1. Jósʼin kisikjaʼaitsjen jngo ti kʼianga jekinrʼoé je kjoanokjoaya xi jaʼa kʼianga kisʼejna kjoajtíntse nga nó 1935.

KʼIANGA nó 1926, kʼiaa kisʼenngindá jngo ti xi 18 nóle. Nga kui nichxin, je xijchále tokʼoa jekotʼaya Biblia, kʼoa Chjota xi kotʼaya Biblia ʼmile je testigole Jeobá nga kʼia. Jan koanni xtixʼinle kʼoa jao koanni xtiyánchjínle. Kʼoasʼin kitsoyale nga je Jeobá sixále kʼoa nga kui choa̱le Jesús skénngi. Kʼoa je tile xi 18 nóle, xki̱ nó xki̱ nó tsakjen je nioxtila kʼoa tsakʼi je vino nga faʼaitsjenya je Kjoabiyale Cristo, tojo kisʼin ngatsʼi xi kiskotʼaya Biblia nga kui nichxin. Tonga tsín tikʼoasʼin kisikjaʼaitsjenni nga ya ngʼajmi koai kʼianga jekinrʼoé je kjoanokjoaya xi “La grande muchedumbre” ʼmi. Jé ndsʼee Joseph Rutherford kitsjoa kjoanokjoaya jebi kʼianga nó 1935 nga kisʼejna kjoajtíntse ya Washington (Estados Unidos). Jméni xi koanjinle ngatsʼi xi kicho kjoajtíntse jebi.

2. Jmé xi kitsoya je ndsʼee Rutherford kʼianga kitsjoa kjoanokjoayale.

² Kʼianga kitsjoa kjoanokjoayale je ndsʼee Rutherford, kui kitsoya ʼyá xi nchja̱ni je chjotankjín xi síkʼaxki̱ ya Apocalipsis 7:9. Nga kʼia, kʼoaasʼin kisikjaʼaitsjen je naxinandále Niná nga je tínchja̱ni xi ya ngʼajmi koai tonga xi tsín nʼio kixi kitʼale Niná. Je ndsʼee Rutherford kui Biblia kisichjén nga kitsoya nga je chjotankjín ali tsa jejin kitjoejin nga ya ngʼajmi koai, kʼoakitso nga ya maxki̱kao xi kjaʼaí barré * ʼmile xi kjoaʼatojintjínkon kjoañʼai xi nʼio tse, kʼoa xi i̱ Sonʼnde koyale koatio (Apoc. 7:14). Je Jesús i kitso: “Tjínsana xi kjaʼaí  barré xi tsín tsa i̱ tjíojin. Kʼoati jebe machjénna nga kjuinroakoa, kjuinrʼoé jta̱na. Tojngo koa̱njtín, kʼoa tojngo koa̱n xi skoʼnda” (Juan 10:16). Je xi kjaʼaí barré, jé xoʼmile je testigole Jeobá xi kixi tjíofitʼale Niná xi kui kjoachoya tjínle nga i̱ Sonʼnde koatio kʼianga jeʼndenaxó koa̱n (Mat. 25:31-33, 46). Kʼianga kitsjoa kjoanokjoayale je ndsʼee Rutherford, nʼio nkjín choʼndale Jeobá xi kisikʼantjaiya josʼin kisikjaʼaitsjen, jolani je ndsʼee xi 18 nóle (Sal. 97:11; Prov. 4:18).

3, 4. Jméni xi koanjinle je chjotale Cristo kʼianga kisʼejna kjoajtíntse nga nó 1935, kʼoa ánni.

