Je Harvey jan koanni xtindsʼe̱, kʼoa jé xi ngisa majchínga. Je familiale yaa tsabeni xi tʼatsʼe Jeobá jñani Midland Junction ʼmi tsakai, ʼnde xi tíjna ya Australia Occidental, kʼoa ñʼai koanchon tao̱n nga jejaʼato nó 1930. Je Harvey nʼio tsjoake koan je Jeobá kʼoa kʼiaa kisʼenngindá nga 14 nóle. Xijekoanni, koanjinle nga tsín ndatjín kʼianga tsín nitjosoán je xá xi bʼainá jinnaxinandále Niná. Ñandia kʼianga sʼa xti, kʼoatsakʼinle nga katabʼéxkia ya jinjtín Xo̱n xi Bájinkonná, tonga koankaile nga̱ kʼoasʼin kisikjaʼaitsjen nga tsín koa̱nle nda kʼoexkia. Je ndsʼee xi tsakjákao Harvey i kitsole: “I̱ jinnaxinandále Jeobá kʼianga ʼya xi kʼoatsoli nga jme xi sʼiain, kui kʼoatsoni nga̱ bele kon nga koa̱nli kʼoasʼiain” (2 Cor. 3:5).

Yaa tsaʼyanijin Énle Niná ya Inglaterra kao ndichja xi majchínga kʼoa kao mana. Skan kiskotʼaya je pana, nga̱ tsín kisasenle nga títjon. Ninga koankaile, kʼiaa kisʼe̱nngindá nga ñajan nóna. Kui xi koanmena nga precursora koa̱n kʼoa xi jekoa̱n nga misionera koa̱n. ʼBeña nga kʼia saʼnda tsjoáʼndena je nʼaina nga kuichona 21 nó nga precursora koa̱n. Tonga tsín koanmena nga kʼoasikji tse  kiskoya. Kʼianga 16 nóna kisijéʼndele je nʼaina nga ya kjuía ya Australia jñani tíjna je ndichja xi majchínga. Kʼoa kʼiaa precursora koan nga kichona 18 nó.

Yaa Australia tsaʼbexkoan je Harvey. Kui xi koanmenajin nga joaijin nga misionero koai̱njin. Kʼiaa chixainjin nga nó 1951. Kʼianga jejao nó nga precursor sʼin tinixáijin, kʼoatsakʼinnajin nga viajante koai̱njin. Nʼio nkjín mani je ʼnde xi tsʼakaonajin ya Australia Occidental, me tokjitʼa nga nʼio kjin tsangínjin kʼoa me to ʼndekixí chon.

Kʼianga nó 1954, kʼiaa kʼoatsakʼinnajin nga koanngínjin Skuela xi tsʼe Galaad, xi mani 25. Jekʼoasʼin kinikjaʼaitsjainjin nga jeme misionero koai̱njin. Barco kichokoaijin nga kichuijin ya Nueva York kʼoa nʼio nda kichotʼayajinjin je Biblia. Kʼianga kichotʼayaijin ya Skuela xi tsʼe Galaad kʼoati tjínnele koannajin kastía. Je Harvey ñʼai koanle nga kinchja̱ je én xi erre faʼaijin.

Je xi kitsoyanajin kʼoakitsonajin nga kʼoati koa̱n én japonés sa̱kóyale tsa ʼya xi mele nga ya Japón koaitsjoánganʼio. Alikui tsakʼetʼaxuinjin yaonajin, nga̱ kui xi koanmenajin nga je naxinandále Jeobá kʼoakuitsonajin jñani koanngínkʼainganʼiuijin. Kʼianga kisʼejinle je ndsʼee Albert Schroeder, je xi kitsoyanajin ya Galaad, i kitsonajin: “Tikjaʼaitsjenlasao”. Kʼianga tsabele kon nga to jao tjínnajin, i kitsonajin: “Jetsakʼetʼaxo̱nlaijin. Chótʼayakaolao je én japonés”. Ngisaa choa ñʼai koanle je Harvey nga én japonés kiskotʼaya.

