KJOAʼMIYA XI CHOTʼAYA 4
Ánni mangínsíñá nga faʼaitsjenya Kjoabiyale Cristo
“Kʼoatʼiaon kuibi jméni nga nda kʼoéjintakonsínináo” (LUC. 22:19).
KJOAJNDA 20 Kinikasénní je ʼNdíli xi tsjoachai
XI TÍNCHJA̱NI *
1, 2. 1) Kʼiáni nga nʼio faʼaitsjenná jngo xíngiaa xi jekʼien. 2) Jméni xi kitso Jesús jngo nitje̱n tongini nga kjesa nikʼienjin.
KʼIANGA jngo xíngiaa biya faʼaitsjenná ninga jenkjín nó faʼato. Kʼoa ngisaa faʼaitsjenná nga xki̱ nó josʼin nga kʼien.
2 Nga xki̱ nó, millón mañá xi biyojtián jngo tjíjtsa Sonʼnde nga nikjaʼaitsjenyá Kjoabiyale Cristo (1 Ped. 1:8). Kuinga nikjaʼaitsjenyañá Kjoabiyale Cristo nga̱ jé kitsjoantjainá kjoabijnachonle nga ndái kuiyolee je jée kao kjoabiya (Mat. 20:28). Je Jesús kui xi koanmele nga katasíkjaʼaitsjenya je chjotatjenngile. Jngo nitje̱n tongini nga kjesa nikʼienjin, tsakjenkao je chjotatjenngile kʼoa i kitsole: “Kʼoatʼiaon kuibi jméni nga nda kʼoéjintakonsínináo” (Luc. 22:19).
3. Jmé xi chótʼayajiaan i̱ kjoaʼmiya jebi.
3 Millón chjota batiojtín nga síkjaʼaitsjenya je Kjoabiyale Cristo, tonga to choaa mani xi ya tjínle kjoachoya ya ngʼajmi, me tongatsʼi nga i̱ tjínle kjoachoya i̱ Sonʼnde. I̱ kjoaʼmiya jebi kui chótʼayajiaan ánni nga nikjaʼaitsjenyasíñá Kjoabiyale Cristo ni i̱ tjínná kjoachoya i̱ Sonʼnde kʼoa ni ya ngʼajmi. Kʼoati chótʼayajiaan josʼin basenkaoná nga biyojtián nga kui nichxin. Kui títjon jchaa ánni nga síkjaʼaitsjenyani Kjoabiyale Cristo je chjota xi ya ngʼajmi tjínle kjoachoya.
ÁNNI SÍKJAʼAITSJENYANI KJOABIYALE CRISTO JE CHJOTALE XI YA NGʼAJMI KOAI
4. Ánni nga ʼbini je vino kʼoa kjenni je nioxtila je chjotale Cristo xi ya ngʼajmi tjínle kjoachoya nga faʼaitsjenya Kjoabiyale Cristo.
4 Jngo koya anni nga síkjaʼaitsjenyani Kjoabiyale Cristo je chjotale xi ya ngʼajmi koai kuinga ʼbi je vino kʼoa kjen je nioxtila. Ánni kʼoasʼínni. Si̱kjaʼaitsjenla jokisʼin je Jesús nga tsakjenkao chjotatjenngile, kʼianga jetsakʼéjna je sʼuí Paxko kʼiaa tsakʼéjna je xi Kjoabichile Nainá sʼin ʼyale. Kisikʼatole je nioxtila kao vino je xi 11 chjotatjenngile kʼoa kʼoakitsole nga kataʼbi kʼoa nga katakjen. Jao koya tjínni xi tsakʼéndajinkao chjotatjenngile, je kjoa xi kisʼendajin chjotse kao kjoa xi kisʼendajin xi tʼatsʼe Chjotaxále Niná (Luc. 22:19, 20, 28-30). * Nga kʼoakisʼin Jesús, kʼiaa saʼnda kitjoʼndenile je pastrole kao xi ngikʼa chjotale Cristo xi ya tjínle kjoachoya ya ngʼajmi nga rey kʼoa naʼmi koa̱n (Apoc. 5:10; 14:1). Je chjotale Cristo xi ya ngʼajmi koai, yaa tjíojin je kjoasʼendajin xi kitso Jesús kʼoa tojé xi ma ʼbi je vino kʼoa kjen je nioxtila.