³ Kʼianga tínchja̱ya je ndsʼee Rutherford itso xi kiskonangi: “A koaan kuinyando ngatsʼio xi i̱ Sonʼnde tichoyalao kuiyo ngantsjai nichxin”. Tojo kitso jngo xi ya tíjna nga kʼia, kanla jmi koanni xi kicho kjoajtíntse jebi, kʼoa tsʼatola basen koanni xi tsakinyando. Kʼoa je ndsʼee Rutherford i kitso: “Tjío i̱bi je chjotankjín”. Nʼio tsjoa kisatio kon ngatsʼi. Je xi tsakinyando koanjinle nga tsín je kitjoejin nga ya ngʼajmi koai kʼoa nga nikaojinla nganʼiotsje kitjoejinni. Nga koannyaonni 840 koanni xi kisʼenngindá nga kisʼejna kjoajtíntse kʼoa me tongatsʼi nga ya tjíojinle xi kjaʼaí barré.

⁴ Saʼnda nga kui nichxin, jmi ndsʼee xi tsín titsakjenni je nioxtila kʼoa tsín titsakʼini je vino kʼianga jaʼaitsjenya je Kjoabiyale Cristo, jolani je ti xi saje kanikʼaxkiaa. Nʼio nkjín xi kʼoati kisatio kon tojo kitso jngo ndsʼee, nga kitso: “Tokʼiaasa nga nó 1935 tsakje̱n je nioxtila kʼoa tsakʼia̱ je vino nga jaʼaitsjenya je Kjoabiyale Cristo. Koanjinna nga tsín an kiskoejinna Jeobá nga ya ngʼajmi kjuía. Koanjinna nga i̱ Sonʼnde tjínna kjoachoya kʼoa nga tsjoanganʼioa nga ʼndenaxó koa̱n” (Rom. 8:16, 17; 2 Cor. 1:21, 22). Saʼnda nga kʼia, je chjotankjín sa nkjín sa nkjín kjima kʼoa to jngojtín tjíosíxá nga tjíobinyakao je chjotale Cristo xi ya ngʼajmi koai xi tjíosa i̱ Sonʼnde.

5. Jósʼin síkjaʼaitsjen Jeobá tʼatsʼe xi tsín tikjienni je nioxtila kʼoa xi tsín tiʼbini je vino.

⁵ Jósʼin síkjaʼaitsjen Jeobá tʼatsʼe xi tsín titsakjenni je nioxtila kʼoa xi tsín titsakʼini je vino nga jejaʼato nó 1935. Jósʼin síkjaʼaitsjen Jeobá tʼatsʼe jngo chjotale Cristo xi kjien je nioxtila kʼoa ʼbi je vino xi ñaki kʼoatjín kon nga ya ngʼajmi koai tonga xi skanni majinle nga tsín je kitjoejin (1 Cor. 11:28). Tjínkʼa xi kjien je nioxtila kʼoa ʼbi je vino xi kʼoasʼin síkjaʼaitsjen nga ya ngʼajmi tjínle kjoachoya, tonga skanni machoyale nga tsín je kitjoejin nga ya ngʼajmi koai kʼoa tsín tikjienni je nioxtila kʼoa tsín tiʼbini je vino. Tsa tosi tonda je Jeobá sixále, je Jeobá kʼoaasʼin skoe̱kon nga ya tjíojinle xi kjaʼaí barré ʼmile. Tojo fi kʼianga faʼaitsjenya je Kjoabiyale Cristo ningalani tsín tikjienni je nioxtila kʼoa tsín tiʼbini je vino, kʼoa tsjoále kjoanda je Jeobá kao Jesús tʼatsʼe jmeni xi kisʼin xi totʼatsaan.

