui xi ngisa chjíle nga nyiná koaan. Tonga nʼio xkón tíjna nga kʼoasʼin si̱kjaʼaitsjeen, nga̱ ninga nyiná koa̱n kʼoa ni mai, je chjota xi kʼoasʼin síkjaʼaitsjen tokui fini nga tao̱n sʼe̱le, kʼoa tsjionkon yaole, familiale kʼoa saʼnda síchaa je kjoamiyo xi tjínle kao Jeobá (1 Tim. 6:10). Bʼailee kjoanda je Nʼainá xi tíjna ngʼajmi nga tsjoáná kjoafaʼaitsjen josʼin tjínnele jchatokoán je tao̱n (Ecl. 7:12; Luc. 12:15).
JÓSʼIN SI̱KUINDAA JE NI̱MA̱NÁ
Tojo kisʼin je chjota xi kisikuinda je naxinandá nichxin kjoatse kʼoa xi kisikuinda je xo̱ntjoale naxinandá, kʼoati machjén nga tosi tonda tjenyatokon kuiyoaa kʼoa kjitʼanangi chʼa̱sjengiaa jmeni xi sikitsón je ni̱ma̱ná (Chótsenlai párrafo 10, 11) *
10, 11. 1) Jméni xi tjínnele sʼiaan nga si̱kuindaa je ni̱ma̱ná. 2) Jmé xi kisʼin je chjota xi kisikuinda je naxinandá nichxin kjoatse, kʼoa jósʼin mangóson kao je tokoán.
10 Nga koa̱nná si̱kuindaa je ni̱ma̱ná, tjínnele jchaa jméni xi koa̱nle sikiʼaonná kʼoa kjitʼanangi kuinyaxinlee. Jmeni xi tso ya Proverbios 4:23 kui síkjaʼaitsjenjinná jmeni xi kisʼin je chjota xi kisikuinda je naxinandá nichxin kjoatse. Yaa tsakatioson je xjáo xi kjindai je naxinandá, kʼoa tsa tsabe nga chjotakontrale jekichochrian kjitʼanangi kisikinrʼoé je naxinandá. Jebi kui tsoyaná jmeni xi tjínnele sʼiaan nga tsín je Na̱i sikitsón je kjoafaʼaitsjenná.
11 Nichxin kjoatse je chjota xi kisikuinda je naxinandá kʼoa kao xi kisikuinda je xo̱ntjoale, tsakinyakaongañá xínkjín (2 Sam. 18:24-26). Tsakinyakao xínkjín nga nda tsakʼéchjoa je xo̱ntjoa kʼianga jekichochrian je chjotakontrale (Neh. 7:1-3). Kʼianga je Biblia bándiaale je tokoán * yaa mangóson joni je chjota xi kisikuinda je naxinandá. Je tokoán koasenkaoná nga jchaa kʼianga je Na̱i koa̱nmele kʼoetʼale je ni̱ma̱ná, nga koa̱nmele sikitsón je kjoafaʼaitsjenná, josatío tokoán kʼoa kao jmeni xi nimetokoán. Tjínnele nga kuenta sʼiaan jmeni xi kuitsoná je tokoán, tsa kʼoasʼiaan likui kʼoaiʼndelee je Na̱i nga sikitsón je kjoafaʼaitsjenná.
12, 13. Jmé kjoani xi sakʼoa jtsaojiaan, tonga jmé xi tjínnele sʼiaan.
12 Jngola choa̱ kataʼyaa jósʼiaan nga si̱kuindalee yaoná je Na̱i. Je Jeobá kʼoatsoná nga tsín koa̱n kui chobayañá je kjoachajngi kʼoa tojmeni xi jndí tíjna (Efes. 5:3). Jméni xi sʼiaan tsa je xi ñatjen nixá kʼoa xi ñatjen mangián skuela kui kjaoyani je xi jndí tíjna. ʼYañá nga tjínnele chʼa̱sjengiaa “ngayije kjoa xi tsín bexkón Niná” kao “ngayije kjoachi̱nga̱le sonʼnde” (Tito 2:12). Kʼoa nga jchaa jebi kui je kjoafaʼaitsjenná koasenkaoná (Rom. 2:15). Jméni xi tjínnele sʼiaan, a kuenta sʼiaan je kjoafaʼaitsjenná kʼoa a kʼoéchjoalee je Na̱i nga tsín katasíkitsón. Tsakui nichxin kʼoati koa̱nmená nga kuinóʼyalee jmeni xi tjíotso kʼoa tsakui chótsenlee je sén xi tjíokotʼa, tonga je xi ngisa ndatjín nga sʼiaan kuinga kjaʼaínile xi chobayañá kʼoa tsa maije̱ tosa tokjuian.
