1. Jméni xi bakóná nga tsín tinanda tsjoakeni xínkjín je chjota.

JE Biblia tongini kʼoakitso nga tsín titsjoake koa̱nni xínkjín je chjota nga jetífikjetʼa nichxin (2 Tim. 3:1, 3). Kʼoakjima nichxin xi tiyoaa ndʼaibi. Tobʼelañá, millón mani je chjota xi tsjion xínkjín, to fáotiʼnde je xi xijchá ma, kʼoa je xi xti ma kʼoaasʼin síkjaʼaitsjen nga tsín ʼya xi tsjoake. Kʼoa ningalani tojngo niʼya tjío, tjínkʼa xi tsín kuenta sʼín xínkjín. Jngo chjota xi kjoafaʼaitsjen tsjoále xi jechixan, itso: “Je xi na̱ ma, je xi xijchá ma kʼoa je xi xti ma alikui kuenta sʼín xínkjín. Ngisaa tse nichxin síkʼayale je computadora, tableta, teléfono kʼoa tsa videojuego. Kʼoa ninga tojngo ndʼia tjío, saʼnda tsín nda bexkon xínkjín”.

2, 3. 1) Tojo tso Romanos 12:10, ʼyáni xi tsjoacha koaan. 2) Jméni xi chótʼayajiaan i̱ kjoaʼmiya jebi.

² Likui mená nga kʼoati katamaa tsanda ñá tojo sʼín je chjota nga tsín tsjoake xínkjín (Rom. 12:2). Machjén nga tosi tonda tsjoacha koaan familianá kao je ndsʼee xi tjío ya jinjtín (tʼexkiai Romanos 12:10). * Jmé xi tínchja̱ni Biblia nga “katamatsjoachao xíngio” tso. Kui nchja̱ni josʼin tsjoachaa je familianá nga tjaoná xíngiaa. Machjén nga kʼoasʼin tsjoacha koaan je ndsʼee xi tjío ya jinjtín, nga̱ tojngo familia maa ngatsʼiaa. Tsa kʼoasʼin tsjoacha koaan  xíngiaa, tsjoa sa̱tío tokoán kʼianga tojngo tinixálee Jeobá (Miq. 2:12).

³ Nkjín choa̱ xi faʼaitʼa Biblia chótʼayajiaan i̱ kjoaʼmiya jebi, xi koasenkaoná nga tsjoacha koaan xíngiaa.

4. Jótso Santiago 5:11 tʼatsʼe nga nʼio tsjoakená je Jeobá.

⁴ Je Biblia tsoyaná jokjoan je Jeobá. Tobʼelañá, itso: “Jé Niná xi kjoatjaocha” (1 Juan 4:8). Kʼianga ʼyaa jebi ngisaa mená nga miyoná katamani. Tonga je Biblia kʼoati tso nga “nʼio tjao bená” je Jeobá (tʼexkiai Santiago 5:11). * Kui jebi xi bakóná nga nʼio tsjoakená je Jeobá.

5. Jósʼin bakó je Jeobá nga mamakená, kʼoa jósʼin koa̱n chjénngilee.

⁵ Kʼianga kʼoatso ya Santiago 5:11 nga nʼio tjao bená je Jeobá kʼoati kui síkʼaxki̱ nga tjínle kjoamatokon (Éx. 34:6). Jngo koya josʼin bakóniná kjoamatokon kuinga síchatʼa je jéená (Sal. 51:1). Kʼianga kjoamatokon nchja̱ni Biblia, ali tsa tokuijin xotsole nga nichatʼalee tsa ʼyani jmeni xi kasʼín. Je kjoamatokon yaa ni̱ma̱le nroajinni jngo chjota, kʼoa kui xosíkao nga binyakaoni je xi kjoañʼai tjíofaʼá. Je Biblia kʼoatso nga ngisa símekon je Jeobá nga basenkaoná tikʼoajinni josʼin símekon jngo na̱ nga basenkao je ʼndíle (Is. 49:15). Kʼianga kjoañʼai chjaʼá, basenkaoná je Jeobá nga̱ mamakená (Sal. 37:39; 1 Cor. 10:13). Koaan chjénngilee josʼín je Jeobá kʼianga si̱chatʼalee je ndsʼee kʼoa nga tsín kʼoéngijtiaa tokoán kʼiatsa jokuitsoná kʼoa tsa josikaoná (Efes. 4:32). Ngisaa machjén nga koakolee kjoamatokon kʼianga kjoa faʼatojin. Jé Jeobá chjenngilee kʼianga kui kjoatsjoacha xosíkaoná nga bakolee kjoamatokon xíngiaa, nga̱ jé Jeobá xi ngisa nda choa̱ bʼéjnaná nga bakó kjoatsjoacha (Efes. 5:1).