6. Jméni xi tsole Jesús nga sʼin je ánkje.

⁶ Jenʼio machrianle nga kjoaʼaí kjoañʼai xi nʼio tse, kuinga koasenkaoniná nga chótʼayajinsaa jmeni xi tso Apocalipsis, capítulo 7 tʼatsʼe chjotale Cristo xi ya ngʼajmi koai, kao tʼatsʼe chjotankjín xi ya maxki̱kao xi kjaʼaí barré. Kʼoatso nga je Jesús kʼoatsole je ánkje nga tosi tondala katabʼéchjoale nga tsín katafaʼai kjoaxkón, kʼiaa saʼnda tsjoáʼnde nga kjoaʼaí kjoaxkón i̱ Sonʼnde kʼianga jesʼe̱choa̱ ngatsʼi xi ya ngʼajmi koai, xi tsonile, nga jechjotakixi skoe̱kon je Jeobá (Apoc. 7:1-4). Je kjoanda xi kʼoaile je chjotale Cristo xi ya ngʼajmi koai nga kixi  kjima kuinga ya koatexomakao je Jesús ya ngʼajmi nga rey kʼoa naʼmi koa̱n (Apoc. 20:6). Nʼio tsjoa sa̱tío kon je Jeobá, Jesús kao ánkje kʼianga jekʼoaile kjoanda ya ngʼajmi je xi 144,000 mani.

7. Tojo tso Apocalipsis 7:9, 10, ʼyáni xi tsabe je Juan, kʼoa jmé xi tjíosʼín (chótsenlai sén xi faʼaitʼa ya portada).

⁷ Kʼianga jetsoya Juan tʼatsʼe je xi 144,000 mani xi ya koatexomakao Jesús, kʼiaa be je chjotankjín xi faʼatojintjínkon Armagedón. Alikui ʼya xi be jotjín mani je chjotankjín nga̱ ngisaa nʼio nkjín mani tikʼoajinni xi 144,000 mani (tʼexkiai Apocalipsis 7:9, 10). * Nga “najñochxoa yʼakjá” je chjotankjín, kui tsoyanile nga tsín i̱ tsjonjin yaole jmeni xi chon sonʼnde kʼoa nga kixi tjíofitʼale Niná kao Cristo (Sant. 1:27). Nʼio tjíobʼéjta kʼoa kʼoatjíotso nga kui kitjontjaini xi totʼatsʼe jme xi kisʼin je Jeobá kao Jesús, je Barréle Niná. Nga xka̱jén yʼatonntsja kʼoasʼin bakóni nga nʼio tsjoa tjíole nga je Jesús kiskoejin Jeobá nga Rey koa̱n (tingósonkoai Juan 12:12, 13).

8. Jméni xi tso Apocalipsis 7:11, 12 tʼatsʼe Jeobá, Jesús, ánkje kao xi 144,000 mani.

⁸ Tʼexkiai Apocalipsis 7:11, 12. * Jókisatio kon ngatsʼi xi ya tjío ngʼajmi. Je Juan be nga nʼio tsjoa tjío kon kʼoa bʼasjengʼa Niná kʼianga jebe je chjotankjín. Je Jeobá kao ngatsʼi xi tjío ya ngʼajmi nʼiojin tsjoa sa̱tío kon kʼianga jekuitjoson je sén xi tsabe Juan kʼianga kjoaʼatojintjínkon je chjotankjín kjoañʼai xi nʼio tse.

9. Tojo tso Apocalipsis 7:13-15, jméni xi jetjíosʼín ndʼaibi je chjotankjín.

⁹ Tʼexkiai Apocalipsis 7:13-15. * Je Juan kʼoatso nga je chjotankjín “jetsakanéjon najñole, kʼoa je kisichxoa kao je njínle je Barré”. Kui xi tsonile nga tsje tjío kjoafaʼaitsjenle kʼoa nga ndatjío ngixko̱n Jeobá (Is. 1:18). Je chjotankjín jebi jekitsjoatʼale yaole Jeobá kʼoa jekisʼenngindá, makjainle xi tʼatsʼe kjoabʼechjíntjaile Jesús kʼoa miyole Jeobá ma (Juan 3:36; 1 Ped. 3:21). Kuinga ya tjíoni ngixko̱n yáxilele Niná kʼoa “síxále nga nichxin kao nga nitje̱n” i̱ Sonʼnde. Kʼoa jekʼoatjíosʼín ndʼaibi nga kao kjoatsjoa tjíotsoyason kʼoa nga chjotale Cristo tjíosíkao chjota, nga̱ kui ngisa tsjoále kjoandosin je Chjotaxále Niná (Mat. 6:33; 24:14; 28:19, 20).

