KJOAʼMIYA XI CHOTʼAYA 5
Jméni xi bakoá nga mangián je kjoajtín
“Kuinókjoayanio kjoabiyale Nainá saʼnda nga kjoaʼaí nga je” (1 COR. 11:26).
KJOAJNDA 18 Kʼoailee kjoanda Niná nga kitsjoa kjoabʼechjíntjai
XI TÍNCHJA̱NI *
1, 2. 1) Jméni xi kuenta sʼín je Jeobá kʼianga miyón mani chjota batiojtín jngo tjíjtsa Sonʼnde nga faʼaitsjenya je Kjoabiyale Cristo (chótsenlai sén xi faʼaitʼa ya portada). 2) Jméni xi chótʼayajiaan i̱ kjoaʼmiya jebi.
KʼIANGA miyón mani chjota xi batiojtín jngo tjíjtsa Sonʼnde nga faʼaitsjenya je Kjoabiyale Cristo, je Jeobá ali tokuijin kotsenle jotjín mani chjota xi batiojtín, kuenta sʼín nga jngó jngó xi bichó. Tjínkʼa xi tsín sícha kjoajtín jebi ninga chjota fitjenngike, kʼoa tjínkʼa xi tokʼia bichó nga faʼaitsjenya je Kjoabiyale Cristo tonga tsín fi je kjoajtín xi satío nga xki̱ xomana. Je Jeobá kʼoati kuenta sʼín je xi tokʼia bichó títjon, ninga to bichó kotsen jmeni xi ma.
2 Tsjoajin male je Jeobá nga nkjín mani chjota batiojtín kʼianga faʼaitsjenya je Kjoabiyale Cristo (Luc. 22:19). Je Jeobá alikuijin xi kuenta sʼín jotjín mani chjota xi kuicho, kui xi ngisa kuenta sʼín ánni nga bichóni. I̱ kjoaʼmiya jebi kui chótʼayajiaan jméni xi nʼio tjínle kjoandosin, ánni nga tsín tokʼia mangínsíñá nga faʼaitsjenya je Kjoabiyale Cristo, nga kʼoati mangián je kjoajtín xi batíondaná je Jeobá nga xki̱ xomana. Kataʼyala jméni xosíkaoná nga mangínñá je kjoajtín.
Jngo tjíjtsa Sonʼnde nda tjoeya je xi miyón mani bichó nga faʼaitsjenya je Kjoabiyale Cristo (Chótsenlai párrafo 1, 2).
KJOANANGITOKON BAKOÁ NGA MANGIÁN KJOAJTÍN
3, 4. 1) Ánni nga mangínsíñá je kjoajtín xi satíoná. 2) Jméni xi bakoá nga mangián je kjoajtín. 3) Tojo tso ya 1 Corintios 11:23-26, ánni nga tsín koa̱n si̱chasíñá nga faʼaitsjenya je Kjoabiyale Cristo.
3 Jé Niná ʼyaxkoán kʼianga mangián je kjoajtín. Kʼoati kuinga mangínñá nga̱ yaa bakóyaná je Jeobá. Je chjota xi ngʼakon kʼoatso nga likui machjén nga ʼya xi kuitsoyale (3 Juan 9). Tonga ñá, kui xi mená nga kuitsoyaná je Jeobá kao naxinandále (Is. 30:20; Juan 6:45).
1 Corintios 11:23-26). * Nga mangián kjoajtín jebi ngisaa sʼená kjoachoya kʼoa kui síkjaʼaitsjenjinná nga tsjoakená je Jeobá. Tonga kʼoati be nga tsín tsa to xki̱ nójin nga machjénná kjoanʼiojin. Kuinga xki̱ xomana satíoni je kjoajtín kʼoa kui xi mele nga koanngián ngantsjai je kjoajtín jebi. Kui kjoanangitokon xi tjínná xosíkaoná nga nitjosonnilee je Jeobá. Kʼoati nkjín ora nikʼayalee nga biyondalee kʼoa nga mangián je kjoajtínná.
4 Kʼianga mangián je kjoajtín bakoñá nga tjínná kjoanangitokon, kʼoa nga tiyondaa nga je Jeobá katabakóyaná. Ali tsakuijin nga mangínñá nga faʼaitsjenya je Kjoabiyale Cristo nga tjínnená kʼoasʼiaan, kuinga mangínñá nga̱ tjínná kjoanangitokon kʼoa kui xi mená nga si̱tjosoán je kjoatéxoma xi kitsjoa je Jesús, nga i̱ kitso: “Kʼoatʼiaon jebi nga kjoaʼaítsjenno xi tʼatsʼan” (tʼexkiai5. Ánni sítjosonnile Jeobá je chjota xi nangitokon ma.