5. Jméni xi be je chjotale Cristo xi ya ngʼajmi koai tʼatsʼe kjoachoya xi tjínle.
5 Ijngo koya anni nga síkjaʼaitsjenyani Kjoabiyale Cristo je chjotale xi ya ngʼajmi koai kuinga kui síkjaʼaitsjenjin je kjoachoya xi tjínle. Je xi ya ngʼajmi koai kui kjoanda tsjoále Jeobá nga tsín tikʼia kuiyáni. Yaa koatexomakao Jesús je xi 144,000 mani kʼoa yaa kuinya ngixko̱n Jeobá (1 Cor. 15:51-53; 1 Juan 3:2). Je chjotale Cristo xi ya ngʼajmi koai be nga kui kjoanda kʼoaile. Tonga nga koa̱n ya ngʼajmi koai tjínnele kixi koaitʼale Niná josaʼnda nga kuiyá (2 Tim. 4:7, 8). Nʼio tsjoa satío kon nga kui síkjaʼaitsjenjin je kjoachoya xi tjínle (Tito 2:13). Kʼoa ánni fini nga faʼaitsjenya Kjoabiyale Cristo je xi “kjaʼaí barré” ʼmile, xi tsonile, je chjotale Cristo xi i̱ Sonʼnde tjínle kjoachoya (Juan 10:16). Kataʼyala.
ÁNNI FINI NGA FAʼAITSJENYA KJOABIYALE CRISTO JE XI KJAʼAÍ BARRÉ ʼMILE
6. Ánni fini nga xki̱ nó nga faʼaitsjenya je Kjoabiyale Cristo je xi kjaʼaí barré ʼmile.
6 Je xi kjaʼaí barré ʼmile fi nga faʼaitsjenya je Kjoabiyale Cristo, tonga alikui ʼbi je vino kʼoa tsín kjen je nioxtila. Kʼianga kʼoatsakʼin títjonle je chjotale Cristo xi i̱ tjínle kjoachoya i̱ Sonʼnde nga koai nga kjoaʼaítsjenya Kjoabiyale Cristo kʼiaa nga nó 1938. Je revista xi tsʼe sá abril nó 1938 xi tsʼe La Torre del Vigía kʼoakitso nga koa̱n koai nga faʼaitsjenya Kjoabiyale Cristo je xi kjaʼaí barré ʼmile ánni nga skoe̱ni josʼin faʼaitsjenya. Kʼoati kitsosa revista jebi nga kʼoati tsjoa satío kon tsanda je nga kui nichxin. Tojo ma jña tjín xi bixan nga tsjoa tjío kon je xi bichó, tikʼoasʼinni je xi kjaʼaí barré ʼmile, tsjoa satío kon nga bichó nga faʼaitsjenya Kjoabiyale Cristo.
7. Ánni nga tsjoa satíoni kon xi kjaʼaí barré ʼmile nga nrʼoé je kjoanokjoaya xi faʼa nga faʼaitsjenya Kjoabiyale Cristo.
7 Je xi kjaʼaí barré ʼmile kʼoati síkjaʼaitsjenjin je kjoachoya xi tjínle. Nrʼoé je kjoanokjoaya xi faʼa nga̱ kui ngisa nchja̱ni josʼin koatio chjota xi kixi koaitʼale Niná je xi jngo jmi nó koatexoma Jesús kao xi 144,000 mani. Je Jesús kao xi ya koatexomakao ʼndenaxó sikao Sonʼnde, kʼoa chjotatsje koa̱n ijngokʼa je chjota. Je xi bichó nga faʼaitsjenya Kjoabiyale Cristo nʼiojin tsjoa satío kon nga síkjaʼaitsjenjin josʼin kuitjoson je én xi tongini kinokjoa, jolani Isaías 35:5, 6; 65:21-23 kao Apocalipsis 21:3, 4. Nga síkjaʼaitsjenjin nga skoe̱ ijngokʼani je xínkjín xi jekʼien kui xi binyakao nga tosi tonda je Niná síxále (Mat. 24:13; Gál. 6:9).