13 Machjén nga nʼiojin koaan nga tsínkui si̱kjaʼaitsjeen kʼoa tsínkui kʼoasʼiaan jmeni xi tsín kixi tíjna xi sʼín je xi ñatjen nixá kʼoa tsa xi ñatjen mangián skuela. Je Jeobá be jokji bʼenelee yaoná, kʼoa jé tsjoáná nganʼio kao kjoachjine nga chʼa̱sjengiaa je kjoafaʼaitsjen xi kaníbason je Na̱i (2 Crón. 16:9; Is. 40:29; Sant. 1:5). Jmésani xi koa̱n sʼiaan nga si̱kuindaa je ni̱ma̱ná.
TOSI TONDA SI̱KUINDAA YAONÁ
14, 15. 1) Jméni xi tjínnele kʼoaiʼndelee nga kjoaʼasʼenjin je ni̱ma̱ná, kʼoa jósʼin bʼaiʼndelee. 2) Jósʼin basenkaoná ya Proverbios 4:20-22 nga ngisa kʼoailee kjoandosin nga kʼoéxkiaa je Biblia (kʼoati chótsenlai je recuadro “ Jósʼin si̱kjaʼaitsjenjiaan”).
14 Nga si̱kuindaa je ni̱ma̱ná, ali tokuijin xi machjén nga kʼoéchjoalee yaoná xi tsín kixi tíjna, kʼoati machjén nga kʼoaiʼndee nga katafaʼasʼenjin kjoafaʼaitsjenná je xi ndatjín. Kuila sikjaʼaitsjen ijngokʼa jokisʼin je chjota xi kisikuinda je naxinandá nichxin kjoatse. Je xi ya kisikuinda je xo̱ntjoa tsakʼéchjoa je xo̱ntjoa nga tsín koan jaʼasʼen je chjotakontrale. Tonga kʼoati kiskoʼai kʼianga koan jaʼasʼen je chjota xi kichokao je tsojmi xi ma chine kʼoa tsa jmesani. Tsa tsínlani kʼoakisʼin, to kjinrájin kʼienni je chjota xi ya tsakatio. Tikʼoasʼinni, machjén nga kjitʼa kʼoaiʼndee nga katafaʼasʼenjin je ni̱ma̱ná jmeni xi tsoya je Jeobá.
15 Yaa Biblia faʼaitʼa je kjoafaʼaitsjenle Niná. Kʼianga bʼexkiaa je Biblia bʼaiʼndeñá nga kui kjoafaʼaitsjenle Niná bándiaale josʼin nikjaʼaitsjeen, josatío tokoán kʼoa jonʼia. Jao koya tjínni xi koa̱n sʼiaan nga ngisa koasenkaoná nga kʼoéxkiaa je Biblia. Xi títjon, nʼio tjínle kjoandosin nga kʼoétsʼoaa. Jngo tichjaa xi itso: “Nga kjesa bʼexkiajian je Biblia, jé Jeobá sijéle nga katamajinna je xi nʼio naskánatjín tsoya je Énle” (Sal. 119:18). Xi majaoni, tjínnele nga si̱kjaʼaitsjenjiaan jmeni xi kʼoéxkiaa. Kʼianga kʼoanʼia, ñaki bichókajin ni̱ma̱ná je Énle Niná kʼoa tsjoacha maa josʼin síkjaʼaitsjen je Jeobá (tʼexkiai Proverbios 4:20-22; * Sal. 119:97).
16. Jmé kjoanda xi sokóná kʼianga chotsenlee je JW Broadcasting. Jngo choa̱ tʼejnai.
16 Ijngosa koya xi sʼiaan nga kʼoaiʼndee nga je kjoafaʼaitsjenle Niná koandiaaná kʼiaa nga chótsenlee ngayeje xi faʼaitʼa ya JW Broadcasting®. Itso jngo ndsʼee kao chjoónle: “Jmeni xi faʼa nga xki̱ sá kʼoasʼin bakóninajin je Jeobá nga nrʼoé je kjoabʼetsʼoanajin. Sínʼio tokuinjin kʼianga sakʼoa ba sʼenajin. Kʼoa kui música xi jndalee Niná noʼyalaijin bʼajnda nichxin: kʼianga bʼendaijin xi bichiñá, nga nitsjaijin kʼoa tsa kʼiaje̱ nga té tiʼyuijin”. Jmeni xi satíotʼa ya JW Broadcasting® binyakaoná nga nikuindaa je ni̱ma̱ná. Kui tsoyaná nga kʼoasʼin si̱kjaʼaitsjeen joni Jeobá kʼoa nga tsínkui kjoafaʼaitsjen xi kaníbason je Na̱i kjuintjenngiaa.
17, 18. 1) Tojo tso 1 Reyes 8:61, jósʼin bichómani kʼianga nitjosoán jmeni xi bakóyaná je Jeobá. 2) Jméni xi bakóyaná je choa̱le rey Ezequías. 3) Tojo tso ya Salmo 139:23, 24, jméni xi kisijéle David je Jeobá xi kʼoati koa̱n si̱jélee tsanda ñá nga kʼoétsʼoalee.