5 Nga xki̱ nó, nkjín chjota xi tjínle kjoanangitokon xi mandosinle nga be tʼatsʼe Jeobá (Is. 50:4). Kʼiaa fitítjon nga faʼaitsjenya je Kjoabiyale Cristo, kʼoa xijemani, kʼiaa fi je kjoajtín xi satío nga xki̱ xomana (Zac. 8:20-23). Ñá kʼoa kao xi sʼa choatsele nga tjíokotʼaya je Énle Niná nʼio tsjoa satío tokoán josʼin tíbándiaaná kʼoa josʼin tíbakóyaná je Niná, kʼoati basenkaoná kʼoa bʼasjentjainá (Sal. 40:17). Tsínsa jmeni xi mangóson kʼoa xi ngisasa nʼio chjíle nga koanngián je kjoajtín, nga̱ yaa bakóyaná je Jeobá kao Jesús, je ʼNdíle xi nʼio tsjoake (Mat. 17:5; 18:20; 28:20).
6. Jósʼin tsakasenkao nga nangitokon koan jngo chjota nga ki kʼianga jaʼaitsjenya je Kjoabiyale Cristo.
6 Nga xki̱ nó xki̱ nó, kʼoaʼmilee je chjota nga katafi nga faʼaitsjenya je Kjoabiyale Cristo. Nkjín chjota xi nangitokon xi binyakao nga bichó nga faʼaitsjenya je Kjoabiyale Cristo. Kataʼyala jngo choa̱. Ñandia kʼianga je ndsʼee jngo invitación kitsjoale jngo chjota, je chjota jebi kʼoakitso nga tsín kʼoakoa̱nle koai. Kʼianga tojeme koaitsʼia nga kjoaʼaítsjenya je Kjoabiyale Cristo, tokʼoakoanle je ndsʼee nga kichoni ya Ndʼia jña chotʼayá je chjota xokitsole. Kʼianga nda kiskoeya je ndsʼee kui xokisikao nga kini je kjoajtín xi satío nga xki̱ xomana, to ján kʼa kisicha nga jngo nó. Jmé xi tsakasenkao nga kʼoakisʼinni chjota jebi, je ndsʼee xi kitsjoale je invitación kʼoatso nga nangitokon chjota jebi. Jejin Jeobá xi koanmele nga ya tsakʼejnajin ya naxinandále. Kʼoa ndʼaibi jekisʼenngindá (2 Sam. 22:28; Juan 6:44).
7. Nga nangitokon maa, jósʼin basenkaoná jmeni xi sakóyaná ya kjoajtín kʼoa nga bʼexkiaa je Biblia.
7 Jmeni xi majinná nga mangián kjoajtín kʼoa nga bʼexkiaa je Biblia kui xi basenkaoná nga nangitokon maa. Nkjín xomana tongini nga kjesa faʼaitsjenyajin je Kjoabiyale Cristo, je kjoajtín xi satíoná kui nʼio nchja̱ni tʼatsʼe je Jesús kʼoa nga kisʼele kjoanangitokon nga kitsjoa kjoabijnachonle xi tʼatsaan. Kʼoa nkjín nichxin tongini kʼoaʼminá nga kʼoéxkiaa je Biblia jñani nchja̱ni jmeni xi koan nga kʼien kʼoa nga jaʼáyale Jesús. Ngayeje jebi basenkaoná nga ngisa ʼyachjiá nga tsakʼéchjíntjainá je jesús. Kʼoa kui xosíkaoná nga chjenngia je kjoanangitokon xi kisʼele kʼoa nga Luc. 22:41, 42).