8. Ijngo koya tikʼaxki̱ anni nga fini xi kjaʼaí barré ʼmile nga faʼaitsjenya Kjoabiyale Cristo.
8 Kʼoati kuinga fini nga faʼaitsjenya Kjoabiyale Cristo xi kjaʼaí barré ʼmile nga tsjoánganʼiole kʼoa tsjoake je chjotale Cristo xi ya ngʼajmi koai. Je Énle Niná tongini kʼoakitso nga jtín sʼin koatio je xi ya ngʼajmi koai kao xi i̱ Sonʼnde koatio. Kataʼyala kʼa jotso je én xi tongini kinokjoa.
9. Tojo tso Zacarías 8:23, jótjío kon je xi kjaʼaí barré ʼmile tʼatsʼe chjotale Cristo xi ya ngʼajmi koai.
9 (Tʼexkiai Zacarías 8:23). * Texto jebi kui bakóya jotjío kon je xi kjaʼaí barré ʼmile xi tʼatsʼe chjotale Cristo xi ya koai ngʼajmi. Je én xi “jngo chjota xi judío” tso jé nchja̱ni xi ya ngʼajmi koai (Rom. 2:28, 29). Je xi “te chjota xi ya jaʼaini ngayeje én xi nokjoa ngakjijnda naxinandá”, jé tínchja̱ni xi kjaʼaí barré ʼmile kʼoa tsoanʼio je najñojnrole, xi tsonile, kixi fitʼale je chjotale Cristo xi ya ngʼajmi koai nga̱ tojngo bexkón Niná. Je xi kjaʼaí barré ʼmile yaa bakóni nga jtín tjío kao chjotale Cristo xi ya ngʼajmi koai nga batiojtín nga faʼaitsjenya Kjoabiyale Cristo.
10. Jósʼin tísítjoson Jeobá je én xi tongini kinokjoa xi faʼaitʼa ya Ezequiel 37:15-19, 24, 25.
10 (Tʼexkiai Ezequiel 37:15-19, 24, 25). * Tísítjoson Jeobá je én xi tongini kinokjoa nga jtín sʼin tjíosíxá je chjotale Cristo xi ya koai ngʼajmi kao xi i̱ Sonʼnde koatio. Je én xi tongini kinokjoa jao yá síkʼaxki̱. Je xi ya koai ngʼajmi yaa mangóson je yá “xi tsʼe Judá” (yaa ntje̱ xi tsʼe Judá kitjoejin xi rey sʼin tsakatio ya naxinandá Israel). Kʼoa je xi i̱ Sonʼnde koyale koatio yaa mangóson je yá “xi tsʼe Efraín”. * Jé Jeobá sijngo nga jao yá jebi, xi tsonile, jtín sʼin sixá kʼoa jé Jesús koatexomale. Je chjotale Cristo xi ya ngʼajmi koai kao xi i̱ Sonʼnde koyale koatio alikui tsen tsen batiojtín kʼianga síkjaʼaitsjenya Kjoabiyale Cristo nga xki̱ nó, ñatjen batiojtín nga̱ je Biblia kʼoatso nga “tojngo koa̱njtín, kʼoa tojngo koa̱n xi skoʼnda” (Juan 10:16).
11. Jósʼin tjíobinyakao je chjotale Cristo xi ya ngʼajmi koai je xi “barré” ʼmile xi bʼaxki̱ ya Mateo 25:31-36, 40.
11 (Tʼexkiai Mateo 25:31-36, 40). * Je xi “barré” tsole texto jebi jé tínchja̱ni je chjota xi i̱ Sonʼnde koyale koatio kʼoa xi kʼia tjíobatio nga to jetífikjetʼa nichxin kʼoa tijéni xi kjaʼaí barré ʼmile. Kixi tjíofitʼale je chjotale Cristo xi ya ngʼajmi koai xi tjíosa i̱ Sonʼnde kʼoa tjíobinyakao nga tjíotsoyason je Énle Niná (Mat. 24:14; 28:19, 20).
12, 13. Jósasʼin tsjoánganʼiole je xi kjaʼaí barré ʼmile je chjotale Cristo xi ya ngʼajmi koai.