6. Jósʼin tsakakó je Jonatán kao David nga tjao koanle xínkjín.

⁶ Ya Biblia nkjín chjota síkʼaxki̱ xi nʼio tjao koanle xínkjín. Kataʼyala xi tʼatsʼe Jonatán kao David. Ya Biblia kʼoatso nga “je Jonatán kao David koanmiyole xínkjín, kʼoa je Jonatán ñaki kʼoasʼin koantsjoake josʼin tsjoake je yaole” (1 Sam. 18:1). Jé David kiskoejin Jeobá nga je koatexomangajaole Saúl, je nʼaile Jonatán. Je Saúl nʼio koanchi̱ni̱ke kʼoa nʼio koanjtike je David kʼoa saʼnda koanmele kisikʼien. Tonga je Jonatán alikui ya tsakasenkao je nʼaile nga koanmele kisikʼien je David. Je Jonatán kao David kʼoasʼin tsakʼéndajin nga miyo koa̱nle xínkjín kʼoa nga kuinyakaongañá xínkjín (1 Sam. 20:42).

7. Jméni xi koan tsakʼéchjoale tsakai je Jonatán kao David nga miyo kjao.

⁷ Xi tokʼoamaná kuinga nkjín koya tjínni xi koan tsakʼéchjoale nga miyo kjao tsakai je Jonatán kao David. Tobʼelañá, je Jonatán kantela nó ngisa jchínga tikʼoajinni je David. Koanjin kʼoasʼin kisikjaʼaitsjen je Jonatán nga sʼa nʼio xti je David kʼoa nga sʼa choa kjoafaʼaitsjen tjínle. Tonga alikui kʼoasʼin kisikjaʼaitsjen, tosaa nʼio tsabexkón je David.

8. Jósingái ji, ánni nga nʼio miyo koannile Jonatán je David.

⁸ Ningalani tile Saúl koan je Jonatán, alikui koanchi̱ni̱ke je David kʼoa alikui kʼoakitso nga je tjínle ʼnde nga rey koa̱n nga koa̱nskanni (1 Sam. 20:31). ʼNdele nga kʼoakisʼin, je Jonatán tosaa nangitokon koan kʼoa kixi kitʼale je Jeobá. Kitsjoanganʼiole je David nga je kiskoejin Jeobá nga rey koa̱n. Kʼoati kixi kitʼale je David ninga nʼio koanjtile je Saúl (1 Sam. 20:32-34).

9. Ánni kʼoabixónñá nga tsín koanchi̱ni̱ke Jonatán je David.

⁹ Je Jonatán tjao koanle je David, kuinga tsín koanchi̱ni̱keni. Je Jonatán nʼio nda koanle tsakasén flecha kʼoa nʼiojin koan nga ki kjoajchán. Je chjota kʼoakitso nga je Jonatán kao nʼaile yaa koanngóson joni je ja̱ jokji xítíya kʼoa yaa koanngóson joni je xa jokji taja koan (2 Sam. 1:22, 23). Koanjin kui tsakʼasjengʼani yaole jokji nkjín kʼa kinjele kjoajchán. Tonga alikui kʼoasʼin kisikjaʼaitsjen nga ngisa tse jmeni xi kisʼin je, kʼoa alikui koanchi̱ni̱ke jmeni xi kisʼin je David. Tosaa nʼio chjí tsabekon nga nʼiojin koan kʼoa nga je Jeobá kisinʼiotʼa. Tobʼelañá, je Jonatán kʼiaa tjao koanle je David kʼianga jekisikʼien je Goliat. Jósʼiaan nga kʼoatisʼin tjaocha koaan je ndsʼee tojo kisʼin je Jonatán.