17 Matajaa je kjoamakjainná kʼianga ʼyaa nga ndasʼin bichómani nga kui kʼoanʼia je xi kixi (Sant. 1:2, 3). Nda satío tokoán kʼianga fayatsjoaa je ni̱ma̱le Jeobá kʼoa nga xtile tsoná, kʼoa tosi tonda nitjosonlee (Prov. 27:11). Nga jme kjoa xi bitjatojiaan yaa bakoñá nga tsín jao tjín tokoán (Sal. 119:113). Yaa ni̱ma̱ná nroajinni nga tsjoachaa je Jeobá kʼoa ñaki kʼoatjío tokoán nga si̱tjosoán je kjoatéxomale kʼoa kao josʼin mele (tʼexkiai 1 Reyes 8:61). *
18 Nga chjotajée maa, sakʼoaa saténgiaa. Kʼianga kʼoama si̱kjaʼaitsjenjiaan je choa̱le rey Ezequías. Kʼianga kisokojéele kʼoakoannile, kʼoa tosi tonda je Jeobá kisixále kao ngayeje ni̱ma̱le (Is. 38:3-6; 2 Crón. 29:1, 2; 32:25, 26). Alikui kʼoaiʼndelee je Na̱i nga sikitsón je kjoafaʼaitsjenná. Si̱jéle je Jeobá nga katatsjoáná jngo ni̱ma̱ xi sítjoson (1 Rey. 3:9; tʼexkiai Salmo 139:23, 24 *). Kixi kjuintʼalee je Jeobá kʼiatsa si̱kuindaa je ni̱ma̱ná.
KJOAJNDA 54 “Kui jebi je ndiaa”
^ párr. 5 Cheen batíoná je Na̱i nga̱ kui xi mele nga tsín tije Jeobá si̱xánilee. A kʼoaiʼndeñá nga kʼoakoa̱n axo tosi tonda kixi kjuintʼalee je Jeobá. Kui xi kuitsoni jósʼin si̱kuindaa je ni̱ma̱ná, ali tsakuijin jmé kjoa xi kuitjátojiaan. Jmé xi tsoyanile nga ni̱ma̱ná nokjoañá. Jósʼín je Na̱i nga mele sikitsón. Kʼoa jméni xi sʼiaan nga si̱kuindaa je ni̱ma̱ná. Kui xi tʼatsʼe jebi chótʼayajiaan i̱ kjoaʼmiya jebi.
^ párr. 11 JÓSʼIN TSOYANILE: Kʼianga “tokoán” síkʼaxki̱ je Biblia kui nchja̱ni nga toxá kʼoasʼin kisindaniná je Jeobá nga maná tiñá chotʼajinñá je kjoafaʼaitsjenná, josatío tokoán kʼoa jmeni xi nʼia kʼoa kʼoasʼín joni jngo juez nga bánená jée tsa jmeni xi nʼia (Rom. 2:15; 9:1). Kʼianga je Biblia bándiaale je tokoán kui xi tsonile nga ya bʼangini je kjoatéxomale Jeobá, nga ʼyaa tsa ndatjín kʼoa tsa chʼaotjín jmeni xi nikjaʼaitsjeen, jmeni xi nʼia kʼoa tsa jmeni xi bixoán.
^ párr. 15 Proverbios 4:20-22: “ʼNdí xi tsʼan, tinóʼyai je énna, nʼio nda tasenñui jotso je kjoatéxomana. 21 Ali nichaxkonjin. Ya tikʼéjnajin ni̱ma̱li. 22 Sʼele kjoabijnachon je xi masjaile kʼoa nda batio”.
^ párr. 17 1 Reyes 8:61: “Kʼoa tjínnele kao ngayeje ni̱ma̱no kʼoasʼin koanngínkao yaono jotso je kjoatéxomale Jeobá Nináná, kʼoa nga sitjoson je kjoatéxomale joni nichxin jebi”.
^ párr. 18 Salmo 139:23, 24: “Chótʼajinnái, ji Niná, kʼoa kataʼyai jotjín ni̱ma̱na. Chótʼajinnái, kʼoa kataʼyai jme xi kjáojinna. 24 Chótsennái tsakui ndiaa xi tsín nda jetikjoé, kʼoa ya tikasényanái ya ndiaa xi tíjnantsjai”.
^ párr. 59 XI TÍNCHJA̱NI JE SÉN XI FAʼAITʼA: Jngo ndsʼee xi jekisʼenngindá kui be ya televisión je xi kjoajndí tjenkao kʼoa tjínnele sikjaʼaitsjen jméni xi tjínnele sʼin.
^ párr. 61 XI TÍNCHJA̱NI JE SÉN XI FAʼAITʼA: Nga be nga bichóchrian je chjotakontrale, je xi síkuinda naxinandá bájinkon je xi ngikʼa. Kʼoa je xi síkuinda je xo̱ntjoa kjitʼanangi bʼéchjoa je xo̱ntjoale naxinandá.