12 Nga xki̱ nó, jao jan xomana tongini nga kjesa faʼaitsjenyajin Kjoabiyale Cristo, je xi kjaʼaí barré ʼmile binyakao je chjotale Cristo xi ya ngʼajmi koai nga bájinkon chjota nga kʼoati katasíkjaʼaitsjenya nga kui nichxin (chótsenlai je recuadro “ A jetibijnandalai nga kjoaʼaítsjenya Kjoabiyale Cristo”). Jngo tjíjtsa Sonʼnde bationdale nga xki̱ nó nga síkjaʼaitsjenya Kjoabiyale Cristo ningalani tsín ya tjío je chjotale Cristo xi ya ngʼajmi koai ya jinjtínle. Je xi kjaʼaí barré ʼmile nʼio tsjoa satío kon nga kʼoasʼin tsjoánganʼiole je chjotale Cristo xi ya ngʼajmi koai. Majinle nga joxi jeni Jesús xi tjíobinyakao nga kʼoasʼín (Mat. 25:37-40).
13 Ánni nga mangínsíñá nga faʼaitsjenya je Kjoabiyale Cristo ni i̱ Sonʼnde tjínná kjoachoya kʼoa ni ya ngʼajmi.
ÁNNI MANGÍNÑÁ NGATSʼIAA NGA FAʼAITSJENYA KJOABIYALE CRISTO
14. Jósʼin tíbakó Jeobá kao Jesús nga nʼio tsjoakená.
14 Kuinga bʼailee kjoanda nga tsjoakená je Jeobá kao Jesús. Nkjín koya josʼin bakóná Jeobá nga tsjoakená. Kʼianga ngisa tsakakóná kjoatsjoacha kʼiaa nga kisikasén i̱ Sonʼnde je ʼNdíle nga jaʼá kjoañʼai kʼoa nga kʼienntjainá (Juan 3:16). Kʼoa nga kʼienntjainá Jesús kʼoati tsakakó nga tsjoakená (Juan 15:13). Ningalani tsín koa̱n josʼin kʼoaingajaoñá jokji kjoatsjoacha tsakakóná, tonga josʼin koanngínkoaa yaoná kʼoasʼin kʼoainilee kjoanda (Col. 3:15). Kʼianga mangián nga faʼaitsjenya Kjoabiyale Cristo kʼoasʼin bakoñá nga tsjoachaa kʼoa nga bʼailee kjoanda je Niná.
15. Ánni tsjoáni kjoanda je chjotale Cristo xi ya ngʼajmi koai kao xi i̱ Sonʼnde koatio nga tsakʼéchjíntjainá Jesús.
15 Bʼaiñá kjoanda nga tsakʼéchjíntjainá je Jesús (Mat. 20:28). Koaan koai ya ngʼajmi je chjotale Cristo xi ya tjínle kjoachoya xi totʼatsʼe nga tsakʼéchjíntjainá Jesús, kuinga nʼio chjí beni kjoanda jebi. Nga makjainle nga kʼienntjainá je Jesús, je Jeobá chjotakixi sʼin bekon kʼoa xtile tsole (Rom. 5:1; 8:15-17, 23). Je xi kjaʼaí barré ʼmile kʼoati bechjí nga kʼienntjainá Jesús, kʼoa nga makjainle xi tʼatsʼe kjoabʼechjíntjai koaan nda koatio ngixko̱n Niná, koaan je Niná sixále kʼoa koaan kjoaʼatojin tjínkon nga kjoaʼaí kjoañʼai xi nʼio tse (Apoc. 7:13-15). Je chjotale Cristo xi ya ngʼajmi koai kao xi i̱ Sonʼnde koyale koatio fi nga xki̱ nó nga faʼaitsjenya Kjoabiyale Cristo nga̱ kʼoasʼin bakóni nga tsjoá kjoanda nga tsakʼéchjíntjainá Jesús.
16. Ánni mangínñá nga faʼaitsjenya je Kjoabiyale Cristo.
16 Mená si̱tjosonlee Jesús. Ni ya ngʼajmi tjínná kjoachoya kʼoa ni i̱ Sonʼnde choyalee nga kuiyoaa, mangíntjenngiñá je kjoafaʼaitsjen xi kitsjoa Jesús josʼin tjínnele kjoaʼaítsjenya kjoabiyale. I kitso: “Kʼoatʼiaon jebi nga kjoaʼaítsjenno xi tʼatsʼan” (1 Cor. 11:23, 24).