kʼoanʼia josʼin mele Niná, ninga sakʼoa ñʼai maná (KJOANʼIOJIN BAKOÁ NGA MANGIÁN JE KJOAJTÍN
8. Jósʼin tsakakó je Jesús nga nʼiojin koan.
8 Xi kʼoati mená chjénngiaa kui kjoanʼiojin xi kisʼele je Jesús. Nga kjesa nikʼienjin, tokʼoa jebe nga totaon skoe̱ je chjotakontrale, nga sikiʼaon kʼoa nga sikʼien (Mat. 20:17-19, TNM). Ninga kʼoalani, kitsjoaʼnde nga kʼoakoa̱ntʼain. Kʼianga tojeme kuindoa̱ yaa tjío kao chjotatjenngile ya ʼnde jña Getsemaní ʼmi, kʼoa i kitsole: “Tisótjaon, tjían. Koeni jetíjnachrian xi ska̱nitʼana” (Mat. 26:36, 46). Kʼianga jekicho je chjotankjín xi ki̱cha̱ yʼatotsja nga tsoa̱ je Jesús, tokjoan kʼoakitso nga je xi tíbinyisjai kʼoa kʼoakitsole je sondado nga katatsjoáʼndele nga katafi je chjotatjenngile (Juan 18:3-8). Nga kʼoakisʼin tsakakó nga nʼiojin koan. Kʼoa nichxin xi tiyoaa ndʼaibi, je chjotale Cristo xi ya koai ngʼajmi kʼoa kao je xi i̱ Sonʼnde koatio tichʼasjeñá nganʼio nga timangíntjenngiaa je kjoanʼiojin xi tsakakó je Jesús.
Je kjoanʼiojin xi bakoá nga mangián je kjoajtín kʼoati tsjoánganʼiole je ndsʼee (Chótsenlai párrafo 9) *
9. 1) Ánni nga machjénsíni nga katasʼená kjoanʼiojin kʼianga ntsjaintsjai koanngián je kjoajtín. 2) Jósʼin binyakao je ndsʼee xi ndoyá tjíoʼya nga kixi mangíntʼalee je Jeobá.
9 Tsakui nichxin sakʼoa ñʼai maná nga ntsjaintsjai mangián je kjoajtín. Tonga machjén nga katasʼená kjoanʼiojin. Tjínkʼa je ndsʼee xi chʼin bʼetʼale, xi ba satío kon kʼoa tsa nroajen kon. Kʼoa tjínkʼa xi xínkjín kʼoa tsa je chjotaxá fitjenngike. Si̱kjaʼaitsjenjinla je ndsʼee xi ndoyá tjíoʼya xi totʼatsʼe kjoamakjainle. Tsa tosi tonda kixi kjuintʼalee je Jeobá kui xi tsjoánganʼiole ndsʼee jebi (Heb. 13:3). Kʼianga sʼejinle nga tojo nda tinixálee je Jeobá ninga kjoa bitjatojiaan, kʼoati mataja je kjoamakjainle nga sʼele kjoanʼiojin kʼoa nga tosi tonda kixi fitʼale je Jeobá. Kʼoakoan je pastro Pablo, kʼianga tíjnaʼya ndoyá ya Roma, tsjoa koanle nga kisʼejinle kʼianga je ndsʼe̱ xi ngikʼa tosi tonda kixi tjíosíxále Niná (Filip. 1:3-5, 12-14). Tsakui nichxin tongini kʼoa tsa kʼiaje̱ nga jekitjoni ndoyá kiskile carta je chjota Hebreo. Kʼoakitsole je ndsʼe̱ nga tosi tonda katabatiojtín, kʼoa itso xi kiskile: “Katamatsjoachantsjao ndsʼao” (Heb. 10:24, 25; 13:1).
10, 11. 1) ʼYáni xi koa̱n kʼoailee je invitación nga faʼaitsjenya je Kjoabiyale Cristo. 2) Tojo tso ya Efesios 1:7, ánni nga kʼoanʼiañá.
10 Kʼoati bakoá kjoanʼiojin kʼianga bʼailee invitación xi tʼatsʼe Kjoabiyale Cristo je xi xíngiaa mani, je xi ñatjen nixá kʼoa tsa jeje̱ chjotandaindʼianá. Kui kʼoanʼiañá nga ʼyachjiá jmeni xi kisʼin je Jeobá kao Jesús xi tʼatsaan. Kui xi mená nga kʼoati katabinyakao je chjota “kjoanda xi tjínle” je Jeobá nga tsakʼéchjíntjainá (tʼexkiai Efesios 1:7; * Apoc. 22:17).
11 Ijngolasa koya chótʼayajiaan jmeni xi
bakoá kʼianga mangián je kjoajtín. Jmeni xi ngisa bakó je Jeobá kao Jesús.KJOATSJOACHA BAKOÁ NGA MANGIÁN JE KJOAJTÍN
12. 1) Ánni nga ngisa tsjoacha masíñá je Jeobá kao Jesús kʼianga mangián je kjoajtín. 2) Jmé xi sʼiaan nga chjénngilee je Jesús tojo tso ya 2 Corintios 5:14, 15.