Kʼiaa kichuijin Japón nga nó 1955. Nga kʼia, to 500 mani xi tsoyason ya naxinandá jebi. 26 nóle Harvey nga kʼia kʼoa an 24 nóna. Yaa naxinandá Kobe kinikasénnajin, ño nó nga ya tsakiyuijin. Nʼio tsjoa kisatio tokuinjin nga kʼoatsakʼinnajin nga viajante koa̱n ijngokʼaijin ya chrian naxinandá jña Nagoya ʼmi. Nʼio tsjoa kisatio tokuinjin nga ya Japón tsakiyuijin, kisasennajin josʼín je ndsʼee, jme xi bichiñá kʼoa jochon. Tonga tsakakó ijngokʼaijin nga tiyondaijin nga si̱tjosuinjin jmeni xi kuitsonajin je Jeobá kʼianga xin ʼnde kinikasén ijngokʼanajin.

Kʼianga jejan nó nga viajante sʼin tinixáijin, je sucursal xi tíjna ya Japón  kʼoakitsonajin tsa koa̱n nga ya Taiwán koanngínkʼainganʼiuijin nga kʼuínyalaijin je chjota xi én ami nchja̱. Tjínkʼa je ndsʼee xi én ami nchja̱ xi yátsʼi̱n tsakinyále Niná, kʼoa je sucursal xi tíjna ya Taiwán koanmele nga jngo ndsʼee xi én japonés nchja̱ koaikasenkao je ndsʼee jebi. * Ñʼai koannajin nga kʼoatsakʼinnajin nga̱ nʼio nda tsakiyuijin ya Japón. Tonga je Harvey alikʼia nga tsín kisitjoson jmeni xi kitsole je naxinandále Niná, kʼoa kuinga tsangínnijin.

Kʼianga kichuijin ya Taiwán nga sá noviembre nó 1962, nga kʼia 2,271 mani xi tsoyason. Me tongatsʼi nga én ami nchja̱. Sa én chino kichotʼayangáijin, tojngoo libro kisʼejnanajin kʼoa je xi kitsoyanajin alikui male inglés. Ninga kʼoalani, koannajin je én chino.

Kʼianga to chriankʼia kichuijin ya Taiwán, je Harvey kʼoatsakʼinle nga ya sucursal sixá. Nga to ʼndí kji je sucursal koan ya kisíxá kʼoa kʼianga xki̱ sá nkjín xomana kitsoyason kao je ndsʼee xi én ami nchja̱. Sakʼoaa superintendente xi tsʼe distrito sʼin kisixá, kʼoa kitsjoaa kjoanokjoaya nga kisatio kjoajtíntse. Koanjin nga én japonés kitsjoa kjoanokjoayale kʼoa koanjinjinle je ndsʼee xi én ami nchja̱, tonga je chjotaxá kʼoakitso nga to én chino tjínnele koa̱nchjén nga sa̱kóya je Énle Niná. Én chino kitsjoa kjoanokjoayale je Harvey ninga kje nanda majinle, kʼoa ijngo ndsʼee xi én ami kisikʼatoya.

Ya naxinandá Taiwán, nga kui nichxin alikui ʼya xi toxkia kitjoʼndele nga tsakatiojtín. Tjínnele kisijékjoa je ndsʼee nga tsakatío kjoajtíntse. Alikui tokjoan tsjoáʼnde je chjotaxá kʼoa tsee kʼoatsoni tsa tsjoáʼnde kʼoa tsa mai. Tsa tojo kje bʼaiʼndejinle nga jebichó xomana nga sʼe̱jna kjoajtíntse, je Harvey yaa ndʼiabasen fi kʼoa yaa bʼejna saʼnda nga bʼaiʼndele. Soa male je policía nga jngo chjota xi xin ʼndele bichókoya ya ndʼiabasen, kʼoa kʼoasʼin tjoʼndeninajin.

Kʼianga mangínkʼinyasuinjin kao je ndsʼee, sakʼoa tsʼato jngo hora mangínmijuinjin nindo kʼoa bitjatojinníjin xo̱ngá. Faʼaitsjenna nga tokʼia kimijon títjoan jngo nindo. Tongotjo tsakichinijin nga tanjioya kʼoa jngo carro kichjoaijin nga las cinco y media nga tanjioya xi ya kikaonajin jngo ʼnde xi kjin tíjna, jngo xo̱ngá kitjatojinjin kʼoa kʼiaa tsangínmijuinjin nindo. Nʼio tjenmijon je nindo xi tsangínmijuinjin.