ÁNNI BINYAKAONINÁ NGATSʼIAA NGA NIKJAʼAITSJENYÁ KJOABIYALE CRISTO
17. Ánni nga ngisa machriantʼanilee Jeobá nga mangián nga faʼaitsjenya Kjoabiyale Cristo.
17 Ngisaa machriantʼalee je Jeobá (Sant. 4:8). Tojosʼin tiʼyaa, kʼianga mangián nga faʼaitsjenya je Kjoabiyale Cristo nikjaʼaitsjenjinñá je kjoachoya xi tsjoáná Jeobá kʼoa jokji kjoatsjoacha tíbakóná (Jer. 29:11; 1 Juan 4:8-10). Tjínjngoo tokoán nga kuitjoson jmeni xi choyalee kʼoa tsínkʼia fetʼa je kjoatsjoachale. Kʼianga nikjaʼaitsjenjiaan jebi ngisaa tsjoacha maa je Jeobá kʼoa ngisaa machriantʼalee (Rom. 8:38, 39).
18. Jósʼin basenkaoná nga nikjaʼaitsjenjiaan je choa̱le Jesús.
18 Basenkaoná nga chjenngilee Jesús (1 Ped. 2:21). Jao jan nichxin tongini nga kjesa faʼaitsjenyajin Kjoabiyale Cristo bʼexkiañá je Biblia tʼatsʼe jmeni xi kisʼin Jesús nga kjesa biyajin kʼoa nga jejaʼáyanile. Je kjoanokjoaya xi faʼa nga faʼaitsjenya Kjoabiyale Cristo kui síkjaʼaitsjenjinná jokji tsjoakená je Jesús (Efes. 5:2; 1 Juan 3:16). Nga bʼexkiaa jme xi kisʼin Jesús kʼoa nga nikjaʼaitsjenjiaan basenkaoná nga mangíntjenngiaa je choa̱le (1 Juan 2:6).
19. Jméni xi sʼiaan nga tosi tonda tsjoake koa̱nná je Niná.
19 Tosi tonda tsjoake maná Niná (Jud. 20, 21). Nga bʼenelee yaoná nga nitjosonlee Niná, nga chʼasjetsjee jaʼaínle kʼoa nga fayatsjoaa ni̱ma̱le tosi tonda tsjoake maná (Prov. 27:11; Mat. 6:9; 1 Juan 5:3). Nga mangían nga faʼaitsjenya Kjoabiyale Cristo basenkaoná nga kʼoanʼia josʼin mele je Jeobá nga nyaon nyaon kʼoa kʼoasʼin bakonilee nga mená nga miyole koaan ngantsjai nichxin.
20. Ánni mangínsíñá nga faʼaitsjenya Kjoabiyale Cristo.
20 Ni ya ngʼajmi tjínná kjoachoya kʼoa ni i̱ Sonʼnde kuiyoaa mangínñá nga xki̱ nó nga faʼaitsjenya Kjoabiyale Cristo. Kʼianga kʼoasʼin biyojtián nga xki̱ nó kui kjoabiyale Cristo nikjaʼaitsjenyá, kʼoati kui nikjaʼaitsjenjiaan jokji tsjoakená Jeobá nga kitsjoantjainá je ʼNdíle. Nó jebi kʼiaa kʼoakaole nga bixine 15 sá abril nga si̱kjaʼaitsjenyá Kjoabiyale Cristo. Tsjoachañá je Jeobá kao Jesús, kuinga kui xi ngisa chjí ʼyañá nga nikjaʼaitsjenyá je Kjoabiyale Cristo nga xki̱ nó.
KJOAJNDA 16 Chʼa̱sjengʼaa Jeobá xi totʼatsʼe ʼNdíle
^ Ni ya ngʼajmi tjínná kjoachoya kʼoa ni i̱ Sonʼnde, mangínñá nga faʼaitsjenya Kjoabiyale Cristo. I̱ kjoaʼmiya jebi kui chótʼayajiaan jotso je Biblia ánni nga mangínsíñá nga kui nichxin kʼoa jósʼin basenkaoná.
^ Yaa koa̱nsjaisali xi tʼatsʼe jebi ya Xo̱n xi Bájinkonná jñani “Jon koatexomao nga naʼmi koa̱on” tso, xi tsʼe 1 sá octubre nó 2014, página 16 saʼnda 20.