10. Jméni xi tsín jao tjínle je chjotankjín, kʼoa jméni xi skoe̱ nga kuitjoson.

¹⁰ Je chjotankjín tjíojngoo kon nga tosi tonda sikuinda Niná kʼianga jekjoaʼato je kjoañʼai xi nʼio tse, nga̱ je Biblia kʼoatso nga “je xi tíjnane je yáxile kʼoéjnajinle nga je”. Kʼoati kuitjoson jmeni xi jekjoatse tichoyalee nga i̱ tso je Biblia: “Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male, nga je kjoa xi títjon jejaʼato” (Apoc. 21:3, 4).

11, 12. 1) Tojo tso Apocalipsis 7:16, 17, jmé kjoanichikontʼain xi koyale je chjotankjín. 2) Jméni xi koa̱n sʼin je xi kjaʼaí barré kʼianga faʼaitsjenya je Kjoabiyale Cristo, kʼoa ánni.

 ¹¹ Tʼexkiai Apocalipsis 7:16, 17. * Nichxin xi tiyoaa ndʼaibi, tjínkʼa choʼndale Jeobá xi tsín nanda sokóle jmeni xi kjine xi totʼatsʼe nga tsín masonnile tao̱n kʼoa tsakuije̱ nga kjoasi tjín kʼoa tsa kjoajchán tjín ya ʼndele. Kʼoa tjínkʼa xi ndoyá tjíoʼya xi totʼatsʼe kjoamakjainle. Ninga kʼoalani, je chjotankjín nʼio tsjoa tjío kon nga̱ nʼio nkjín tsojmi sʼe̱le kʼoa tosi tonda kuitsoyale je Jeobá kʼianga jekjoeson jmeni xi chon sonʼnde. Kʼianga sikjeson Jeobá jmeni xi chon sonʼnde xi je Na̱i kjinentsja, je Jeobá sikuinda je chjotankjín nga tsín jme xi koa̱nle. Kʼianga jekjoaʼato kjoañʼai xi nʼio tse, jé Jesús koandiaale “jña títjo nandá xi tíjnakon”, xi tsonile, jé koasenkao nga sʼe̱le kjoabijnachon xi tsínkʼia fetʼa. Si̱kjaʼaitsjenla jokji kjoanda sʼe̱le je chjotankjín, ninga jmi millón mani je chjota, tojejin xi tsínkʼia kuiyá (Juan 11:26).

¹² Je xi kjaʼaí barré nʼio tsjoále kjoanda je Jeobá kao Jesús nga kui kjoanda tjínle. Ninga tsín je kiskoejin Jeobá nga ya ngʼajmi koai, kʼoati tsjoake kʼoa chjí bekon joni je xi ya koai. Je xi kjaʼaí barré kʼoa je xi ya ngʼajmi koai bʼasjengʼaa je Niná kao Cristo. Jngo koya josʼin bʼasjengʼa Niná kʼiaa nga síkjaʼaitsjenya je Kjoabiyale Cristo.

13, 14. Ánni nga tjínnenile kjuian ngatsʼiaa kʼianga faʼaitsjenya je Kjoabiyale Cristo.