12 Ngisaa tsjoacha maa je Jeobá kao Jesús kʼianga mangián je kjoajtín. Ánni, kuinga ya kjoajtín kjitʼaa nikjaʼaitsjenjinná jmeni xi tjíosʼín je Jeobá kao Jesús xi tʼatsaan (Rom. 5:8). Kʼoa kʼianga faʼaitsjenya je Kjoabiyale Cristo kui síkjaʼaitsjenjinná nga tsjoakená ngatsʼiaa, ninga je xi tsín bechjí je kjoabʼechjíntjaile. Ñá nʼio ʼyachjiá jmeni xi kisʼin je Jesús, kuinga je chjenngisínilee josʼin mangínkoaa yaoná nichxin nga nyaon (tʼexkiai 2 Corintios 5:14, 15). * Kʼoa yaa ni̱ma̱ná nroajinni nga chʼasjengʼaa je Jeobá nga kitsjoa je ʼNdíle xi tʼatsaan. Jolani kʼianga bʼé énná ya jinjtín.
13. Tʼeyanajmí jósʼin bakoá nga tsjoachaa je Jeobá kao Jesús.
13 Kʼianga kʼoanʼia jotsoná je Jeobá kao Jesús bakoñá nga nʼio tsjoachaa. Mangínñá je kjoajtínná ninga sakʼoa ñʼai maná. Tobʼelañá, tjínkʼa je ndsʼee xi kʼia satíole je kjoajtín xi sʼejna nga jinle xomana kʼianga maxon nga jebitjoni xále kʼoa tsakui nichxin jekijtale. Kʼoa xi ijngo kjoajtín kʼiaa sʼejnale kʼianga jetífe xomana, nga síkjáya chjota. Kuenta sʼín je Jeobá kʼianga mangián je kjoajtín ninga jekijtaná. Kʼoa tsa tosi tonda kʼoasʼiaan, ngisaa skoe̱chjí je Jeobá jokji tsjoachaa (Mar. 12:41-44).
14. Jmé choa̱ xi tsakʼéjnaná je Jesús.
14 Je Jesús nʼio nda tsakakó jme xi tsoyanile nga tsjoacha maa je ndsʼee. Ali tokʼiajin tsakakó kjoatsjoacha nga kitsjoa kjoabijnachonle xi totʼatsʼe chjotatjenngile, ngantsjai nga kuenta kisʼin jme xi koanchjénle. Tobʼelañá tsakatíojtín kao chjotatjenngile ningalani ba tjínkon kʼoa kijtale (Luc. 22:39-46). Kui ngisa kini josʼin tsjoánganʼiole je xi ngikʼa tikʼoajinni nga je kʼoainganʼiole (Mat. 20:28). Tsa kʼoati kji tsjoachaa je Jeobá kʼoa kao je ndsʼee, koanngínjian kʼianga kjoaʼaítsjenya je Kjoabichile Nainá, kʼoa kao je kjoajtín xi ngikʼa.
15. ʼYáni xi ngisa machjén nga kuinyakoaa.
15 Yaa tiyojinlee je naxinandále Niná kʼoa kao kjoatsjoa nikʼayaa je nichxinná nga kʼoaʼmilee je chjota nga kʼoati katakotʼaya je Énle Niná. Tonga je xi ngisa mená kuinyakoaa jé xi ngóson sʼin makjainná, jolani xi jekisikatío xále Niná (Gál. 6:10). Bakolee kjoatsjoacha nga kʼoaʼmilee nga katafi kjoajtín, kʼoa nga katafi nga faʼaitsjenya je Kjoabiyale Cristo. Joni je Jeobá kao Jesús, ñá kʼoati tsjoa maná kʼianga ijngokʼa síchriantʼale je Niná ʼyani xi jekisikjinle tsakai (Mat. 18:14).
16. 1) Jósʼin si̱nʼiojiaan je xíngiaa, kʼoa jósʼin koasenkaoná je kjoajtín. 2) Ánni nga nʼio tjínnile kjoandosin nga nikjaʼaitsjenjiaan ndʼaibi jmeni xi kitso je Jesús tojo tso ya Juan 3:16.