^ Zacarías 8:23: “Kui jebi xi títso je Jeobá xi tsʼe chjotakjoajchán: Kʼianga kui nichxin te chjota xi ya jaʼaini ngayeje én xi nokjoa ngakjijnda naxinandá tsoa̱nʼio, tsoa̱nʼio je najñojnrole jngo chjota xi judío, kʼoa i kuitso: Menajin nga ya koanngínkaolaijin, nga̱ kinoʼyaníjin nga Niná tíjnakaono”.
^ Ezequiel 37:15-19, 24, 25: “Je Jeobá i tikitsongánina: 16 Kʼoa ji, ʼndíle chjota, jngo yá chjóai kʼoa i̱ tso xi chjítʼai: Xi tsʼe Judá kʼoa kao chjota israelita xi ya tjíokao. Ijngo yá chjóai kʼoa i̱ tso xi chjítʼai: Xi tsʼe José, je yá xi tsʼe Efraín, kʼoa kao ngatsʼi je niʼyale Israel xi ya tjíokao. 17 Xijekoa̱n, tjayokjoai nga jao ánni nga tojngo yá koa̱nsíni ya yandsai. 18 Kʼianga i̱ tso xi skónangili je naxinandáli, a tsí kʼoakʼuínnáijin josʼin tsoyanile jebi, 19 i tʼinlai, kui jebi xi títso je Jeobá xi batéxomale ngayeje: Skoéña je yále José, xi kjiantsja je Efraín, kao ntje̱le Israel xi ya tjíokao, kʼoa kjoayokjaoña kao yá xi tsʼe Judá. Tojngoo yá sikoa nga jao; tojngo yá koa̱n ya yandsa̱. 24 Jé choʼndana David xi reyle koa̱n kʼoa tojngoo koa̱n xi skóʼnda ngatsʼi. Kʼoasʼin kʼoétsoma jotso kjoatéxomana kʼoa nda sitjoson je kjoatéxomana. 25 Yaa koatio ya nangi xi an kitsjoale je choʼndana, je Jacob, jñani tsakatio je chjotajchíngano. Yaa koatio ngantsjai nichxin, je kao xtile kʼoa kao xtile xtile; kʼoa jé choʼndana David koasentítjonle ngantsjai”.
^ Yaa koa̱nsjaisali jme xi tínchja̱ni je én xi tongini kinokjoa xi tʼatsʼe nga jao yá xi bʼaxki̱ ya capítulo 37 xi tsʼe Ezequiel, ya libro La adoración pura de Jehová: ¡por fin restaurada!, página 130 saʼnda 135, párrafo 3-17.
^ Mateo 25:31-36, 40: “Kʼia nga je ʼndíle chjota kjoaʼaíkao kjoajeyale, kʼoa kao ngatsʼi ánkjele xi tsje kao je, kʼia kʼoéjnason yáxilele kjoajeyale. 32 Koa̱nxkó ngixko̱n nga je ngatsʼi naxinandá, kʼoa sikatío tʼaxin nga jngójngó kʼa, josʼín je xi koʼnda cho̱ síkatío tʼaxin barré, kʼoa tʼaxin tindso. 33 Kʼoa je sikatío barré ngakixile, kʼoa tindso ngʼaskónle. 34 Kʼia je chjotatítjon kuitsole je xi tjío ngakixile: Nroáo, jon xi Nʼaina kisichikontʼain, chjoékjoatjao je kjoatéxoma xi tíjnanda xi tʼatsaon, saʼnda nga totsʼinle kjoa. 35 Koanbaona, kʼoa kitsʼaináo xi tsakje̱n. Koanfatina, kʼoa kitsʼaináo xi tsakʼia̱. Kitsʼaiʼndenáo, nda tsa tsín tsaʼyaxkonnáo. 36 Kjijtia, kʼoa kinikʼakjánáo. Timʼe, kʼoa tsangín nikuindanáo. Tsakatejna ya ndoyá, kʼoa jinroachonnáo. 40 Kʼia je chjotatítjon kuitsole: Xi kjoakixi xi xinno, kʼia nga kʼoakinikao jngo xi je ndsʼebi xi ngisa nangi tjío, kʼoati an xi kʼoakinikaonáo”.