Nga kui nichxin, je Harvey yaa ñatjen kitsoyason kao je ndsʼee xi ya tsʼe, kʼoa an yaa kixinyasoan jngo ʼnde jñani én japonés nchja̱ chjota. Jelikui tikichokjoanina nga kichoka la una, nga̱ jenkjín hora jaʼato nga tsín tsakje̱n. Kʼianga jekisatejinjin xíngijin kao Harvey to jekini je ndsʼee xi ngikʼa. Jan chjao tsakʼaile Harvey nga revista kitsjoa, kʼoakitsona nga skoxʼákjále chjao kʼoa nga kʼoexo̱ngile. Alikui nanda kitso tokoan, tonga jao chjao kiskine̱, nga̱ likuijin kʼoakoa̱nle  Harvey nga je kʼoangʼana tsa yalani koa̱nʼinda.

Kʼoeyanajmílano jokoan ñandia nga kisʼejna kjoajtíntse. Yaa tsakiyonijin ndʼiale jngo ndsʼee xi ya chrian tíjna ya Ndʼia jña chotʼayá. Je chjota xi én ami nchja̱ nʼio chjí bekon kʼianga bindoyaa. Je chjoónle superintendente xi tsʼe circuito to jetjíandale nandá xi kuindóyanijin. Kʼoa nga tsín ale je Harvey kʼoakitsona nga an títjon koangoya. Je tichjaa jngo xjoa̱ tjíale ndányʼán kʼoa ijngo xjoa̱ xi ndásje tjíale, kʼoa jngo niso kitsjoanajin. Tokʼoakoanna nga ya tsakatío nditsin, nga̱ yaa matsenni jña tjío je ndsʼee ya Ndʼia jña chotʼayá. Kʼoakixinle nga jngo najño katatsjoána xi kjoenchjoa, tonga tojngoo xo̱n plástico xi matsenya kitsjoana. Koanmena nga ya kjájtonndʼia kikangoya tsakai, tonga nʼio tsʼen pato xi ya tjío. I kixian: “Alikuila kui kuenta sʼin je ndsʼee nga tibangoya, alikuijin ndasʼin sikjaʼaitsjen tsa tsín koangoya, kʼoa kuinga tsakangoyaña”.

Je Harvey koanjinle nga ñʼai koanle je ndsʼee xi én ami nchja̱ nga nʼio kisatio kjoamakjainle, nga̱ nʼio nkjín xi tsín male bʼéxkia. Alikui jme xo̱n xi Énle Niná yʼangini kisʼeyole nga kui én. To chriankʼiaa tsaʼyale josʼin chji én ami, kʼoa tsakʼinyalaijin je ndsʼee nga katamale katabʼéxkia nga énle. Nʼio tse xá kisʼenajin. Nga jeki nichxin chaan koanle toje kiskotʼaya. Kʼianga jejaʼato nó 1960, kʼiaa kitjo je xo̱n xi Énle Niná yʼangini nga én ami. Kʼoa kʼiaa nga nó 1968 kitjo je Xo̱n xi Bájinkonná.

Tonga je chjotaxá alikui kitsjoaʼnde nga kui xo̱n kʼoabíson xi kjaʼaí én faʼaitʼa, tokʼiakjoán tsa én chino faʼaitʼa. Kʼianga tsín jme kjoa sʼe̱, kjaʼaí kjaʼaísʼin kitjo je Xo̱n xi Bájinkonná. Tobʼelañá, tsʼato ñanó nga jao én jaʼaitʼa, nga én chino kao én ami. Alijme kjoa kisʼe nga̱ kʼoasʼin koantsen nga én chino tiʼmiyalaijin je chjota. Saʼnda nga kʼia, je naxinandále Jeobá bʼasjee je xo̱n xi Énle Niná yʼangini nga én ami nga binyakao je chjota nga majinle jmeni xi tso Biblia (Hech. 10:34, 35).