10. Jmé xi tsoyanile kʼianga “nʼio nda katamatsjoachao xíngio kao ni̱ma̱no” tso je Biblia.

¹⁰ Je Biblia itso: “Nʼio nda katamatsjoachao xíngio kao ni̱ma̱no” (1 Ped. 1:22). Je Jeobá nʼio nda choa̱ bʼéjnaná. Nʼio tsjoakená, kʼoa tsa tosi tonda kixi kjuintʼalee tsjoake koa̱nná ngantsjai (Rom. 8:38, 39). Kʼianga én griego je xi “nʼio nda katamatsjoachao xíngio” sʼin jaʼatoya, kui nchja̱ni nga tjínnele kʼoénelee yaoná nga koakoá kjoatsjoacha. Tonga sakʼoaa ñʼai maná nga tsjoacha maa je ndsʼee. Je Biblia kʼoatsoná jmeni xi tjínnele sʼiaan nga ʼya xi síjtiná. Itso: “Tikjaínlao xíngio nga tjaochao. Tixítíyalao yaono nga tojngo tiyokjao nga nyʼán tiyo, nga je Espíritu Santo tsakʼékjaono” (Efes. 4:1-3). Tsa mená nga nda kjuinkoaa je ndsʼee, alikui koa̱n kui chótsenlee jñani saténgi, tosa kʼoasʼin  jchatokoán josʼin bekon je Jeobá (1 Sam. 16:7; Sal. 130:3).

11. Ánni nga sakʼoa ñʼai maniná nga tsjoacha maa je ndsʼee.

¹¹ Alikui choa ñʼai maná nga tsjoacha maa je ndsʼee, ngisaa tsakui kuenta nʼia jñani saténgi. Kʼoakoan nga siglo 1. Tobʼelañá, je Evodia kao Síntique nʼio nda kitsoyason je Énle Niná kʼianga ya ñatjen tsakʼema kao Pablo. Tonga ñʼai koanle nga nda kikao xínkjín. Kuinga kʼoakitsonile je Pablo nga tongóson sʼin katasíkjaʼaitsjen josʼin mele Cristo (Filip. 4:2, 3).

12. Jméni xi machjén nga sʼiaan nga tsjoacha koaan je ndsʼee.

¹² Jméni xi koasenkaoná nga tsjoacha koaan je ndsʼee. Xi koasenkaoná kuinga ngisasa nda jchaxkoaan. Ngisaa choa ñʼai koa̱nná nga koa̱njinná jotjío kon kʼoa kʼoaasʼin tsjoacha koa̱nñá. Koaan miyo cho̱bá kao je ndsʼee xi jejchínga, xi sʼa xti kao xi xin tsʼe. Si̱kjaʼaitsjeen nga miyo tsakjáo je Jonatán kao David ninga ngisa jchínga je Jonatán. A tjío ya jinjtín je ndsʼee xi jengisa jchínga kʼoa tsa ngisa xti tikʼoajinni ñá xi koa̱n miyo chobá. Tsa kʼoasʼiaan, kʼoasʼin koakoñá nga tsjoachaa ngatsʼi je ndsʼee (1 Ped. 2:17).

13. Ánni nga tokʼani je ndsʼee xi ngisa tsjentʼalee.

¹³ Kʼianga tsjoacha koaan je ndsʼee, a kui xi tsonile nga nʼio miyoná koa̱nni ngatsʼi. Alikuijin kʼoakoa̱n tsa tongatsʼi ndsʼee nga nʼio miyoná koa̱nni. Tokʼaa ndsʼee xi ngisa nʼio tsjentʼalee, nga̱ tsín tongatsʼi nga mangósoán. Tobʼelañá, je Jesús miyole koanni ngatsʼi je pastro, tonga jé Juan xi ngisa tsjoake koan (Juan 13:23; 15:15; 20:2). Ninga kʼoalani, alikui ngisa nda tsabekon je Juan tikʼoajinni xi ngikʼa. Tobʼelañá, kʼianga kʼoakitso je Juan kao ndsʼe̱ Santiago tsa koa̱n ya koatiotʼale nga jekoatexoma, je Jesús i kitsole: “Tonga xi kuiyotʼanáo ngakixina kao ngʼaskónna, ali anjian xi tsjoale” (Mar. 10:35-40). Chjénngilee jokisʼin je Jesús, alikui toje nda si̱koaa je xi nʼio miyoná mani (Sant. 2:3, 4). Xkoa̱ya sʼin biyoaa kʼianga tokʼa xi nda nikoaa. Tsa  kʼoasʼiaan, alikuijin nda kuiyoaa kao je ndsʼee ya jinjtín (Jud. 17-19).