16 Jemachrianle je nichxin nga kʼoakʼuínlee je chjota nga katafaʼai nga kjoaʼaítsjenya je Kjoabiyale Cristo nga bixine 19 sá abril nó 2019 (chótsenlai je recuadro “ Kʼoakʼuínlee je chjota nga katafaʼai”). Jokji jekjoaʼato nichxin, kʼoainganʼio ngañálee je xíngiaa nga tsín si̱chaa je kjoajtínná. Sa chrian sa chrian tiyolee nga kjoetʼa jmeni xi chon sonʼnde, kuinga machjénni nga koanngián je kjoajtínná, nga̱ kui xi koasenkaoná nga tosi tonda sʼe̱ná kjoanangitokon, kjoanʼiojin kao kjoatsjoacha (1 Tes. 5:8-11). Koakolee je Jeobá kʼoa kao Jesús nga ʼyachjiá jokji tsjoakená (tʼexkiai Juan 3:16). *
KJOAJNDA 126 Tajajin, kixi kʼoa nʼiojin katamaa
^ párr. 5 Je Kjoabiyale Cristo kʼiaa si̱kjaʼaitsjenyá nga bixine 19 sá abril nó 2019. Je kjoajtín jebi kui xi ngisa nʼio tjínle kjoandosin. Ánni machjénsíni nga kjuian kjoajtín jebi. Kuinga mená kjoáyatsjoaa ni̱ma̱le Jeobá. I̱ kjoaʼmiya jebi kui chótʼayá jméni xosíkaoná nga mangínñá nga faʼaitsjenya je Kjoabiyale Cristo kʼoa kao kjoajtín xi satíoná nga xki̱ xomana.
^ párr. 4 1 Corintios 11:23-26: “Nainá kitsjoana tikui xi tsakakoyano nga jon: Je Nainá Jesús kiskoé nioxtila je nitje̱n kʼia nga kichanitʼa. 24 Kʼia nga jekitsjoa kjoanda, kisixkoa̱ya, kʼoakitso: Chjóao, ticho. Jébi yaona xi kʼoasʼin maxkoa̱ya tʼatsaon. Kʼoatʼiaon jebi nga kjoaʼaítsjenno xi tʼatsʼan. 25 Kʼoatisʼinni kiskoé je cho̱tsín, koanskanni nga jetsakjen, kitso: Je cho̱tsínbi jé kjoachjotse xi sʼenʼio kao njínna. Tojo tjín kʼa nga sʼioyao cho̱tsínbi kʼoatʼiaon nga kjoaʼaítsjenno xi tʼatsʼan. 26 Tojo tjín kʼa nga kuicho nioxtilabi, kʼoa nga sʼioyao cho̱tsínbi, kuinókjoayanio kjoabiyale Nainá saʼnda nga kjoaʼaí nga je”.
^ párr. 10 Efesios 1:7: “Je Cristo tsakʼéchjíntjainá kao njínle. Kisichatʼa jéená nga kʼoasʼin tonʼio tse kjoanda xi tjínle”.
^ párr. 12 2 Corintios 5:14, 15: “Je kjoatjaochale Cristo kjoanʼio sʼínnajin, nga jekinikjaʼaitsjainjin jebi, nga jngo xi kʼen xi tʼatsʼe ngatsʼi, kui tjíokʼenni ngatsʼi. 15 Kʼoa kʼen xi tʼatsʼe ngatsʼi, jméni nga je xi tjíokon, likui tikoatiokonni xi titʼatsʼeni, tonga xi tʼatsʼe je xi kʼoasʼin kʼen, kʼoa xi kinikjaʼáyanile xi tʼatsʼe”.
^ párr. 16 Juan 3:16: “Nga̱ Niná kʼoasʼin koantsjoake sonʼnde nga kitsjoa je xi tojngo ʼndíle, jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai”.
^ párr. 56 XI TÍNCHJA̱NI JE SÉN XI FAʼAITʼA: Jngo ndsʼee xi ndoyá tíjnaʼya xi totʼatsʼe kjoamakjainle tsjoánganʼiole kʼianga bʼéxkia jngo xo̱n xi síkasénle xínkjín. Tsjoa sʼe kon ndsʼee jebi kʼianga faʼaitsjenle xínkjín xi tʼatsʼe, kʼoa nga kixi tjíofitʼale Jeobá ninga tse kjoa tjíofaʼatojin ya ʼndele.