¹³ Nichxin xi tiyoaa ndʼaibi, kʼianga 1,000 mani chjota xi batiojtín nga faʼaitsjenya je Kjoabiyale Cristo, mela tojngo xi kjien je nioxtila kʼoa ʼbi je vino. Kui xi tsonile nga nʼio nkjín ʼnde jñani tsín ʼya xi kjien je nioxtila kʼoa ʼbi je vino. Me tongatsʼi je xi fi kʼianga faʼaitsjenya je Kjoabiyale Cristo nga i̱ Sonʼnde koyale koatio. Tonga ánni kʼoati síkjaʼaitsjenyani je Kjoabiyale Cristo. Yaa mangóson joma kʼianga jngo miyoná bixan. Kuinga mangínñá nga̱ miyo chobá kʼoa tsjoachañá. Kʼoatisʼinni xi kjaʼaí barré, kuinga fini kʼianga faʼaitsjenya je Kjoabiyale Cristo nga̱ kʼoasʼin bakónile nga tsjoake kʼoa nga tsjoánganʼiole je Cristo kao xi  ya ngʼajmi koai. Xi ijngosani, kʼoasʼin bakóni nga bechjí je kjoabʼechjíntjaile Jesús nga̱ totʼatsʼee nga koa̱n koatio ngantsjai nichxin i̱ Sonʼnde.

¹⁴ Ijngosa koya xi nʼio tjínle kjoandosin anni nga fini xi kjaʼaí barré kʼianga faʼaitsjenya je Kjoabiyale Cristo, kuinga sítjoson jmeni xi tsakʼéne je Jesús. Kʼianga tsakjenkao je pastrole xi kixi kitʼale, i kitsole: “Kʼoatʼiaon jebi nga kjoaʼaítsjenno xi tʼatsʼan” (1 Cor. 11:23-26). Je xi kjaʼaí barré tosi tonda sikjaʼaitsjenya je Kjoabiyale Cristo nga i̱ sa Sonʼnde tjío xi ya ngʼajmi koai. Kʼoa kʼoatsole ngatsʼi chjota nga katafi nga faʼaitsjenya je Kjoabiyale Cristo.

15. Jméni xi sʼiaan nga jngó jngoá nga chʼa̱sjengʼaa je Niná kao Jesús kʼianga kjoaʼaítsjenya je Kjoabiyale Cristo.

¹⁵ Kʼianga kjoaʼaítsjenya je Kjoabiyale Cristo, kui kjoanda tjínná nga chʼa̱sjengʼaa Niná kao Cristo kʼianga kuijndá kʼoa nga kʼoétsʼoaa. Je kjoanokjoaya xi kjoaʼa nó jebi, i ʼmi: “Jchachjiá jmeni xi kisʼin je Niná kao Cristo xi tʼatsaan”. Kʼianga kuinóʼyá kjoanokjoaya jebi, ngisaa kʼoailee kjoanda je Jeobá kao Cristo. Kʼianga kjoaʼatoya je nioxtila kao je vino koaan si̱kjaʼaitsjenjiaan nga kui tsoyanile je yaole kao njínle Jesús. Kʼoati koa̱n si̱kjaʼaitsjenjiaan nga je Jeobá kitsjoaʼnde nga kʼienntjainá je ʼNdíle ánni nga sʼe̱niná je kjoabijnachon (Mat. 20:28, TNM). Ngatsʼi xi tsjoake je Jeobá kao Jesús koai nga kjoaʼaítsjenya je Kjoabiyale Cristo.

16. Jméni xi mangóson je chjotale Cristo xi ya ngʼajmi koai kao xi kjaʼaí barré.

¹⁶ Je Niná tongóson kji tsjoake kʼoa tongóson kji chjí bekon je xi ya ngʼajmi koai kao xi kjaʼaí barré. Nga̱ kao kjoabijnachonle ʼNdíle tsakʼéchjíntjaini xi ya ngʼajmi koai kao xi i̱ Sonʼnde koatio. Tokuikjoán je kjoachoya xi tjínle xi tsín mangóson, tonga tongóson sʼin tjínnele kixi koaitʼale Niná kao Cristo (Sal. 31:23). Je Jeobá koaanle sichjén je nganʼiotsjele nga tsjoánganʼiole ngatsʼi choʼndale. Je Jeobá kʼoakji tsjoále je nganʼiotsjele jokji machjénle je choʼndale, ni ya ngʼajmi koai kʼoa ni i̱ Sonʼnde koatio.