14. Tojo tso Filipenses 2:3, jméni xi koasenkaoná nga tsín ngisa ngʼa chʼa̱sjee yaoná tikʼoajinni je ndsʼee.

¹⁴ Kʼiatsa tsjoacha koaan je ndsʼee alikuijin ngisa ngʼa chʼa̱sjee yaoná. Si̱kjaʼaitsjeen nga je Jonatán alikui koanchi̱ni̱ke je David kʼoa alikui koanmele nga je tsakatéxomangajaole. Chjénngiaa je choa̱le kʼoa alikui koa̱nchi̱ni̱chaa je ndsʼee ninga ngisa nkjín koya xi male sʼín. Tosa kʼoasʼiaan jokitso Pablo, nga kitso: “Tosa kjoayo̱ma̱ kjiatakon nga chósonnilao nga xikʼa ngisa nda male kjoa xi tjín kaoni tsa jon” (tʼexkiai Filipenses 2:3). * Si̱kjaʼaitsjeen nga bʼainganʼioá ngatsʼiaa ya jinjtín. Tsa nangitokon maa, kuijin ngisa kuenta sʼiaan jñani nda sʼín je ndsʼee kʼoa koasenkaoná nga nda choa̱ batío (1 Cor. 12:21-25).

15. Jmé xi bakóyali jokoan je Tanya kao xtile.

¹⁵ Kʼianga ñʼai tjín kjoa bitjatojiaan, kʼoasʼin tsjoánganʼioniná je Jeobá kʼianga binyakaoná je ndsʼee kʼoa nga bakóná kjoatsjoacha. Kataʼyala jokoan jngo tichjaa kʼianga jejetʼa kjoajtíntse xi kisʼejna nga xoto, je kjoajtíntse xi “Je kjoatjaocha nikʼiajin fetʼa” tsakʼin, xi kisʼejna nga nó 2019 ya Estados Unidos. Je Tanya jan mani je xtile, kʼoatso nga jngo carro tsakʼétʼale je carrole kʼianga to jetjíofini ya hotel jñani tsakationi. Je tichjaa itso: “Aliʼya xi kitsiʼaon, tonga tsín titsaʼyanijin jokinʼiaijin, toyaasa tsakinyayaijin yandiaa. Kʼiaa tsaʼyaijin jngo ndsʼee xi tísíkʼatjinajin  ntsja xi kʼoati ya ki kjoajtíntse, kʼoa kʼoakitsonajin nga ya koanngínchonlaijin jñani tíjna carrole. Kʼoati nkjínsa ndsʼee tsakinya xi kʼoati ya ki je kjoajtíntse xi kisʼejna, jolani je ndsʼee xi Suecia tsʼe. Je tichjaa xi ya tjío kitsoakjánajin kao tsotiʼndína. Nʼio kitsjoanganʼionajin nga kʼoakisʼin. Ninga kʼoatsakʼinlaijin nga tsín jme xi koannajin, yaa tsakatiokaonajin. Tojo yaa tjío nga kicho je chjinexki. Tsakinyakaonajin nga tsín jme xi ñʼai koa̱nnajin. Nga kui nichxin tsaʼyaníjin je kjoatsjoachale Jeobá. Nga kui kjoa kitjatojinjin, ngisaa tsjoacha koainjin je ndsʼee, ngisaa tsjoacha koainjin je Jeobá kʼoa ngisaa tsakʼailaijin kjoanda”. A faʼaitsjenli josʼin tsakasenkaoli jngo ndsʼee kʼianga nganʼio koanchjénli.

16. Ánni tjínnenile koakoá nga tsjoachaa xíngiaa.

¹⁶ Jósʼin kuichomani tsa koakolee kjoatsjoacha xíngiaa. Si̱nʼiojinjián je ndsʼee kʼianga kjoa tjíofaʼatojin kʼoa jtínjin sʼin kuiyoaa nga naxinandále Niná maa. Xi ijngosani, kʼoaasʼin koakoñá nga chjotale Cristo maa, kʼoa kui xosikao je chjota nga koa̱nmele je Jeobá sixále. Tonga xi ngisa chjíle kuinga je Jeobá chʼa̱sjejeyaa, “je Nʼai xi tsʼe kjoamatakon, kʼoa Niná xi tsʼe ngayije kjoanijetakon” (2 Cor. 1:3). Kui xi mená ngatsʼiaa nga tosi tonda koakoá nga tsjoachaa xíngiaa.