Nʼio nkjín nó nga je ndsʼee xi én ami nchja̱ tsín kʼoasʼin kikao yaole josʼin mele Niná. Nga tsín nʼio nda koanjinle jotso Biblia, tjínkʼa xi kisichajngi, xi cháchʼi̱ koan kʼoa xi na̱jno̱ kisken. Je Harvey nkjín jtín kisíxatʼa nga tsakasenkao je ndsʼee nga koanjinle jósʼin bekon Jeobá jmeni xi tjíosʼín. Kʼianga timanixatʼaijin je jtín xi ya tjío, kʼiaa kʼoakoan jmeni xi jenása kabʼeyanajmía nga títjon.

Je ndsʼee xi nangitokon koan kisikʼantjaiya yaole, tonga nʼio nkjín xi tsín kʼoakisʼin. Ya Taiwán, tsʼato 2,450 mani tsakai xi tsoyason, tonga nga 20 nó jejaʼato, jeto 900 koanni. Nʼio ba koannajin nga kʼoakoan, tonga kʼoati ʼyaijin nga tsínkʼia sichikontʼain Jeobá je xi tsín tsje koaikao yaole (2 Cor. 7:1). Nga jeki nichxin alikui tikui xi chʼaotjín kʼoakisʼinni je ndsʼee. Tísíchikontʼain Jeobá je ndsʼee xi ya tsʼe, nga̱ ndʼaibi jetsʼato 11,000 mani je xi tsoyason ya naxinandá Taiwán.

Nga jejaʼato nó 1980, sa nda sa nda kisixále Niná je ndsʼee xi én ami nchja̱. Je Harvey kʼiaa ngisa kisikʼayale nichxin je chjota xi én chino male. Nʼio nkjín xʼinle tichjaa tsakasenkao nga testigole Jeobá koan. Faʼaitsjenna nga nʼio tsjoa kisʼe kon je Harvey kʼianga tokʼia tsakʼétsʼoa títjonle Jeobá je xi kitsoyale. Kʼoati nʼio tsjoa tjín tokoan nga̱ nʼio nkjín chjota tsakasenkoa nga kisichriantʼale je Jeobá. Nʼio tsjoa kisʼe tokoan nga ya ñatjen kinixáijin ya sucursal xi tíjna Taiwán kao tile kʼoa kao tsotile je chjota xi kixinyale Biblia.

Jekʼien xʼinna. Tsʼato 59 nó tsakiyokoaijin xíngijin, cáncer kisʼele je Harvey kʼoa kʼiaa kʼien nga 1 sá enero nó 2010. Me 60 nó nga to xále Niná kisʼin. Nʼio faʼaitsjenna Harvey. Tonga nʼio tsjoa tjín tokoan nga̱ jao naxinandá tjínni jñani tokʼia tíʼmiyale chjota je Énle Niná nga kichuijin. Jao én koannajin xi nokjoa ya Asia, kʼoa je Harvey koanle kiski én jebi.

Ñola nó koanskanni nga jekʼien Harvey, je Cuerpo Gobernante kʼoakitsona nga tosa nda nga ya kjuí ijngokʼa ya Australia nga̱ jejchínga. Nga tokʼia, i kixian: “Mena nga tosi tonda i̱ Taiwán koatejna”. Tonga je Harvey kui kitsoyana nga tsín ma mai ʼmilee je naxinandále Jeobá. Kuinga i̱ Australia kinroa ijngokʼaña, kʼoa skanni koanjinna nga nda kisʼian nga i̱ kinroa.

Kʼianga jinle xomana yaa sucursal xi tíjna Australasia sixá, kʼoa fixinyasonña nga tífe xomana. An bandiaale je xi faʼaikotsen Betel je xi én chino kʼoa tsa én japonés nchja̱. Nʼio tsjoake̱ jme xi sʼian. Kui tikoyale nga kuicho nichxin nga kjoaʼáyanile je kʼien. Je Harvey alikʼia mai kitsole kʼianga kitsjoaxále je Jeobá kʼoa ʼbeña nga faʼaitsjenle Jeobá xi tʼatsʼe (Juan 5:28, 29).