17. Jméni xi tjíokoyale je chjotale Cristo xi ya ngʼajmi koai.

¹⁷ Je chjotale Cristo xi ya ngʼajmi koai ali tokʼoajejin kui kjoachoya tjínle kʼianga tsin, jé Jeobá xosʼín kʼianga kui kjoachoya sʼele. Je chjotale Cristo xi ya ngʼajmi koai kui síkjaʼaitsjen ʼndeʼnde je kjoachoya xi tjínle, síkʼaxki kʼianga bʼétsʼoa kʼoa jemele nga sʼe̱le kjoanda jebi ya ngʼajmi. Alikui majinle jókjoan yao xi kʼoa̱, tonga kui nʼio símekon nga ya koatiokao Jeobá, Jesús,  ánkje kao xi ngikʼa chjotale Cristo xi kʼoati ya ngʼajmi koai, kʼoa nga ya koatexomakao Jesús (Filip. 3:20, 21; 1 Juan 3:2).

18. Jméni xi nʼio símekon je xi kjaʼaí barré.

¹⁸ Je xi kjaʼaí barré kui koyale nga i̱ Sonʼnde koatio ngantsjai nichxin, kʼoa toxá kui nimetokonñá ngatsʼiaa xi chjotaa (Ecl. 3:11). Kui xi mele nga jekatafaʼai nichxin nga tsjoánganʼio nga ʼndenaxó koa̱n i̱ Sonʼnde, nga kʼoenda ndʼiale, nga kʼoentje tsojmi kao naxó, kʼoa alikui tijme chʼin sʼe̱nile je kʼoa kao xtile (Is. 65:21-23). Nʼio mele nga nkjín ʼnde skoe̱xkon, nga skoe̱ nindo, skoe̱ jñájchá, skoe̱ ndáchikon kʼoa nga skótʼayason jmeni xi kisinda je Jeobá. Tonga je xi ngisa tsjoa batío kon, kuinga sa miyo sa miyo koa̱n kao Jeobá nga nyaon nyaon.

19. Jméni xi nʼia kʼianga faʼaitsjenya je Kjoabiyale Cristo, kʼoa kʼiáni kjoaʼaítsjenya nó jebi.

¹⁹ Nʼio naskánatjín je kjoachoya xi tsjoále Jeobá nga jngó jngó choʼndale xi jekitsjoatʼale yaole (Jer. 29:11). Ngatsʼiaa xi chjotale Cristo maa nʼio chjí ʼyatokoán kʼianga faʼaitsjenya je Kjoabiyale Cristo, nga̱ kʼoasʼin chʼasjengʼañá je Niná kao Cristo tʼatsʼe jmeni xi kisʼin nga koa̱n kuiyoaa ngantsjai nichxin. Kʼianga faʼaitsjenya je Kjoabiyale Cristo kuisa xi ngisa nʼio chjí ʼyaa kʼianga xki̱ nó xki̱ nó ñá xi chjotale Cristo maa. Kʼianga nó 2021 kʼiaa kjoaʼaítsjenya je Kjoabiyale Cristo nga xoto 27 sá marzo kʼianga jeska̱ntjai Tsʼuí. Nó jebi, nʼio nkjín ʼnde jñani choa ñʼai koa̱nle je ndsʼee nga sikjaʼaitsjenya je Kjoabiyale Cristo, tjínjinkʼa xi tojo koai ninga chjota batiochjoale, kʼoa tjínjinkʼa xi tojo sikjaʼaitsjenya ninga ndoyá tjíoʼya. Skoee je Jeobá, Jesús, ánkje kʼoa kao chjotale Cristo xi jeya ngʼajmi tjío kʼianga si̱kjaʼaitsjenyá ngatsʼiaa je Kjoabiyale Cristo, ninga nkjín koa̱nñá nga kuiyojtían kʼoa ninga tojngo koanñá.